Kamoo o ka Batamelago “Mokwi wa Dithapêlô”

“Batho ka moka ba tla xo Wene Mokwi wa dithapêlô.”—PSALME 65:2.

1. Ke’ng se se dirago gore batho ba fapane le dibopiwa tše dingwe tša lefase, gomme se se re nea sebaka sefe?

GO DIPHEDI ka moka tša lefase tše dikete, ke batho feela bao ba kgonago go rapela Mmopi. Ke batho feela bao ba lemogago gore ba na le dinyakwa tša moya e bile ba nago le kganyogo ya go di kgotsofatša. Se se re nea sebaka se se kgahlišago sa go ba le tswalano ya motho ka noši le Tatago rena wa legodimong.

2. Sebe se bile le mafelelo afe a bohloko tswalanong ya batho le Mmopi?

² Modimo o bopile motho a e-na le bokgoni bja go boledišana le Mmopi wa gagwe. Adama le Efa ba bopilwe ba se na sebe. Ka gona ba be ba ka boledišana le Modimo ba lokologile go fo etša ge ngwana a boledišana le tatagwe. Lega go le bjalo, ba ile ba lahlegelwa ke tokelo yeo e kgolo ka baka la sebe. Adama le Efa ba ile ba se kwe Modimo gomme ka baka leo ba lahlegelwa ke tswalano ya bona ya kgaufsi le yena. (Genesi 3:8-13, 17-24) Na seo se bolela gore ditlogolwana tša Adama di ka se sa kgona go boledišana le Modimo? Aowa, Jehofa o sa dutše a di dumelela gore di boledišane le yena, eupša ge feela di fihlelela dinyakwa tše itšego tša motheo. Dinyakwa tšeo ke dife?

Dinyakwa tša go Rapela Modimo

3. Batho bao ba abetšego sebe ba swanetše go rapela Modimo bjang, gona ke mohlala ofe o bontšhago se?

³ Tiragalo yeo e akaretšago barwa ba babedi ba Adama e re thuša go bona seo Modimo a se nyakago go motho yo a sa phethagalago yoo a nyakago go Mo rapela. Kaine le Abele ba ile ba dira maiteko a go rapela Modimo ka go mo direla dihlabelo. Sehlabelo sa Abele se ile sa amogelwa, mola sa Kaine sona se sa ka sa amogelwa. (Genesi 4:3-5) Phapano e be e le efe magareng ga tšona? Baheberu 11:4 e re: “Ka tumelo Abele o neile Modimo sehlabelo sa bohlokwa bjo bogolo go feta sa Kaine, e lego tumelo yeo ka yona a ilego a hlatselwa gore o be a lokile.” Ka gona, go molaleng gore go nyakega tumelo e le gore re kgone go boledišana le Modimo. Senyakwa se sengwe se bonwa mantšung ao Jehofa a a boditšego Kaine a rego: “Xe O ka dira xa-botse, a xa se mó Ò tl’o xo inamoloxa!” Ee, thapelo ya Kaine go Modimo e ka ba e ile ya amogelega ge nkabe a ile a dira botse. Lega go le bjalo, Kaine o ile a gana keletšo ya Modimo, a bolaya Abele gomme a feleletša e le moleleri. (Genesi 4:7-12) Ka gona, go ile gwa gatelelwa bohlokwa bja go rapela Modimo ka tumelo gotee le go dira mediro e mebotse go tloga mathomong.

4. Ke’ng seo re swanetšego go se lemoga ge re rapela Modimo?

⁴ Ke gabohlokwa gore re lemoge boemo bja rena bja bodiradibe ge e ba re nyaka go rapela Modimo. Batho bohle ba dira dibe gomme sebe ke lepheko leo le re šitišago go rapela Modimo. Moporofeta Jeremia o ngwadile mabapi le Isiraele gore: “Xo sentše rena . . . Wa khuta ka leru; thapêlô e se Xo fihlêlê.” (Dillo tša Jeremia 3:42, 44) Lega go le bjalo, go theoša le histori Modimo o bontšhitše gore o ikemišeditše go theetša dithapelo tša bao ba tlago go yena ka tumelo, ba e-na le boemo bjo bo swanetšego bja pelo e bile ba boloka ditaelo tša gagwe. (Psalme 119:145) Ba bangwe ba batho bao e be e le bomang, gona re ka ithuta’ng dithapelong tša bona?

5, 6. Re ka ithuta’ng tseleng yeo Aborahama a bego a boledišana le Modimo ka yona?

⁵ Yo mongwe wa batho bao e be e le Aborahama. Modimo o ile a amogela maiteko a gagwe  a go mmatamela ka gobane o be a bitša Aborahama gore ke “mogwera wa-ka.” (Jesaya 41:8, NW) Re ka ithuta’ng tseleng yeo Aborahama a bego a rapela Modimo ka yona? Mopatriareka yo yoo a botegago o ile a kgopela Jehofa gore a mo nee mojabohwa ge a re: “O tlo mpha’ng? Hleng ke sepela kè se n’e ngwana.” (Genesi 15:2, 3; 17:18) Ka nako e nngwe o ile a bontšha go tshwenyega ga gagwe ka gore ke bomang bao ba tlago go phologa ge Modimo a be a ahlola ba kgopo kua Sodoma le Gomora. (Genesi 18:23-33) Le gona Aborahama o ile a rapelela ba bangwe. (Genesi 20:7, 17) Le gona, go etša tabeng ya Abele, ka dinako tše dingwe go rapela ga Aborahama Modimo go be go akaretša sehlabelo seo a bego a se direla Jehofa.—Genesi 22:9-14.

⁶ Mabakeng a ka moka, Aborahama o be a ikwa a lokologile go boledišana le Jehofa. Lega go le bjalo, go bolela ga gagwe ka bolokologi go be go sepedišana le go lemoga ga gagwe gore ke yo monyenyane ge a bapišwa le Mmopi wa gagwe. Ela hloko mantšu a gagwe ao a bontšhago tlhompho ao a hwetšagalago go Genesi 18:27, e rego: “A k’o tsebê hlê xe ke betile pelo ka bolêla le Mong’aka, le xe kè le lerole le molôra.” A boemo bjo bobotse gakaakang bja kgopolo bjoo re ka bo ekišago!

7. Ke dilo dife tšeo bapatriareka ba ilego ba di rapelela go Jehofa?

⁷ Bapatriareka ba be ba rapelela dilo tše di fapa-fapanego gomme Jehofa o ile a theetša dithapelo tša bona. Jakobo o ile a dira thapelo ya keno. Ka morago ga go kgopela thekgo ya Modimo, o ile a mo holofetša gore: “Xomme mo xo tšohle tše O tl’o xo mpha tšôna, ke tlo Xo arolêla sa-lesome.” (Genesi 28:20-22) Ka morago, ge a be a le kgaufsi le go kopana le mogolo’agwe, Jakobo o ile a kgopela Jehofa gore a mo šireletše a re: “A k’o mphološê seatleng sa moxol’wake, seatleng sa Esau, ka xobane ke a mmoifa.” (Genesi 32:9-12) Mopatriareka Jobo o be a rapela Jehofa legatong la lapa la gagwe, a le direla dihlabelo. Ge bagwera ba Jobo ba bararo ba dirile sebe ka seo ba se boletšego, Jobo o ile a ba rapelela gomme “Morêna a dumêla xe Jobo a ba rapêlêla.” (Jobo 1:5; 42:7-9) Dipego tše di re bontšha dilo tšeo re ka di rapelelago go Jehofa. Le gona re ithuta gore Jehofa o ikemišeditše go amogela dithapelo tša bao ba mo rapelago ka tsela e swanetšego.

Ka Tlase ga Kgwerano ya Molao

8. Ka tlase ga kgwerano ya Molao, ditaba di be di išwa go Jehofa bjang legatong la setšhaba?

⁸ Jehofa o ile a nea setšhaba sa Isiraele kgwerano ya Molao ka morago ga go se phološa Egipita. Molao o ile wa hlalosa tokišetšo ya go rapela Modimo ka baperisita ba kgethilwego. Balefi ba bangwe ba ile ba kgethwa gore ba hlankele bjalo ka baperisita legatong la setšhaba. Ge go be go rotoga ditaba tšeo di kgomago setšhaba ka moka, moemedi wa setšhaba—yoo  ka dinako tše dingwe e bego e le kgoši goba moporofeta—o be a iša taba yeo go Modimo ka thapelo. (1 Samuele 8:21, 22; 14:36-41; Jeremia 42:1-3) Ka mohlala, nakong ya ge go neelwa tempele, Kgoši Salomo o ile a rapela Jehofa ka thapelo e tšwago pelong. Ke moka Jehofa o ile a bontšha gore o amogetše thapelo ya Salomo ka go tlatša tempele ka letago la Gagwe gomme a re: “’Tsêbê tša-ka di tlo theetša ’thapêlô tša felô fá.”—2 Koronika 6:12–7:3, 15.

9. Ke’ng seo se bego se nyakega e le gore Jehofa a rapelwe ka tsela e swanetšego ka sekgethweng?

⁹ Molaong woo a bego a o neile Isiraele, Jehofa o ile a akaretša selo seo se bego se nyakega gore a rapelwe ka tsela e amogelegago ka sekgethweng. Selo seo e be e le eng? Mesong e mengwe le e mengwe le mantšiboeng a mangwe le a mangwe, moperisita yo a phagamego o be a swanetše go thuntšhetša Jehofa diorelo tše di nkgago bose go tlaleletša dihlabelong tša diphoofolo tšeo a bego a di neela. Ka morago, baperisita ba ka tlasana le bona ba be ba dira modiro wo, ntle le ka Letšatši la Poelano. Ge baperisita ba be ba sa phethe modiro wo wa go bontšha tlhompho, Jehofa o be a sa amogele bodiredi bja bona.—Ekisodo 30:7, 8; 2 Koronika 13:11.

10, 11. Re na le bohlatse bofe bja gore Jehofa o be a amogela dithapelo tšeo batho ba bego ba itirela tšona?

¹⁰ Na Modimo o be a rapelwa feela ka baemedi bao ba kgethilwego Isiraeleng ya bogologolo? Aowa, Mangwalo a bontšha gore Jehofa o be a thabela go amogela dithapelo tša motho ka noši. Thapelong ya gagwe ge a be a neela tempele, Salomo o ile a lopa Jehofa ka gore: “Dithapêlô tšohle le ditôpô tšohle, xe di ka dirêlwa motho mang le mang, le xe e le sethšaba ka moka sa xaxo sa Isiraele . . . ’me ba emišitše ’atla tša bôná bà le Ngwakong wó, O kwê Ò le xodimong.” (2 Koronika 6:29, 30) Pego ya Luka e re botša gore ge Sakaria, e lego tatago Johane Mokolobetši, a be a thuntšha diorelo ka sekgethweng, lešaba la barapedi ba Jehofa bao e sego baperisita le be le “rapela ka ntle.” Go molaleng gore e be e šetše e le setlwaedi gore batho ba Modimo ba bokane ka ntle ga sekgethwa gomme ba rapele ge diorelo di be di thuntšhetšwa Jehofa aletareng ya gauta.—Luka 1:8-10.

¹¹ Ka gona, ge Jehofa a be a rapelwa ka tsela e swanetšego o be a thabela go amogela dithapelo tša bao ba bego ba emela setšhaba ka moka le tšeo batho ba bego ba itirela tšona. Lehono ga re sa phela ka tlase ga kgwerano ya Molao. Eupša re ka ithuta dithuto tša bohlokwa tseleng yeo Baisiraele ba bogologolo ba bego ba rapela Modimo ka yona.

Ka Tlase ga Thulaganyo ya Bokriste

12. Bakriste ba na le thulaganyo efe ya go rapela Jehofa?

¹² Ga bjale re ka tlase ga thulaganyo ya Bokriste. Ga go sa na tempele ya kgonthe yeo go yona baperisita ba bego ba emela batho ka moka pele ga Modimo goba yeo re ka yago go yona go yo rapela Modimo. Lega go le bjalo, go sa dutše go e na le thulaganyo yeo Jehofa a e dirilego ya gore re mo rapele. Ke efe? Ge Kriste a be a tlotšwa ka 29 C.E. gomme a kgethwa gore e be Moperisita yo a Phagamego, tempele ya moya e ile ya thoma go šoma. * Tempele ye ya moya e be e le thulaganyo e mpsha ya go rapela  Jehofa motheong wa sehlabelo sa poelanyo sa Jesu Kriste.—Baheberu 9:11, 12.

13. Ke dibopego dife tše di swanago tša tempele yeo e bego e le Jerusalema le tempele ya moya tabeng ya thapelo.

¹³ Dibopego tše dintši tša tempele yeo e bego e le Jerusalema di swantšhetša ditokišetšo tša tempele ya moya gabotse, go akaretša le tšeo di lego mabapi le thapelo. (Baheberu 9:1-10) Ka mohlala, diorelo tšeo di bego di thuntšhwa mesong le mantšiboa aletareng ya diorelo ka Sekgethweng sa tempele di be di swantšhetša’ng? Go ya ka puku ya Kutollo, “diorelo di bolela dithapelo tša bakgethwa.” (Kutollo 5:8; 8:3, 4) Dafida o ile a budulelwa go ngwala gore: “Anke dithapelo tša-ka di lokišwe bjalo ka diorelo pele ga gago.” (Psalme 141:2, NW) Ka gona, ka tlase ga thulaganyo ya Bokriste, diorelo tše di nkgago bose ka mo go swanetšego di emela dithapelo tše di amogelegago le tumišo yeo e yago go Jehofa.—1 Bathesalonika 3:10.

14, 15. Go ka thwe’ng ka tsela yeo Jehofa a rapelwago ke (a) Bakriste ba tloditšwego? (b) “dinku tše dingwe”?

¹⁴ Ke bomang bao ba ka rapelago Modimo tempeleng ye ya moya? Tempeleng ya kgonthe, baperisita le Balefi ba be ba e-na le tokelo ya go hlankela ka lebaleng la ka gare, eupša ke baperisita feela bao ba bego ba tsena ka Sekgethweng. Bakriste ba tloditšwego bao ba nago le kholofelo ya go phela legodimong ba na le boemo bja moswana-noši bja moya bjoo bo bego bo swantšhetšwa ke lebala la ka gare le Sekgethwa, e lego boemo bjoo bo ba kgontšhago go rapela le go tumiša Modimo.

¹⁵ Go thwe’ng ka bao ba nago le kholofelo ya go phela lefaseng, e lego “dinku tše dingwe”? (Johane 10:16) Moporofeta Jesaya o bontšhitše gore batho ba tšwago ditšhabeng tše dintši ba be ba tla rapela Jehofa “bofelong bya mabaka.” (Jesaya 2:2, 3) O ngwadile gape gore “ba mathokô” ba be ba tla rapela Jehofa. Ge a bontšha go ikemišetša ga gagwe go amogela dithapelo tša bona, Modimo o itše: “Ke tlo ba . . . thabiša Ntlong ya-ka ya thapêlô.” (Jesaya 56:6, 7) Kutollo 7:9-15 e re nea dintlha tše di oketšegilego ge e bolela ka “lešaba le legolo” le le tšwago “ditšhabeng tšohle” leo le bokanago go rapela Modimo “mosegare le bošego” le eme lebaleng la ka ntle la tempele ya moya. A kgopolo e homotšago gakaakang ya gore bahlanka ba Modimo ka moka lehono ba ka batamela Modimo ka bolokologi ba e-na le kholofelo e feletšego ya gore o a ba kwa!

Ke Dithapelo tša Mohuta Ofe Tšeo di Amogelegago?

16. Re ka ithuta’ng ka thapelo go Bakriste ba lekgolong la pele?

¹⁶ Bakriste ba lekgolong la pele e be e le batho bao ba tlwaetšego go rapela. Ba be ba rapelela dilo tša mohuta ofe? Bagolo ba Bakriste ba be ba rapelela tlhahlo ge ba be ba kgetha banna bao ba bego ba rwala boikarabelo bja go etelela pele. (Ditiro 1:24, 25; 6:5, 6) Epafora o ile a rapelela badumedi-gotee le yena. (Bakolose 4:12) Ditho tša phuthego ya Jerusalema di ile tša rapelela Petro ge a be a golegilwe. (Ditiro 12:5) Bakriste ba lekgolong la pele ba ile ba kgopela Modimo gore a ba nee sebete ge ba be ba lebeletšane le kganetšo ba re: “Jehofa, lebiša tlhokomelo ditšhošetšong tša bona, gomme o dumelele bahlanka ba gago go tšwela pele ba  bolela lentšu la gago ka sebete ka moka.” (Ditiro 4:23-30) Morutiwa Jakobo o kgothaleditše Bakriste gore ba rapele Modimo gore a ba nee bohlale ge ba le ka tlase ga teko. (Jakobo 1:5) Na o akaretša dilo tše bjalo ge o rapela Jehofa?

17. Jehofa o amogela dithapelo tša bomang?

¹⁷ Modimo ga a amogele dithapelo ka moka. Ka gona, ke bjang re ka rapelago ka kgodišego ya gore dithapelo tša rena di tla amogelwa? Batho ba botegago bao Modimo a ilego a ba theetša mehleng ya bogologolo ba be ba mo rapela ka potego e bile ba e-na le boemo bjo bo swanetšego bja pelo. Ba bontšhitše tumelo gomme ba e hlatsela ka mediro e mebotse. Re ka kgonthišega gore Jehofa o tla theetša bao ba mo rapelago ka mokgwa o swanago lehono.

18. Bakriste ba swanetše go fihlelela senyakwa sefe e le gore dithapelo tša bona di kwewe?

¹⁸ Go na le selo se sengwe gape seo se nyakegago. Moapostola Paulo o se hlalositše ge a re: “Ka yena . . . re kgona go batamela go Tate ka moya o tee.” Paulo o be a bolela ka mang ge a be a ngwala gore “ka yena”? O be a bolela ka Jesu Kriste. (Baefeso 2:13, 18) Ee, re ka batamela Tate ka bolokologi ka Jesu feela.—Johane 14:6; 15:16; 16:23, 24.

19. (a) Ke neng moo diorelo tšeo di bego di thuntšhwa Isiraeleng di bego di sa kgahliše Jehofa? (b) Re ka kgonthišetša bjang gore dithapelo tša rena di ba bjalo ka diorelo tše di nkgago bose go Jehofa?

¹⁹ Bjalo ka ge go šetše go boletšwe, diorelo tšeo di bego di thuntšhwa ke baperisita ba Baisiraele di be di emela dithapelo tše di amogelegago tša bahlanka ba Modimo ba ba botegago. Lega go le bjalo, ka dinako tše dingwe diorelo tšeo di bego di thuntšhwa ke Baisiraele di be di sa kgahliše Jehofa. Lebaka la se e be e le ge Baisiraele ba thuntšha diorelo tempeleng mola ka nako e swanago ba be ba rapela medimo ya diswantšho. (Hesekiele 8:10, 11) Ka mo go swanago lehono, dithapelo tša bao ba ipolelago gore ba hlankela Jehofa eupša ka nako e swanago ba dira dilo tšeo di thulanago le melao ya gagwe di swana le diorelo tše di nkgago gampe go yena. (Diema 15:8) Ka gona, anke re tšweleng pele re boloka dikarolo ka moka tša maphelo a rena di hlwekile e le gore dithapelo tša rena di ka swana le diorelo tše di nkgago bose go Modimo. Jehofa o thabela dithapelo tša bao ba latelago ditsela tša gagwe tša go loka. (Johane 9:31) Lega go le bjalo, go sa na le dipotšišo tšeo di rotogago. Re swanetše go rapela bjang? Re ka rapelela eng? Le gona, Modimo o araba dithapelo tša rena bjang? Sehlogo sa rena se se latelago se tla ahla-ahla dipotšišo tše gotee le tše dingwe.

[Mongwalo wa ka tlase]

Na o ka Hlalosa?

• Batho ba sa phethagalago ba ka rapela Modimo bjang ka mo go amogelegago?

• Re ka ekiša bapatriareka bjang dithapelong tša rena?

• Re ithuta’ng dithapelong tša Bakriste ba pele?

• Ke neng moo dithapelo tša rena di lego bjalo ka diorelo tše di nkgago bose go Modimo?

[Dipotšišo tša Thuto]

[Seswantšho go letlakala 23]

Ke ka baka la’ng Modimo a ile a amogela sehlabelo sa Abele eupša a se amogele sa Kaine?

[Seswantšho go letlakala 24]

‘Ke lerole le molora’

[Seswantšho go letlakala 25]

“Mo xo tšohle tše O tl’o xo mpha tšôna, ke tlo Xo arolêla sa-lesome”

[Seswantšho go letlakala 26]

Na dithapelo tša gago di bjalo ka diorelo tše di nkgago bose go Jehofa?