‘Mehla ya Bofelo’ ke Eng?

NA O ipotšiša gore ke’ng seo bokamoso bo se huperego bakeng sa gago le bao o ba ratago? Batho ba bantši ba šetša mekero ya ditaba ka kelohloko go bona kamoo ditiragalo tša lefase di ka kgomago maphelo a bona. Lega go le bjalo, go ela hloko Lentšu la Modimo leo le buduletšwego go re nea temogo ya kgonthe. Se ke ka gobane Beibele ga se ya bolela e sa le pele ka ditiragalo tša lefase tša lehono feela eupša gape e boletše le ka dilo tšeo di sa tlago.

Ka mohlala, ge Jesu Kriste a be a le lefaseng, o ile a bolela ka mo go nabilego ka Mmušo wa Modimo. (Luka 4:43) Ka mo go kwešišegago, batho bao ba mo kwelego ba ile ba nyaka go tseba gore Mmušo woo o kgahlišago o be o tla tla neng. Ka kgonthe, matšatši a mararo pele ga gore Jesu a bolawe a se na molato, balatedi ba gagwe ba ile ba mmotšiša gore: “Pontšho ya go ba gona ga gago [o le matleng a Mmušo] le ya bofelo bja tshepedišo ya dilo e tla ba eng?” (Mateo 24:3) Jesu o ba boditše gore Jehofa Modimo ke yena a nnoši a tsebago nako ya maleba yeo ka yona Mmušo o tlago go laola lefase ka mo go feletšego. (Mateo 24:36; Mareka 13:32) Lega go le bjalo, Jesu le ba bangwe ba ile ba bolela e sa le pele ka ditiragalo tše dingwe tšeo di bego di tla direga lefaseng go hlatsela gore Kriste o buša a le matleng a Mmušo.

Pele re hlahloba bohlatse bjo bo lemogegago bja gore re phela “mehleng ya bofelo” bja tshepedišo ya gona bjale ya dilo, a re hlahlobeng ka boripana tiragalo ya bohlokwa yeo e ilego ya direga lefelong leo le sa bonagalego la moya. (2 Timotheo 3:1) Jesu Kriste o bile Kgoši legodimong ka ngwaga wa 1914. * (Daniele 7:13, 14) Kapejana ka morago ga go fiwa matla a Mmušo, Jesu o ile a gata mogato. Beibele e re botša gore: “Ntwa ya tsoga legodimong: Mikaele le barongwa ba gagwe ba lwa le drakone, gomme drakone le barongwa ba yona ba lwa.” (Kutollo 12:7) “Mikaele morongwa yo mogolo” ke Jesu Kriste ge a le maemong a gagwe legodimong. * (Juda 9; 1 Bathesalonika 4:16) Drakone ke Sathane Diabolo. Sathane le barongwa ba gagwe ba babe bao ba mo latelago, bao ba bitšwago batemona, ba lwele bjang ntweng yeo? Ba ile ba fenywa gomme ba rakwa legodimong goba ba “lahlelwa” tikologong ya lefaseng. (Kutollo 12:9) Ka lebaka leo, ‘magodimo le bao ba dulago go ona,’ ke gore barwa ba botegago ba Modimo, ba ile ba thaba. Lega go le bjalo, batho ga se ba ka ba thaba. Beibele e boletše e sa le pele gore: “Go madimabe lefase . . . gobane Diabolo o theogetše go lena a galefile kudu, ka ge a tseba gore o na le nako e kopana.”—Kutollo 12:12.

Ka pefelo ya gagwe, Sathane o tlišitše madimabe—matshwenyego le tlaišego—go bao ba dulago lefaseng. Lega go le bjalo, madimabe ao e tla ba a lebakanyana, “nako e kopana.” Beibele e bitša nako ye gore ke ‘mehla ya bofelo.’ Re thabišwa ke gore kgaufsinyane tutuetšo ya Diabolo godimo ga lefase e tla fedišwa ka mo go feletšego. Eupša go na le bohlatse bofe bja gore re phela mehleng ya bofelo?

[Mengwalo ya ka tlase]

 [Methopo ya Diswantšho go letlakala 2]

COVER: Foreground: © Chris Stowers/Panos Pictures; background: FAROOQ NAEEM/AFP/Getty Images