Bota Jehofa Gomme o be le Sebete

“Letêla Morêna, O tiê matla, O tlêmê pelo. Letêla Morêna.”—PSALME 27:14.

1. Kholofelo e bohlokwa gakaaka’ng, gona lentšu le le dirišwa bjang ka Mangwalong?

KHOLOFELO ya kgonthe e bjalo ka seetša se se phadimago. E re thuša go lebelela ka kua ga diteko tša gona bjale le go lebeletšana le bokamoso ka sebete le ka lethabo. Ke Jehofa feela yo a ka re neago kholofelo e kgonthišeditšwego, yeo a re neago yona ka Lentšu la gagwe le le buduletšwego. (2 Timotheo 3:16) Ge e le gabotse, mantšu “kholofelo,” “holofetše” le “go holofela” a tšwelela ka makga a mantši ka Beibeleng gomme a hlalosa tebelelo e fagahletšwego le e kgonthišeditšwego ya selo se itšego se sebotse le lebaka la go ba le tebelelo yeo. * Kholofelo e bjalo e feta go fo ba le kganyogo, e lego kganyogo yeo e ka bago e se na motheo goba tebelelo ya go phethagatšwa.

2. Kholofelo e bapetše karolo efe bophelong bja Jesu?

² Ge a be a lebeletšane le diteko le mathata, Jesu o ile a lebelela ka kua ga boemo gomme a bota Jehofa. “Ka baka la lethabo leo le bego le beilwe pele ga gagwe o ile a kgotlelela kota ya tlhokofatšo, a se be le taba le go hlabišwa dihlong, gomme a dula ka letsogong le letona la sedulo sa bogoši sa Modimo.” (Baheberu 12:2) Ka ge a be a tsepamišitše mogopolo tebelelong ya go phagamišwa ga bogoši bja Jehofa le go kgethagatšwa ga leina la Gagwe, Jesu ga se a ka a arošwa tseleng ya gagwe ya go kwa Modimo, go sa šetšwe bohloko bjoo a bego a tla bo kwa.

3. Kholofelo e bapala karolo efe maphelong a bahlanka ba Modimo?

³ Kgoši Dafida o bontšha gore kholofelo le sebete di a tswalana ge a re: “Letêla Morêna, O tiê matla, O tlêmê pelo. Letêla Morêna.” (Psalme 27:14) Ge e ba re nyaka gore dipelo tša rena di be matla, gona ga se ra swanela go dumelela kholofelo ya rena go fokola eupša re swanetše go dula re nagana ka yona. Go dira bjalo go tla re thuša gore re ekiše Jesu gomme re be le sebete le phišego ge re tšea karolo modirong woo a laetšego barutiwa ba gagwe gore ba o dire. (Mateo 24:14;  28:19, 20) Ka kgonthe, kholofelo go bolelwa ka yona ka Beibeleng gotee le tumelo le lerato e le seka se swarelelago seo se hlaolago bophelo bja bahlanka ba Modimo.—1 Bakorinthe 13:13.

Na o ‘Atelwa ke Kholofelo’?

4. Ke’ng seo Bakriste ba tloditšwego le bagwera ba bona ba “dinku tše dingwe” ba se fagahletšego?

⁴ Batho ba Modimo ba letetšwe ke bokamoso bjo bo kgahlišago. Bakriste ba tloditšwego ba fagahletše go hlankela le Kriste legodimong, mola “dinku tše dingwe” di holofetše ‘go lokollwa bokgobeng bja tshenyego gomme di be le tokologo ya letago ya bana ba Modimo ba lefaseng.’ (Johane 10:16; Baroma 8:19-21; Bafilipi 3:20) ‘Tokologo yeo ya letago’ e akaretša go phološwa sebeng le mafelelong a sona a bohloko. Ka kgonthe, Jehofa—Monei wa “mpho e nngwe le e nngwe e botse le neo e nngwe le e nngwe e phethagetšego”—o tla nea bahlanka ba gagwe ba botegago mpho e kaone kudu.—Jakobo 1:17; Jesaya 25:8.

5. Re ‘atelwa bjang ke kholofelo’?

⁵ Kholofelo ya Bokriste e swanetše go ba ya bohlokwa gakaaka’ng maphelong a rena? Go Baroma 15:13 re bala gore: “Eka Modimo yo a neago kholofelo a ka le tlatša ka lethabo le khutšo ka go dumela ga lena, e le gore le atelwe ke kholofelo ka matla a moya o mokgethwa.” Ee, kholofelo e ka bapišwa le mahlasedi a matla a letšatši la mesong ao a tlatšago maphelo a rena ka khutšo, lethabo, morero le sebete, e sego kerese yeo e goteditšwego lefsifsing. Ela hloko gore re ‘atelwa ke kholofelo’ ge re dumela Lentšu la Modimo le le ngwadilwego gomme re amogela moya wa gagwe o mokgethwa. Baroma 15:4 e re: “Gobane dilo tšohle tšeo di ilego tša ngwalwa e sa le pele di ile tša ngwalelwa go re ruta, gore ka kgotlelelo ya rena le ka khomotšo e tšwago Mangwalong re be le kholofelo.” Ka gona ipotšiše gore: ‘Na ke boloka kholofelo ya-ka e tiile ka go ba morutwana yo a fišegago wa Beibele, ke e bala letšatši le letšatši? Na ke rapelela moya wa Modimo ka mehla?—Luka 11:13.

6. Re swanetše go itiša malebana le eng e le gore kholofelo ya rena e dule e tiile?

⁶ Jesu, Mohlala wa rena, o ile a matlafatšwa ke Lentšu la Modimo. Ka go ithuta go yena, re ka phema go ‘felelwa ke matla meoyeng ya rena.’ (Baheberu 12:3) Ke ga tlhaologanyo go bolela gore ge e ba re felelwa ke kholofelo yeo re e neilwego ke Modimo ka dipelong tša rena le menaganong ya rena goba re arošwa ke dilo tše dingwe—mohlomongwe re arošwa ke dilo tše di bonagalago goba dipakane tša nama—go se go ye kae re ka thoma go otsela moyeng gomme mafelelong ra lahlegelwa ke matla le sebete sa go phela ka ditekanyetšo tša boitshwaro. Ge re le boemong bjoo, ‘tumelo ya rena e ka ba ya senyega go swana le lesela-watle le le robegilego.’ (1 Timotheo 1:19) Ka lehlakoreng le lengwe, kholofelo ya kgonthe e matlafatša tumelo ya rena.

Kholofelo—Karolo ya Bohlokwa ya Tumelo

7. Ke ka ditsela dife kholofelo e lego karolo ya bohlokwa ya tumelo?

⁷ Beibele e re: “Tumelo ke tebelelo e kgonthišeditšwego ya dilo tše di holofetšwego, bohlatse bjo bo lego molaleng bja dilo tša kgonthe le ge di sa bonwe.” (Baheberu 11:1) Ka gona, kholofelo ga se feela selo seo se sepedišanago le tumelo; ke karolo ya bohlokwa ya tumelo. Nagana ka Aborahama. Go ya ka pono ya batho, yena le mosadi wa gagwe, e lego Sara, ba be ba fetile nywaga ya go belega ge Jehofa a ba holofetša mojabohwa. (Genesi 17:15-17) Aborahama o ile a arabela bjang? “Gaešita le ge go be go se na kholofelo, fela go theilwe kholofelong o ile a ba le tumelo, gore e tle e be tatago ditšhaba tše dintši.” (Baroma 4:18) Ee, kholofelo yeo Aborahama a e neilwego ke Modimo e ile ya matlafatša tumelo ya gagwe ya gore o tla ba le ngwana. Ka baka leo, tumelo ya gagwe e ile ya matlafala gomme kholofelo ya gagwe ya tia. Ge e le gabotse, Aborahama le Sara ba ile ba ba le sebete sa go tlogela legae la bona le meloko gomme ba fetša bophelo bja bona ka moka ba le nageng e šele!

8. Go kgotlelela ka potego go tiiša kholofelo bjang?

⁸ Aborahama o ile a boloka kholofelo ya gagwe e tiile ka go kwa Jehofa ka mo go feletšego, gaešita le ge go dira bjalo go be go le thata. (Genesi 22:2, 12) Ka mo go swanago, ge e ba re e-kwa le go kgotlelela tirelong ya rena go Jehofa, re ka kgodišega gore o tla re putsa. Paulo o ngwadile gore, ‘kgotlelelo e tšweletša boemo bjo bo amogelegago, boemo bjo bo amogelegago bo tšweletša  kholofelo, ke moka kholofelo ga e lebiše go nyamišweng.’ (Baroma 5:4, 5) Ke ka baka leo Paulo a ilego a ngwala gape gore: “Re duma gore yo mongwe le yo mongwe wa lena a bontšhe mafolofolo a swanago e le gore le be le kgodišego e tletšego ya kholofelo go ba go fihla bofelong.” (Baheberu 6:11) Pono e bjalo e botse, yeo e theilwego tswalanong ya kgaufsi le Jehofa, e ka re thuša go lebeletšana le mathata le ge e le afe ka sebete le ka lethabo.

“Thabang Kholofelong”

9. Ke’ng seo se tlago go re thuša go ‘thaba kholofelong’ ge re se dira ka mehla?

⁹ Kholofelo ya rena yeo re e neilwego ke Modimo e phagametše ka tsela e ka se kego ya lekanywa selo le ge e le sefe seo lefase le ka re holofetšago sona. Psalme 37:34 e re: “Letêla Morêna, O swarê ka tsela ya xaxwe, a Xo xodišê O bê mong wa naxa; O bônê xe [ba] babe ba lôba.” Ee, re na le lebaka le legolo la go ‘thaba kholofelong.’ (Baroma 12:12) Lega go le bjalo, e le gore re dire bjalo, re swanetše go dula re nagana ka kholofelo ya rena. Na ka mehla o nagana ka kholofelo ya gago yeo o e neilwego ke Modimo? Na o kgona go ipona o le Paradeiseng, o phetše gabotse mmeleng, o se na dipelaelo, o dikologilwe ke batho bao o ba ratago gomme o tšea karolo modirong o kgotsofatšago e le ka kgonthe? Na o naganišiša ka diswantšho tša Paradeise tšeo di lego ka dikgatišong tša rena? Go naganišiša ka tsela e bjalo ka mehla go ka bapišwa le go hlwekiša lefasetere leo le re bontšhago naga e botse. Ge e ba re sa hlwekiše lefasetere leo, go se go ye kae le tla ba le ditšhila gomme ra se sa kgona go bona bobotse bja naga yeo le go kgahliša ga yona. Le gona re ka arošwa ke dilo tše dingwe. Anke le ka mohla re se ke ra dumelela seo gore se direge!

10. Ke ka baka la’ng go nagana ka moputso e le selo se se swanetšego tswalanong ya rena le Jehofa?

¹⁰ Ke therešo gore lebaka le legolo la go hlankela ga rena Jehofa ke ka gobane re mo rata. (Mareka 12:30) Lega go le bjalo, re swanetše go fagahlela moputso. Ge e le gabotse, Jehofa o lebeletše gore re dire bjalo! Baheberu 11:6 e re: “Ka ntle le tumelo go kgahliša Modimo gabotse ga go kgonege, gobane yo a batamelago Modimo o swanetše go dumela gore o gona le gore e ba moputsi wa bao ba mo tsomago ka phišego.” Ke ka baka la’ng Jehofa a nyaka gore re mo lebelele e le Moputsi? Ka gobane ge re dira bjalo, re bontšha gore re tseba Tatago rena wa legodimong gabotse. O na le seatla se se bulegilego gomme o rata bana ba gagwe. Akanya feela kamoo re bego re ka se thabe ka gona le kamoo re bego re tla nyema moko ka gona ge e ba re be re se na “bokamoso le kholofelo.”—Jeremia 29:11, NW.

11. Kholofelo e tšwago go Modimo e thušitše Moše bjang go dira diphetho tše bohlale?

¹¹ Moše ke mohlala o mobotse wa motho yo a ilego a ema a tiile kholofelong yeo a e neilwego ke Modimo. Bjalo ka “morwa wa morwedi wa Farao,” Moše o be a neilwe matla, maemo le mahumo a Egipita. Na o be a tla phegelela dilo tše goba o be a tla hlankela Jehofa? Ka sebete Moše o ile a  kgetha go hlankela Jehofa. Ka baka la’ng? Ka gobane “o be a tsepeletše tefong ya moputso.” (Baheberu 11:24-26) Ee, Moše o be a sa hlokomologe kholofelo yeo Jehofa a bego a mo neile yona.

12. Ke ka baka la’ng kholofelo ya Bokriste e swana le kefa?

¹² Moapostola Paulo o bapišitše kholofelo le kefa. Kefa ya rena ya seswantšhetšo e šireletša matla a rena a monagano gomme ya dira gore re kgone go dira diphetho tše bohlale, go ba le dilo tša bohlokwa tše di tlago pele bophelong le go dula re botega. (1 Bathesalonika 5:8) Na o dula o rwele kefa ya gago ya seswantšhetšo? Ge e ba go le bjalo, gona go etša Moše le Paulo, o ka se ‘holofele mahumo a sa kgonthišegego, eupša o tla holofela Modimo yo a re neago dilo tšohle gore re ipshine ka tšona.’ Ke therešo gore go nyakega sebete e le gore o gane go phegelela dilo tša boithati, eupša go tloga go swanetše gore o dire boiteko bjoo! Ka gona ke ka baka la’ng o swanetše go amogela selo seo se fetwago ke ‘bophelo bja kgonthe’ bjo bo tlago go hwetšwa ke bao ba botago Jehofa le bao ba mo ratago?—1 Timotheo 6:17, 19.

“Le ka Mohla Nka se ke ka le Tlogela”

13. Jehofa o nea bahlanka ba gagwe ba botegago kgonthišetšo efe?

¹³ Batho bao ba botilego tshepedišo ya gona bjale ya dilo ba swanetše go naganišiša ka bokamoso bja bona ka ge lefase le welwa ke ‘dihlabi tše dintši tša tlalelo.’ (Mateo 24:8) Eupša bao ba boifago Jehofa ga ba na poifo e bjalo. Ba tšwela pele ‘ba dula ka go iketla ba ikagela ba sa šie kotsi.’ (Diema 1:33) Ka ge ba sa holofela tshepedišo ya gona bjale ya dilo, ba theetša ka lethabo temošo ya Paulo e rego: “Mokgwa wa lena wa bophelo a o se be le lerato la go rata tšhelete, ge le dutše le kgotsofetše ka dilo tše di lego gona. Gobane o itše: ‘Le ka mohla nka se ke ka le tlogela le ge e le go le lahla.’”—Baheberu 13:5.

14. Ke ka baka la’ng Bakriste ba sa swanela go tshwenyega ka mo go feteletšego ka dinyakwa tša bona tša nama?

¹⁴ “Le ka mohla,” “le ge e le”—mantšu a ao a gatelelago a bontšha ka mo go kwagalago gore Modimo o tla re hlokomela. Le gona Jesu o re kgonthišeditše ka tlhokomelo e lerato ya Modimo ge a re: “Ka gona, tšwelang pele le tsoma mmušo pele le toko ya gagwe, gomme dilo tše tše dingwe ka moka [dilo tše di bonagalago tša motheo bophelong] le tla di okeletšwa. Ka gona, le ka mohla le se ke la belaela ka letšatši le le latelago, gobane letšatši le le latelago le tla ba le dipelaelo tša lona.” (Mateo 6:33, 34) Jehofa o a tseba gore go thata gore re fišegele Mmušo wa gagwe mola ka nako e swanago re rwele boikarabelo bja go hlokomela dinyakwa tša rena. Ka gona a re beng le kgodišego e feletšego bokgoning bja gagwe le kganyogong ya gagwe ya go re nea dinyakwa tša rena.—Mateo 6:25-32; 11:28-30.

15. Bakriste ba boloka bjang ‘leihlo le lokile’?

¹⁵ Re bontšha gore re ithekgile ka Jehofa ge re boloka ‘leihlo la rena le lokile.’ (Mateo 6:22, 23) Leihlo le le lokilego le a botega, le na le maikemišetšo a mabotse e bile ga le phegelele megabaru le boithati. Go ba le leihlo le le lokilego ga go bolele gore re swanetše go diila wa go šiiša goba ra hlokomologa boikarabelo bja rena bja Bokriste. Go e na le moo, go bolela gore re bontšha “go hlaphogelwa monaganong” ge re dutše re bea tirelo ya Jehofa boemong bja pele bophelong.—2 Timotheo 1:7.

16. Ke ka baka la’ng go nyakega tumelo le sebete e le gore re boloke leihlo la rena le lokile?

¹⁶ Go boloka leihlo la rena le lokile go nyaka tumelo le sebete. Ka mohlala, ge e ba mothwadi a phegelela gore ka mehla o šome ka nako yeo o swanetšego go ba o le dibokeng tša Bokriste ka yona, na ka sebete o tla kgomarela dilong tša moya tše di tlago pele bophelong? Ge e ba motho a belaela kholofetšo ya Jehofa ya gore O tla hlokomela bahlanka ba Gagwe, gona selo feela seo go nyakegago gore Sathane a se dire ke go oketša kgateletšo gomme motho yo bjalo a ka kgaotša ka mo go feletšego go ba gona dibokeng. Ee, go se be le tumelo go dira gore Sathane a re laole gomme gwa dira gore yena, e sego Jehofa, a re beele dilo tšeo di tlago pele bophelong. Bjoo e tla ba boemo bjo bo nyamišago gakaakang!—2 Bakorinthe 13:5.

“Letêla Morêna”

17. Bao ba botago Jehofa ba šegofatšwa bjang gaešita le gona bjale?

¹⁷ Mangwalo a re bontšha leboelela gore bao  ba botago Jehofa ba ka se ke ba nyama. (Diema 3:5, 6; Jeremia 17:7) Ke therešo gore ka dinako tše dingwe ba ka swanelwa ke go kgotsofalela seo ba nago le sona, eupša ba lebelela seo e le tahlegelo e nyenyane ge e bapišwa le ditšhegofatšo tšeo ba di boloketšwego. Ka gona ba bontšha gore ba “letêla Morêna” gomme ba kgodišegile gore mafelelong o tla nea bahlanka ba gagwe ba botegago dikganyogo ka moka tše di lokilego tša dipelo tša bona. (Psalme 37:4, 34) Ka baka leo, ba thabile e le ka kgonthe gaešita le gona bjale. “Kholofêlô ya baloki ké lethabô; tše ba babe ba di botilexo di a lôba.”—Diema 10:28.

18, 19. (a) Jehofa o re nea kgonthišetšo efe e lerato? (b) Re ka boloka Jehofa bjang a le ‘hleng ga rena’?

¹⁸ Ge mošemanyana a sepela le tatagwe a mo swere ka letsogo, o ikwa a šireletšegile. Go bjalo le ka rena ge re sepela le Tatago rena wa legodimong. Jehofa o boditše Baisiraele gore: “O se boifê xobane ke na le wene. . . . ke a Xo thuša; . . . Xobane Nna Morêna ké Modimo w’axo; ke Xo swere ka seatla sa-ka sa le letona, ’me ke bolêla naxô ke re: Se boifê, ké Nna ke Xo phološaxo!”—Jesaya 41:10, 13.

¹⁹ Ruri se ke seswantšho se kgomago pelo—Jehofa a re swere ka letsogo! Dafida o ngwadile gore: “Ke dula kè itebanya le Morêna, o hleng xa-ka, nka se kê ka šutha.” (Psalme 16:8) Ke bjang re ka bolokago Jehofa a le ‘hleng ga rena’? Re dira bjalo bonyenyane ka ditsela tše pedi. Ya pele, re dumelela Lentšu la gagwe go re hlahla karolong e nngwe le e nngwe ya bophelo; gomme ya bobedi, re tsepamiša megopolo moputsong o kgahlišago woo Jehofa a o beilego pele ga rena. Mopsalme Asafa o opetše ka gore: “Ke dula kè na naxô’; O nthswere ka seatla sa-ka sa le letona. O nthsepediša ka morêrô w’axo, wa tlo bá wa nkamoxêla wa nkxodiša.” (Psalme 73:23, 24) Ruri re ka lebeletšana le bokamoso ka sebete ge re e-na le kholofelo e bjalo.

“Topollo ya Lena e a Batamela”

20, 21. Bao ba holofetšego Jehofa ba na le bokamoso bofe?

²⁰ Letšatši le lengwe le le lengwe ge le feta le akgofiša go nyakega ga gore re boloke Jehofa a le hleng ga rena. Kgaufsinyane, lefase la Sathane le tla welwa ke masetla-pelo ao a sa kago a le wela, gomme a tla thoma ka go fedišwa ga bodumedi bja maaka. (Mateo 24:21) Batho ba se nago tumelo ba tla aparelwa ke poifo. Lega go le bjalo, nakong yeo ya khuduego, bahlanka ba Jehofa ba nago le sebete ba tla thaba kholofelong ya bona! Jesu o itše: “Ge dilo tše di thoma go direga, gona le inamologe le emišetše dihlogo tša lena godimo, gobane topollo ya lena e a batamela.”—Luka 21:28.

²¹ Ka gona anke re thabeleng kholofelo ya rena yeo re e neilwego ke Modimo gomme re se ke ra forwa goba ra lekwa ke dikgoketšo tša Sathane tša bohwirihwiri. Ka nako e swanago, anke re kataneleng go hlagolela tumelo, lerato le go boifa Modimo. Ka go dira bjalo, re tla ba le sebete sa go kwa Jehofa ka tlase ga maemo ka moka le go ganetša Diabolo. (Jakobo 4:7, 8) Ee, “dirang senna, Le tiê matla dipelong, lena bohle ba Le letetšexo Yêna Morêna.”—Psalme 31:24.

[Mongwalo wa ka tlase]

Na o ka Araba?

• Kholofelo ya Jesu e mo thušitše bjang gore a be sebete?

• Tumelo le kholofelo di tswalana bjang?

• Ke bjang kholofelo le tumelo di ka neago Mokriste sebete sa go bea dilo tša bohlokwa pele bophelong?

• Ke ka baka la’ng bao ba ‘letelago Jehofa’ ba ka lebelela bokamoso ka kholofelo?

[Dipotšišo tša Thuto]

[Seswantšho go letlakala 28]

Go sa šetšwe gore o motho yo mogolo goba o yo monyenyane, na o ipona o le Paradeiseng?