Dipotšišo tše Tšwago go Babadi

Ke ka baka la’ng New World Translation go Doiteronomio 31:2 e re Moše o be “a ka se sa dumelelwa go tšwa le go tsena” e le moetapele wa Isiraele, mola diphetolelo tše dingwe di re o be a ka se sa kgona go dira bjalo?

Gaešita le ge lentšu la Seheberu leo le ahla-ahlwago mo le ka fetolelwa ka ditsela tše di fapa-fapanego, tsela yeo le beilwego ka yona diphetolelong tše dingwe tša Seisemane tša Beibele e bontšha gore ge Moše a be a le kgaufsi le go hwa, o be a babja, a se sa kgona go phethagatša boikarabelo bja gagwe bja go ba moetapele. Ka mohlala, The New English Bible e tsopola Moše a re: “Ga bjale ke na le nywaga e lekgolo le masome-pedi, gomme ga ke sa kgona go sepela-sepela kamoo ke ratago.” Ka mo go swanago, The New American Bible e re: “Ga ke . . . sa kgona go sepela-sepela ka bolokologi.”

Lega go le bjalo, Doiteronomio 34:7 e bontšha gore gaešita le ge Moše a be a tšofetše, o be a sa babje. E re: “Mošê xe a e-hwa ó be a na le nywaxa e lekxolo le masome a mabedi; ’me mahlô a xaxwe a be a sešo a fifala; le matla a xaxwe a be a sešo a fêla.” Ka baka leo, Moše o be a sa dutše a kgona go etelela setšhaba pele, eupša Jehofa o be a se sa nyaka gore a dire bjalo. Se se bonagala go seo Moše a tšwetšego pele a se bolela ge a re: “Morêna ó mpoditše a re: O ka se kê wa sela noka yé ya Jorodane.” Go bonagala Jehofa a be a bušeletša seo a bego a se boletše kua meetseng a Meriba.—Numeri 20:9-12.

Moše o phetše bophelo bjo botelele le bjo bo makatšago, bjo bo ka arolwago ka diripa tše tharo. O dutše Egipita ka nywaga e 40, mo a ilego a “rutwa ka bohlale ka moka bja Baegipita” le gona o be a le “matla mantšung a gagwe le ditirong tša gagwe.” (Ditiro 7:20-22) O ile a dula Midiane ka nywaga e mengwe e 40. Ge a le moo o ile a hlagolela dika tša moya tšeo di nyakegago e le gore a ka etelela batho ba Jehofa pele. Mafelelong, Moše o ile a hlahla Baisiraele le go ba etelela pele ka nywaga e 40. Lega go le bjalo, Jehofa mo nakong ye o be a dirile phetho ya gore Jošua, e sego Moše, o be a tla etelela setšhaba se go phatša Noka ya Jorodane go ya Nageng ya Kholofetšo.—Doiteronomio 31:3.

Ka gona, New World Translation e swere molaetša o nepagetšego wa Doiteronomio 31:2. Moše o be a ka se sa tšwela pele e le moetapele wa Isiraele, e sego ka baka la ge a se sa hlwa a e-na le matla, eupša ka baka la gore Jehofa ga se a ka a mo dumelela go dira bjalo.