Go Tsoma ga Batho Bophelo bjo bo sa Felego

GO TLOGA dinakong tša kgale, batho ba be ba hlologela go phela ka mo go sa felego. Lega go le bjalo, tlhologelo yeo ga se ya ka ya kgotsofatšwa—ga go na motho yo a hweditšego tsela ya go fenya lehu. Lega go le bjalo, morago bjale nyakišišo ya tša kalafo e tsošološitše kholofelo ya gore go telefatša bophelo bja motho ka tsela e makatšago go ka kgonega e le ka kgonthe. Ela hloko seo mafapha a fapa-fapanego a thutamahlale a se hweditšego nyakišišong ya ona mabapi le taba ye.

Bo-rathutaphedi ba dira diteko ka di-enzyme telomerase go leka go oketša makga a tlwaelegilego a go ikatiša ga disele. Bo-rathutamahlale ba a tseba gore disele tša kgale tšeo di senyegago di a hwa gomme tša tšeelwa legato ke tše difsa. Ge e le gabotse, karolo e kgolo ya mmele e mpshafatšwa ka makga a mmalwa nakong ya bophelo bja motho. Banyakišiši ba nagana gore, ge e ba mogato wa go mpshafatša o ka telefatšwa, gona “mmele wa motho o be o ka impshafatša ka nako e telele kudu—gaešita le ka mo go sa felego.”

Go dumelwa gore lefapha la go alafa ka go tšweletša ka mokgwa wo e sego wa tlhago seruiwa se se swanago tlwaa le se sengwe, leo le sa thekgwego ke banyakišiši ba bantši, le ka tsenya balwetši ditho tše di tšweleditšwego tše difsa tšeo di šomago gabotse tše bjalo ka dibete, dipshio le dipelo. Ditho tše bjalo di ka tšweletšwa go dirišwa disele tša motheo tša balwetši.

Banyakišiši ba nanotechnology ba nagana gore nakong e tlago dingaka di tla kgona go tsenya diroboto tša go lekana le sele ka mading a motho bakeng sa gore di nyake le go bolaya disele tša kankere le dipaketheria tše kotsi. Ba bangwe ba dumela gore lefapha le la tša thutamahlale, gotee le ka thušo ya go alafa ka ditho tša leabela, mafelelong le tla kgona go thuša mmele wa motho gore o tšwele pele o impshafatša ka mo go sa felego.

Baboleledi ba cryonics (mokgwa wa go kgahliša ditopo tša bahu ka lehlwa ka morero wa go di tsošetša bophelong ge go hweditšwe pheko ya bolwetši bjo bo bakilego lehu) ba tšidifatša ditopo tša bahu. Maikemišetšo ke go di bea go fihlela ge tlhabologo tsebong ya dihlare e dira gore dingaka di kgone go alafa malwetši, go bušetša batšofadi bofseng, go tsoša bahu le go ba dira gore ba phele gabotse mmeleng. Puku ya American Journal of Geriatric Psychiatry e bitša mokgwa wo gore “ke mokgwa wa lehono wa go gwamiša wo o tswalanywago le wa Egipita ya bogologolo.”

Maiteko a batho a go tsoma go phela ka mo go sa felego a bontšha kamoo go lego thata ka gona go amogela kgopolo ya seo lehu e lego sona. Na ruri go a kgonega gore batho ba hwetše bophelo bjo bo sa felego? Beibele e re’ng ka taba ye? Sehlogo se se latelago se tla araba dipotšišo tše.