Go ba Sebete go Matlafatšwa ke Lerato
Go ba Sebete go Matlafatšwa ke Lerato
“Modimo ga se a re nea moya wa bofšega, eupša o re neile wa matla le lerato le wa go hlaphogelwa monaganong.”—2 TIMOTHEO 1:7.
1, 2. (a) Lerato le ka tutueletša motho go dira’ng? (b) Ke ka baka la’ng sebete sa Jesu se be se sa tlwaelega?
MONNA le mosadi bao ba bego ba sa tšwa go nyalana ba be ba phonkgela ka lewatleng gomme ba theogela tlase-tlase (scuba diving) kgaufsi le lebopo la ka bohlabela la Australia. Ba be ba le kgaufsi le go phaphamala ka godimo ge šaka e kgolo e tšhweu e e-tla ka lebelo e lebile go mosadi. E le ge a bontšha sebete, monna yoo o ile a kgaphela mosadi wa gagwe ka thoko e le gore šaka e bolaye yena legatong la mosadi. Tirelong ya poloko, mohlologadi yo o itše: “O gafile bophelo bja gagwe bakeng sa-ka.”
2 Ee, lerato le ka tutueletša batho gore ba bontšhe sebete se se sa tlwaelegago. Jesu Kriste ka boyena o itše: “Ga go yo a nago le lerato le le fetago le, gore motho a gafe moya wa gagwe ka baka la bagwera ba gagwe.” (Johane 15:13) Nakong ya diiri tša ka tlase ga tše 24 ka morago ga ge a boletše mantšu a, Jesu o ile a gafa bophelo bja gagwe, e sego bakeng sa motho o tee, eupša bakeng sa batho ka moka. (Mateo 20:28) Ka godimo ga moo, Jesu ga se a gafa bophelo bja gagwe a le ka tlase ga maikwelo a sa letelwago a go ba sebete. O tsebile e sa le pele gore o be a tla kwerwa, a gobošwa, a ahlolwa ka tsela e se nago toka le go bolawa koteng ya tlhokofatšo. O ile a ba a lokišeletša barutiwa ba gagwe tiragalo yeo ka gore: “Bonang, re rotogela Jerusalema, Morwa wa motho o tla gafelwa baperisita ba bagolo le bamangwalo, gomme ba tla mo ahlolela lehu ba mo gafela batho ba ditšhaba, gomme ba tla dira metlae ka yena, ba mo tshwela ka mare ba mo otla le go mmolaya.”—Mareka 10:33, 34.
3. Ke’ng seo se dirilego gore Jesu a be sebete kudu?
3 Ke’ng seo se dirilego gore Jesu a be le sebete se se sa tlwaelegago? Tumelo le go boifa Modimo di bapetše karolo ya bohlokwa. (Baheberu 5:7; 12:2) Lega go le bjalo, ka godimo ga tšohle Jesu o bile sebete ka baka la lerato, lerato bakeng sa Modimo le batho. (1 Johane 3:16) Ge e ba re hlagolela lerato le bjalo go tlaleletša tumelong le go boifeng Modimo, le rena re tla kgona go ba le sebete se se swanago le sa Kriste. (Baefeso 5:2) Re ka hlagolela bjang lerato le bjalo? Re swanetše go lemoga Mothopo wa lona.
“Lerato le tšwa go Modimo”
4. Ke ka baka la’ng go ka thwe Jehofa ke Mothopo wa lerato?
4 Jehofa ke mothofatšo wa lerato e bile ke Mothopo wa lona. Moapostola Johane o ngwadile gore: “Baratiwa, a re tšweleng pele re ratana gobane lerato le tšwa go Modimo, gomme yo mongwe le yo mongwe yo a nago le lerato o tswetšwe ke Modimo gomme o hwetša tsebo ya Modimo. Yo a se nago lerato ga a tsebe Modimo, gobane Modimo ke lerato.” (1 Johane 4:7, 8) Ka gona, lerato le bjalo ka la Modimo le ka gola ge feela motho a batamela kgaufsi le Jehofa ka go hwetša tsebo e nepagetšego gomme a diriša tsebo yeo ka go kwa Modimo ka pelo ka moka.—Bafilipi 1:9; Jakobo 4:8; 1 Johane 5:3.
5, 6. Ke’ng seo se thušitšego balatedi ba Jesu ba pele go hlagolela lerato le swanago le la Kriste?
5 Thapelong ya gagwe ya mafelelo a e-na le baapostola ba gagwe ba botegago ba 11, Jesu o bontšhitše tswalano yeo e lego gona magareng ga go tseba Modimo le go gola leratong ge a re: “Ke ba tsebišitše leina la gago gomme ke tla le tsebatša, e le gore lerato leo o nthatilego ka lona le be go bona, gomme nna ke be boteeng le bona.” (Johane 17:26) Jesu o ile a thuša barutiwa ba gagwe go hlagolela lerato leo le bego le le gona magareng ga gagwe le Tatagwe gomme a ba bontšha ka mantšu le ka ditiro seo leina la Modimo le se emelago—dika tše di kgahlišago tša Modimo. Ka gona Jesu o be a ka re: “Yo a bonego nna o bone le Tate.”—Johane 14:9, 10; 17:8.
6 Lerato le bjalo ka la Kriste le tšweletšwa ke moya o mokgethwa wa Modimo. (Bagalatia 5:22) Ge Bakriste ba pele ba amogela moya o mokgethwa o holofeditšwego ka Pentekoste ya 33 C.E., ga se ba gopola feela dilo tše dintši tšeo Jesu a bego a ba rutile tšona, eupša gape ba ile ba kwešiša ka mo go tseneletšego seo Mangwalo a se bolelago. Go molaleng gore kwešišo ye e tseneletšego e ile ya godiša lerato la bona go Modimo. (Johane 14:26; 15:26) Mafelelo e bile afe? Ba ile ba bolela ditaba tše dibotse ka sebete le ka phišego gaešita le ge maphelo a bona a be a le kotsing.—Ditiro 5:28, 29.
Go Bonagatša Sebete le Lerato
7. Ke’ng seo Paulo le Baranaba ba ilego ba swanelwa ke go se kgotlelela leetong la bona la boromiwa?
7 Moapostola Paulo o ngwadile gore: “Modimo ga se a re nea moya wa bofšega, eupša o re neile wa matla le lerato le wa go hlaphogelwa monaganong.” (2 Timotheo 1:7) Paulo o be a bolela go tšwa phihlelong ya gagwe. Nagana ka seo yena le Baranaba ba ilego ba lebeletšana le sona ge ba be ba le leetong la bona la boromiwa. Ba dirile boboledi metseng e mentši go akaretša Antiokia, Ikonia le Lisitara. Motseng o mongwe le o mongwe, ba bangwe e ile ya ba badumedi eupša ba bangwe ya ba baganetši ba nago le lehloyo. (Ditiro 13:2, 14, 45, 50; 14:1, 5) Kua Lisitara, sehlopha sa batho ba galefilego se ile sa ba sa kgatla Paulo ka mafsika gomme sa mo tlogela se nagana gore o hwile! “Lega go le bjalo, ge barutiwa ba mo dikaneditše, a ema gomme a tsena motseng. Ke moka letšatšing le le latelago a tloga le Baranaba ba ya Derebe.”—Ditiro 14:6, 19, 20.
8. Sebete seo se bontšhitšwego ke Paulo le Baranaba se bontšhitše bjang lerato le le tseneletšego leo ba bego ba rata batho ka lona?
8 Na maiteko a a go bolaya Paulo a ile a dira gore yena le Baranaba ba tšhoge gomme ba kgaotše? Le gatee! Ka morago ga “go dira barutiwa ba bantši” kua Derebe, banna ba ba babedi ba ile “ba boela Lisitara le Ikonia le Antiokia.” Ka baka la’ng? E le gore ba kgothatše barutiwa ba bafsa gore ba dule ba le matla tumelong. Paulo le Baranaba ba itše: “Re swanetše go tsena mmušong wa Modimo ka ditlaišego tše dintši.” Go molaleng gore ba bile sebete ka baka la lerato leo le tseneletšego leo ba bego ba rata ‘dinku tša Kriste tše dinyenyane’ ka lona. (Ditiro 14:21-23; Johane 21:15-17) Ka morago ga go kgetha bagolo go e nngwe le e nngwe ya diphuthego tše di bego di sa tšwa go hlongwa, bana babo rena ba ba babedi ba ile ba rapela gomme “ba ba gafela go Jehofa yo ba bego ba šetše ba mo dumela.”
9. Bagolo ba Efeso ba ile ba arabela bjang leratong leo Paulo a bego a ba rata ka lona?
9 Paulo e be e le motho yo a nago le lerato le sebete mo e lego gore o be a ratwa ka mo go tseneletšego ke Bakriste ba bantši ba pele. Gopola seo se diregilego sebokeng seo Paulo a bego a se swere le bagolo ba tšwago Efeso, mo a ilego a fetša nywaga e meraro gomme a ganetšwa kudu. (Ditiro 20:17-31) Ka morago ga go ba kgothaletša go diša mohlape wa Modimo woo o beilwego tlhokomelong ya bona, Paulo o ile a khunama le bona gomme a rapela. Ke moka, “gwa tsoga sello se segolo gare ga bona ka moka, gomme ba wela godimo ga molala wa Paulo ba mo atla ka borutho, gobane ba be ba kwešitšwe bohloko kudu ke lentšu leo a ilego a le bolela la gore ba be ba ka se sa hlwa ba bona sefahlego sa gagwe.” Ruri bana babo rena ba ba be ba rata Paulo! Ka kgonthe ge nako ya gore ba sepele e fihla, Paulo le bagwera ba gagwe ba ile ba swanelwa ke go ‘arogana le bona,’ eupša bagolo ba Efeso ba be ba sa nyake go ba tlogela.—Ditiro 20:36–21:1.
10. Dihlatse tša Jehofa tša mehleng yeno di bontšhane bjang lerato ka sebete?
10 Lehono, balebeledi ba basepedi, bagolo ba phuthego le ba bangwe ba bantši ba ratwa ka mo go tseneletšego ka baka la sebete seo ba se bontšhago bakeng sa dinku tša Jehofa. Ka mohlala, dinageng tšeo di sentšwego ke ntwa ya selegae goba tšeo modiro wa boboledi o thibetšwego go tšona, balebeledi ba basepedi le basadi ba bona ba bea maphelo a bona le tokologo ya bona kotsing e le gore ba etele diphuthego. Ka mo go swanago, Dihlatse tše dintši di tlaišitšwe ke babuši ba nago le lehloyo gotee le balatedi ba bona ka gobane di ganne go eka Dihlatse-gotee le tšona goba go utolla moo di hwetšago dijo tša tšona tša moya. Tše dingwe tše dikete di ile tša tlaišwa gaešita le go bolawa ka gobane di gana go kgaotša go bolela ditaba tše dibotse goba go kgaotša go kopanela le badumedi-gotee dibokeng tša Bokriste. (Ditiro 5:28, 29; Baheberu 10:24, 25) Eka re ka ekiša tumelo le lerato tša bana babo rena ba bjalo ba nago le sebete!—1 Bathesalonika 1:6.
Le se ke la Dumelela Lerato la Lena le Fola
11. Ke ka tsela efe Sathane a lwago ntwa ya moya kgahlanong le bahlanka ba Jehofa, gona ke’ng seo go nyakegago gore ba se dire?
11 Ge Sathane a be a lahlelwa mo lefaseng, o be a ikemišeditše go ntšhetša kgalefo ya gagwe go bahlanka ba Jehofa ka gobane ba ‘boloka ditaelo tša Modimo gomme ba e-na le modiro wa go nea bohlatse ka Jesu.’ (Kutollo 12:9, 17) Le lengwe la maano a Diabolo ke tlaišo. Lega go le bjalo, leano le ga le ke le e-ba le mafelelo a letetšwego ka gobane le dira gore batho ba Modimo ba batamelane kgaufsi kudu ditlemong tša lerato la Bokriste gomme le tutuetša bontši bja bona go ba le phišego e oketšegilego. Leano le lengwe la Sathane ke go ipiletša tshekamelong ya batho ya bodiradibe. Go nyakega mohuta o fapanego wa sebete e le gore re ganetše leano le ka gobane re lwa ntwa kgahlanong le dikganyogo tše sa swanelago ka pelong ya rena yeo e lego ‘lešaedi le mmata-mano-mabe.’—Jeremia 17:9; Jakobo 1:14, 15.
12. Sathane o diriša bjang “moya wa lefase” maitekong a gagwe a go fokotša lerato la rena go Modimo?
12 Sathane o diriša sebetša se sengwe gape se matla—“moya wa lefase,” ke gore, tshekamelo ya lona yeo e le laolago goba tutuetšo yeo e lego kgahlanong le moya o mokgethwa wa Modimo. (1 Bakorinthe 2:12) Moya wa lefase o kgothaletša megabaru le lerato la dilo tše di bonagalago—“kganyogo ya mahlo.” (1 Johane 2:16; 1 Timotheo 6:9, 10) Gaešita le ge dilo tše di bonagalago le tšhelete di se kotsi ka botšona, ge e ba lerato la rena bakeng sa tšona le feta lerato leo re ratago Modimo ka lona, gona Sathane o tla ba a re fentše. Moya wa lefase o na le “matla” ka gobane o ipiletša nameng e sa phethagalago, o diriša boradia, o sehlogo gomme go swana le moya, o hwetšagala gohle. O se ke wa dumelela moya wa lefase o huetša pelo ya gago!—Baefeso 2:2, 3; Diema 4:23.
13. Go ba ga rena le sebete sa go dula re hlwekile boitshwarong go ka lekwa bjang?
13 Lega go le bjalo, go nyakega sebete e le gore re ganetše moya wa lefase le go o lahla. Ka mohlala, go nyakega sebete e le gore re tšwe lefelong la dipaesekopo, re time computer goba thelebišene ge go tšwelela diswantšho tše di gobogilego. Go nyakega sebete e le gore re ganetše kgatelelo e kotsi ya dithaka goba re kgaotše go gwerana le batho ba babe. Ka mo go swanago, go nyakega sebete e le gore re boloke melao ya Modimo le melao ya gagwe ya motheo ge re lebeletšane le dikwero, di ka ba di e-tšwa go bao re tsenago le bona sekolo, bao re šomago le bona, baagišani goba ba leloko.—1 Bakorinthe 15:33; 1 Johane 5:19.
14. Re swanetše go dira’ng ge e ba re hueditšwe ke moya wa lefase?
14 Ka gona, ruri go bohlokwa gore re matlafatše go rata ga rena Modimo le bana babo rena ba moya le dikgaetšedi! Iphe nako ya go lekola dipakane tša gago le tsela ya gago ya bophelo go bona ge e ba moya wa lefase o go hueditše ka tsela le ge e le efe. Ge e ba o go hueditše—gaešita le ge e ka ba ganyenyane—rapela Jehofa gore a go nee sebete sa go o ntšha le go o boloka o le kgole le wena. Jehofa a ka se ke a hlokomologa dithapelo tše bjalo tše di tšwago pelong. (Psalme 51:17) Ka godimo ga moo, moya wa gagwe o matla kudu go feta moya wa lefase.—1 Johane 4:4.
Go Lebeletšana le Diteko tša Motho ka Noši ka Sebete
15, 16. Lerato le swanago le la Kriste le ka re thuša bjang go lebeletšana le diteko tša motho ka noši? Nea mohlala.
15 Diteko tše dingwe tšeo bahlanka ba Jehofa ba swanetšego go lebeletšana le tšona di akaretša ditla-morago tša go se phethagale le botšofadi, tšeo gantši di feleletšago ka bolwetši, go golofala, kgateletšo le mathata a mangwe a mantši. (Baroma 8:22) Lerato le swanago le la Kriste le ka re thuša go lebeletšana le diteko tše. Ela hloko mohlala wa Namangolwa yo a goletšego lapeng la Bokriste kua Zambia. Namangolwa o ile a golofala ge a be a e-na le nywaga e mebedi. O re: “Ke be ke dula ke tshwenyegile, ke nagana gore batho ba tla tšhošwa ke ponagalo ya-ka. Eupša bana babo rena ba moya ba ile ba nthuša go lebelela dilo ka tsela e fapanego. Ka baka leo, ke ile ka fenya go dula ga-ka ke tshwenyegile gomme ka morago ga nako ka kolobetšwa.”
16 Gaešita le ge Namangolwa a e-na le setulo sa digole, gantši o swanelwa ke go sepela ka matsogo le matolo tseleng ya lekgwara e šilafetšego. Lega go le bjalo, ngwaga o mongwe le o mongwe o tšea karolo bodireding e le mmulamadibogo wa go thuša bonyenyane ka dikgwedi tše pedi. Mong wa ntlo yo mongwe o ile a lla ge Namangolwa a mo nea bohlatse. Ka baka la’ng? Ka gobane o be a kgomilwe kudu ke tumelo le sebete tša kgaetšedi yo. E le bohlatse bja tšhegofatšo e ntši ya Jehofa, barutwana ba Namangolwa ba bahlano ba Beibele ba kolobeditšwe gomme yo mongwe wa bona o hlankela bjalo ka mogolo. Namangolwa o re: Gantši maoto a-ka a opa gabohloko, eupša ga ke dumelele seo go nthibela.” Kgaetšedi yo e fo ba e le yo mongwe wa Dihlatse tše dintši lefaseng ka bophara tšeo di fokolago mmeleng eupša di le matla moyeng ka baka la go rata ga tšona Modimo le moagišani. Batho ba bjalo ba kgahliša gakaakang mahlong a Jehofa!—Hagai 2:7.
17, 18. Ba bantši ba thušwa ke’ng go lebeletšana le malwetši le diteko tše dingwe? Nea mehlala ya phuthegong ya gabo lena.
17 Go phela ka bolwetši le gona go ka baka manyami le kgateletšego. Mogolo yo mongwe wa phuthego o re: “Sehlopheng sa rena sa thuto ya puku go na le kgaetšedi yo a nago le bolwetši bja swikiri le yo dipshio tša gagwe di sa šomego, yo mongwe yo a nago le kankere, ba babedi bao ba nago le bolwetši bjo šoro bja marapo le o tee yo a nago le bolwetši bja letlalo (lupus) le bolwetši bja go ruruga mešifa (fibromyalgia). Ka dinako tše dingwe ba ikwa ba nyamile. Lega go le bjalo, nako feela yeo ba sa bego gona dibokeng ka yona ke ge ba babja kudu goba ba le sepetlele. Ba ba gona ka mehla tirelong ya tšhemo. Ba nkgopotša Paulo yo a itšego: ‘Ge ke fokola, ke gona ke lego matla.’ Ke kgahlišwa ke lerato la bona le sebete. Mohlomongwe boemo bja bona bo dira gore ba be le pono e botse ka bophelo le go tsepamiša megopolo dilong tšeo ruri e lego tša bohlokwa.”—2 Bakorinthe 12:10.
18 Ge e ba o lwantšhana le mafokodi, bolwetši goba bothata le ge e le bofe, ‘o se kgaotše go rapelela’ thušo ya gore o se ke wa fenywa ke manyami. (1 Bathesalonika 5:14, 17) Ke therešo gore go ka no ba le dinako tšeo o ikwago kaone le tšeo o nyamago ka tšona, eupša leka go tsepamiša mogopolo dilong tše dibotse, dilo tša moya, kudu-kudu kholofelo ya rena e kgahlišago ya Mmušo. Kgaetšedi yo mongwe o itše: “Bodiredi ke kalafo go nna.” Go botša ba bangwe ditaba tše dibotse go mo thuša go ba le pono e botse.
Lerato le Thuša Badiri ba Bobe go Boela go Jehofa
19, 20. (a) Ke’ng seo se ka thušago bao ba wetšego sebeng gore ba be le sebete sa go boela go Jehofa? (b) Re tla ahla-ahla’ng sehlogong se se latelago?
19 Ba bantši bao ba fokolago moyeng goba bao ba dirilego sebe ba hwetša go le thata go boela go Jehofa. Eupša batho ba bjalo ba ka ba le sebete ge e ba ruri ba itshola gomme ba tsošološa go rata ga bona Modimo. Ela hloko mohlala wa Mario * yo a dulago United States. Mario o ile a tlogela phuthego ya Bokriste, a lemalela dino-tagi le dihlare-tagi gomme mafelelong, ka morago ga nywaga e 20, a golegwa. Mario o re: “Ke ile ka thoma go naganišiša ka bokamoso bja-ka le go bala Beibele gape. Ka morago ga nako ke ile ka thoma go leboga dika tša Jehofa, kudu-kudu kgaugelo ya gagwe yeo gantši ke bego ke e rapelela. Ge ke se na go lokollwa kgolegong, ke ile ka phema bagwera ba-ka ba kgale, ka ya dibokeng tša Bokriste gomme mafelelong ka bušetšwa ka phuthegong. Mmeleng wa-ka ke buna seo ke se bjetšego, eupša gona bjale bonyenyane ke na le kholofelo e kgahlišago. Ke leboga Jehofa kudu ka baka la kwelobohloko ya gagwe le tebalelo.”—Psalme 103:9-13; 130:3, 4; Bagalatia 6:7, 8.
20 Ke therešo gore bao ba lego boemong bjo bo swanago le bja Mario ba swanetše go šoma ka thata e le gore ba boele go Jehofa. Eupša lerato la bona le tsošološitšwego—ka baka la go ithuta Beibele, go rapela le go naganišiša—le tla ba nea sebete se nyakegago le boikemišetšo. Mario o ile a matlafatšwa gape ke kholofelo ya Mmušo. Ee, kholofelo e ka ba tutuetšo e matla ya go dira botse bophelong bja rena gotee le lerato, tumelo le go boifa Modimo. Sehlogong se se latelago, re tla ahla-ahla mpho ye ya bohlokwa ya moya.
[Mongwalo wa ka tlase]
^ ser. 19 Leina le fetotšwe.
Na o ka Araba?
• Lerato le tlaleleditše bjang go beng ga Jesu le sebete se se kgahlišago?
• Go rata bana babo bona go thušitše Paulo le Baranaba bjang gore ba be le sebete se se sa tlwaelegago?
• Sathane o leka bjang go fediša lerato la Bokriste?
• Go rata Jehofa go ka re nea sebete sa go kgotlelela diteko dife?
[Dipotšišo tša Thuto]
[Seswantšho go letlakala 23]
Go rata ga Paulo batho go mo neile sebete sa go kgotlelela
[Seswantšho go letlakala 24]
Go nyakega sebete e le gore re boloke ditekanyetšo tša Modimo
[Seswantšho go letlakala 24]
Namangolwa Sututu