O ka Phela ka mo go sa Felego

PALO e kgolo kudu ya badumedi bao ba tswalanywago le madumedi a lefase e kgahlwa ke dikgopolo tše di sa swanego tša go phela ka mo go sa felego. Tsela yeo di hlaloswago ka yona e fapana go ya ka madumedi, eupša kholofelo e a swana—go phela ka lethabo maemong a kgahlišago go se na go boifa lehu. Na e ka ba seo le wena o se kganyogago? Go tuma ga ditumelo tše go ka hlaloswa bjang? Le gona, na tebelelo ya bophelo bjo bo sa felego e ka fihlelelwa?

Mangwalo a bontšha gore Mmopi o tsentše kganyogo ya bophelo bjo bo sa felego ka gare ga monagano wa motho go tloga mathomong nakong ya ge a bopa batho ba pele ba babedi. Beibele e re: “Le tša neng le neng [Modimo] ó di beile dipelong tša bôná.”—Mmoledi 3:11.

Lega go le bjalo, e le gore ba phethagatše kganyogo yeo ya go phela ka mo go sa felego, banyalani ba pele ba be ba swanetše go amogela bolaodi bja Modimo bja go dira phetho mabapi le se se lokilego le se se fošagetšego. Ge nkabe ba dirile bjalo, Jehofa a ka be a ba ahlotše ka gore ba swanelwa ke go phela “ka xo sa felexo” legaeng leo a ba lokišeleditšego lona, tšhemong ya Edene.—Genesi 2:8; 3:22.

Bophelo bjo bo sa Felego bo Timetše

Pego ya Beibele e bontšha gore Modimo o bjetše “sehlare sa xo tseba botse le bobe,” seo a boditšego Adama le Efa gore ba se ke ba ja seenywa sa sona, go sego bjalo ba be ba tla hwa. (Genesi 2:9, 17) Go se je ga Adama le Efa seenywa seo go be go tla bontšha Modimo gore ba amogela bolaodi bja gagwe. Ka lehlakoreng le lengwe, go ja seenywa sa sehlare seo go be go tla bontšha gore ba gana bolaodi bja Modimo. Adama le Efa ba ile ba se kwe ditaelo tša Jehofa gomme ba thekga Sathane, sebopiwa sa moya seo se rabetšego kgahlanong le bolaodi bja Modimo. Ka baka leo, Modimo ka mo go swanetšego o ile a dira phetho ya gore Adama le Efa ba be ba sa swanelwe ke go phela ka mo go sa felego.—Genesi 3:1-6.

Seo Modimo a bego a boletše gore ba tla se hwetša e be e le bophelo goba lehu, go ba gona goba go se be gona. Ditla-morago tša go se kwe e bile lehu le phedišo ya bona ya sa ruri. Go be go sa kgonege gore Adama le Efa goba yo mongwe wa ditlogolo tša bona a tšwele pele a phela ka thušo ya dihlare tša maleatlana goba gore moya wa gagwe o se hwe. *

Bana ba Adama ka moka ba ile ba tlaišega ka baka la borabele bja gagwe. Moapostola Paulo o hlalosa ditla-morago tša bjona. O ngwadile gore: “Ka motho o tee sebe se tsene lefaseng, gomme lehu la tsena ka sebe, ka baka leo lehu le aparetše batho bohle gobane bohle ba dirile sebe.”—Baroma 5:12.

 Bophelo bjo bo sa Felego bo Hwetšwa Gape

Moapostola Paulo o ile a swantšha boemo bja bana ba Adama le bja lekgoba la lekgolong la pele la nywaga. Ka baka la sebe sa leabela, bana ba Adama le Efa ba ile ba belegwa e le “bahlanka ba sebe,” bao ba bego ba ka se phonyokge lehu. (Baroma 5:12; 6:16, 17) Bana ba Adama le Efa ba be ba ka se phonyokge ge nkabe Jehofa a se a ka a dira gore go be le selo sa go rekolla tokologo ya makgoba a bjalo. Paulo o hlalositše gore: “Ka karogo e tee [ya Adama], mafelelo go mehuta ka moka ya batho e bile go bonwa molato, ka mo go swanago ka tiro e tee ya tokafatšo, mafelelo go mehuta ka moka ya batho ke go bolelwa ga bona ba lokile bakeng sa bophelo.” “Tiro [yeo] e tee ya tokafatšo” e ile ya dira gore Jesu a gafe bophelo bja gagwe bjo bo phethagetšego e le motho gore e be “topollo e lekanago bakeng sa bohle.” Jehofa o ile a lemoga matla a sehlabelo sa topollo a go lokolla batho ‘kahlolong’ ya “go bonwa molato.”—Baroma 5:16, 18, 19; 1 Timotheo 2:5, 6.

Ke ka baka leo bo-rathutamahlale ba ka se tsogego ba hweditše sephiri sa go phela ka mo go sa felego thulaganyong e raraganego ya motho ya leabela. Go na le moo sephiri se ka hwetšwago gona. Go ya ka Beibele, sebaki se segolo sa lehu molokong wa batho ga se tša maphelo, eupša ke boitshwaro le toka. Tsela ya go dira gore bophelo bjo bo sa felego bo kgonege—sehlabelo sa Jesu sa topollo—e a nyakega. Topollo le yona ke pontšho ya toka ya Modimo le ya botho bja gagwe bjo lerato. Ka gona, ke mang yo a tlago go holwa ke topollo gomme a hwetša bophelo bjo bo sa felego?

Mpho ya go se hwe

Jehofa Modimo ke wa “mehla e se naxo mathômô, e se naxo mafêlô.” Ga a hwe. (Psalme 90:2) Motho wa mathomo yo Jehofa a ilego a mo nea mpho ya go se hwe ke Jesu Kriste. Moapostola Paulo o hlalosa gore: “Kriste, ka ge bjale a tsošitšwe bahung, ga a sa hwa; lehu ga le sa mmuša.” (Baroma 6:9) Ka kgonthe, ge a mmapetša le babuši ba bangwe ba lefase, Paulo o hlalosa Jesu e le yena feela yo a nago le matla a go se hwe. Jesu o tla tšwela pele a “phela ka mo go sa felego.” Bophelo bja gagwe ke bjo bo sa “senyegego.”—Baheberu 7:15-17, 23-25; 1 Timotheo 6:15, 16.

Ga se Jesu feela yo a tlago go hwetša mpho ye. Bakriste ba tloditšwego ka moya bao ba  kgethetšwego go buša e le dikgoši letagong la legodimo ba tsošwa ka tsogo e swanago le yeo Jesu a tsošitšwego ka yona. (Baroma 6:5) Moapostola Johane o bontšha gore mpho ye e neilwe batho ba 144 000. (Kutollo 14:1) Le bona ba newa mpho ya go se hwe. Paulo ge a bolela mabapi le tsogo ya bona o re: “Nama le madi di ka se rue mmušo wa Modimo . . . Phalafala e tla lla, bahu ba tla tsošwa e le ba sa senyegego, gomme re tla fetošwa. Gobane se seo se senyegago se tla apara go se senyege, gomme se seo se hwago se tla apara go se hwe.” Lehu ga le na matla go bao ba tsošwago ka mokgwa wo.—1 Bakorinthe 15:50-53; Kutollo 20:6.

Ka kgonthe kutollo ye yeo e tšwago go Modimo e a kgahliša. Gaešita le ge barongwa e le dibopiwa tša moya, ga se ba bopša ba e-na le go se hwe. Se se bontšhwa ke taba ya gore dibopiwa tša moya tšeo di ilego tša thekga borabele bja Sathane di tla fedišwa. (Mateo 25:41) Ka lehlakoreng le lengwe, babuši-gotee le Jesu ba hwetša mpho ya go se hwe, yeo e lego kgonthišetšo ya Jehofa ya go holofela potego ya bona ka go tia.

Na se se bolela gore ke batho ba 144 000 feela, e lego palo e nyenyane ge e bapetšwa le ba dimilione tše dikete bao ba ilego ba phela, bao ba tlago go phela ka mo go sa felego? Aowa. A re boneng lebaka.

Bophelo bjo bo sa Felego Lefaseng la Paradeise

Puku ya Beibele ya Kutollo e nea seswantšho se sebotse sa lešaba la batho leo le se nago palo leo le neilwego bophelo bjo bo sa felego lefaseng la paradeise. Ba nago le bona ke bao ba bego ba hwile eupša ba ilego ba tsošwa le go newa bophelo bjo bobotse le matla a bofsa. (Kutollo 7:9; 20:12, 13; 21:3, 4) Ba lebišwa ‘nokeng ya meetse a bophelo e sekilego bjalo ka legakabje, e elago e e-tšwa sedulong sa bogoši sa Modimo.’ Leribeng la yona go na le “dihlare tša bophelo . . . , matlakala a dihlare e be e le a go fodiša ditšhaba.” Taletšo e botho ya Jehofa Modimo ke e rego: “Mang le mang yo a nyorilwego a a tle; mang le mang yo a ratago a tle a tšee meetse a bophelo ka ntle le tefo.”—Kutollo 22:1, 2, 17.

Dihlare tše le meetse a, ga se dipheko tša maleatlana tša go hwetša bophelo bjo bo sa felego goba didiba tša meetse a bofsa tše bjalo ka tšeo di bego di tsongwa nywaga-kgolong e fetilego ke ditsebi tša tša go telefatšwa ga bophelo le banyakišiši. Go e na le moo di emela tokišetšo ya Modimo ka Jesu Kriste ya go bušetša batho maemong a phethagetšego ao a ilego a ba gona mathomong.

Morero wa Modimo wa go nea batho ba kwago bophelo bjo bo sa felego mo lefaseng ga se wa fetoga. Morero woo o tla phethagatšwa ka ge Jehofa a botega. Psalme 37:29 e re: “Baloki e ba beng ba naxa, ba dula mo xo yôna ka mehla le ka mehla.” Rena le bao ba neilwego bophelo bja go se hwe legodimong re tutuetšwa ke kholofetšo ye go bolela gore: “Mediro ya gago ke e megolo le e makatšago, Jehofa Modimo Ra-matla-ohle. Ditsela tša gago ke tša go loka le therešo, wena Kgoši ya bosafelego. Ke mang yo ruri a ka se kego a boifa wena, Jehofa, gomme a reta leina la gago, gobane ke wena o nnoši yo a botegago?”—Kutollo 15:3, 4.

Na o kganyoga go hwetša mpho e kgahlišago ya bophelo bjo bo sa felego? Ge e ba go le bjalo, o swanetše go ipontšha o botega e bile o e-kwa “Kgoši ya bosafelego.” O swanetše go ithuta ka Jehofa le yoo go dirilwego gore bophelo bjo bo bjalo bo kgonege ka yena e lego Jesu Kriste. Bohle bao ba ikemišeditšego go amogela ditekanyetšo tša Modimo tša mabapi le se se lokilego le se se fošagetšego, ba tla newa mpho ya “bophelo bjo bo sa felego.”—Johane 17:3.

[Mongwalo wa ka tlase]

[Lepokisi/Seswantšho go letlakala 5]

Toro e sa Fetogego

Thetogale ya Gilgamesh, kanegelo ya Mesopotamia yeo go naganwago gore ke ya morago seketeng sa bobedi sa nywaga B.C.E., e hlalosa ka mogale yo a ilego a tsoma bofsa bja ka mo go sa felego. Baegipita ba bogologolo ba be ba gwamiša bahu, ka kgopolo ya gore moya, woo ba bego ba dumela gore ga o hwe, o tla tla o kgona go diriša mmele woo gape. Ka baka leo, mabitla a mangwe a ba Egipita a be a na le dilo tšohle tšeo ba bego ba nagana gore bahu ba tla di nyaka bophelong bjo bo bitšwago bja ka morago ga lehu.

Go bonala tumelo ya gore mmele ga o hwe gare ga ditsebi tša go telefatšwa ga bophelo tša Machina, e thomile mohlomongwe lekgolong la seswai la nywaga B.C.E., gomme kgonagalo ya go bo hwetša ka go diriša dipheko tša maleatlana, e thomile lekgolong la bone la nywaga B.C.E. Ma-Yuropa le ma-Arabia a mehleng ya Mehla ya Magareng a ile a thoma le go leka go itswakela dipheko tša maleatlana tša go telefatša bophelo. Metswako e mengwe ya bona e be e e-na le matswai a arsenic, mercury le sebabole. Ga go tsebege gore ke ba bakae bao ba ilego ba ikgobatša ka go nwa metswako yeo!

Dipolelo tšeo le tšona di ilego tša tuma ka nako e nngwe ke tša mabapi le seo go thwego ke Mothopo wa Bofsa—sediba seo go bego go bolelwa gore se be se matlafatša bohle bao ba bego ba e-nwa meetse a sona.

 [Lepokisi/Diswantšho go letlakala 7]

Bophelo bjo bo sa Felego—Na bo tla Leša Bodutu?

Ba bangwe ge ba ganetša ba bolela gore bophelo bjo bo sa felego bo tla leša bodutu, mo e lego gore nako e sa felego e tla senywa ganyenyane-ganyenyane ka maitišo a se nago mohola ao a dirwago gantši. Mohlomongwe ba nagana gore bosafelego bo tla tlaleletšwa mekgweng ya gona bjale ya go phela go akaretšwa le maemo a lehono, tšeo go batho ba bantši di bego di ka bonala di leša bodutu e bile di se na morero. Lega go le bjalo, Modimo o holofetša gore Paradeiseng yeo a tlago go e tsošološa, batho ba “tlo thaba ka botlalô bya moláô.” (Psalme 37:11) Bophelo bjoo bo tla nea batho sebaka sa go monya tsebo ka tlholo ya Jehofa le go diriša nako yeo go kaonefatša bokgoni selong goba dilong tše di kgahlišago, dithuto gotee le mešomo yeo ga bjale ba dumago go e dira.

Dr. Aubrey de Grey, setsebi sa tša leabela Yunibesithing ya Cambridge yo a ilego a dira nyakišišo ya go telefatša bophelo, o re: “Lehono batho bao ba nago le thuto e kaone le nako ya go e diriša ga ba lewe ke bodutu le gona ga ba nagane gore ba ka hloka dilo tše difsa tšeo ba ka ratago go di dira.” Lega go le bjalo, Lentšu la Modimo le le buduletšwego le re: “Tirô ye Yêna Modimo a e diraxo, mathômô le mafêlô a yôna, motho xa a e lemoxe.”—Mmoledi 3:11.