Bontšha Gore o na le Tumelo ka Tsela Yeo o Phelago ka Yona

“Tumelo . . . ge e ba e se na mediro e hwile.”—JAKOBO 2:17.

1. Ke ka baka la’ng Bakriste ba pele ba ile ba ela hloko tumelo le mediro?

KA KAKARETŠO, Bakriste ba pele ba be ba bontšha gore ba na le tumelo ka tsela yeo ba bego ba phela ka yona. Morutiwa Jakobo o kgothaleditše Bakriste ka moka gore: “E-bang badiri ba lentšu, e sego bakwi feela.” O okeditše ka gore: “Bjalo ka ge mmele ka ntle le moya o hwile, le tumelo ka ntle le mediro e hwile.” (Jakobo 1:22; 2:26) Nywaga e ka bago e 35 ka morago ga ge a ngwadile seo, Bakriste ba bantši ba be ba tšwela pele ba hlatsela tumelo ya bona ka mediro e swanetšego. Eupša ka manyami, ba bangwe ba be ba sa dire bjalo. Jesu o ile a reta phuthego ya kua Simirina; lega go le bjalo, o boditše bontši bja bao ba lego phuthegong ya Sarede gore: “Ke tseba ditiro tša gago, gore o na le leina la gore o a phela, eupša o hwile.”—Kutollo 2:8-11; 3:1.

2. Bakriste ba swanetše go ipotšiša’ng mabapi le tumelo ya bona?

² Ka mo go swanetšego, Jesu o kgothaleditše bao ba lego kua Sarede—gomme a kgothaletša kutšwanyana bao ka morago ba bego ba tla bala mantšu a gagwe—gore ba hlatsele gore ba rata therešo ya Bokriste go swana le pele gomme ba phafoge moyeng. (Kutollo 3:2, 3) Yo mongwe le yo mongwe wa rena a ka ipotšiša potšišo ye: ‘Go thwe’ng ka mediro ya-ka? Na ditiro tša-ka di bontšha gabotse gore ke dira seo nka se kgonago go hlatsela tumelo ya-ka dilong tšohle tšeo ke di dirago, gaešita le dikarolong tšeo di sa tswalanego ka go lebanya le modiro wa boboledi goba diboka tša Bokriste?’(Luka 16:10) Go ka elwa hloko dikarolo tše dintši tša bophelo, eupša anke re hlahlobeng e tee feela: dipokano tša segwera, go akaretša le tšeo di diregago gantši ka moragonyana letšatšing la menyanya ya manyalo a Bokriste.

Dipokano tše Dinyenyane tša Segwera

3. Beibele e re’ng ka go ba gona dipokanong?

³ Bontši bja rena re thabela go laletšwa pokanong e thabišago ya Bokriste. Jehofa ke “Modimo yo a thabilego,” yo a nyakago gore bahlanka ba gagwe ba thabe. (1 Timotheo 1:11) O dirile gore  Salomo a akaretše therešo ye ka Beibeleng: “Nna ka rêta lethabô; ka xobane motho fá tlase xa letšatši xa a na se se botse, xe e se xo ja le xo nwa le xo thaba. Tšôna-tšeo a di bê naê, ditapišong tša xaxwe mehleng yeno.” (Mmoledi 3:1, 4, 13; 8:15) Re ka thaba ka tsela e bjalo nakong ya dijo tšeo re di jago re le lapa goba pokanong e nngwe e nyenyane ya barapedi ba therešo.—Jobo 1:4, 5, 18; Luka 10:38-42; 14:12-14.

4. Ke’ng seo motho yo a rulaganyago pokano a swanetšego go se kgahlegela?

⁴ Ge e ba o rulaganya pokano e bjalo e bile o ikarabela ka yona, o swanetše go ela hloko seo o se rulaganyago, gaešita le ge o laletša badumedi ba mmalwa feela gore le tle le thabele dijo le poledišano ya segwera le le gotee. (Baroma 12:13) O swanetše go kgonthišetša gore “dilo ka moka di [dirwa] ka bothakga,” ka tlhahlo ya “bohlale bjo bo tšwago godimo.” (1 Bakorinthe 14:40; Jakobo 3:17) Moapostola Paulo o ngwadile gore: “Go sa šetšwe gore le a ja goba le a nwa goba le dira selo le ge e le sefe se sengwe, dirang dilo tšohle bakeng sa letago la Modimo. Phemang go ba ba kgopišago.” (1 Bakorinthe 10:31, 32) Ke dikarolo dife tšeo di nyakago go elwa hloko ka mo go kgethegilego? Go di ela hloko e sa le pele go ka kgonthišetša gore seo wena le baeng ba gago le tlago go se dira se tla bontšha gore le dira seo le se dumelago.—Baroma 12:2.

Pokano e tla ba ya Mohuta Mang?

5. Ke ka baka la’ng morulaganyi wa pokano a swanetše go naganišiša ka kelohloko ge e ba a tla dira gore dino-tagi le mmino di hwetšagale goba go se bjalo?

⁵ Barulaganyi ba bantši ba dipokano ba ile ba lebeletšana le taba ya ge e ba ba swanetše go nea batho bao ba tlilego pokanong dino-tagi. Ga se dino-tagi tšeo di dirago gore pokano e be e agago. Gopola gore Jesu o neile sehlopha se se lekanego sa batho dijo tšeo di bego di e-tšwa go yena—o ile a atiša dinkgwa le dihlapi. Pego ye ga e bolele gore o ile a se nea beine ka tsela ya mohlolo, gaešita le ge re tseba gore o be a kgona go dira bjalo. (Mateo 14:14-21) Ge e ba o dira phetho ya gore go tla ba le dino-tagi pokanong yeo o e rulaganyago, lekanyetša gore go tla ba le tše kaaka’ng, gomme o kgonthišetše gore go ba le dino tše di se nago tagi bakeng sa bao ba ka di thabelago. (1 Timotheo 3:2, 3, 8; 5:23; 1 Petro 4:3) O se ke wa tsoga o dirile gore motho le ge e le ofe a ikwe a gapeletšega go nwa selo seo se ka lomago “bo-ka nôxa.” (Diema 23:29-32) Go thwe’ng ka mmino goba go opela? Ge e ba pokano ya lena e tla akaretša mmino, ga go pelaelo gore o tla kgetha dikoša ka kelohloko, o ela hloko morethetho le mantšu a wona. (Bakolose 3:8; Jakobo 1:21) Bakriste ba bantši ba hweditše gore go bapala Kingdom Melodies goba gaešita le go opela dikopelo tše bjalo ba le gotee go kgothaletša moya o thabišago. (Baefeso 5:19, 20) Le gona ke therešo gore o swanetše go ela hloko nako le nako gore mmino ga o llele godimo kudu e le gore o se ke wa šitiša poledišano e thabišago goba go šitiša baagišani le ge e le bafe.—Mateo 7:12.

6. Morulaganyi wa pokano a ka bontšha bjang gore tumelo ya gagwe e a phela ge go tliwa tabeng ya dipoledišano goba mediro e mengwe?

⁶ Pokanong ya segwera, Bakriste ba ka boledišana ka ditaba tše di fapa-fapanego, ba bala taba e  itšego ka go hlaboša goba go laodiša diphihlelo tše di thabišago. Ge e ba poledišano e fapoga, morulaganyi wa pokano a ka e bušetša tseleng ka bohlale. Le gona o swanetše go ela hloko gore ga go na motho yo a bolelago kudu go feta ba bangwe. Ge e ba a bona seo se direga, ka bohlale a ka bolela maikwelo a gagwe gomme a akaretša ba bangwe poledišanong, mohlomongwe ka go dira gore bana le bona ba bolele goba a thome taba yeo e nyakago gore go bolele batho ba fapa-fapanego. Mohuta wo wa pokano o tla thabiša ba banyenyane le ba bagolo. Ge e ba o sepediša dilo ka bohlale le ka temogo, bjalo ka morulaganyi, bao ba lego gona ba tla ‘tseba gore o yo a leka-lekanego.’ (Bafilipi 4:5) Ba tla lemoga gore tumelo ya gago e a phela le gore e tutuetša dikarolo ka moka tša bophelo bja gago.

Ditirelo tša Manyalo le Menyanya ya Manyalo

7. Ke ka baka la’ng go rulaganya manyalo le dipokano tše di tswalanago le ona go nyaka go elwa hloko?

⁷ Tiragalo e nngwe e kgethegilego yeo e ka thabelwago ke lenyalo la Bokriste. Bahlanka ba Modimo ba bogologolo, go akaretša Jesu le barutiwa ba gagwe, ba ile ba tšea karolo ka go rata ditiragalong tše bjalo tše di thabišago, tše di akaretšago go ja gotee. (Genesi 29:21, 22; Johane 2:1, 2) Lega go le bjalo, dinakong tša morago bjale, diphihlelo di bontšhitše gabotse gore dipokano tša segwera tše di tswalanago le manyalo di nyaka boiteko bjo bo kgethegilego e le gore di bonagatše kahlolo e botse le teka-tekano ya Bokriste. Lega go le bjalo, tše ke dibopego tše di tlwaelegilego tša bophelo tše di neago Mokriste sebaka sa go bontšha gore o na le tumelo.

8, 9. Dilo tšeo di dirwago manyalong a mantši di bontšha bjang seo re se balago go 1 Johane 2:16, 17?

⁸ Batho ba bantši bao ba sa tsebego melao ya motheo ya Modimo goba bao ba se nago taba le yona ba lebelela monyanya wa lenyalo e le nako ya go feteletša dilo, goba mohlomongwe e le nako ya go lokafatša go feteletšwa ga dilo. Makasineng o mongwe wa Yuropa, mosadi yo a bego a sa tšwa go nyalwa o boletše mabapi le lenyalo la gagwe leo e kego ke la ka bogošing gore: ‘Re be re sepela ka karikana yeo e bego e gogwa ke dipere tše nne gomme e latelwa ke dikarikana tše dingwe tše 12 tšeo di bego di gogwa ke dipere le karikana yeo e bego e rwele sehlopha sa baletši bao ba bego ba bapala mmino. E bile go be go e-na le dijo tše di rothišago mare le mmino o thabišago; e be e le botse bjo bo fetišišago. E be e le sona seo ke bego ke se nyaka, go ba kgošigadi ya letšatši leo.’

⁹ Gaešita le ge metlwae ya dinaga e fapana, maikwelo a bjalo a fo ba a kgonthišetša seo moapostola Johane a se ngwadilego ge a re: “Dilo tšohle tše di lego lefaseng—kganyogo ya nama le kganyogo ya mahlo le pontšho ya bompogeng ya dilo tša motho tša boiphedišo—ga di tšwe go Tate, eupša di tšwa lefaseng.” Na o ka akanya banyalani ba Bakriste bao ba godilego ka tsebo ba nyaka go ba le lenyalo la maemo a godimo leo le nago le monyanya o kgabišitšwego ka mo go feteletšego? Go e na le moo, ba swanetše go rulaganya dilo ba dutše ba nagana ka taba ya gore “yo a dirago thato ya Modimo o dula a le gona ka mo go sa felego.”—1 Johane 2:16, 17.

10. (a) Ke ka baka la’ng go rulaganya go le bohlokwa e le gore lenyalo le be le teka-tekano? (b) Diphetho di swanetše go dirwa bjang mabapi le bao ba laletšwago?

¹⁰ Banyalani ba Bakriste ba swanetše go dira dilo ka tsela e bohlale le e leka-lekanego, gomme Beibele e ka ba thuša. Gaešita le ge letšatši la lenyalo e le le le kgethegilego, ba a tseba gore e fo ba mathomo a bophelo bja lenyalo la Bakriste ba babedi bao ba nago le kholofelo ya bophelo bjo bo sa felego. Ga ba gapeletšege go ba le monyanya o mogolo wa lenyalo. Ge e ba ba kgetha go ba le pokano, ba swanetše go bala ditshenyagalelo tša pokano le mohuta wa pokano yeo ba tla bago le yona. (Luka 14:28) Bophelong bja bona bja Bokriste ge ba le gotee, monna e tla ba hlogo go ya ka Mangwalo. (1 Bakorinthe 11:3; Baefeso 5:22, 23) Ka baka leo, monyadi ke yena a ikarabelago kudu ka monyanya wa lenyalo. Ke therešo gore o tla boledišana le mosadi wa gagwe wa ka moso ka tsela e lerato mabapi le ditaba tše bjalo ka gore ke mang yo ba nyakago gore a laletšwe monyanyeng wa lenyalo le yo ba tla kgonago go mo laletša. Go ka no se kgonege goba go ka no pala gore bagwera ka moka le ba leloko ba laletšwe; ka baka leo, diphetho tše dingwe di swanetše go dirwa ka teka-tekano. Banyalani ba swanetše go holofela gore ge ba sa kgone go laletša Bakriste-gotee ba bangwe, Bakriste bao ba tla kwešiša gomme ba ka se ke ba kgopišega.—Mmoledi 7:9.

 “Molaodi wa Monyanya”

11. “Molaodi wa monyanya” a ka bapala karolo efe monyanyeng?

¹¹ Ge e ba banyalani ba kgetha go ba le pokano e le gore ba keteke lenyalo, ba ka kgonthišetša bjang gore tiragalo ye e dula e e-na le seriti? Ka nywaga e mentši, Dihlatse tša Jehofa di lemogile bohlale bja go akaretša karolo yeo go boletšwego ka yona mabapi le monyanya wo Jesu a ilego a ya go wona kua Kana. Go be go e-na le “molaodi wa monyanya,’ yo ruri e bego e le modumedi-gotee yo a ikarabelago. (Johane 2:9, 10) Ka mo go swanago, monyadi yo bohlale o tla kgetha ngwanabo rena wa Mokriste yo a godilego ka tsebo gore a sware karolo ye ya bohlokwa. Ge molaodi a boditšwe dikganyogo tša monyadi le dilo tšeo a di ratago, a ka sepediša dilo gabotse pele ga pokano le nakong ya yona.

12. Ke’ng seo monyadi a swanetšego go se ela hloko mabapi le go dirišwa ga dino-tagi?

¹² Ka go dumelelana le seo se ahla-ahlilwego go serapa 5, banyalani ba bangwe ba kgetha go se akaretše dino-tagi monyanyeng wa lenyalo bakeng sa go phema go šitiša go thabiša le go atlega ga tiragalo ye. (Baroma 13:13; 1 Bakorinthe 5:11) Lega go le bjalo, ge ba akaretša dino-tagi, monyadi o tla kgonthišetša gore di ba gona goba di hwetšagala ka mo go lekanetšego. Monyanyeng wa lenyalo leo Jesu a ilego a ya go lona kua Kana go be go e-na le beine, le gona o ile a direla bao ba bego ba le gona beine e theogelago. Se se thabišago ke gore molaodi wa monyanya woo o boletše gore: “Motho yo mongwe le yo mongwe o ntšha beine e bose pele, ya re ge batho ba tagilwe a ntšha e sego bose. Wena o bolokile beine e bose go fihla bjale.” (Johane 2:10) Ka kgonthe, Jesu ga se a ka a kgothaletša botagwa, ka ge a be a lebelela go dira bjalo e le mo go fošagetšego. (Luka 12:45, 46) Ge molaodi a be a bontšha go makatšwa ke go ba bose ga beine ye, o dirile gore go be molaleng gore o ile a bona maemo a mangwe moo baeng ba ilego ba tagwa lenyalong. (Ditiro 2:15; 1 Bathesalonika 5:7) Ka baka leo, monyadi le Mokriste yo a ka botwago yo monyadi a mo kgethago gore e be molaodi wa monyanya ba swanetše go kgonthišetša gore bohle bao ba lego gona ba latela tlhahlo ye e kwagalago e rego: “Le se ke la tagwa ke beine, moo go nago le kgobogo.”—Baefeso 5:18; Diema 20:1; Hosea 4:11.

13. Ke’ng seo banyalani ba swanetšego go se ela hloko ge ba rulaganya go ba le mmino monyanyeng wa lenyalo, gona ka baka la’ng?

¹³ Go etša ge go le bjalo ka dipokano tše dingwe, ge e ba go tla ba le mmino, go swanetše go elwa hloko gore o se ke wa llela godimo kudu e le gore batho ba ka kwana ge ba boledišana. Mogolo yo mongwe wa Mokriste o boletše gore: “Ge go dutše go fsifala, ge poledišano e thoma go ba e kgothatšago goba go thoma go binwa, ka dinako tše dingwe mmino o thoma go llela godimo. Seo se thomilego e le mmino o llelago fase se ka ba mmino o llelago godimo gomme sa šitiša poledišano. Monyanya wa lenyalo o nea batho sebaka sa go ba le segwera se se thabišago. Ruri e be e tla ba mo go nyamišago ge mmino o llelago godimo o be o ka senya sebaka se!” Le gona mo, monyadi le molaodi wa monyanya ba swanetše go dira dilo ka tsela ya go bontšha boikarabelo, e sego ka go tlogelela boikarabelo go babapadi ba mmino gore ba laole mohuta wa mmino le lešata la wona, e ka ba bao ba hirilwego goba bao ba sa hirwago. Paulo o ngwadile gore: “Selo le ge e le sefe seo le se dirago ka lentšu goba ka modiro, le direng tšohle leineng la Morena Jesu.” (Bakolose 3:17) Ge baeng ba e-ya gae ka morago ga monyanya wa lenyalo, na ba tla gopola ka mmino e le wo o bontšhago gore banyalani ba be ba dira dilo tšohle leineng la Jesu? Go swanetše go ba bjalo.

14. Ke’ng seo Bakriste ba swanetšego go thabela go se gopola mabapi le go thabiša ga monyanya wa lenyalo?

¹⁴ Ee, monyanya wa lenyalo wo o rulagantšwego gabotse o ka gopolwa ka tsela e thabišago. Adam le Edyta, bao ba šetšego ba nyalane ka nywaga e 30, ba boletše ka monyanya o mongwe wa lenyalo gore: “Ruri o be o kwagala gore ke wa Bokriste. Go be go e-na le dikopelo tšeo di bego di tumiša Jehofa le boithabišo bjo bongwe bjo bobotse. Go bina le mmino e be e se dilo tša bohlokwa  kudu. Go be go thabiša e bile go kgothatša, gomme tšohle di be di dumelelana le melao ya motheo ya Beibele.” Ee, monyadi le monyadiwa ba ka dira mo gontši go bontšha gore ba hlatsela tumelo ya bona ka mediro.

Dimpho tša Lenyalo

15. Ke keletšo efe ya Beibele yeo e ka dirišwago mabapi le dimpho tša lenyalo?

¹⁵ Go tlwaelegile dinageng tše dintši gore bagwera le ba leloko ba nee bao ba nyalanago dimpho. Ge e ba o kgetha go dira bjalo, o swanetše go gopola’ng? Gopola seo moapostola Johane a se boletšego mabapi le “pontšho ya bompogeng ya dilo tša motho tša boiphedišo.” Ga se a ka a tswalanya pontšho e bjalo le Bakriste bao ba bonagatšago tumelo ya bona ka mediro, eupša o e tswalantše le ‘lefase le le fetago.’ (1 Johane 2:16, 17) Ka go dumelelana le mantšu a buduletšwego a Johane, na banyalani bao ba sa tšwago go nyalana ba swanetše go tsebiša phatlalatša maina a bao ba ba neilego dimpho? Bakriste ba tšwago Matsedonia le Akaya ba ile ba dira meneelo bakeng sa bana babo bona ba kua Jerusalema, eupša ga go na se se bontšhago gore maina a bona a ile a phatlalatšwa. (Baroma 15:26) Bakriste ba bantši bao ba rekago mpho ya lenyalo ba ka rata go dula ba sa tsebje go e na le go dira bompogeng bjo bo sa nyakegego. Tabeng ye, ela hloko keletšo ya Jesu yeo e hwetšwago go Mateo 6:1-4.

16. Batho bao ba sa tšwago go nyalana ba ka phema bjang go kgopiša ba bangwe mabapi le dimpho tša lenyalo?

¹⁶ Go bolela maina a batho bao ba ba neilego dimpho go ka ‘tsoša diphenkgišano’ mabapi le gore ke mpho efe yeo e lego kaone le e bitšago kudu. Ka gona, Bakriste ba bohlale bao ba sa tšwago go nyalana ba tla phema go tsebiša phatlalatša maina a bao ba ba neilego dimpho. Go tsebiša maina a bao ba ba neilego dimpho go ka nyamiša ba bangwe bao mohlomongwe ba sa kgonego go nea dimpho. (Bagalatia 5:26; 6:10) Ke therešo gore ga se phošo gore monyadi le monyadiwa ba tsebe gore mpho e tšwa go mang. Mohlomongwe ba ka tseba seo ge ba bona karata e swanetšego yeo e sepedišanago le mpho eupša e sa balwe phatlalatša. Ge re reka, re nea e bile re amogela dimpho tša lenyalo, ka moka ga rena re na le sebaka sa go bontšha gore gaešita le tabeng yeo ya ka sephiring, tumelo ya rena e kgoma seo re se dirago. *

17. Bakriste ba swanetše go ba le pakane efe mabapi le tumelo le mediro ya bona?

¹⁷ Go hlatsela tumelo ya rena ruri go akaretša se se fetago go phela ka boitshwaro, go ba gona dibokeng tša Bokriste le go tšea karolo modirong wa boboledi. Eka yo mongwe le yo mongwe wa rena a ka ba le tumelo e phelago yeo e kgomago tšohle tše re di dirago. Ee, re ka bontšha tumelo ya rena ka ditiro tšeo di ‘dirwago ka botlalo,’ go akaretša le dikarolong tša bophelo tšeo di ahla-ahlilwego ka mo godimo.—Kutollo 3:2.

18. Mantšu a lego go Johane 13:17 a itlhatsela bjang e le a therešo mabapi le menyanya ya Bokriste le dipokano?

¹⁸ Ka morago ga ge Jesu a beetše baapostola ba gagwe bao ba botegago mohlala o mobotse ka tiro e nyatšegago ya go ba hlapiša maoto, o itše: “Ge e ba le tseba dilo tše, le a thaba ge e ba le di dira.” (Johane 13:4-17) Lefelong leo re dulago go lona lehono, go ka no se nyakege goba e ka ba mo go sa tlwaelegago go hlapiša maoto a motho yo mongwe, go swana le moeng yo a ka bago a re etetše. Lega go le bjalo, go etša ge re etše hloko sehlogong se, go na le dikarolo tše dingwe tša bophelo tšeo go tšona re ka bontšhago tumelo ka go direlana ditiro tše lerato le tša go naganelana, go akaretša tšeo di tswalanago le dipokano tša segwera le manyalo a Bokriste. Go bjalo go sa šetšwe gore re a nyalana goba re baeng lenyalong goba re pokanong e itšego ya Mokriste yo a nyakago go bontšha tumelo ya gagwe ka ditiro.

[Mongwalo wa ka tlase]

O be o tla Araba Bjang?

O ka hlatsela tumelo ya gago bjang

• ge o rulaganya pokano ya segwera?

• ge o rulaganya tirelo ya lenyalo goba monyanya wa lenyalo?

• ge o nea goba o amogela dimpho?

[Dipotšišo tša Thuto]

[Seswantšho go letlakala 24]

Gaešita le ge le laletša batho ba mmalwa feela, hlahlwang ke “bohlale bjo bo tšwago godimo”