Go Hwetša Mahumo a Moya Kua Guinea

KA NYWAGA-KGOLO e mentši, banyakišiši ba ile ba bea maphelo a bona kotsing e le ge ba tsoma matsaka le mahumo. Batho ba se nago poifo bao ba ilego ba fihla Guinea, ka Afrika Bodikela, ba ile ba hwetša mehuta e mebedi ye e fapanago kudu ya mahumo—a bonalago le a moya. Naga yeo e humilego ka ditaamane, gauta, borale le bauxite ya maemo a godimo (yeo aluminum e ntšhwago go yona), ke legae la badudi ba Guinea ba fetago dimilione tše senyane.

Le ge madumedi a Bojakane e se a mantši mo nageng ye, borapedi ke bja bohlokwa gomme ba bantši ba tšeela matsaka a moya godimo. Ge e le gabotse matsaka a ke eng? Ke bahlanka ba Jehofa ba botegago, bao ba hlalositšwego go Hagai 2:7 e le “matsaka a dithšaba ka moka.”

Matsaka a Moya

Go epa molete o išago bakeng sa go tsoma matsaka a fihlilwego go nyaka boiteko bjo bogolo. Ka mo go swanago, go hwetša matsaka a moya bodireding bja Bokriste go nyaka boiteko bjo bogolo. Kua Guinea, modiro wa go bolela ka Mmušo o thomile mathomong a bo-1950 ka bogareng bja naga gomme wa se ke wa fihla motse-mošate e lego Conakry, go ba go fihla mathomong a bo-1960. Ga bjale nageng ka bophara go na le Dihlatse tša Jehofa tše 900 diphuthegong tše 21 go akaretša le dihlotswana.

Baromiwa ba gorogile ka 1987 gomme ba šoma gotee le phuthego yeo e bego e le yona e nnoši kua Conakry. Ga bjale kua motse-mošate le ka bogareng bja naga go na le baromiwa ba fetago 20. Ka mafolofolo ba matlafatša diphuthego le go šoma le bana babo rena ba gona moo modirong wa boboledi.

Luc yo a dulago Conakry, o ile a thabišwa ke  go ithuta Beibele le Albert, mofsa yo e lego ngaka ya sekgowa. Albert o be a ile a tsoma therešo ya bodumedi dikerekeng tše di fapa-fapanego, gomme o be a dirišana le meoya. O be a rwala palamonwana yeo a e filwego ke dinoge ka kgonthišetšo ya gore e tla mo tlišetša mahlatse. Ka morago ga go nyamišwa gantši ge a be a tsoma therešo, Albert o ile a lahla palamonwana ya gagwe gomme a rapela ka gore: “Modimo ge e ba o le gona, dira gore ke kgone go go tseba le go go hlankela. Go sego bjalo, ke tla fo phela bophelo bja-ka go ya kamoo ke ratago ka gona.” Nakwana ka morago ga moo, Albert o be a etetše ga kgaetšedi’agwe gomme o ile a utswa ka tsebe ge yo mongwe wa Dihlatse tša Jehofa a be a swere thuto ya Beibele le motlogolo wa gagwe. Ntle le go senya nako, go ile gwa dirwa dithulaganyo tša gore Luc a ithute Beibele le Albert.

Luc o be a thabela go swara thuto gomme beke e nngwe le e nngwe o be a sepela dikhilomithara tše hlano go ya le tše hlano go boa. Le ge Luc a be a se a rutega gakaalo, Albert e lego sealoga sa yunibesithi, o be a kgahlilwe kudu ke tumelo ya gagwe e tiilego Mangwalong le tsela ya gagwe e kwešišegago ya go a diriša. Albert o ile a thaba gakaakang ge a ithuta gore matshwenyego a batho ga a bakwe ke Modimo, go e na le moo, morero wa Jehofa ke go fediša matshwenyego ka moka le go dira gore lefase le e be paradeise. (Psalme 37:9-11) Ditherešo tša Beibele gotee le boitshwaro bjo bobotse bjoo a bo lemogilego gare ga ditho tša phuthego di ile tša kgoma pelo ya Albert.

Lega go le bjalo, go swana le ge taamane e swanetše go segwa gabotse ke babetli ba yona ba nago le bokgoni bakeng sa gore e phadime, Albert le yena o be a swanetše go tlogela mekgwa e mentši ya lefase e le gore a dumelelanye bophelo bja gagwe le ditekanyetšo tša Modimo tša go loka. O ile a kgaotša go dirišana le dinoge, a kgaotša go nwa bjalwa ka mo go feteletšego a ba a kgaotša le go petšha. Albert o ile a hwetša go le thata go kgaotša go kgoga. Ge mafelelong a rapela Jehofa ka mo go tseneletšego gore a mo thuše, o ile a kgona go kgaotša. Dikgwedi tše tshela ka morago, o ile a ngwadiša lenyalo la gagwe ka molao. Mosadi wa gagwe o ile a thoma go ithuta Beibele. Ga bjale ka bobedi ke bahlanka ba Jehofa ba kolobeditšwego.

Taamane e nngwe ya moya ke Martin. Ge a be  a e-na le nywaga e 15, o ile a thoma go ithuta Beibele le Guéckédou. Batswadi ba gagwe ba Makatholika ba be ba mo ganetša go ya dibokeng tša Dihlatse tša Jehofa. Ba ile ba senya dipuku tša gagwe tšeo di theilwego Beibeleng, ba mmetha gomme ba mo raka ka gae. Go swana le ge taamane e bopša ge khapone e e-ba ka tlase ga kgatelelo e matla, ka mo go swanago, ka baka la kganetšo Martin le yena o ile a tielela go rata ditherešo tša Beibele. Ge nako e dutše e e-ya, boemo bja kgopolo bja batswadi ba gagwe bo ile bja fetoga, gomme o ile a boela gae. Ke’ng seo se dirilego gore batswadi ba gagwe ba fetoše dikgopolo? Ba ile ba lemoga phapano e kgolo boitshwarong bja Martin le bja bana babo, bao ba bego ba thomile go ba le moya wa borabele le go ba le dikopano tša botona le botshadi tše di gobogilego. Ka ge tatagwe a be a kgodišegile gore bodumedi bjo bofsa bja Martin bo be bo mo hola, o ile a dumelela ditho tša phuthego di tsena ka gae. Mmago Martin o lebogile bana babo rena gantši bakeng sa seo ba se dirilego go thuša morwa wa gagwe. Ka ge a kolobeditšwe a e-na le nywaga e 18, Martin ka morago o ile a ya Sekolong sa Tlwaetšo sa Bodiredi gomme ga bjale o hlankela e le modiredi wa mmulamadibogo yo a kgethegilego.

Mahumo a Moya a Tšwago Dinageng tše Dingwe

Le ge Guinea e romela matsaka a yona dinageng tše dingwe, a mangwe a mahumo a yona a moya a tšwa dinageng tše dingwe. Batho ba bantši ba tla ba e-tšwa ditšhabeng tše dingwe tša Afrika, gantši ka mabaka a tša boiphedišo. Ba bangwe ba tlile ka ge ba tšhaba dintwa tšeo di tšerego lebaka le letelele le tše sehlogo.

Ernestine, yo a tšwago Cameroon o fihlile Guinea nywageng e 12 e fetilego. O be a ithuta le Dihlatse tša Jehofa gomme ka nywaga e mentši a e-ba gona dibokeng, eupša a sa kolobetšwe. Ka 2003, o ile a sekiša megokgo ge a be a lebeletše kolobetšo kopanong ya tikologo ya Dihlatse tša Jehofa. A ikwa a le molato, o ile a rapela Jehofa a re: “Ke na le nywaga e 51 gomme ga go na se sebotse seo ke go diretšego sona. Ke rata go go hlankela.” Ka morago ga moo, Ernestine o ile a dira  dilo ka go dumelelana le thapelo ya gagwe ya boikokobetšo. O ile a hlalosetša monna yo a bego a dula le yena gore ba tla dula gotee ge feela ba ka nyalana ka molao. Monna yoo o ile a dumela, gomme ka morago Ernestine o ile a tšwa megokgo ya lethabo ge a be a kolobetšwa ka November 2004.

Ga e sa le go tloga mathomong a bo-1990, Guinea e amogetše bafaladi ba dikete ba tšwago Liberia le Sierra Leone, go akaretša le bahlanka ba Jehofa ba makgolo. Kapejana ka morago ga go fihla kampeng ya bafaladi, bana babo rena ba ile ba dira dithulaganyo tša gore ba bokane ka mehla, ba rulaganya modiro wa go dira boboledi le go aga Holo ya Mmušo. Batho ba bangwe ka dikampeng tša bafaladi ba fetogile bahlanka ba Jehofa. Isaac ke yo mongwe wa bona. Ka morago ga kolobetšo ya gagwe, go ile gwa tšwelela sebaka sa gore a boele mošomong wa gagwe khamphaning e kgolo ya Liberia yeo a bego a šoma go yona. Go e na le moo, o ile a kgetha go šala e le mmulamadibogo wa ka mehla ka kampeng ya bafaladi ya Lainé. O hlalosa gore: “Ga bjale ga go nyakege gore ke kgopele tumelelo ya go ya dibokeng goba kopanong go mothwadi. Ke hlankela Jehofa ka bolokologi.” Ka December 2003, kopano ya selete e ile ya swarelwa bafaladi ba Dihlatse ba 150 bao ba dulago gare ga bafaladi ba 30 000, ka kampeng ye yeo e lego lekatana. Ka lethabo, ba 591 ba ile ba ba gona, go akaretša le difoa tše 9 tšeo di ilego tša thabela lenaneo ka polelo ya diatla. Batho ba 12 ba ile ba kolobetšwa. Bana babo rena ba ile ba leboga kudu maiteko ao a ilego a dirwa bakeng sa gore ba hwetše dijo tša moya.

“Matsaka” a Dira Diphetogo tše di Swanetšego

Ga go na lepheko leo e ka bago le legolo go ka šitiša bao ba tsomago gauta le ditaamane. Lega go le bjalo, go a thabiša go bona maiteko ao a dirwago ke bao ba sa tšwago go thoma go kopanela, a go fenya ditšhitišo ka moka e le gore ba hlankele Jehofa. Ela hloko phihlelo ya Zainab.

Ge Zainab a be a e-na le nywaga e 13, o ile a dirwa lekgoba ka kgapeletšo. Go tloga nageng ya gabo ka Bodikela bja Afrika o ile a išwa Guinea. Ge a e-na le nywaga e 20, o ile a kwa molaetša wa Beibele. O be a ikemišeditše go diriša seo a bego a ithuta sona.

Go be go le thata go Zainab gore a be gona dibokeng tša Bokriste tša borapedi. Eupša o be a rata diboka kudu gomme o be a ikemišeditše go se di foše. (Baheberu 10:24, 25) O be a uta dipuku tša gagwe ka ntle bakeng sa gore a tle a di tšee ge a e-ya dibokeng. Ka makga a mmalwa, o ile a bethwa o šoro ke bao ba ipitšago beng ba gagwe ge a be a e-tšwa dibokeng.

Maemo ka morago a ile a fetoga gomme Zainab o ile a lokollwa. Kapejana o ile a thoma go ba gona dibokeng ka moka, tšeo di mo thušitšego go gola moyeng ka pela. O ile a gana mošomo o lefago tšhelete e ntši wo o bego o tla mo palediša go ya dibokeng moo a bego a tla hwetša thuto ya Bokriste. O ile a ingwadiša Sekolong sa Bodiredi sa Pušo ya Modimo, a ba mogoeledi wa Mmušo yo a sego a kolobetšwa gomme ka morago o ile a bontšha boineelo bja gagwe go Jehofa ka kolobetšo ya meetseng. Kapejana ka morago ga moo o ile a tsenela tirelo ya bobulamadibogo bja go thuša. Dikgwedi tše tshela ka morago, o ile a kgopela go hlankela e le modiredi wa mmulamadibogo wa nako e tletšego.

Motho yo a thabelago o ile a bolela ka morago ga gore a be gona dibokeng tše mmalwa gore: “Ge ke le mo ke ikwa ke sa hloke selo.” Le ge batho ba bantši ba kgahlwa feela ke mahumo a dilo tše di bonagalago a Guinea, bao ba ratago Jehofa ba tsoma lehumo la moya ka mafolofolo. Ee, lehono “matsaka a dithšaba ka moka” a retologela borapeding bja Jehofa bjo bo sekilego!

[Lepokisi go letlakala 8]

GUINEA - 2005

Tlhora ya palo ya Dihlatse: 883

Dithuto tša Beibele: 1 710

Bao ba bilego gona segopotšong: 3 255

[Mebapa go letlakala 8]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

GUINEA

Conakry

SIERRA LEONE

LIBERIA

[Seswantšho go letlakala 9]

Albert le Luc

[Seswantšho go letlakala 9]

Holo ya Mmušo kua Conakry

[Seswantšho go letlakala 10]

Ernestine

[Seswantšho go letlakala 10]

Martin

[Seswantšho go letlakala 10]

Zainab

[Mothopo wa Seswantšho go letlakala 8]

USAID