“Ke ka Baka La’ng re le mo?”

ELIE Wiesel yo a thopilego Sefoka sa Nobel e bile a phonyokgilego Polao e Sehlogo ya Nazi, o kile a re ye ke “potšišo ya bohlokwa kudu yeo batho ba swanetšego go ipotšiša yona.” Ke efe? Ke potšišo e rego: “Ke ka baka la’ng re le mo?”

Na o kile wa naganišiša ka potšišo ye? Ba bantši ba ile ba naganišiša ka yona, eupša ga ba hwetše karabo. Ge a be a leka go hwetša morero wa bophelo, radihistori wa Brithania e lego Arnold Toynbee o ngwadile gore: “Pakane ya kgonthe ya motho ke go tumiša Modimo le go Mo thabela ka mo go sa felego.”

Ka mo go kgahlišago, nywaga ya ka godimo ga e dikete tše tharo e fetilego, monna yo mongwe yo a bego a tsebja ka phišego ya gagwe ya go hlahloba bophelo, o be a šetše a hweditše karabo ya motheo ya potšišo ye. Kgoši Salomo yo bohlale o boletše gore: “A re kweng phêthêxô ya ditaba tšohle: Boifa Modimo, O lôtê taêlô tša xaxwe. Ké se se swanetšexo batho bohle.”—Mmoledi 12:13.

Molao wo wa motheo o ile wa thekgwa ke Morwa wa Modimo, Jesu Kriste. Ge a be a le lefaseng Jesu o ile a dira maiteko ka moka a gore a tagafatše Tatagwe wa legodimong. Go hlankela Mmopi wa gagwe go ile gwa humiša bophelo bja Jesu. Go ile gwa mo matlafatša, gwa mo dira gore a bolele mantšu a rego: “Dijo tša-ka ke gore ke dire thato ya yo a nthomilego le go phetha modiro wa gagwe.—Johane 4:34.

Ka gona, ke ka baka la’ng re le mo? Go swana le Jesu, Salomo le bahlanka ba bangwe ba bantši ba Modimo, re ka hwetša morero wa kgonthe le o thabišago wa bophelo ka go dira thato ya Modimo. Na o ka rata go tseba ka mo go oketšegilego mabapi le go rapela Modimo “ka moya le ka therešo”? (Johane 4:24) Dihlatse tša Jehofa motseng wa geno di tla thabela go go thuša go araba potšišo ye e rego, “Ke ka baka la’ng re le mo?”