Na Ruri re ka Kgona go Tseba Modimo?

“SE SE BOLELA BOPHELO BJO BO SA FELEGO, GORE BA HWETŠE TSEBO KA . . . MODIMO A NNOŠI WA THEREŠO.”—JOHANE 17:3.

MOAPOSTOLA PAULO o goeleditše ka gore: “A bodiba bja mahumo a Modimo le bohlale le tsebo!” O okeditše ka gore: “Dikahlolo tša gagwe ke tšeo di sa nyakišišegego gomme ditsela tša gagwe ke tše di sa latišegego gakaakang!” (Baroma 11:33) Na go tšwa mantšung a re swanetše go phetha ka gore batho ba ka se kgone go hwetša bohlale le tsebo tša go swana le tšeo Modimo a nago le tšona, gomme ka baka leo re phethe ka gore ba ka se kgone go mo tseba le go tseba merero ya gagwe?

Baetapele ba bangwe ba bodumedi ba dumela gore go tseba Modimo ga go kgonege. The Encyclopedia of Religion e bolela mabapi le filosofi ye gore: “Modimo o feta tšohle tšeo di ka bago di tsebja ka yena. . . . Modimo a ka se ke a bitšwa ka leina goba a hlaloswa. Leina goba tlhaloso le ge e le efe e mo nea matla a lekanyeditšwego, eupša Modimo o phagametše ditlhaloso tšeo ka moka . . . ga tšona. . . . Ke yo a ka se kego a tsebja, ka gobane ga a kwešišege.” *

Go ya ka makasine wa Newsweek, batho ba bantši mekgatlong ya lefase ba sekametše “mohuteng o mongwe wa thuto,” yeo ge e le gabotse e rutago gore “go na le therešo e tee feela gomme therešo yeo ke gore ga go na therešo.”

Lega go le bjalo, ba bantši ba sa dutše ba sa hwetše dikarabo tša dipotšišo tša mabapi le morero wa bophelo. Ba bona mathata ao a kwešago bohloko a bodiidi, bolwetši le bošoro. Ba ka no gakantšhwa kudu ke go se tsepame ga bophelo. Ba ka hlologela go hwetša dikarabo eupša ge ba sa di hwetše, ba ka phetha ka gore ga di gona. Ka baka leo, bontši bja batho bao ba ikarotše bodumeding bjo bo rulagantšwego gomme ba inyakela tsela ya bona ka noši ya go rapela Modimo—ge e ba ba sa dutše ba dumela gore o gona.

Pono ya Beibele

Bao ba thekgago Beibele e bile ba sekametše tabeng ya go dumela gore Jesu Kriste ke Mmoleledi wa Modimo, ba swanetše go kgahlišwa ke go tseba pono ya Beibele. Mohlomongwe o sa gopola gore Jesu o kile a bolela ka ditsela tše pedi, ka ‘tsela e petleke le e phatlaletšego e išago tshenyegong’ le ka ‘tsela e pitlaganego  e išago bophelong.’ O ile a hlalosa kamoo re ka lemogago bao ba sepelago go e nngwe le e nngwe ya ditsela tše, ge a re: “Le tla ba tseba ka dienywa tša bona.” Ka dienywa tša mohuta ofe? E sego ka seo ba se bolelago eupša ka seo ba se dirago, go etša ge Jesu a hlalositše gore: “Ga se yo mongwe le yo mongwe yo a rego go nna, ‘Morena, Morena,’ a tlago go tsena mmušong wa magodimo, eupša go tla tsena yo a dirago thato ya Tate yo a lego magodimong.” Go bolela gore re dumela go Modimo ga se gwa lekana. Re swanetše go dira thato ya Modimo. Ge e le gabotse, re swanetše go ba le tsebo e nepagetšego ka seo thato ya Modimo e lego sona.—Mateo 7:13-23.

Jesu o bontšhitše gabotse gore go a kgonega gore batho ba ba hwetše tsebo ka Modimo. O boletše gore: “Se se bolela bophelo bjo bo sa felego, gore ba hwetše tsebo ka wena Modimo a nnoši wa therešo le ka yo o mo romilego, Jesu Kriste.” (Johane 17:3) Ka mo go kwagalago, re ka hwetša bohlale le tsebo tšeo Modimo a di utollago—eupša ge feela re dira boiteko bja go di tsoma. Lega go le bjalo, mpho ya Modimo go bao ba dirago bjalo ke bophelo bjo bo sa felego, ka gona go di tsoma go a putsa.

[Mongwalo wa ka tlase]

[Seswantšho go letlakala 4]

Jesu o boletše gore tsela e pitlaganego e iša bophelong