Daniel le Petšhe ya Gagwe ya Kopano

JESU o ile a kgalemela baetapele ba bodumedi ba go itira baloki bao ba ilego ba galefa ge ba be ba bona bašemane ba banyenyane ba tumiša Modimo phatlalatša. Jesu o ile a ba botšiša ka mo go swanetšego gore: “Na ga se la ka la bala gore, ‘O neile tumišo ka melomo ya bana le ba ba amušwago’?”—Mateo 21:15, 16.

Daniel wa nywaga e tshelelago, yo a kopanelago le phuthego ya leleme la se-Russia kua Jeremane, o hlatsela gore bafsa ba sa dutše ba tumiša Jehofa. O bile gona kopanong ya Dihlatse tša Jehofa kua Duisburg. Le e be e le lekga la bona la pele la go ba gona kopanong e bjalo e kgolo. Selo se sengwe le se sengwe e be e le se sefsa: hotele, lešaba le legolo la batheetši, go dula ka go kgosela matšatši a mararo, kolobetšo re sa bolele ka terama. Go thwe’ng ka Daniel? Boitshwaro bja gagwe e be e le mohlala.

Ge ba be ba le gae, ka Mošupologo wa ka morago ga kopano, Daniel o ile a tsoga e sa le mesong gore a ye sekolong sa bo-mapimpana. Eupša ke’ng seo se bego se sa le baking ya gagwe? Petšhe yeo e bego e mo hlaola e le yo mongwe wa batla-kopanong! Mmagwe o ile a mo hlalosetša gore: “Kopano e fetile. Lehono o ka ntšha petšhe.” Eupša Daniel o ile a re: “Ke nyaka gore yo mongwe le yo mongwe a bone gore ke be ke le kae le gore a tsebe seo ke ithutilego sona.” Ka gona letšatši ka moka sekolong sa bo-mapimpana o be a hlomile petšhe ya gagwe ka go ikgantšha. Ge morutišigadi wa gagwe a mmotšiša mabapi le yona, o ile a mo hlalosetša lenaneo la kopano.

Ka go dira bjalo, Daniel o be a latela mohlala wa bašemane le banenyana ba dikete bao ba ilego ba tumiša Jehofa phatlalatša go theoša le nywaga-kgolo.