Go Bontšha Tlhompho Bakeng sa Dipokano tša Rena tše Kgethwa
Go Bontšha Tlhompho Bakeng sa Dipokano tša Rena tše Kgethwa
“Ke tlo ba tliša fá thabeng e kxêthwa ya-ka, ka ba thabiša Ntlong ya-ka ya thapêlô.”—JESAYA 56:7.
1. Re na le mabaka afe a Mangwalo a go bontšha tlhompho e swanetšego bakeng sa diboka tša rena?
JEHOFA o kgobokantše batho ba gagwe, Bakriste ba tloditšwego le bagwera ba bona, gore ba mo rapele ‘thabeng ya gagwe e kgethwa.’ O dira gore ba ‘thabe’ ge ba le ka ‘ntlong ya gagwe ya thapelo,’ tempele ya gagwe ya moya, yeo e lego “ntlo ya thapelo ya ditšhaba ka moka.” (Jesaya 56:7; Mareka 11:17) Ditiragalo tše di bontšha gore borapedi bja Jehofa ke bjo bokgethwa, bo sekile e bile bo phagame. Ka go bontšha tlhompho e swanetšego bakeng sa diboka tša rena tša go ithuta le go rapela, re bontšha gore re na le pono e swanago le ya Jehofa ka dilo tše kgethwa.
2. Ke’ng seo se bontšhago gore Jehofa o be a lebelela lefelo leo a le kgethilego bakeng sa borapedi bja gagwe e le le lekgethwa, gomme Jesu o bontšhitše bjang gore le yena o be a le lebelela bjalo?
2 Isiraeleng ya bogologolo, lefelo leo Jehofa a ilego a le kgetha bakeng sa borapedi bja gagwe le be le swanetše go lebelelwa e le le lekgethwa. Tabarenakele le thoto ya yona le dibjana tša yona di be di swanetše go lebelelwa e le tše kgethegilego e le gore ‘di ka ba tše kgethwa-kgethwa.’ (Ekisodo 30:26-29) Dikarolo tše pedi tša ngwako wa kgwerano di be di bitšwa “Lefelo le Lekgethwa” le “Sekgethwa-kgethwa.” (Baheberu 9:2, 3) Ka morago tabarenakele e ile ya tšeelwa legato ke tempele ya kua Jerusalema. Bjalo ka lefelo leo Jehofa a bego a rapelwa go lona, Jerusalema e be e bitšwa gore ke ‘motse o mokgethwa.’ (Nehemia 11:1; Mateo 27:53) Nakong ya bodiredi bja gagwe bja lefaseng, Jesu ka boyena o ile a bontšha tlhompho e swanetšego bakeng sa tempele. O ile a galefela batho bao ka go hloka tlhompho ba bego ba diriša tempele bakeng sa merero ya kgwebo le bao ba bego ba phatša lebaleng la yona ge ba e-ya karolong e nngwe ya Jerusalema.—Mareka 11:15, 16.
3. Ke’ng seo se bontšhago go kgethega ga dipokano tša Baisiraele?
3 Baisiraele ba be ba bokana ka mehla bakeng sa go rapela Jehofa le go theetša ge go balwa Molao wa gagwe. Matšatši a itšego a menyanya ya bona a be a bitšwa pitšo-kgethwa goba mabothelele, e le go bontšha go kgethega ga dipokano tše. (Lefitiko 23:2, 3, 36, 37) Pokanong ya setšhaba mehleng ya Esera le Nehemia, Balefi ba be “ba hlathollêla sethšaba molaô.” Ka ge “batho ka moka ba be ba lla xe ba e-kwa se molaô o se bolêlaxo,” Balefi ba be ba “homotša batho ka moka, ba re: Homolang, xobane ’tšatši lé ké le lekxêthwa!” Ke moka Baisiraele ba ile ba keteka Monyanya wa Mešaša wa matšatši a šupago ka “lethabô le lexolo ka kudu.” Go oketša moo, “puku ya melaô ya Modimo ya hlwa è balwa ka matšatši ao ka moka; monyanya woo ba o dira ka matšatši a šupaxo. La seswai ya ba la pitšô e kxolo ka mokxwa wa monyanya woo.” (Nehemia 8:7-11, 17, 18) Ruri tše e be e le dipokano tše kgethwa tšeo di bego di nyaka gore bao ba lego gona ba theetše ka tlhompho.
Diboka tša Rena ke Dipokano tše Kgethwa
4, 5. Ke dibopego dife tša diboka tša rena tšeo di itlhatselago e le dipokano tše kgethwa?
4 Ke therešo gore Jehofa lehono ga a na motse wa kgonthe o mokgethwa mo lefaseng woo o nago le tempele yeo e neetšwego borapeding bja gagwe. Lega go le bjalo, ga se ra swanela go lebala gore diboka tša go rapela Jehofa ke dipokano tše kgethwa. Re bokana gararo ka beke e le gore re bale le go ithuta Mangwalo. Lentšu la Jehofa le a ‘hlathollwa,’ gomme go etša mehleng ya Nehemia, go dirwa gore ‘re le hlaologanye.’ (Nehemia 8:8) Diboka tša rena ka moka di thongwa le go phethwa ka thapelo, gomme go tše dingwe tša tšona re opela dikopelo tša go tumiša Jehofa. (Psalme 26:12) Diboka tša phuthego e tloga e le karolo ya borapedi bja rena gomme di nyaka gore re naganišiše ka tšona ka thapelo gomme re theetše ka tlhompho ge re le go tšona.
5 Jehofa o šegofatša batho ba gagwe ge ba bokana e le gore ba mo rapele, ba ithute Lentšu la gagwe le go thabela segwera se se agago sa Bokriste. Ge e le nako ya diboka, re ka kgonthišega gore moo ke mo ‘Jehofa a laelago tšhegofatšo gore e be gona.’ (Psalme 133:1, 3) Re amogela tšhegofatšo yeo ge re e-ba gona gomme re theetša lenaneo la moya ka kelohloko. Ka godimo ga moo, Jesu o itše: “Moo go lego ba babedi goba ba bararo ba kgobokane gotee ka leina la-ka, le nna ke gona gare ga bona.” Go ya ka taba e dikologilego, mantšu a a šoma go bagolo ba Bakriste bao ba kopanago go swaragana le mathata a magolo ao a bago gona magareng ga batho, eupša ka kwešišo e nngwe, a bolela ka diboka tša rena. (Mateo 18:20) Ge e ba Kriste, ka moya o mokgethwa, a e-ba gona ge Bakriste ba bokana leineng la gagwe, na dipokano tše bjalo ga se tša swanelwa go lebelelwa e le tše kgethwa?
6. Go ka thwe’ng ka mafelo a rena a diboka, tše dinyenyane le tše dikgolo?
6 Ke therešo gore Jehofa ga a dule ditempeleng tšeo di dirilwego ke batho. Lega go le bjalo, Diholo tša rena tša Mmušo ke mafelo a borapedi bja therešo. (Ditiro 7:48; 17:24) Re kopana moo e le gore re ithute Lentšu la Jehofa, re mo rapele gomme re mo opelele ditumišo. Go bjalo le ka Diholo tša rena tša Kopano. Mafelo a magolo ao a hirwago bakeng sa dikopano tša rena—a bjalo ka diholo, diholo tša dipontšho goba mapatlelo—a fetoga mafelo a borapedi nakong ya ge a dirišetšwa dipokano tša rena tše kgethwa. Dipokano tše tša borapedi, tše dinyenyane le tše dikgolo, di swanelwa ke tlhompho ya rena gomme tlhompho yeo e swanetše go bonala boemong bja rena bja kgopolo le tseleng yeo re itshwarago ka yona.
Ditsela tša go Bontšha Tlhompho Bakeng sa Dipokano tša Rena
7. Re ka bontšha tlhompho bakeng sa diboka tša rena ka tsela efe e lego molaleng?
7 Go na le ditsela tše lego molaleng tšeo ka tšona re ka bontšhago tlhompho bakeng sa dipokano tša rena. Tsela e nngwe ke ka go ba gona ge go opelwa dikopelo tša Mmušo. Bontši bja dikopelo tše bo ngwadilwe ka mokgwa wa dithapelo gomme di swanetše go opelwa ka tlhompho. Ge a tsopola Psalme 22, moapostola Paulo o ngwadile mabapi le Jesu gore: “Ke tla bolela leina la gago go bana bešo; ke tla go tumiša ka kopelo gare ga phuthego.” (Baheberu 2:12) Ka baka leo, re swanetše go kgonthišetša gore re dutše fase pele modula-setulo a rola kopelo gomme re tsepamiše megopolo go seo se bolelwago ke mantšu a yona ge re dutše re opela. Eka tsela yeo re opelago ka yona e ka bontšha maikwelo a mopsalme yo a ngwadilego gore: “A nke ke leboxê Morêna ka pelo ka moka kè le mo pitšong ya ba ba lokilexo, kè le phuthexong.” (Psalme 111:1) Ee, go opelela Jehofa ditumišo ke lebaka le lengwe le lebotse kudu la gore re fihle ka nako dibokeng tša rena le go dula go fihlela di fela.
8. Ke mohlala ofe ka Beibeleng woo o bontšhago gore re swanetše go theetša dithapelo tšeo di dirwago dibokeng tša rena ka tlhompho?
8 Selo se sengwe seo se dirago gore diboka tša rena ka moka di be bohlokwa kudu ke thapelo e tšwago pelong yeo e dirwago legatong la bao ba lego gona. Tiragalong e nngwe, Bakriste ba lekgolong la pele la nywaga kua Jerusalema ba ile ba bokana gomme “ba hlatlošetša mantšu a bona go Modimo e le ba kwanago” ka thapelo e tšwago pelong. Ka baka leo, ba ile ba tšwela pele—go sa šetšwe tlaišo—“ba bolela lentšu la Modimo ka sebete.” (Ditiro 4:24-31) Na re ka nagana motho le ge e le ofe go bao ba bego ba le gona a dumelela monagano wa gagwe go lelera nakong ya thapelo yeo? Aowa, ba rapetše “e le ba kwanago.” Dithapelo tšeo di dirwago dibokeng tša rena di bontšha maikwelo a bohle bao ba bokanego. Re swanetše go di theetša ka tlhompho.
9. Re ka bontšha bjang tlhompho bakeng sa dipokano tša rena tše kgethwa ka moaparo wa rena le boitshwaro?
9 Go oketša moo, re ka bontšha gore re hlompha ka mo go tseneletšego go kgethega ga dipokano tša rena ka moaparo wa rena. Ponagalo ya rena ge go tliwa moaparong wa rena le tseleng yeo re lokišago meriri ya rena ka yona e ka oketša seriti sa diboka tša rena. Moapostola Paulo o eleditše ka gore: “Ke rata gore lefelong le lengwe le le lengwe banna ba rapele, ba emiše diatla tše botegago go se kgalefo le dingangišano. Ka mo go swanago, ke rata gore basadi ba ikgabiše ka moaparo o rulagantšwego gabotse, ka go se solege le ka go hlaphogelwa ga monagano, e sego ka mekgwa ya go loga moriri le gauta goba diperela goba kobo ya theko e kgolo, eupša ka tsela e swanelago basadi bao ba ipolelago gore ba hlompha Modimo.” (1 Timotheo 2:8-10) Ge re e-ya dikopanong tše dikgolo tšeo di swarelwago mapatlelong, re ka apara ka tsela e dumelelanago le maemo a leratadima eupša ra tšwela pele re e-na le seriti. Go tlaleletša moo, go hlompha ga rena pokano yeo go tla re tutueletša gore re pheme go ja goba go sohla mmotu nakong ya mananeo. Go apara le go itshwara ka tsela e swanetšego ge re le dipokanong tša rena go godiša Jehofa Modimo, borapedi bja gagwe le barapedi-gotee le rena.
Boitshwaro bjo bo Swanelago Ngwako wa Modimo
10. Moapostola Paulo o bontšhitše bjang gore go nyakega tekanyo e phagamego ya boitshwaro dibokeng tša rena tša Bokriste?
10 Go 1 Bakorinthe kgaolo 14, re hwetša keletšo e bohlale ya moapostola Paulo mabapi le kamoo diboka tša Bokriste di swanetšego go swarwa ka gona. O phethile ka gore: “Dilo ka moka di dirwe ka bothakga le ka thulaganyo.” (1 Bakorinthe 14:40) Diboka tša rena ke karolo ya bohlokwa ya modiro wa phuthego ya Bokriste, gomme di nyaka mohuta wa boitshwaro bjo bo swanelago ngwako wa Jehofa.
11, 12. (a) Ke’ng seo se swanetšego go gatišwa ka megopolong ya bana bao ba bago gona dibokeng? (b) Bana ba ka bontšha tumelo ya bona ka tsela efe e swanetšego dibokeng?
11 Bana ka mo go kgethegilego ba swanetše go rutwa kamoo ba swanetšego go itshwara ka gona ge ba le dibokeng. Batswadi ba Bakriste ba swanetše go hlalosetša bana ba bona gore Holo ya Mmušo le lefelo leo Thuto ya Puku ya Phuthego e swarelwago go lona ga se mafelo a go bapala. Ke mafelo ao re rapelago Jehofa go ona le go ithuta Lentšu la gagwe. Kgoši Salomo yo bohlale o ngwadile gore: ‘Lotola maoto a gago ge o e-ya ngwakong wa Modimo gomme o batamele e le gore o theetše.’ (Mmo 5:1, NW) Moše o ile a ruta Baisiraele gore ba bokane e le batho ba bagolo le “bana.” O itše: “O phuthêlê sethšaba mmôxô . . . O ba balêlê ba kwê, ba ithutê, xomme ba boifê Morêna Modimo wa lena, ba hlôkômêlê se se bolêlwaxo ke molaô wó, ba dirê ka wôna. Le bana ba bôná ba ba sešoxo ba o tseba, ba o kwê, ba ithutê xo boifa Morêna.” (Mongwalo o sekamego ke wa rena.)—Doiteronomio 31:12, 13.
12 Ka mo go swanago lehono, bana ba tla dibokeng le batswadi ba bona gore ba theetše le go ithuta. Gatee-tee ge ba kgona go theetša le go kwešiša bonyenyane ditherešo tša motheo tša Beibele, le bona ba ka kgona go “bolela phatlalatša” tumelo ya bona ka go tšea karolo ka ditlhaloso tše kopana. (Baroma 10:10) Ngwana yo monyenyane a ka thoma ka go bolela mantšu a sego kae e le karabo ya potšišo yeo a e kwešišago. Mathomong, a ka swanelwa ke go bala karabo yeo, eupša ge nako e dutše e e-ya a ka kgona go e bolela ka mantšu a gagwe. Se se hola ngwana e bile se a mo thabiša gomme dipolelo tše bjalo tša tumelo tšeo a di dirago le semeetseng di thabiša batho ba bagolo bao ba lego gona. Ka tlhago, batswadi ba bea mohlala ka gore bona ka bobona ba nee ditlhaloso. Ge go kgonega, ke mo gobotse gore bana ba be le Beibele ya bona, puku ya dikopelo le kopi ya kgatišo yeo e ithutwago. Ba swanetše go ithuta go swara dikgatišo tše bjalo ka tlhompho e swanetšego. Se ka moka se tla gatiša ka megopolong ya bana gore diboka tša rena ke dipokano tše kgethwa.
13. Re holofela eng mabapi le bao ba bago gona dibokeng tša rena ka lekga la mathomo?
13 Ke therešo gore ga re nyake gore diboka tša rena di swane le ditirelo tša dikereke tša Bojakane. Ditirelo tšeo e ka ba tše se nago lerato le tše feteletšago dilo goba di ka tlala lešata go etša dikhonsate tša mmino wa rock. Re nyaka gore diboka tšeo di swarwago Diholong tša rena tša Mmušo di be borutho gomme batho ba ikwe ba lokologile go tla go tšona, eupša e sego gore di swane le dipokano tša segwera. Re bokana ka morero wa go rapela Jehofa, ka gona diboka tša rena di swanetše go ba le seriti ka dinako tšohle. Kganyogo ya rena ke gore ka morago ga go theetša taba yeo e ahla-ahlwago le go bona boitshwaro bja rena le bja bana ba rena, bao ba tlilego dibokeng ka lekga la mathomo ba re: “Ruri Modimo o gare ga lena.”—1 Bakorinthe 14:25.
Karolo ya ka Mehla ya Borapedi bja Rena
14, 15. (a) Re ka phema bjang go “lahla Ngwakô wa Modimo wa rena”? (b) Jesaya 66:23 e phethagala bjang gona bjale?
14 Bjalo ka ge go boletšwe mathomong, Jehofa o kgoboketša batho ba gagwe gomme o dira gore ba thabe ka ‘ntlong ya gagwe ya thapelo,’ e lego tempele ya gagwe ya moya. (Jesaya 56:7) Nehemia monna yo a botegago o ile a gopotša Bajuda ba gabo gore ba swanetše go bontšha tlhompho e swanetšego bakeng sa tempele ya kgonthe ka go e thekga ka dilo tše di bonagalago. O boletše gore: “Xa re rate xo lahla Ngwakô wa Modimo wa rena.” (Neh 10:39, NW) Ka godimo ga moo, ga se ra swanela go hlokomologa taletšo ya Jehofa ya gore re mo rapele ka ‘ntlong ya gagwe ya thapelo.’
15 Ge a bontšha go nyakega ga go bokana ka mehla bakeng sa go rapela, Jesaya o porofetile gore: “E tlo fêla e re kxwedi è balama, le ka Sabatha e nngwê le e nngwê nama ka moka e tlo tla ya khutša pele xa-ka. Ó r’yalo Morêna.” (Jesaya 66:23) Se se a direga lehono. Ka mehla, beke e nngwe le e nngwe mo kgweding, Bakriste ba ineetšego ba a bokana e le gore ba rapele Jehofa. Gare ga dilo tše dingwe, ba dira se ka go ba gona dibokeng tša Bokriste le ka go tšea karolo bodireding bja phatlalatša. Na o yo mongwe wa bao ka mehla ba ‘khutšago ka pele ga Jehofa’?
16. Ke ka baka la’ng go ba gona ka mehla dibokeng e swanetše go ba karolo ya ka mehla ya maphelo a rena gona bjale?
16 Jesaya 66:23 e tla phethagala ka mo go feletšego bophelong lefaseng le lefsa leo Jehofa a le holofeditšego. Ka nako yeo, “nama ka moka” ‘e tla khutša pele ga Jehofa,’ goba ya mo rapela ka tsela ya kgonthe beke e nngwe le e nngwe le kgwedi e nngwe le e nngwe ka mo go sa felego. Ka ge go bokana ka mehla bakeng sa go rapela Jehofa e tla ba karolo ya ka mehla ya bophelo bja rena bja moya tshepedišong e mpsha ya dilo, na ga se ra swanela go dira gore go ba gona ka mehla dipokanong tša rena tše kgethwa e be karolo ya ka mehla ya maphelo a rena gona bjale?
17. Ke ka baka la’ng re swanetše go ya dibokeng “kudu-kudu ka ge [re] bona letšatši le batamela”?
17 Ge bofelo bo dutše bo batamela, re swanetše go ikemišetša go ba gona dipokanong tša rena tša Bokriste tša borapedi go feta le ge e le neng pele. Ka ge re hlompha go kgethega ga diboka tša rena, ga re dumelele mošomo, mošomo wa sekolo woo o dirwago gae goba diklase tša bošego go re šitiša go bokana ka mehla le badumedi-gotee le rena. Re nyaka matla ao re a hwetšago ka go bokana le ba bangwe. Diboka tša rena tša phuthego di re nea sebaka sa go tsebana, go kgothatšana le go išana “leratong le medirong e mebotse.” Re swanetše go dira bjalo “kudu-kudu ka ge [re] bona letšatši le batamela.” (Baheberu 10:24, 25) Ka gona, eka ka mehla re ka bontšha tlhompho e swanetšego bakeng sa dipokano tša rena tše kgethwa ka go ba gona ka mehla, ka moaparo o swanetšego le boitshwaro bjo bobotse. Ka go dira bjalo, re bontšha gore re na le pono e swanago le ya Jehofa ka dilo tše kgethwa.
E le go Boeletša
• Ke’ng seo se bontšhago gore dipokano tša batho ba Jehofa di swanetše go lebelelwa e le tše kgethwa?
• Ke dikarolo dife tša diboka tša rena tšeo di bontšhago gore ke tše kgethwa?
• Bana ba ka bontšha bjang gore ba hlompha go kgethega ga diboka tša rena?
• Ke ka baka la’ng re swanetše go dira gore go ba gona ka mehla dibokeng e be karolo ya ka mehla ya maphelo a rena?
[Dipotšišo tša Thuto]
[Diswantšho go letlakala 28]
Diboka tšeo go tšona go rapelwago Jehofa ke dipokano tše kgethwa go sa šetšwe moo di swarelwago gona
[Seswantšho go letlakala 31]
Bana ba rena ba tla dibokeng e le gore ba theetše le go ithuta