Go Nea Bohlatse bjo bo Feletšego ka “Sebete Kudu”
“Re Swanetše Go Kwa Modimo E Le Mmuši Go E-na Le Batho”
Go Nea Bohlatse bjo bo Feletšego ka “Sebete Kudu”
SEHLOPHA se sešoro sa bahlola-mpherefere se ikemišeditše go otla mohlanka yo a botegago wa Modimo go fihlela a e-hwa. Mašole a Roma a fihla ka bjako gomme a ntšha monna yo ka matsogong a bahlasedi ba gagwe gomme a a mo golega. Se se bula lelokelelo la ditiragalo tšeo di tšeago lebaka la nywaga e mehlano. Ka baka leo, bahlankedi ba bantši ba lego maemong a phagamego ba Baroma ba kwa ditaba tša mabapi le Jesu Kriste.
Mohlaselwa yo ke moapostola Paulo. Mo e ka bago ka 34 C.E., Jesu o ile a utolla gore Paulo (Saulo) o be a tla bolela leina la Gagwe pele ga “dikgoši.” (Ditiro 9:15) Ka ngwaga wa 56 C.E., go be go letetšwe gore seo se phethege. Lega go le bjalo, ge moapostola a batamela bofelong bja leeto la gagwe la boraro la boromiwa, boemo bo kgaufsi le go fetoga.
O Otlwa ke Lešaba Eupša ga a Tlogele
Paulo o tšwetša pele leeto la gagwe la go ya Jerusalema, gomme ka thušo ya “moya,” Bakriste ba itšego ba mo lemoša gore tlaišo e šoro e mo letile motseng woo. Paulo ka sebete o bolela gore: “Ke ikemišeditše e sego feela go tlengwa eupša le go hwela Jerusalema ke hwela leina la Morena Jesu.” (Ditiro 21:4-14) Kapejana ge Paulo a e-ya tempeleng Jerusalema, Bajuda ba tšwago Asia bao ba tlwaelanego le modiro wa gagwe wo o atlegilego wa boebangedi kua Asia ba hlohleletša lešaba gore le mmolaye. Mašole a Roma a mo hlakodiša ka bjako. (Ditiro 21:27-32) Tlhakodišo yeo e nea Paulo sebaka sa moswana-noši sa go tsebatša therešo mabapi le Kriste mašabeng ao a galefilego gaešita le bathong ba maemo a godimo.
Go Bolela go Batho Bao ba sa Fihlelelegego Gabonolo
Paulo o gogelwa lefelong leo le šireletšegilego, o gogwa godimo ga manamelo a sebo seo se tsebjago e le Tora ya Antonia. * Ge a le moo manamelong, moapostola yo o nea sehlopha seo sa bodumedi bohlatse bjo matla. (Ditiro 21:33–22:21) Eupša ge a thoma go hlalosa taelo yeo a e neilwego ya go bolela go Bantle, go tsoga mpherefere gape. Molaodi wa madira e lego Lisia, o laela gore Paulo a sekišwe e bile a otlwe bakeng sa go hwetša gore ke ka baka la eng a latofatšwa ke Bajuda. Lega go le bjalo, go otlwa go thibelwa ke ge Paulo a bolela gore ke modudi wa Roma. Letšatšing le le latetšego, Lisia o iša Paulo lekgotleng la Sanhedrine go hwetša gore ke ka baka la eng a latofatšwa ke Bajuda.—Ditiro 22:22-30.
A eme ka pele ga lekgotla le le le phagamego, Paulo o na le sebaka se sengwe se sebotse sa go dira boboledi go Bajuda-gotee le yena. Moebangedi yo yo a sa boifego o bolela phatlalatša gore o dumela gore bahu ba tlo tsošwa. (Ditiro 23:1-8) Lehloyo le matla la Bajuda la go rata go mmolaya le a gola gomme Paulo o išwa meagong ya mašole. Bošegong bjo bo latetšego, o amogela kgothatšo e homotšago e tšwago go Morena e rego: “E-ba le sebete kudu! Ka ge o be o dutše o nea bohlatse bjo bo feletšego ka dilo tšeo di lego mabapi le nna Jerusalema, ka mo go swanago o swanetše go nea bohlatse le kua Roma.”—Ditiro 23:9-11.
Leano la go bolaya Paulo le šitišwa ke ge moapostola a romelwa ka bjako Kesarea ka sephiring, e lego motse-mošate wa taolo ya Baroma wa Judea. (Ditiro 23:12-24) Kua Kesarea go tšwelela dibaka tše dingwe gape, gomme Paulo o dira boboledi go “dikgoši.” Lega go le bjalo, moapostola o thoma ka go bontšha Mmušiši Felikisi gore ga go na bohlatse bjo bo thekgago ditatofatšo tšeo a latofatšwago ka tšona. Ka morago, Paulo o ruta Felikisi le mosadi wa gagwe Dirusila mabapi le Jesu, boitshwaro, toka le kahlolo e tlago. Lega go le bjalo, Paulo o golegwa lebaka la nywaga e mebedi, ka ge Felikisi a be a holofetše go newa pipa-molomo, eupša Paulo a se ke a mo nea yona.—Ditiro 23:33–24:27.
Ditiro 25:1-11, 20,21) Matšatši a mmalwa ka morago, ge moapostola a hlalositše boemo bja gagwe go Kgoši Heroda Agaripa II, kgoši yeo e bolela gore: “Ka nako e kopana o tla nkgodiša gore ke be Mokriste.” (Ditiro 26:1-28) Mo e ka bago ka 58 C.E., Paulo o romelwa Roma. Ge e le mogolegwa moo, moapostola yo yo a šomago ka thata o tšwela pele ka nywaga e mengwe e mebedi go diriša mekgwa e fapanego ya go dira boboledi ka Kriste. (Ditiro 28:16-31) Go bonala Paulo mafelelong a ile a ema ka pele ga Mmušiši Nero, a se bonwe molato, gomme a feleletša a kgona go tšwela pele ka modiro wa gagwe wa boromiwa a lokologile. Ga go na pego yeo e bontšhago gore moapostola le ge e le ofe yo mongwe o ile a ba le sebaka sa go fihlelela batho ba lego maemong a phagamego ka ditaba tše dibotse.
Ge Felikisi a tšeelwa legato ke Fesito, Bajuda ba thomološa ka maiteko a bona a go dira gore Paulo a ahlolwe le go bolawa. Molato o sekelwa Kesarea gape gomme e le go thibela gore o se romelwe Jerusalema, Paulo o bolela gore: “Ke eme pele ga sedulo sa kahlolo sa Kesara, . . . Ke ipiletša go Kesara!” (Ka ge pego ye e lego ka mo godimo e bontšha, moapostola Paulo o ile a phela ka go dumelelana le molao wa motheo o bohlokwa wo o ilego wa bolelwa ke Bakriste-gotee le yena lekgotleng le phagamego la Sejuda, o rego: “Re swanetše go kwa Modimo e le mmuši go e-na le batho.” (Ditiro 5:29) A mohlala o mobotse gakaakang wo a re beetšego wona! Go sa šetšwe maiteko a sa kgaotšego ao batho ba bego ba a dira gore ba mo thibele, moapostola o ile a phetha taelo ya go nea bohlatse ka botlalo. Ka baka la go kwa ga gagwe Modimo ka mo go tiilego, Paulo o ile a phetha kabelo ya gagwe e le ‘sebjana se se kgethilwego,’ sa go iša leina la Jesu “ditšhabeng gotee le go dikgoši le go bana ba Isiraele.”—Ditiro 9:15.
[Mongwalo wa ka tlase]
^ ser. 8 Bona 2006 Calendar of Jehovah’s Witnesses, November/December.
[Lepokisi/Diswantšho go letlakala 9]
NA PAULO O BE A KGAHLWA FEELA KE GO IKEMELA?
A nea karabo ya potšišo ye, mongwadi Ben Witherington III, o ngwala gore: “Go tšwa ponong ya Paulo, selo sa bohlokwa ga se gore Paulo a ikemelele, eupša ke gore a hlatsele ebangedi go balaodi, bobedi ba Bajuda le ba Bantle. . . . Ge e le gabotse, go sekišwa ebangedi.”