Itote Leratong la Modimo!
Itote Leratong la Modimo!
“Baratiwa, . . . itoteng leratong la Modimo . . . ka tebelelo ya bophelo bjo bo sa felego.”—JUDA 20, 21.
1, 2. O ka dira bjang gore o dule o ratwa ke Modimo?
JEHOFA o rata batho kudu mo e lego gore o ba neile Morwa wa gagwe yo a tswetšwego a nnoši e le gore bao ba bontšhago tumelo go yena ba ka ba le bophelo bjo bo sa felego. (Johane 3:16) Ruri go a thabiša go bontšhwa lerato le bjalo! Ge e ba o le mohlanka wa Jehofa, ruri o nyaka go ratwa ka tsela e bjalo ka mo go sa felego.
2 Morutiwa Juda o utolotše kamoo o ka dulago o ratwa ke Modimo. Juda o ngwadile gore: “Ka go ikaga tumelong ya lena e kgethwa-kgethwa le go rapela ka moya o mokgethwa, itoteng leratong la Modimo ge le dutše le letetše kgaugelo ya Morena wa rena Jesu Kriste ka tebelelo ya bophelo bjo bo sa felego.” (Juda 20, 21) Go ithuta Lentšu la Modimo le go bolela ditaba tše dibotse go thuša go go aga ‘tumelong e kgethwa-kgethwa’—dithuto tša Bokriste. E le gore o dule o ratwa ke Modimo, o swanetše go rapela “ka moya o mokgethwa,” goba ka tutuetšo ya wona. E le gore o šegofatšwe ka bophelo bjo bo sa felego, o swanetše gore gape o bontšhe tumelo sehlabelong sa Jesu Kriste sa topollo.—1 Johane 4:10.
3. Ke ka baka la’ng ba bangwe e se sa le Dihlatse tša Jehofa?
3 Ba bangwe bao ba kilego ba ba le tumelo ga se ba ka ba dula ba ratwa ke Modimo. Ka ge ba kgethile go phegelela tsela ya sebe, ga e sa le Dihlatse tša Jehofa. O ka phema bjang go wela tseleng e bjalo? Go naganišiša ka dintlha tše di latelago go ka go thuša go tlogela sebe le go dira gore o dule o ratwa ke Modimo.
Bontšha Gore o Rata Modimo
4. Go kwa Modimo go bohlokwa gakaaka’ng?
4 Bontšha gore o rata Modimo ka go mo kwa. (Mateo 22:37) Moapostola Johane o ngwadile gore: “Se ke seo lerato la Modimo le se bolelago, gore re boloke ditaelo tša gagwe; gomme ditaelo tša gagwe ga di boima.” (1 Johane 5:3) Tsela ya go kwa Modimo e ka go matlafatša gore o pheme teko le gona e ka go thabiša. Mopsalme o itše: “Yo šexo ké monna eo a sa sepelexo à lailwe ke bakxôpô, . . . sa xaxwe ya ba xo thabêla molaô wa Morêna.”—Psalme 1:1, 2.
5. Go rata Jehofa go tla go tutueletša go dira dilo ka tsela efe?
5 Go rata Jehofa go tla go tutueletša gore o pheme go dira sebe se segolo seo se tla tlišago kgobošo leineng la gagwe. Aguri o rapetše ka gore: “Se nneê bodiidi, se nneê lehumô. Mphêphê ka boxôbê byo bo ntekanexo. E se re xe ke khoše ka hlanoxa, ka re: Morêna ké mang? xoba kè hlôka, ka utswa, ka senya ’ina la Modimo wa-ka.” (Diema 30:1, 8, 9) Ikemišetše go se ‘senye leina la Modimo’ ka go mo goboša. Go e na le moo, ka mehla katanela go dira dilo tše dibotse tšeo di mo tlišetšago letago.—Psalme 86:12.
6. Go ka direga’ng ge e ba o ka dira sebe ka boomo?
6 Ka mehla rapela Tatago yo lerato wa legodimong gore a go thuše go fenya teko ya go wela sebeng. (Mateo 6:13; Baroma 12:12) Tšwela pele o latela keletšo ya Modimo e le gore dithapelo tša gago di se ke tša šitišwa. (1 Petro 3:7) Ge e ba o ka dira sebe ka boomo, mafelelo a gona e tla ba a kotsi, ka ge Jehofa ka tsela ya seswantšhetšo a thibela gore bao ba rabelago ba se ke ba mmatamela a diriša leru le legolo e le gore dithapelo tša bona di se ke tša fihla go yena. (Dillo tša Jeremia 3:42-44) Ka gona bontšha moya wa boikokobetšo, gomme o rapelele gore o se ke wa dira selo seo se go paledišago go batamela Modimo ka thapelo.—2 Bakorinthe 13:7.
Bontšha Gore o Rata Morwa wa Modimo
7, 8. Go kwa keletšo ya Jesu go ka thuša motho bjang gore a pheme tsela ya sebe?
7 Bontšha gore o rata Jesu Kriste ka go kwa ditaelo tša gagwe, ka ge se se tla go thuša go gana tsela ya sebe. Jesu o itše: “Ge e ba le boloka ditaelo tša-ka, le tla dula leratong la-ka go etša ge ke bolokile ditaelo tša Tate, gomme ke dula leratong la gagwe.” (Johane 15:10) Go dira kamoo Jesu a boletšego ka gona go ka go thuša bjang gore o dule o ratwa ke Modimo?
8 Go ela hloko mantšu a Jesu go ka go thuša go dula o botega boitshwarong. Molao wo Modimo a o neilego Baisiraele o itše: “O se kê wa ôtswa.” (Ekisodo 20:14) Eupša Jesu o ile a utolla molao wa motheo wo go ona go theilwego taelo yeo ge a re: “Yo mongwe le yo mongwe yo a tšwelago pele a lebeletše mosadi e le gore a mo kganyoge o šetše a hlotlotše le yena pelong ya gagwe.” (Mateo 5:27, 28) Moapostola Petro o boletše gore ba bangwe phuthegong ya lekgolong la pele la nywaga ba be ba e-na le “mahlo a tletšego bohlotlolo” le gona “ba goketša meoya e sa tsepamago.” (2 Petro 2:14) Lega go le bjalo, ka go se swane le bona, o ka phema go dira dibe tša dikopano tša botona le botshadi ge e ba o rata Modimo le Kriste e bile o ba kwa gomme o ikemišeditše go dula o e-na le tswalano le bona.
Dumelela Moya wa Modimo go go Hlahla
9. Mabapi le moya o mokgethwa, go ka direga’ng ge e ba motho a phegelela go dira sebe?
9 Rapelela moya o mokgethwa wa Modimo, gomme o o dumelele gore o go hlahle. (Luka 11:13; Bagalatia 5:19-25) Ge e ba o phegelela go dira sebe, Modimo a ka go amoga moya wa gagwe. Ka morago ga ge Dafida a dirile sebe le Batseba, o lopile Modimo ka gore: “Se nthakê pele xa xaxo; ’me O se tlošê môya-mokxêthwa wa xaxo xo nna.” (Psalme 51:11) Ka baka la go ba modiradibe yo a sa itsholego, Kgoši Saulo o ile a lahlegelwa ke moya wa Modimo. Saulo o dirile sebe ka go dira sehlabelo le ka go tlogela mohlape wa dinku, dipudi le dikgomo o phela le ka go tlogela kgoši ya Baamaleke. Ka morago ga moo, Jehofa o ile a amoga Saulo moya wa gagwe.—1 Samuele 13:1-14; 15:1-35; 16:14-23.
10. Ke ka baka la’ng o swanetše go gana kgopolo ya go tlwaela go dira sebe?
10 Gana kgopolo ya go tlwaela go dira sebe. Moapostola Paulo o ngwadile gore: “Ge re tlwaela go dira sebe ka boomo ka morago ga ge re hweditše tsebo e nepagetšego ya therešo, gona ga go sa na sehlabelo se sengwe bakeng sa dibe.” (Baheberu 10:26-31) Ruri go be go tla nyamiša ge o be o ka tšwela pele o dira sebe go fihla bokgoleng bjoo!
Bontšha Gore o Rata ba Bangwe e le ka Kgonthe
11, 12. Ke ka ditsela dife lerato le tlhompho di ka thibelago motho gore a se ke a ineela boitshwarong bjo bo gobogilego bja dikopano tša botona le botshadi?
11 Go rata batho ba bangwe go tla go thibela go se akaretšwe boitshwarong bjo bo sa swanelago bja tša botona le botshadi. (Mateo 22:39) Lerato le bjalo le tla go tutueletša go šireletša pelo ya gago e le gore e se ke ya go dira gore o utswe pelo ya molekane wa yo mongwe wa lenyalo. Go dira bjalo go ka lebiša sebeng sa bohlotlolo. (Diema 4:23; Jeremia 4:14; 17:9, 10) Ekiša Jobo wa moloki, yo a sa kago a ba le dikgopolo tša go rata mosadi yo mongwe ntle le wa gagwe.—Jobo 31:1.
12 Go hlompha go kgethega ga lenyalo go ka go thuša go phema sebe se segolo. Modimo o rerile gore lenyalo le le hlomphegago le dikopano tša botona le botshadi e swanetše go ba tsela ya go belega bana. (Genesi 1:26-28) Gopola gore ditho tša pelego di reretšwe go tšweletša bophelo, bjo e lego bjo bokgethwa. Diotswa le dihlotlolo ga di kwe Modimo, di goboša tiro ya go ba le dikopano tša botona le botshadi, ga di hlomphe go kgethega ga lenyalo e bile di direla mebele ya tšona sebe. (1 Bakorinthe 6:18) Eupša go rata Modimo le moagišani mo go sepedišanago le go kwa Modimo go tla dira gore motho a se ke a ineela boitshwarong bjo bo ka feleletšago ka gore a kgaolwe ka phuthegong ya Bokriste.
13. Motho yo a gobogilego “o tšitlanya thoto” ka tsela efe?
13 Re swanetše go gana dikgopolo tša sebe e le gore re se ke ra kweša bao re ba ratago bohloko. Diema 29:3 e re: “Wa xo xwêrana le diotswa, o tšitlanya thoto.” Sehlotlolo seo se sa itsholego se senya tswalano ya sona le Modimo gotee le ditlemo tša lapa. Mosadi wa motho yo e lego sehlotlolo se se sa itsholego o na le mabaka a go hlala. (Mateo 19:9) Go sa šetšwe gore ke monna goba mosadi yo a dirilego sebe, go kgaotša lenyalo go ka kweša bohloko kudu go molekane yo a botegago, bana le ba bangwe. Na ga o dumele gore go tseba tshenyo yeo e bakwago ke boitshwaro bjo bo gobogilego go swanetše go re tutueletša go gana teko ya go wela go bjona?
14. Re ka ithuta thuto efe go Diema 6:30-35 mabapi le go dira sebe?
14 Taba ya gore ga go na tsela ya go ka dirolla bohlotlolo ge bo šetše bo diregile e swanetše go tutueletša motho go phema tiro ye e kgolo ya boithati. Diema 6:30-35 e bontšha gore gaešita le ge batho ba ka kwešiša mabaka a lehodu ge le utswitše ka ge le swerwe ke tlala, ba nyatša sehlotlolo ka gobane se na le boikemišetšo bjo bobe. Se “ithsenyetša bophelô.” Ka tlase ga Molao wa Moše, se ka be se bolailwe. (Lefitiko 20:10) Motho yo a dirago bohlotlolo o kweša ba bangwe bohloko ka morero wa go kgotsofatša kganyogo ya gagwe, gomme sehlotlolo seo se sa itsholego ga se dule se ratwa ke Modimo eupša se rakwa ka phuthegong e hlwekilego ya Bokriste.
Dula o E-na le Letswalo le le Hlwekilego
15. Boemo bja letswalo le le swailego “mo e kago ke ka tšhipi ya go fišeletša” ke bofe?
15 E le gore re dule re ratwa ke Modimo, re ka se ke ra dumelela letswalo la rena gore le thatafatšwe ke sebe. Go molaleng gore ga se ra swanela go amogela ditekanyetšo tša lenyatšo tša lefase, gomme re swanetše go ba šedi ditabeng tše bjalo ka go kgetha bagwera, dipuku tše re di balago le boithabišo. Paulo o lemošitše ka gore: “Mabakeng a tlago ba bangwe ba tla wa tumelong, ba ela hloko dipolelo tše di buduletšwego tše di timetšago le dithuto tša batemona, ka boikaketši bja batho bao ba bolelago maaka, bao ba swailwego matswalo a bona mo e kago ke ka tšhipi ya go fišeletša.” (1 Timotheo 4:1, 2) Letswalo le le swailwego “mo e kago ke ka tšhipi ya go fišeletša” le bjalo ka nama e omeletšego yeo e gwagwaletšego e bile e sa kwe bohloko. Letswalo le bjalo le ka se sa hlwa le re lemoša gore re sepelele kgole le bahlanogi le maemong ao a ka dirago gore re hlanogele tumelo.
16. Ke ka baka la’ng go le bohlokwa kudu go ba le letswalo le le hlwekilego?
16 Go phologa ga rena go ithekgile ka gore re be le letswalo le le hlwekilego. (1 Petro 3:21) Ka tumelo ya rena mading a Jesu a tšholotšwego, letswalo la rena le hlwekišitšwe medirong e hwilego, “e le gore re neele tirelo e kgethwa go Modimo yo a phelago.” (Baheberu 9:13, 14) Ge e ba re ka dira sebe ka boomo, letswalo la rena le ka šilafatšwa gomme re ka se sa hlwa re e-ba batho bao ba hlwekilego bao ba swanelegago go hlankela Modimo. (Tito 1:15) Eupša ka thušo ya Jehofa, re ka ba le letswalo le le hlwekilego.
Ditsela tše Dingwe tša go Phema Boitshwaro bjo bo Fošagetšego
17. Go ‘latela Jehofa ka mokgwa o tletšego’ go hola ka’ng?
17 ‘Latela Jehofa ka mokgwa o tletšego’ go etša Kalebe wa Isiraele ya bogologolo. (Doiteronomio 1:34-36) Dira seo Modimo a se nyakago go wena, gomme o se ke wa nagana ka go jela “tafoleng ya batemona.” (1 Bakorinthe 10:21) Gana bohlanogi. E-ja ka tebogo dijo tša moya tše di hwetšagalago feela tafoleng ya Jehofa, gomme o ka se ke wa arošwa ke barutiši ba maaka goba madira a kgopo a moya. (Baefeso 6:12; Juda 3, 4) Lebiša tlhokomelo dilong tša moya, tše bjalo ka go ithuta Beibele, go ba gona dibokeng le bodireding bja tšhemo. Ruri o tla thaba ge o latela Jehofa ka botlalo gomme o e-na le mo gontši go go dira modirong wa Morena.—1 Bakorinthe 15:58.
18. Go boifa Jehofa go tla kgoma boitshwaro bja gago bjang?
18 Ikemišetše go “[direla] Modimo tirelo e kgethwa ka go boifa Modimo le go šia.” (Baheberu 12:28) Go boifa Jehofa ka tsela ya tlhompho go tla go tutueletša go gana tsela le ge e le efe e fapogilego. Go tla go thuša go itshwara ka go dumelelana le keletšo yeo Petro a ilego a e nea batlotšwa-gotee le yena e rego: “Ge e ba le bitša Tate yo a ahlolago ka go se bebe sefahlego go ya ka modiro wa yo mongwe le yo mongwe, gona itshwareng ka poifo nakong ya bodiiledi bja lena.”—1 Petro 1:17.
19. Ke ka baka la’ng o swanetše go dula o diriša dilo tšeo o ithutago tšona Lentšung la Modimo?
19 Dula o diriša seo o ithutago sona Lentšung la Modimo. Se se tla go thuša go phema go dira sebe se segolo ka gobane o tla itlhatsela o le gare ga “bao ka go diriša matla a bona a tlwaeditšwego a go hlatha, ba kgethologanyago se se nepagetšego le se se fošagetšego.” (Baheberu 5:14) Go e na le go se be le taba ka seo o se bolelago le kamoo o itshwarago ka gona, e-ba yo a phafogilego e le gore o sepele bjalo ka motho yo bohlale, ‘o ithekela nako e swanetšego’ mehleng ye e kgopo. ‘Tšwela pele o hlatha seo thato ya Jehofa e lego sona,’ gomme o tšwele pele o e dira.—Baefeso 5:15-17; 2 Petro 3:17.
20. Ke ka baka la’ng re swanetše go phema go duma tša ba bangwe?
20 Phema ka mo go feletšego go duma tša ba bangwe. O mongwe wa Melao e Lesome o re: “O se kê wa duma ntlo ya wa xeno. O se kê wa duma mosadi wa wa xeno, le molata wa xaxwe wa monna le wa mosadi, le kxomo ya xaxwe, le pôkôlô ya xaxwe, le tšohle tše e lexo tša wa xeno.” (Ekisodo 20:17) Molao wo o be o šireletša ntlo ya motho, mosadi wa gagwe, bahlanka, diphoofolo le tše dingwe. Eupša selo sa bohlokwa kudu ke mantšu a Jesu a rego go duma tša ba bangwe go šilafatša motho.—Mareka 7:20-23.
21, 22. Ke mekgwa efe ya go phema dilo yeo Mokriste a ka e dirišago e le gore a pheme go dira sebe?
21 Gata megato yeo e tla thibelago gore kganyogo e se ke ya go lebiša sebeng. Morutiwa Jakobo o ngwadile gore: “Yo mongwe le yo mongwe o lekwa ka go gogwa le go goketšwa ke kganyogo ya gagwe. Ke moka kganyogo ge e emere e tswala sebe; sebe le sona ge se dirilwe, se tšweletša lehu.” (Jakobo 1:14, 15) Ka mohlala, ge motho a kile a ba le bothata bja go nwa nakong e fetilego, a ka dira phetho ya go dira gore dino-tagi di se ke tša ba gona ka legaeng la gagwe. E le go phema teko yeo e akaretšago motho wa bong bjo bo fapanego, Mokriste a ka rata go fetoša lefelo leo a šomelago go lona goba go fetoša mošomo ka bowona.—Diema 6:23-28.
22 O se ke wa gata gaešita le mogato o tee o išago sebeng. Go bapala ka lerato le go naganišiša ka dikgopolo tše di gobogilego go ka feleletša ka bootswa goba bohlotlolo. Go bolela maaka a sa rego selo go ka tutueletša motho gore a bolele maaka a matala gomme go ka mo lebiša mokgweng wa sebe wa go bolela maaka. Go utswa mo go ka bonagalago e le go gonyenyane go ka senya letswalo la motho go fihla moo a thomago go utswa dilo tše dikgolo. Gaešita le go kgotlelela go se nene dikgopolo tša bohlanogi go ka feleletša ka bohlanogi bjo bogolo.—Diema 11:9; Kutollo 21:8.
Go Thwe’ng ge e ba o Dirile Sebe?
23, 24. Koronika tša Bobedi 6:29, 30 le Diema 28:13 di ka go homotša bjang?
23 Batho ka moka ga se ba phethagala. (Mmoledi 7:20) Eupša ge e ba o dirile sebe se segolo, o ka homotšwa ke thapelo ya Kgoši Salomo nakong ya ge go be go kgakolwa tempele ya Jehofa. Salomo o rapetše Modimo ka gore: “Dithapêlô tšohle le ditôpô tšohle, xe di ka dirêlwa motho mang le mang, le xe e le sethšaba ka moka sa xaxo sa Isiraele, bohle bà lemoxa kôtlô ya dipelo tsa bôná, ’me ba emišitše ’atla tša bôná bà le Ngwakong wó, O kwe O le xodimong, Ò le bodulong bya xaxo byo bo tiilexo, O ba lebalêlê; bohle O ba neé tše di lebanexo tsela ye ba bexo ba e swere; xobane O tseba dipelo tša bôná, Mo-tseba-dipelo-tša-bana-ba-batho-ka-moka ké Wene Ò nnoši.”—2 Koronika 6:29, 30.
24 Ee, Modimo o tseba pelo le gona o a lebalela. Diema 28:13 e re: “Mmipa-dikaroxô-tš’axwe xa a lêtlêxe; xo tlo xauxêlwa e a ipexaxo ’me a lahla dikaroxô.” Ka go ipobola le ka go tlogela sebe, motho a ka hwetša kgaugelo ya Modimo. Lega go le bjalo, ke’ng seo se ka go thušago gore o dule o ratwa ke Modimo ge e ba o fokola kudu moyeng?
O be o tla Araba Bjang?
• Ke bjang re ka dulago re ratwa ke Modimo?
• Go rata Modimo le Kriste go re thuša bjang go gana tsela ya sebe?
• Ke ka baka la’ng go rata ba bangwe e le ka kgonthe go re phemiša go wela boitshwarong bjo bo gobogilego bja tša botona le botshadi?
• Ke ditsela dife tše dingwe tšeo ka tšona go ka phengwago boitshwaro bjo bo fošagetšego?
[Dipotšišo tša Thuto]
[Seswantšho go letlakala 21]
Juda o re bontšha kamoo re ka dulago re ratwa ke Modimo
[Seswantšho go letlakala 23]
Go kgaotša lenyalo go ka kweša bohloko kudu go molekane yo a botegago le go bana
[Seswantšho go letlakala 24]
Ka go swana le Kalebe, na o ikemišeditše go ‘latela Jehofa ka mokgwa o tletšego’?
[Seswantšho go letlakala 25]
Rapelela thušo ka mehla gore o pheme teko