Ke ka Baka La’ng o Swanetše go Dira se se Lokilego?

MONNA yo a rutegilego kudu o kile a bolela gore: “Go kgona go duma go gona go nna, eupša go kgona go tšweletša botse ga go gona. Gobane botse bjo ke bo dumago ga ke bo dire, eupša bobe bjo ke sa bo dumego ke bjona ke bo dirilego tlwaelo.” Ke ka baka la’ng monna yo a be a thatafalelwa ke go dira botse bjo a bego a bo duma? O hlalositše gore: “Ka gona, go nna ke hwetša molao wo: gore ge ke duma go dira se se lokilego, se sebe se gona go nna. Ruri ke kgahlišwa ke molao wa Modimo go ya ka motho yo ke lego yena ka gare, eupša dithong tša-ka ke bona molao o mongwe woo o lwantšhanago le molao wa monagano wa-ka gomme o ntira lethopša la molao wa sebe wo o lego dithong tša-ka.”—Baroma 7:18, 19, 21-23.

Mantšu a a moapostola Paulo, ao a ngwadilwego nywaga e ka bago e 2 000 e fetilego, a bontšha kamoo go dira se se lokilego e lego tlhohlo go batho ba sa phethagalago. Go kgomarela melao e nepagetšego ya motheo go nyaka matla a boitshwaro, kudu-kudu ka tlase ga maemo a lekago. Ka gona re dira gabotse go botšiša gore, Ke lebaka lefe le legolo leo le dirago gore ke dire se se lokilego?

Hlokomela seo Mangwalo a se bolelago ka bokamoso bja motho yo a nago le boitshwaro bjo bobotse. Go Psalme 37:37, 38, re bala gore: “Šetša moloki O bônê yo boló; monna wa moláô ó tlo bôna ditloxolo. Bakxeloxi ba timetšwa bohle; ditloxolo tša bakxôpô di tlo fetšwa.” Diema 2:21, 22 e re botša gore: “Ba ba tl’o xo dula mo naxeng, ké baloki; ba ba tl’o xo šala bà le xôna, ké bôná ba-ila-bokxôpô. Ba babe ba tlo fedišwa naxeng; bakxeloxi ba tlo rakwa mo xo yôna.”

Le ge dikholofetšo tše gotee le tše dingwe tšeo di hwetšwago ka Beibeleng di re nea lebaka la go phegelela tsela yeo e kgahlišago Modimo, ga di re nee lebaka la motheo la go phegelela tsela yeo. Lebaka leo la motheo le tswalanywa le kgang yeo e akaretšago dibopiwa ka moka tše bohlale. Sehlogo se se latelago se ahla-ahla kgang yeo le kamoo re akaretšwago ka gona go yona.