Kgang Yeo o Akaretšwago go Yona

NA GO na le mogwera goba setho sa lapa seo o tlwaelanego le sona ka mo go kgethegilego? O be o ka ikwa bjang ge e ba motho yo mongwe a ka go latofatša ka gore o tšwela pele ka tlwaelano yeo feela ka mabaka a boithati? Na o be o ka se ikwe o nyamile, mohlomongwe e bile o galefile? Ka go lebanya, ye ke tatofatšo yeo Sathane Diabolo a e dirilego kgahlanong le batho bohle bao ba nago le segwera le Jehofa Modimo.

Anke o gopole ka seo se ilego sa direga ge Sathane a be a atlega go dira gore batho ba babedi ba pele e lego Adama le Efa, ba robe molao wa Modimo gomme ba mo tlatše borabeleng bja gagwe kgahlanong le Modimo. Na seo se ilego sa direga se be se bolela gore batho ba be ba tla kwa Jehofa, ge feela go dira bjalo go be go ba hola? (Genesi 3:1-6) Nywaga e 2 500 ka morago ga borabele bja Adama, Sathane o ile a tsoša kgang ye gape—mo lebakeng le kgahlanong le monna yo a bitšwago Jobo. Ka ge tatofatšo ye e dirilwego ke Diabolo e tšweletša kgang ye pepeneneng, a re hlahlobeng pego yeo ya Beibele ka kelohloko.

“Ke tlo hwa kè Sešo ka re: Ke Molato”

Jobo ke monna wa ‘bothakga le go loka, wa go boifa Modimo le wa go ila bobe.’ Lega go le bjalo, Sathane o senya go loka ga Jobo. O botšiša Jehofa gore: “A O re Jobo xe a boifa Modimo, ó dira fêla?” Ka morago, Diabolo o senya Modimo le Jobo maina ka go bolela gore Jehofa o rekile potego ya Jobo ka go mo šireletša le ka go mo šegofatša. Sathane o ba hlohla ka gore: “O k’O lekê xo iša letsôxô O kxwathê tšohle tše e lexo tša xaxwe, O bônê xe a tlo Xo hlala pepeneneng.”—Jobo 1:8-11.

E le go araba ditatofatšo tše, Jehofa o dumelela Sathane gore a leke Jobo. A leka go dira gore a furalele Modimo, Diabolo o tlišetša monna yoo yo a botegago bošula ka go latelelana. Diruiwa ka moka tša Jobo di a utswiwa goba di a bolawa, bahlanka ba gagwe gotee le bana ba gagwe ba a bolawa. (Jobo 1:12-19) Eupša na Sathane o a atlega? Aowa! Le ge Jobo a be a sa tsebe gore Diabolo ke yena yo a bakilego mathata a gagwe, o bolela gore: “Morêna ó be a neile; Morêna ó tšere. Leina la Morêna a le rêtwê.”—Jobo 1:21.

Ka morago ga moo Sathane o ema ka pele ga Jehofa, yoo a mmotšago gore: “[Jobo] O sa fêla a tieletše bothakxa bya xaxwe, le xe ke mo hlokofaditše à se n’e molato kè tutuweditšwe ke wêna.” (Jobo 2:1-3) Kgang e kgolo e mabapi le potego ya Jobo—seka seo se bontšhwago ka go botegela Modimo ka potego e sa kwanantšhego le go kgomarela go loka. Go fihla ga bjale ge go tliwa tabeng ya potego, Jobo e bile mofenyi. Lega go le bjalo, Diabolo ga a lahlele toulo.

Se se latelago, Sathane o dira tatofatšo e kgolo kudu yeo e akaretšago batho ka moka. O botša Jehofa gore: “Letlalô le kxônwa ka letlalô. Motho tše a naxo natšô, a ka di nthša tšohle xe a hlêkêlêla bophelo bya xaxwe. O k’O mo išê letsôxô O kxwathê mašapô a xaxwe le nama ya  xaxwe, O bônê xe a tlo Xo hlala pepeneneng.” (Jobo 2:4, 5) Ka go diriša lentšu la kakaretšo la “motho” bakeng sa leina la Jobo, Diabolo o be a belaela potego ya batho bohle. Ge e le gabotse, o gatelela gore: ‘Motho a ka dira dilo tšohle bakeng sa go šireletša bophelo bja gagwe. Ntumelele gomme nka kgona go dira gore motho yo mongwe le yo mongwe a furalele Modimo.’ Na ga go na motho yo a ka dulago a botegela Modimo maemong le ge e le afe goba dinakong le ge e le dife?

Jehofa o dumelela Diabolo gore a hlokofatše Jobo ka bolwetši bjo šoro. Jobo o tlaišega kudu moo a rapelelago go hwa. (Jobo 2:7; 14:13) Lega go le bjalo, Jobo o re: “Ke tlo hwa kè sešo ka re: Ke molato.” (Jobo 27:5) Jobo o bolela bjalo ka baka la gore o rata Modimo gomme ga go na se se ka fetošago seo. Jobo o ipontšha e le monna wa potego. Beibele e re: “Morêna yêna a šexofatša Jobo ka tše di tlilexo byale; tša fetiša tša mola pele.” (Jobo 42:10-17) Na go na le bao ba ilego ba swana le Jobo? Ke’ng se se ilego sa utollwa ge nako e dutše e feta?

Kamoo Kgang e Bego e Arabja ka Gona

Go kgaolo 11 ya puku ya Beibele ya Baheberu, moapostola Paulo o lokeletša palo ya banna le basadi ba botegago ba pele ga mehla ya Bokriste, go akaretša Noa, Aborahama, Sara le Moše. Ka morago moapostola o bolela gore: “Ke tla felelwa ke nako ge nka iša pele ke laodiša ka [ba bangwe].” (Baheberu 11:32) Bahlanka ba bao ba botegago ba Modimo e be e le ba bantši kudu moo Paulo a ba bitšago ‘leru le legolo gakaakaa la dihlatse,’ a ba swantšha le leru le legolo leo le ikadilego leratadimeng. (Baheberu 12:1) Ee, go theoša le nywaga-kgolo e mentši, batho ba bantši ba ile ba diriša tokelo ya bona ya boikgethelo gomme ba ile ba kgetha go botegela Jehofa Modimo.—Jošua 24:15.

Karabo e feletšego tatofatšong ya Sathane ya gore a ka dira gore batho ba furalele Jehofa e neilwe ke Morwa wa Modimo ka boyena e lego Jesu Kriste. Gaešita le bohloko bjo bo tseneletšego bjo a bego a bo kwa ge a le koteng ya tlhokofatšo ga se bja ka bja dira gore a se botegele Modimo. Ge Jesu a be a buša moya la mafelelo, o ile a goeletša ka gore: “Tate, ke gafela moya wa-ka diatleng tša gago.”—Luka 23:46.

Go feta ga nako go bontšhitše gabotse gore Diabolo ga se a ka a kgona go dira gore batho bohle ba tlogele go hlankela Modimo wa therešo. Batho ba bantši ba kgonne go tseba Jehofa le go ‘mo rata ka dipelo tša bona ka moka le ka meoya ya bona ka moka le ka menagano ya bona ka moka.’ (Mateo 22:37) Go botegela ga bona Jehofa ka go se kwanantšhe go hlatsetše gore Sathane o boletše maaka mabapi le kgang ya potego ya batho. Le wena o ka hlatsela gore Sathane o boletše maaka ka go ba monna goba mosadi yo a botegago.

O Swanetše go Dira’ng?

Ke thato ya Modimo gore “mehuta yohle ya batho e phološwe gomme e fihle tsebong e nepagetšego ya therešo.” (1 Timotheo 2:4) O ka dira seo bjang? Dira lenaneo la go ithuta Beibele gomme o ‘hwetše tsebo ka Modimo a nnoši wa therešo le ka yo a mo romilego, Jesu Kriste.’—Johane 17:3.

Sathane o ile a hlohla potego ya batho ka go belaela maikemišetšo a bona a go hlankela Modimo. E le gore tsebo e tutuetše maikemišetšo a gago, e swanetše go kgoma pelo ya gago. Le gona e le gore se se direge, o swanetše go ithuta ka mo go tseneletšego e sego go fo nyaka tsebišo ka Beibeleng. Hlagolela mokgwa wa go naganišiša ka seo o ithutago sona. (Psalme 143:5) Ge o bala Beibele goba dipuku tšeo di theilwego Beibeleng, kgonthišetša gore o naganišiša ka dipotšišo tše di swanago le tše: ‘Se se nthuta’ng ka Jehofa? Ke dika dife tša Modimo tšeo ke di bonago di tšweletšwa mo? Ke dikarolong dife bophelong bja-ka mo ke swanetšego go ba ka tsela ye? Ke dilo dife tšeo Modimo a di amogelago le tšeo a sa di amogelego? Seo se kgoma bjang maikwelo a-ka ka Modimo?’ Go naganišiša ka tsela ye go tla dira gore pelo ya gago e rate le go leboga Mmopi.

Go botegela Modimo ga se gwa lekanyetšwa feela dipolelong tša bodumedi. (1 Dikxoši 9:4) Go dula o botegela Jehofa Modimo go nyaka boitshwaro bjo bobotse dikarolong ka moka tša bophelo. Lega go le bjalo, go dula o botega go ka se  go time selo. Jehofa ke “Modimo yo a thabilego,” gomme o nyaka gore o thabele bophelo. (1 Timotheo 1:11) Ga bjale nagana ka mekgwa e mengwe yeo o swanetšego go e efoga e le gore o dule o hlwekile boitshwarong gomme ka go dira bjalo o be le bophelo bjo bo thabišago le go amogelwa ke Modimo.

Efoga Boitshwaro bjo bo Gobogilego bja Dikopano tša Botona le Botshadi

Jehofa ka boyena o beile tekanyetšo ya lenyalo yeo e hwetšwago ka Lentšung la gagwe e lego Beibele, yeo e rego: “Monna ó tlo tloxêla tata’xwê le mma’xwê, a xomarêla mosadi wa xaxwe; xomme ba tlo ba nama e tee.” (Genesi 2:21-24) Ka ge balekane ba lenyalo ba fetogile “nama e tee,” ba godiša thulaganyo ya Modimo ya lenyalo ge ba e-ba le dikopano tša botona le botshadi le balekane ba bona feela. Moapostola Paulo o boletše gore: “Lenyalo a le hlomphege go bohle, gomme malao a lenyalo a se be le ditšhila, gobane Modimo o tla ahlola diotswa le dihlotlolo.” (Baheberu 13:4) Polelwana “malao a lenyalo” e šupa go kopano ya botona le botshadi gare ga monna le mosadi bao ba nyalanego ka molao. Ge yo mongwe wa bona a ka ba le dikopano tša botona le botshadi tša ka ntle ga lenyalo, seo e tla ba go dira bohlotlolo gomme se tla ba bakela kotlo e sehlogo e tšwago go Modimo.—Maleaki 3:5.

Go thwe’ng ka dikopano tša botona le botshadi tša pele ga lenyalo? Le tšona di thulana le ditekanyetšo tša boitshwaro tšeo di beilwego ke Jehofa. Beibele e re: “Gobane se ke seo Modimo a se ratago, . . . gore le ile bootswa.” (1 Bathesalonika 4:3) Bosodoma, dikopano tša botona le botshadi le wa leloko gotee le dikopano tša botona le botshadi le phoofolo le tšona ke dibe mahlong a Modimo. (Lefitiko 18:6, 23; Baroma 1:26, 27) Motho le ge e le ofe yo a ratago go kgahliša Modimo gotee le go ba le bophelo bjo bo thabišago o swanetše go šuthela kgole le mekgwa e gobogilego.

Go thwe’ng ka mokgwa wa go tsoša kganyogo ya kopano ya botona le botshadi pele ga lenyalo? Mokgwa wo ga o kgahliše Jehofa. (Bagalatia 5:19) Le monagano o swanetše go bolokwa o hlwekile o efošwa dikgopolo tše di gobogilego. Jesu o itše: “Yo mongwe le yo mongwe yo a tšwelago pele a lebeletše mosadi e le gore a mo kganyoge o šetše a hlotlotše le yena pelong ya gagwe.” (Mateo 5:28) Mantšu ao a šoma le tabeng ya go lebelela diswantšho tšeo di tsošago dikganyogo tša dikopano tša botona le botshadi dipukung, difiliming goba go Internet; go bala dipego tšeo di bolelago ka ditiro tša kopano ya botona le botshadi; go akaretšwa le go theetša dikoša tšeo di hlohleletšago kopano ya botona le botshadi. Go efoga dilo tše go kgahliša Modimo e bile go ba le tutuetšo e agago bophelong bja motho.

Go thwe’ng ka go bapala ka lerato? Go bapala ka lerato go hlaloswa e le “lerato le le se nago maikemišetšo goba dikgoketšo tša dikopano tša botona le botshadi.” Monna goba mosadi yo a lego lenyalong yo a lebišago dikgahlego tše bjalo mothong yo a sego a nyalana le yena o thulana le melao ya motheo ya Beibele gomme se ke pontšho ya go se hlomphe Jehofa. (Baefeso 5:28-33) Go fošagetše gakaakang gore batho bao ba sego lenyalong ba bontšhane dikgahlego tša lerato e le feela go bapala! Go ka direga’ng ge e ba go bapala mo go bjalo go sa lebelelwe ke yo mongwe e le papadi? Nagana ka bohloko bja maikwelo bjo bo ka bakwago ke seo. Selo se sengwe seo se re phafošago ke taba ya gore go bapala ka lerato go ka dira gore batho ba dire bootswa goba bohlotlolo. Ka lehlakoreng le lengwe, go swara batho ba bong bjo bo fapanego ka bokwala go godiša go itlhompha.—1 Timotheo 5:1, 2.

Go Kgahliša Modimo Dikarolong tše Dingwe tša Bophelo

Dinageng tše dintši dino-tagi di hwetšagala gabonolo. Na ke phošo go di nwa? Go nwa beine, bjala goba dino-tagi tše dingwe ka go lekanyetša ga go ganetšwe ke Mangwalo. (Psalme 104:15; 1 Timotheo 5:23) Lega go le bjalo, go nwa kudu le botagwa ke dilo tše fošagetšego mahlong a Modimo. (1 Bakorinthe 5:11-13) Ruri ga o nyake gore go nwa ka mo go feteletšego go senye bophelo bja gago bjo bobotse gaešita le go šarakanya bophelo bja lapa la gago.—Diema 23:20, 21, 29-35.

Jehofa ke “Modimo-mmotexi.” (Psalme 31:5) Beibele e bolela gore: ‘Ga go kgonege gore Modimo  a aketše.’ (Baheberu 6:18) Ge e ba o nyaka go amogelwa ke Modimo, o tla efoga go bolela maaka. (Diema 6:16-19; Bakolose 3:9, 10) Beibele e eletša Bakriste ka gore: “Bolelang therešo yo mongwe le yo mongwe wa lena le moagišani wa gagwe.”—Baefeso 4:25.

Le gona go na le mokgwa wa go petšha. Le ge go tlwaetšwe ke ba bantši, go petšha ke mokgwa wa megabaru, ka ge e le maiteko a go hwetša tšhelete yeo ba bangwe ba e beeleditšego. Jehofa ga a kgahlwe ke batho ba “megabaru ya leruo la go se botege.” (1 Timotheo 3:8) Ka gona ge e ba o nyaka go kgahliša Jehofa, o tla tlogela mekgwa ka moka ya go petšha, go akaretša di-lottery, bingo le go petšha dipere. Ge e le gabotse, o ka hwetša o na le tšhelete e ntši bakeng sa go kgona go fihlelela dinyakwa tša lapa la gago.

Go utswa, e lego go tšea selo seo e sego sa gago, ke mokgwa o mongwe wa megabaru. Beibele e re: “O se kê wa utswa.” (Ekisodo 20:15) Ke phošo go reka dilo tšeo o tsebago gore di utswitšwe le go tšea dilo ka ntle le tumelelo. Beibele e re: “Yo a utswago a se ke a hlwa a utswa, eupša go e-na le moo a šome ka thata, a dire seo e lego modiro o mobotse ka diatla tša gagwe, gore a be le seo a ka se abelago yo mongwe yo a hlokago.” (Baefeso 4:28) Go e na le gore ba utswe nako mošomong, bao ba ratago Jehofa ba dira mošomo wa letšatši ka potego. Ba “rata go itshwara ka go botega dilong tšohle.” (Baheberu 13:18) Le gona, letswalo leo le hlwekilego ka kgonthe le tlaleletša khutšong ya monagano.

Modimo o lebelela bjang motho yo a nago le kgalefo e šoro? Beibele e lemoša ka gore: “O se kê wa tlwaêlana le monna wa sebefedi; O se yê xo monna-moxalefi.” (Diema 22:24) Kgalefo e sa laolegego gantši e lebiša dintweng. (Genesi 4:5-8) Ge e le mabapi le go itefeletša Beibele e re: “Le se ke la bušetša bobe ka bobe go motho. Dirang dilo tše botse mahlong a batho bohle. Ge e ba go kgonega, go fihla moo go ithekgilego ka lena, e-bang le khutšo le batho bohle. Le se ke la itefeletša, baratiwa, eupša šuthelelang kgalefo; gobane go ngwadilwe gwa thwe: ‘Tefetšo ke ya-ka, ke tla lefetša, go re’alo Jehofa.’” (Baroma 12:17-19) Ge e ba re latela taelo yeo, maphelo a rena a tla atelwa ke khutšo—gomme seo se tla godiša lethabo la rena.

O ka Kgona

Na o ka kgona go dula o botegela Modimo go sa šetšwe kgatelelo ya gore o se botege? Ee, o ka kgona. Gopola gore Modimo o nyaka gore o kgone go hlatsela gore Sathane o boletše maaka mabapi le kgang ya potego, ka ge Lentšu la Gagwe le re: “Ngwan’a-ka! Hlalefa, O nthabišê pelo, ke tsebê se nkaxo fetola sôna xe ba nnyatša.”—Diema 27:11.

O ka kgopela Jehofa ka thapelo gore a go nee matla a go dira se se lokilego mahlong a gagwe. (Bafilipi 4:6, 7, 13) Ka gona ikemišetše go godiša maiteko a gago a go oketša tsebo ya gago ya Lentšu la Modimo, Beibele. Go naganišiša ka go rata ka seo o ithutago sona ka Beibeleng go ka go thuša gore o rate Modimo kudu gomme go tla go tutueletša gore o mo kgahliše. Johane wa Pele 5:3 e re: “Se ke seo lerato la Modimo le se bolelago, gore re boloke ditaelo tša gagwe; gomme ditaelo tša gagwe ga di boima.” Dihlatse tša Jehofa motseng wa geno di tla thabela go go thuša go ithuta Beibele. O kgopelwa gore o ikopanye le tšona motseng wa geno goba o ka ngwalela bagatiši ba makasine wo.

[Seswantšho go letlakala 4]

Jobo o ile a dula o botega ka tlase ga teko

[Seswantšho go letlakala 7]

Go oketša tsebo ya gago Lentšung la Modimo go tla matlafatša boikemišetšo bja gago bja go dira se se lokilego