Ruta Bana ba Gago go Nea Ditlhaloso

PERLA yo a dulago Mexico o gopola gore ge e be e sa le ngwanenyana yo monyenyane, mmagwe o be a mo thuša go lokišetša dikarabo tše dikopana bakeng sa Thuto ya Morokami. Ga bjale Perla o na le morwa wa nywaga e mehlano. O mo thuša bjang? O re: “Ke thoma ka go lokišetša. Ge ke dira bjalo, ke lebelela serapa seo morwa wa-ka a ka se kwešišago, seo a ka kgonago go se hlalosa ka mantšu a gagwe. Ke moka re thoma go lokišetša seo a se bitšago ‘serapa sa-ka.’ Ke mo kgopela gore a se hlalose a diriša mehlala e tlwaelegilego. Ke moka re boeletša tlhaloso yeo ka makga a mmalwa. Re diriša selo seo se lekanago le maekrofone e le gore a tsebe kamoo a swanetšego go o swara ka gona ge a araba. Ke thaba kudu gore ga go na seboka se se fetago a se a araba goba a se a emiša letsogo. Gantši o ya go moswari wa thuto pele ga ge seboka se ka thoma gomme a mmotša serapa seo a nyakago go araba go sona.”

Jens e lego mogolo yo a hlankelago sehlopheng seo go sona go bolelwago se-Hindi, o na le barwa ba babedi, wa nywaga e mebedi le wa nywaga e mene. Ge yena le mosadi wa gagwe ba lokišetša diboka le bana ba bona, ba diriša mokgwa wo Jens a ithutilego wona go batswadi ba gagwe. O re: “Re ela hloko gore ke dikarolo dife tša sehlogo tšeo bana ba ka di kwešišago. Ke moka re leka go ba nea kakaretšo ya taba e itšego goba dintlha tše dikgolo tša sehlogo, gomme ka morago re ba botšiša dipotšišo tšeo re nyakago gore ba di arabe dibokeng. Gantši re makatšwa ke dikarabo tšeo ba di neago ka mantšu a bona. Tsela yeo ba bolelago maikwelo a bona ka yona ruri e bontšha seo ba se kwešišago. Ka baka leo, dikarabo tša bona e ba theto ya kgonthe go Jehofa e bile di bontšha tumelo ya bona.”