Sekolo Seo Dialoga tša Sona di Holago Batho Lefaseng ka Bophara

DIPHUTHEGONG tše fetago 98 000 tša Dihlatse tša Jehofa dinageng tše fetago 200, batho ba tšwago maemong ka moka a bophelo ba rutwa ke Modimo. Puku e dirišwago kudu ke Beibele, gomme morero wa thuto ye ke go thuša batho go gola moyeng ka go ithuta seo thato ya Modimo e lego sona le kamoo ba ka phelago ka go dumelelana le yona. Bao ba amogelago thuto ye ba holega e le ruri. Ba botša ba bangwe seo ba ithutago sona, ka go dumelelana le taelo ya Jesu Kriste ya gore re dire barutiwa.—Mateo 28:19, 20.

Go tlaleletša lenaneong la thuto leo le tšwelago pele diphuthegong tša tšona, Dihlatse tša Jehofa di theile dikolo tše mmalwa tše di kgethegilego. Se sengwe sa tšona ke Sekolo sa Tlwaetšo ya Bodiredi. Se thomile ka October 1987 kua Pittsburgh, Pennsylvania, U.S.A. Sehlopha sa mathomo e be e le sa barutwana ba bolelago Seisemane ba 24. Ga e sa le go tloga ka nako yeo, go swerwe dithuto ka maleme a 21 dinageng tše 43. Go fihla ga bjale, bagolo le bahlanka ba bodiredi ba sego ba nyala bao ba tšwago dinageng tše fetago 90 ba šetše ba tlwaeditšwe. Ge di fetša lenaneo-thuto la dibeke tše seswai, dialoga di abelwa go ya moo go nyakegago baboledi ba oketšegilego, e ka ba nageng ya gabo tšona goba nageng e šele. Mafelelong a 2005, badiredi ba Bakriste ba fetago 22 000 ba be ba šetše ba alogile. Maiteko a bona ao ba  a dirago ka boikokobetšo a go tšwetša pele mediro ya Mmušo le go hola ba bangwe a putsitšwe kudu.—Diema 10:22; 1 Petro 5:5.

Go Lokišeletša go ya

E le gore ba ye Sekolong sa Tlwaetšo ya Bodiredi, barutwana ba bantši ba swanelwa ke go kgopela gore ba se be gona mešomong ya bona ya boiphedišo ya nakwana goba ya ka mehla. Ka dinako tše dingwe se se baka mathata. Kua Hawaii, banna ba babedi ba Bakriste bao ba bego ba laleditšwe gore ba ye sekolong ba ile ba swanelwa ke go kgopela gore ba se be gona mošomong wa bona wa borutiši. Ka tumelo ba ile ba romela dikgopelo tša bona, ba hlalosa lebaka leo ka lona ba swanetšego go ya le kamoo ba tlago go holega ka gona. Ba ile ba dumelelwa go sepela.

Mabakeng a mantši Dihlatse tšeo di kgopetšego go se be gona mošomong di ile tša botšwa gore di tla felelwa ke mošomo. Di kgethile go tlwaetšwa ke mokgatlo wa Jehofa gaešita le ge seo se be se bolela gore di tla felelwa ke mošomo. Ba bangwe ba ile ba botšwa ke bathwadi ba bona gore ba boe gape mošomong ka morago ga ge ba alogile sekolong. Boikemišetšo bjo bjalo bja go ya sekolong bo ka akaretšwa ka tsela ye: Kgopela tumelelo go mothwadi, rapelela thušo ya Jehofa gomme o tlogele dilo matsogong a gagwe.—Psalme 37:5.

‘Ba Rutwa ke Jehofa’

Lenaneo-thuto la dibeke tše seswai la sekolo le akaretša thuto e tseneletšego ya Beibele. Barutwana ba ithuta kamoo batho ba Jehofa ba rulagantšwego ka gona bakeng sa go dira thato ya Modimo le kamoo bona ka bobona ba ka dirišago Beibele ka katlego bodireding bja bona bja tšhemo, dibokeng tša phuthego le dikopanong.

Sealoga se sengwe se se nago le tebogo se ile sa ngwalela morutwana yo a sego a hlwa a e-ya sekolong mantšu a: “Ruri ke a go botša, o tla ithuta ka tsela yeo o sa kago wa ithuta ka yona pele. Ruri go dirwa gore re be le kwešišo e oketšegilego ya lengwalo leo le bolelago ka go ‘rutwa ke Jehofa.’ Nako ka moka yeo e fetšwago moo ke ya go bopša le go lokišwa ga pelo le semelo sa motho e le gore se dumelelane kudu le mohlala wa Kriste Jesu. Ge o e-ya sekolong, o tla ba le nako e thabišago kudu yeo o sa kago wa ba le yona bophelong bja gago.”—Jesaya 54:13.

Baebangedi, Badiši le Barutiši

Ga bjale dialoga tša Sekolo sa Tlwaetšo ya Bodiredi di hlankela dinageng tše 117. Dinaga tšeo di akaretša dihlakahlaka ša Atlantic, Caribbean, dinaga tša Pacific gotee le dinaga tšeo go tšona go nago le diofisi tša makala tša Dihlatse tša Jehofa. Makala a bega gore tlwaetšo e botse yeo barutwana ba e hweditšego e bonala medirong ya bona ya boebangedi, ya bodiši le ya go ruta. Tlwaetšo ya bona e ba hlamela go diriša Beibele ka katlego bodireding bja tšhemo. (2 Timotheo 2:15) Le gona ge ba araba dipotšišo tša beng ba dintlo, gantši ba diriša puku ya Go Boledišana ka Mangwalo * gomme ba tlwaetša bagoeledi ba bangwe ba Mmušo go dira se se swanago. Phišego ya dialoga e a fetela gomme mediro ya tšona e matlafatša diphuthego.

Bagolo ba phuthego ba na le tokelo ya go ‘diša mohlape,’ ka go rialo ba thuše go hlokomela ba bangwe moyeng. (1 Petro 5:2, 3) Mogolo yo mongwe o boletše mabapi le tokišetšo ye gore: “Re leboga gore ofisi ya lekala e romela bana babo rena bao ba tlwaeditšwego gabotse go re thuša go rwala morwalo wa go diša mohlape wa Modimo.” Lekala la kua Bohlabela bja Kgole le boletše gore: “Dialoga di tloga di e-na le kwelobohloko. Di šoma ka thata gomme diphuthego di a di hlompha. Boikokobetšo bja tšona, borutho le go ikemišetša go šoma go tsebja ke bohle e bile di tšeelwa godimo. Di ikgafa ka go rata gomme di thabela go hudugela diphuthegong tšeo di nyakago badiši.” (Bafilipi 2:4) Banna ba bjalo ba matlafatša badumedi-gotee le bona gomme ba swanelwa ke theto.—1 Bakorinthe 16:18.

Gare ga dilo tše dingwe, bahlahli Sekolong sa Tlwaetšo ya Bodiredi ba thuša barutwana go kaonafatša bokgoni bja bona bjalo ka diboledi tša phatlalatša. Ka go diriša ditšhišinyo le  keletšo yeo di e newago, go se go ye kae dialoga tše dintši di ka dirišwa mananeong a dikopano tša tikologo le tša selete. Molebeledi yo mongwe wa tikologo o boletše gore dialoga di “nea dipolelo tše dibotse gomme di dira gore taba e šome ka go diriša mokgwa o mobotse wa go nea mabaka.”—1 Timotheo 4:13.

Mokgwa wa go ruta dibokeng tša phuthego o kaonafetše kudu nageng e nngwe Afrika ka morago ga ge Sekolo sa Tlwaetšo ya Bodiredi se be se swaretšwe go yona gomme dialoga di rometšwe tšhemong. Bagolo bao ba rometšwego go tšwa sekolong ba thuša kudu modirong wa boebangedi, wa bodiši le wa go ruta, ka go rialo ba aga diphuthego moyeng.—Baefeso 4:8, 11, 12.

Boetapele bjo bo Kaonafetšego Diphuthegong

Mafelong a mantši go nyakega bagolo le bahlanka ba bodiredi ba oketšegilego. Diphuthego tše dingwe di ka be di se na bagolo le gatee ge nkabe di sa ka tša romelwa sealoga se se tšwago Sekolong sa Tlwaetšo ya Bodiredi. Ka baka leo, dialoga tše dintši di abelwa go yo hlankela moo go nago le tlhokego e bjalo.

Makala a mantši a bega gore banna ba “ba tseba dithulaganyo tša mokgatlo gabotse,” “ba tšeela boikarabelo bja bona godimo,” “ba thuša ba bangwe go kwešiša le go hlompha mokgatlo wa Jehofa” le gore “ba tlaleletša moyeng o borutho le boemong bja moya bja diphuthego tša gabo bona.” Go bjalo ka gobane dialoga tša sekolo se di latela seo se ngwadilwego ka Lentšung la Modimo gomme ga di ithekge ka bohlale bja tšona goba tša ipona e le tše bohlale. (Diema 3:5-7) Banna ba bjalo e ba tšhegofatšo ya moya diphuthegong tšeo ba abelwago go tšona.

Go Hlankela Mafelong a Lego Lekatana

Dialoga tše dingwe tšeo di kgethwago go ba babulamadibogo ba kgethegilego di thuša dihlopha tšeo di lego lekatana gore e be diphuthego. Ge a hlalosa go leboga ga gagwe thušo ya bona, mogolo yo mongwe lefelong leo le lego lekatana kua Guatemala o itše: “Ka nywaga e 20 ke be ke tshwenyega ka gore tšhemo ye e kgolo e tla hlokomelwa bjang. Gantši ke be ke rapela ka taba ye. Bana babo rena bao ba tšwago Sekolong sa Tlwaetšo ya Bodiredi ba tlwaeditšwe gabotse tabeng ya go ruta le ditabeng tša thulaganyo gomme ke leboga go bona gore ga bjale lefelo le le hwetša tlhokomelo e lerato.”

Dialoga di ithutile go atlega mafelong ao go wona di swanetšego go sepela nako e telele tikologong e tletšego dithaba e le gore di fihlelele metsana e lego moo. Ka pela ge di le moo di thea le go rulaganya sehlopha seo se lego lekatana, gaešita le ge bagoeledi ba bangwe ba sa ka ba kgona go dira bjalo. Ka mohlala, mogolo wa kua Niger o ile a kgopela thušo ya dialoga ka gobane a nagana gore di ka dira modiro o mobotse tikologong ya gabo. Go ka ba bonolo kudu bakeng sa banna ba sego ba nyala gore ba hlankele bjalo ka babulamadibogo ba kgethegilego le balebeledi ba tikologo mafelong a lego lekatana. Go etša moapostola Paulo, ba swanetše go lebeletšana le ‘dikotsi tša dinoka le bahlakodi ditseleng, dikotsi tša lešokeng,’ mathata a motho ka noši gaešita le dipelaelo tša diphuthego tšeo ba di hlankelago.—2 Bakorinthe 11:26-28.

Go Hola Bafsa

Mangwalo a kgothaletša bafsa go gopola Mmopi wa bona. (Mmoledi 12:1) Dialoga tše di fišegago tša Sekolo sa Tlwaetšo ya Bodiredi ke mohlala o mobotse go bafsa ba Bakriste. Ka morago ga ge dialoga tše pedi di fihlile phuthegong e nngwe kua United States, palo-moka ya nako yeo bana babo rena ba e fetšago bodireding e ile ya ipoeletša gabedi. Go oketša moo, palo ya babulamadibogo ba ka mehla, goba bagoeledi ba Mmušo ba nako e tletšego, e ile ya oketšega go tloga go ba 2 go ya go ba 11. Diphuthegong tše dintši go diregile se se swanago.

Le gona dialoga di kgothaletša bafsa go naganišiša ka taba ya go ya Sekolong sa Tlwaetšo ya Bodiredi. Se se kgothaleditše ba bangwe bao ba sego ba hlwa ba hlankela bjalo ka bahlanka ba bodiredi go katanela go fihlelela tokelo yeo. Ofisi ya lekala ya Netherlands e bitša dialoga  tša Sekolo sa Tlwaetšo ya Bodiredi gore ke “mohlala go bafsa bao ba naganago ka seo ba tlago go se dira ka maphelo a bona.”

Go Hlankela Diphuthegong tša Maleme a Šele

Dinageng tše dintši, maiteko a go botša batho ditaba tše dibotse ka leleme la gabo bona a a akgofa. Gantši dialoga tša Sekolo sa Tlwaetšo ya Bodiredi di ithuta maleme a mangwe gomme tša hlankela mafelong ao go nago le batho ba bantši ba tšwago dinageng dišele. Ka mohlala, kua Belgium go nyakega bagoeledi ba oketšegilego ba Mmušo tšhemong ya batho ba bolelago se-Albania, se-Persia le se-Russia.

Diphuthego le dihlopha tša batho ba bolelago maleme a šele kua Brithania, Italy, Jeremane, Mexico, United States le dinageng tše dingwe ga bjale di holwa kudu ke balebeledi ba basepedi, bagolo le bahlanka ba bodiredi bao ba alogilego Sekolong sa Tlwaetšo ya Bodiredi. Lekala la kua Korea le bega gore “dialoga tše fetago 200 di bapala karolo ya bohlokwa go thušeng diphuthego le dihlopha tša maleme a šele.”

Go Hlankela Maemong a Mangwe ka Boikokobetšo

Go tlaleletša go hlankeleng dihlopheng le diphuthegong tša maleme a šele, dialoga tša Sekolo sa Tlwaetšo ya Bodiredi di hlankela bjalo ka bagolo, bahlanka ba bodiredi le balebeledi ba basepedi. Tše dingwe di amogela dikabelo tša go ya dinageng tše dingwe, mohlomongwe di thuša moo go tlogago go nyakega thušo Lefapheng la Tirelo lekaleng. Bao ba nago le bokgoni go tša kago ba ka tšea karolo lenaneong la go aga Diholo tša Mmušo.

Go oketšega ga palo ya diphuthego le ditikologo lefaseng ka bophara go bolela gore go dula go nyakega balebeledi ba oketšegilego ba basepedi. E le go thuša go fihlelela se, dialoga tše itšego tša Sekolo sa Tlwaetšo ya Bodiredi di newa tlwaetšo ya dibeke tše lesome ya modiro wa bosepedi gomme tša hlankela bjalo ka balebeledi ba tikologo ba thušago goba ba ka mehla. Ga bjale dialoga tše ka bago 1 300 di hlankela bjalo ka balebeledi ba basepedi dinageng tše 97. Nageng e nngwe Afrika, 55 lekgolong ya balebeledi ba basepedi ke dialoga tša Sekolo sa Tlwaetšo ya Bodiredi mola go e nngwe e le 70 lekgolong.

Kua Australia, Canada, Yuropa, Bohlabela bja Kgole le United States, dialoga tše makgolo di rometšwe gore di yo hlankela dikabelong tše itšego ka mo go kgethegilego dinageng tše dingwe. Ka tsela ye, sekolo se se hola batho lefaseng ka bophara.

Ka Morwa wa gagwe, Jesu Kriste, Jehofa o tsošitše baebangedi, badiši, barutiši le ba bangwe bao ba etišago mediro ya Mmušo pele matšatšing a a bofelo. Na go na le kgonagalo ya gore palo ya batho ba Modimo e oketšege? Ka kgonthe! Ka gona, go dula go nyakega gore banna ba ineetšego ba katanele go swanelegela boikarabelo bjo bo oketšegilego. (Jesaya 60:22; 1 Timotheo 3:1, 13) Sekolo sa Tlwaetšo ya Bodiredi se nea bagolo le bahlanka ba bodiredi sebaka sa gore ba hlamelwe go katološa bodiredi bja bona gomme bona seng ba holege kudu le go hola ba bangwe tšhemong ya lefase ka bophara.

[Mongwalo wa ka tlase]

[Diswantšho go letlakala 10]

Sekolo sa Tlwaetšo ya Bodiredi se etiša pele mediro ya Mmušo lefaseng ka bophara

[Diswantšho go letlakala 13]

Na o nyaka go ingwadiša Sekolong sa Tlwaetšo ya Bodiredi gomme o hole ba bangwe?