Dipotšišo tše Tšwago go Babadi

Na Jesu o be a se na tlhompho goba a se botho tseleng yeo a ilego a bolela le mmagwe ka yona monyanyeng wa lenyalo kua Kana?—Johane 2:4.

Nakwana ka morago ga ge a kolobeditšwe, Jesu le barutiwa ba gagwe ba ile ba laletšwa monyanyeng wa lenyalo kua Kana. Mmagwe le yena o be a le gona. Ge beine e be e hlaela, Maria o boditše Jesu gore: “Ga ba na beine.” Ge a araba, Jesu o boditše mmagwe gore: “Ke na le taba mang le wena, mosadi? Nako ya-ka ga e ešo ya fihla.”—Johane 2:1-4.

Lehono, gore motho a bitše mmagwe a re “mosadi” le gore “ke na le taba mang le wena?” go ka lebelelwa e le go se be le tlhompho, gaešita le go rogana. Eupša go latofatša Jesu ka tsela yeo e be e tla ba go hlokomologa setšo le polelo yeo e bego e dirišwa ka nako yeo. Go kwešiša kamoo dipolelwana tše di bego di dirišwa ka gona mehleng ya Beibele e tla ba mo go thušago.

Ge Vine’s Expository Dictionary of Old and New Testament Words e bolela mabapi le lentšu “mosadi” e re: “Le dirišwa ge go bolelwa le mosadi, ga se polelwana ya go kgalemela goba go galefa, eupša ke ya lerato goba tlhompho.” Methopo e mengwe e dumelelana le se. Ka mohlala, The Anchor Bible e re: “Se ga se go kgalema goba polelwana e se nago tlhompho, goba pontšho ya go se be le lerato . . . E be e le tsela ya Jesu e tlwaelegilego le ya tlhompho ya go bitša basadi.” The New International Dictionary of New Testament Theology e hlalosa gore lentšu le “le dirišwa e le polelwana e se nago go se hlomphe ka gare.” Le gona Theological Dictionary of the New Testament ya Gerhard Kittel e bolela gore go dirišwa moo “ruri ga se mo go se nago tlhompho goba mo go nago le lenyatšo.” Ka gona, ga se ra swanela go phetha ka gore Jesu o be a hloka tlhompho goba a se botho go mmagwe ge a be a mmitša ka lentšu le le rego “mosadi.”—Mateo 15:28; Luka 13:12; Johane 4:21; 19:26; 20:13, 15.

Go thwe’ng ka polelwana e rego, “ke na le taba mang le wena?” Go bonagala se e le seka se se tlwaelegilego sa Bajuda seo se tšwelelago ka makga a mantši ka Beibeleng. Ka mohlala, go 2 Samuele 16:10 (PK), re kwa ka Dafida a thibela Abisai gore a se ke a bolaya Simei gore: “Ke na le taba mang le lena, barwa ba Tseruya? Mo lesetšeng a roge, ge Jehofa a mo laetše gore: Roga Dafida!” Ka mo go swanago, re bala go 1 Dikxoši 17:18 gore ge mohlologadi wa Tsarepata a se na go hwetša gore morwa wa gagwe o hwile, o boditše Eliya gore: “Ke sa na le taba mang naxô’ wene monna wa Modimo? A O tlile xo nna xore xo xopolwê sebe sa-ka, le xore ngwana wa-ka a hwê?”

Go tšwa mehlaleng ye ya Beibele, re ka kgona go bona gore polelwana e rego “ke na le taba mang le wena?” e dirišwa gantši, e sego ka lenyatšo goba makoko, eupša ka go gana go akaretšwa tirong e kgothaletšwago goba e šišinywago gaešita le go bontšha pono goba kgopolo e fapanego. Ka gona, go ka thwe’ng ka mantšu ao Jesu a a boditšego Maria?

Ge Maria a be a botša Jesu gore “Ga ba na beine,” go molaleng gore o be a sa fo botša Jesu seo se diregago eupša o be a šišinya gore a dire se sengwe ka taba yeo. Jesu o dirišitše seka seo se se tlwaelegilego e le bakeng sa go gana tšhišinyo yeo e sa bolelwego ka go lebanya ya Maria, gomme mantšu a gagwe a oketšegilego a rego, “Nako ya-ka ga e ešo ya fihla,” a re thuša go kwešiša lebaka la go ba a ile a dira bjalo.

Go tloga nakong ya ge a be a kolobetšwa le go tlotšwa ka 29 C.E., Jesu o be a lemoga gabotse gore e be e le thato ya Jehofa gore yena, bjalo ka Mesia yo a holofeditšwego, a sepele tseleng ya go botega yeo e bego e tla feleletša ka gore a hwe, a tsoge le go tagafatšwa. O itše: “Morwa wa motho [ga] se a tlela go direlwa, eupša [o] tletše go direla le go nea moya wa gagwe gore e be topollo bakeng sa ba bantši.” (Mateo 20:28) Ge nako ya lehu la gagwe e be e dutše e batamela, Jesu o ile a dira gore taba ye e kwešišege ka go bolela gore: ‘Nako e fihlile.’ (Johane 12:1, 23; 13:1) Ka baka leo, thapelong ya gagwe bošegong bja pele ga lehu la gagwe, Jesu o itše: “Tate, nako e fihlile; tagafatša morwa wa gago, gore morwa wa gago  a go tagafatše.” (Johane 17:1) Ke moka ge lešaba mafelelong le be le fihla go tla go mo golega kua Getsemane, Jesu o ile a tsoša baapostola bao ba bego ba robetše gomme a re: “Iri e fihlile! Bonang! Morwa wa motho o ekelwa diatleng tša badiradibe.”—Mareka 14:41.

Lega go le bjalo, lenyalong la kua Kana, Jesu o be a sa tšwa go thoma bodiredi bja gagwe e le Mesia gomme “iri” e be e se ya tšwa e fihla. Morero wa gagwe o mogolo e be e le go dira thato ya Tatagwe ka tsela le ka nako yeo Tatagwe a ilego a laela ka yona, le gona go be go se na motho yo a bego a ka šitišana le go ikemišetša ga gagwe tseleng yeo. Ge a be a botša mmagwe taba yeo, Jesu o be a sa itome ganong eupša gape ga se gore o be a sa bontšhe tlhompho goba a se botho. Ka lehlakoreng le lengwe, Maria ga se a ka a ikwa a nyamile goba a rogilwe ke morwa wa gagwe. Ge e le gabotse, ka ge a be a kwešiša seo Jesu a bego a se bolela, Maria o ile a botša bao e bego e le badiredi lenyalong leo gore: “Se sengwe le se sengwe seo a le botšago sona, le se dire.” Go e na le go hlokomologa mmagwe, Jesu o dirile mohlolo wa gagwe wa pele e le Mesia—wa go fetoša meetse gore e be beine e bose—gomme ka go rialo a bontšha teka-tekano e botse ka go dira thato ya Tatagwe le go ela hloko selo seo mmagwe a bego a tshwenyegile ka sona.—Johane 2:5-11.

[Seswantšho go letlakala 31]

Jesu o be a le botho eupša a sa itome ganong ge a be a bolela le mmagwe