Go Botega go a Putsa

GO SE botege go bile gona go tloga tšhemong ya Edene. Lega go le bjalo, ditšo gotee le ditšhaba tše dintši di tšeela potego godimo gomme di lebelela go bolela maaka le bofora e le tšeo di sa kgahlišego le go se amogelege. Go lebelelwa o le yo a botegago ke selo seo motho a swanetšego go ikgantšha ka sona. Lega go le bjalo, gantši go se botege go lebelelwa e le selo seo se nyakegago bakeng sa gore motho a kgone go atlega mehleng ya lehono. O nagana bjang ka seo? Na potego ke selo seo se swanetšego go hlagolelwa? Ke ditekanyetšo dife tšeo o di dirišago bakeng sa go kgethologanya potego le go se botege?

E le gore re kgahliše Modimo, re swanetše go botega ka polelo gaešita le tseleng ya rena ya bophelo. Moapostola Paulo o eleditše Bakriste-gotee le yena gore: “Bolelang therešo yo mongwe le yo mongwe wa lena le moagišani wa gagwe.” (Baefeso 4:25) Paulo gape o ngwadile gore: “Re rata go itshwara ka go botega dilong tšohle.” (Baheberu 13:18) Maikemišetšo a rena a gore re botege ga se gore re retwe ke batho ba bangwe. Re botega ka gobane re hlompha Mmopi wa rena e bile re nyaka go mo kgahliša.

O se ke wa Uta Seo o Lego Sona

Dinageng tše dintši, batho ba uta seo ba lego sona e le gore ba kgone go hwetša dilo tše itšego bophelong. Ba hwetša mangwalo a boitsebišo, di-diploma le mangwalo a bohlatse a bofora e le gore ba tsene ka nageng ka ntle le tumelelo goba e le gore ba hwetše mošomo goba maemo ao a sa ba swanelego. Batswadi ba bangwe ba nea bohlatse bja maaka mangwalong a bana ba bona a bohlatse bja matswalo e le go dira gore ba oketše nako ya bona ya go tsena sekolo.

Lega go le bjalo, e le gore re kgahliše Modimo, re ka se bolele maaka. Beibele e bolela gore Jehofa ke “Modimo-mmotexi” le gore o lebeletše gore bao ba nago le tswalano le yena ba botege. (Psalme 31:5) Ge e ba re nyaka go dula re e-na le tswalano ya kgaufsi le Jehofa, re ka se ke ra ekiša “batho ba maaká,” bao e lego “ba bomenetša.”—Psalme 26:4.

Go tlwaelegile gore batho ba ute therešo ge e ba ba lebeletšane le go laiwa ka ge ba dirile selo se se fošagetšego. Gaešita le ka phuthegong ya Bokriste, motho a ka lekega go dira bjalo. Ka mohlala, phuthegong e nngwe lesogana le lengwe le ile la ipolela go bagolo gore le dirile dibe tše itšego. Lega go le bjalo, ga se la ka la amogela gore le utswitše, le ge go be go e-na le bohlatse bja gore le utswitše. Mafelelong go ile gwa utollwa gore le utswitše gomme le ile la swanelwa ke go kgaolwa ka phuthegong. Na e be e ka se be gabohlale gore le botege ka mo go feletšego gomme le thušwe gore le boloke tswalano ya lona e bohlokwa le Jehofa? Goba gona, Beibele e re: “O se ke wa nyenyefatša tayo e tšwago go Jehofa, le gona o  se ke wa felelwa ke matla ge o phošollwa ke yena, gobane yo Jehofa a mo ratago o a mo laya.”—Baheberu 12:5, 6.

Ka dinako tše dingwe, ngwanabo rena yo a nyakago go fihlelela boikarabelo ka phuthegong a ka leka go uta mathata a gagwe goba mekgwa ya go se itshware gabotse yeo a ilego a e dira. Ka mohlala, ge a tlatša fomo ya kgopelo ya tirelo e kgethegilego ya nako e tletšego, a ka no se arabe ka mo go feletšego dipotšišo tša maphelo le tša boitshwaro, a nagana gore go bolela therešo ditabeng tše bjalo go ka dira gore a se amogelwe. A ka nea mabaka ka gore, ‘Ga se gore ke boletše maaka,’ eupša na o be a rereša le go botega go tše dingwe? Hlokomela ntlha yeo e tšweletšwago go Diema 3:32 (PK), e rego: “Jehofa o hlaswa motho e a arogago, eupša o gwerana le ba dipelo tše di otlologilego.”

Sa pele, go ba yo a botegago go bolela go ipotegela. Gantši re dumela seo re ratago go se dumela, go e na le go dumela selo sa kgonthe goba sa therešo. Ruri go bonolo kudu gore re sole ba bangwe go e-na le go itshola! Ka mohlala, Kgoši Saulo o ile a leka go lokafatša go se kwe ga gagwe ka go sola ba bangwe. Ka baka leo, Jehofa o ile a mo lahla gomme ya se sa ba kgoši. (1 Samuele 15:20-23) O fapane gakaakang le Kgoši Dafida yo a rapetšego Jehofa ka gore: “Ka bá ka Xo bobolêla sebe sa-ka, ka se kê ka hlwa kè uta molato; ka re a nke ke ipobôlêlê ka bokxôpô bya-ka xo Morêna. ’Me Wêna  wa napa wa nthola molato wa sebe.”—Psalme 32:5.

Potego e Tliša Ditšhegofatšo

Go botega goba go se botege go tutuetša tsela yeo ba bangwe ba go lebelelago ka yona. Ge batho ba lemoga gore o ba forile le ge e ka ba gatee, ba ka se sa go bota gomme ga go bonolo go phumola seo. Ka lehlakoreng le lengwe, ge e ba o rereša e bile o botega o tla itirela botumo bja go ba motho yo a botegago, yo a swanetšego go botwa. Dihlatse tša Jehofa di itiretše botumo bjo bo bjalo. Ela hloko mehlala e mengwe.

Molaodi wa khamphani o ile a lemoga gore bašomedi ba gagwe ba bantši ba be ba utswetša khamphani, ka gona o ile a nyaka thušo ya maphodisa. Ge a lemoga gore mošomedi yo e lego yo mongwe wa Dihlatse tša Jehofa o be a le gare ga bao ba bego ba golegilwe, o ile a ya go maphodisa bakeng sa go dira gore Hlatse e lokollwe ka bjako. Ka baka la’ng? Ka baka la gore molaodi o be a tseba gore motho yo e be e le mošomi yo a botegago le gore o be a se na molato. Hlatse e ile ya tšwela pele e šoma, mola ba bangwe ba ile ba rakwa mošomong. Dihlatse-gotee le yena di ile tša thaba, di tseba gore boitshwaro bja gagwe bo tlišitše kgodišo leineng la Jehofa.

Boitshwaro bjo bobotse bo a lemogwa. Motseng o mongwe moo go dulago ma-Afrika, leporogo leo le lego ka godimo ga mokero wa go sepediša meetse a ditšhila le be le nyaka go lokišwa ka baka la ge mapolanka a mangwe a lona a utswitšwe. Badudi ba motse ba ile ba dira phetho ya go kgoboketša tšhelete ya go reka mapolanka a mafsa, eupša ke mang yo ba bego ba ka mmota gore a hlokomele ditšhelete tšeo? Bohle ba ile ba dumelelana ka gore e swanetše go ba yo mongwe wa Dihlatse tša Jehofa.

Ge nageng e nngwe ya Afrika go be go tsoga dintwa tša dipolitiki le tša semorafo, Hlatse yeo e bego e le sebalamatlotlo khamphaning ya ditšhaba-tšhaba e ile ya romelwa ke khamphani yeo nageng e nngwe ka ge bophelo bja yona bo be bo le kotsing. Ka ditshenyagalelo tša yona, khamphani e ile ya rulaganya gore a šome dikgwedi tše dintši ka nageng yeo go fihlela ge boemo bo boetše sekeng. Ka baka la’ng? Ka baka la gore nakong e fetilego o be a ile a gana go dirišana le bao ba bego ba rulaganya go utswetša khamphani. Balaodi ba be ba tseba ka botumo bja gagwe bja potego e feletšego. Na ba ka be ba ile ba mo thuša ge nkabe a tsebega ka mediro ya go se botege?

Diema 20:7, (PK) e re: “Yo a lokilego o sepela a se na bosodi.” Motho wa potego ke motho yo a se nago bomenetša. Ga a hlalefetše ba bangwe goba go fora bao a dirišanago le bona. Na ga se tsela yeo o ratago gore ba bangwe ba dirišane le wena ka yona? Potego ke motheo wa borapedi bja therešo. Ke tsela ya go bontšha gore re rata Modimo le baagišani ba rena. Ka go ba ba botegago, re bontšha kganyogo ya rena ya go latela molao wa motheo wa boitshwaro wo o boletšwego ke Jesu, o rego: “Ka baka leo, dilo tšohle, tše le nyakago batho ba le dira tšona, le lena ka mo go swanago le ba dire tšona.”—Mateo 7:12; 22:36-39.

Go botega ka dinako tšohle go ka ba le ditla-morago tše di sa thabišego, eupša letswalo le lebotse leo le tlišwago ke go dira bjalo le bohlokwa go feta mabaka ka moka a go se dire bjalo. Ka gona, go botega le go loka go tliša moputso o mogolo mafelelong. Therešo ke gore tswalano e botse le Jehofa ke selo sa bohlokwa. Ke ka baka la’ng o e senya ka go dira dilo ka go se botege e le gore batho ba go hlomphe goba e le gore o hwetše dilo tšeo di sego tša go swanela? Ge re lebeletšane le tlhohlo le ge e le efe, re ka kgodišega ka mantšu a mopsalme a rego: “Wa lehlôxônôlô ké monna eo a itšexo: Kholofêlô ya-ka ké Morêna! a se yê xo baipoti le xo bahlanoxi ba maaká.”—Psalme 40:4.

[Diswantšho go letlakala 18]

Bakriste ba therešo ga ba reke le go diriša dipampiri tša bofora