Ke ka Baka La’ng o Swanetše go Lemoga Molwa-le-Kriste?

Moapostola yo a buduletšwego o ngwadile mehleng ya kgale gore: “Le kwele gore molwa-le-Kriste o a tla.” (1 Johane 2:18) Mantšu ao a makatša gakaakang! Ka nywaga-kgolo e mentši batho ba be ba ipotšiša seo mantšu ao a bego a se bolela. Molwa-le-Kriste ke mang? O tla tla neng? Ge a tlile, ke’ng seo a tlago go se dira?

LELOKELELO la bao ba ilego ba latofatšwa ka gore ke balwa-le-Kriste ke le letelele. Nakong e fetilego, bao ba ilego ba bitšwa “balwa-le-Kriste” ba be ba akaretša Bajuda, bo-mopapa ba Katholika le babušiši ba Roma. Ka mohlala, ge Mmušiši Frederick II (1194-1250) a kgetha go se tšee karolo Ntweng yeo e bego e thekgwa ke kereke, Mopapa Gregory IX o ile a mmitša molwa-le-Kriste gomme a mo kgaola ka kerekeng. Mohlatlami wa Gregory e lego Innocent IV, o ile a mo kgaola gape. Ge a iphetolela, Frederick o ile a bolela phatlalatša gore Innocent ke molwa-le-Kriste.

Moapostola Johane ke mongwadi a nnoši wa Beibele yo a ilego a diriša lentšu “molwa-le-Kriste.” Ka mangwalong a mabedi ao a bitšwago ka yena, lentšu le le tšwelela ka makga a mahlano, le le ka botee le ka bontši. Ditemana tšeo lentšu le le tšwelelago go tšona di lokeleditšwe lepokising leo le lego letlakaleng le le latelago. Ditemaneng tše, re kgona go bona gore molwa-le-Kriste ke moaketši e bile ke mofori yo a ikemišeditšego go senya tswalano yeo motho a nago le yona le Kriste gotee le Modimo. Ka mo go swanetšego, moapostola o ile a kgothaletša Bakriste-gotee le yena gore: “Baratiwa, le se ke la dumela polelo e nngwe le e nngwe e buduletšwego, eupša lekang dipolelo tše di buduletšwego gore le bone ge e ba di e-tšwa go Modimo, gobane baporofeta ba bantši ba maaka ba tšwetše lefaseng.”—1 Johane 4:1.

Jesu le yena ge a lemoša ka bafori goba baporofeta ba maaka, o itše: “Ba tla go lena ba apere matlalo a dinku, eupša ka gare e le diphiri tše di gagolago. Le tla ba tseba ka dienywa [goba ditiro] tša bona.” (Mateo 7:15, 16) Na Jesu o be a lemoša balatedi ba gagwe ka molwa-le-Kriste wa seswantšhetšo? Anke re bone gore re ka lemoga bjang mofori yo yo šoro.