Molwa-le-Kriste o a Pepentšhwa

O BE o ka itšhireletša bjang ge o be o tseba gore go na le bolwetši bjo bo bolayago motseng wa geno? Mohlomongwe o be o tla matlafatša tshepedišo ya gago ya go lwantšha malwetši gomme wa ba kgole le batho bao ba ka go fetetšago ka bolwetši. Ka kgopolo ya moya, re swanetše go dira se se swanago. Mangwalo a re botša gore molwa-le-Kriste o ‘šetše a le gona lefaseng.’ (1 Johane 4:3) Ge e ba re sa nyake go “fetetšwa,” re swanetše go lemoga bao ba ka re “fetetšago” gomme re be kgole le bona. Ka mo go kgahlišago, Beibele e re thuša go kwešiša taba ye.

Lentšu “molwa-le-Kriste” le ra gore “kgahlanong (goba ka ntle) le Kriste.” Ka gona, ka kakaretšo lentšu le le šupa go batho ka moka bao ba ganetšago goba bao ka maaka ba ipolelago gore ke bo-Kriste goba baemedi ba gagwe. Jesu ka boyena o itše: “Yo a sego ka lehlakoreng la-ka o kgahlanong le nna, gomme yo a sa kgoboketšego le nna o a gašanya.”—Luka 11:23.

Ke therešo gore Johane o ngwadile mabapi le molwa-le-Kriste nywaga e fetago e 60 ka morago ga lehu la Jesu le go tsošetšwa ga gagwe legodimong. Ka gona, mediro ya molwa-le-Kriste e swanetše go kwešišwa go lebeletšwe kamoo e kgomago balatedi ba Jesu ba botegago ba lefaseng.—Mateo 25:40, 45.

Molwa-le-Kriste o lwa le Bakriste

Jesu o lemošitše balatedi ba gagwe gore lefase ka kakaretšo le tla ba hloya. O itše: “Batho ba tla le gafela tlaišegong gomme ba tla le bolaya, le tla ba ba hloilwego ke ditšhaba tšohle ka baka la leina la-ka. Go tla tsoga baporofeta ba bantši ba maaka gomme ba tla timetša ba bantši.”—Mateo 24:9, 11.

Ka ge barutiwa ba Jesu ba tlaišwa “ka baka la leina [la Jesu],” batlaiši ba bona ka ntle le pelaelo ke balwa-le-Kriste, ba kgahlanong le Kriste. ‘Baporofeta ba maaka,’ bao ba bangwe e kilego ya ba Bakriste, le bona ba ka legorong leo.  (2 Johane 7) Johane o ngwadile gore: “Balwa-le-Kriste ba bantši . . . ba tšwile go rena, eupša e be e se ba mohuta wa rena; gobane ge e be e le ba mohuta wa rena, nkabe ba ile ba dula le rena.”—1 Johane 2:18, 19.

Mantšu a Jesu le Johane a bontšha gabotse gore molwa-le-Kriste ga se motho o tee, eupša o bopša ke balwa-le-Kriste ba bantši ba fapa-fapanego. Go feta moo, ka ge e le baporofeta ba maaka, o mongwe wa merero ya bona e megolo ke go fora batho ka bodumedi. Ke mekgwa efe e mengwe yeo ba e dirišago?

Go Phatlalatša Dithuto tša Maaka tša Bodumedi

Moapostola Paulo o ile a lemoša mošomi-gotee le yena e lego Timotheo gore a hlokomele dithuto tša bahlanogi, ba bjalo ka Himeneo le Fileto, bao “lentšu la bona le tla kekago bjalo ka sešo sa go keka.” Paulo o okeditše ka gore: “Banna ba ba fapogile therešong, ba bolela gore tsogo e šetše e diregile; gomme ba phekgola tumelo ya ba bangwe.” (2 Timotheo 2:16-18) Go bonagala eka Himeneo le Fileto ba be ba ruta gore tsogo ke ya seswantšhetšo le gore Bakriste ba šetše ba tsošitšwe ka kgopolo ya moya. Ka gona, go ya ka pono ya Modimo yeo e hlalositšwego gabotse ke Paulo, ge motho a fetoga morutiwa wa kgonthe wa Jesu o be a thoma go phela. (Baefeso 2:1-5) Lega go le bjalo, dithuto tša Himeneo le Fileto di be di hlokomologile kholofetšo ya Jesu ya gore bahu ba tla tsošwa ka kgonthe Mmušong wa Modimo.—Johane 5:28, 29.

Ka morago, dikgopolo tša tsogo ya seswantšhetšo di ile tša godišwa ke sehlopha seo se bitšwago Magnostic. A dumela gore tsebo (gnoʹsis ka Segerika) e ka hwetšwa ka ditsela tša maleatlana, Magnostic a ile a kopanya dithuto tša Bokriste tša bohlanogi le filosofi ya Bagerika gotee le maleatlana a ka Bohlabela. Ka mohlala, ba be ba dumela gore dilo ka moka tše di bonagalago ke tše mpe gomme ka baka leo Jesu ga se a ka a tla ka mmele wa nama eupša o be a bonagala a e-na le mmele wa motho—tumelo ye e bitšwa gore ke  Docetism. Ka ge re bone, se ke sona seo moapostola Johane a re lemošitšego kgahlanong le sona.—1 Johane 4:2, 3; 2 Johane 7.

Thuto e nngwe ya maaka yeo e thomilwego nywaga-kgolo e mentši ka morago ke yeo e bitšwago Boraro botee bjo bokgethwa, yeo e nago le tumelo ya gore Jesu ke Modimo yo Matla-ohle e bile ke Morwa wa Modimo. Ka pukung ya gagwe ya The Church of the First Three Centuries, Dr. Alvan Lamson o bolela gore thuto ya boraro botee “e thomile mothopong o fapanego ka mo go feletšego le wa Bajuda le wa Mangwalo a Bakriste; moo e ilego ya gola gomme ya kopanywa le ya Bokriste ka thušo ya Bo-tate bao ba bego ba ruta dithuto tša Plato.” ‘Bo-tate ba bao ba bego ba ruta dithuto tša Plato’ e be e le bomang? E be e le baruti ba bahlanogi bao ba bego ba tutueditšwe ke dithuto tša boheitene tša radifilosofi wa Mogerika e lego Plato.

Go tlaleletša ka thuto ya Boraro botee go bile le katlego e kgolo go molwa-le-Kriste, ka ge thuto ye e ile ya dira gore Modimo e be sephiri le gore go se bonagale kamoo a tswalanago ka gona le Morwa wa gagwe. (Johane 14:28; 15:10; Bakolose 1:15) Bjalo ka ge Mangwalo a kgothaletša, ipotšiše feela gore motho a ka ‘batamela Modimo’ bjang ge e ba e le sephiri?—Jakobo 4:8.

Go tlaleletša kgakanegong ye, bafetoledi ba bantši ba Beibele ba tlošitše leina la Modimo e lego Jehofa ka diphetolelong tša bona, le ge le tšwelela ka makga a fetago 7 000 ka mangwalong a mathomo! Ge e le gabotse, go se leke feela go dira gore Ra-matla-ohle a se tsebje eupša le go dira gore le leina la gagwe le se tsebje ke pontšho e kgolo ya go se hlomphe Mmopi wa rena le Lentšu la gagwe leo le buduletšwego. (Kutollo 22:18, 19) Go feta moo, go ngwala sereto Morena goba Modimo sebakeng sa leina la gagwe ke go lwantšha thapelo ya Jesu ya mohlala yeo ka boripana e rego: “Leina la gago a le kgethagatšwe.”—Mateo 6:9.

Balwa-le-Kriste ba Gana Mmušo wa Modimo

Ge e le gabotse, balwa-le-Kriste ba thomile go ba mafolofolo “mehleng ya bofelo,” nakong ye yeo re phelago go yona. (2 Timotheo 3:1) Maikemišetšo a magolo a bafori ba ba mehleng ya lehono ke go fapoša batho gore ba se lemoge karolo ya Jesu bjalo ka Kgoši ya Mmušo wa Modimo, e lego mmušo wa legodimong woo kgaufsinyane o tlago go buša lefase lohle.—Daniele 7:13, 14; Kutollo 11:15.

Ka mohlala, baetapele ba bangwe ba bodumedi ba ruta gore Mmušo wa Modimo ke boemo bja pelo ya motho e lego thuto yeo e sego ya thewa Mangwalong. (Daniele 2:44) Ba bangwe ba bolela gore Kriste o šoma ka mebušo le mekgatlo ya batho. Lega go le bjalo, Jesu o boletše gore: “Mmušo wa-ka ga se karolo ya lefase le.” (Johane 18:36) Ka kgonthe, Sathane ke “mmuši wa lefase” e bile ke “modimo wa tshepedišo ye ya dilo,” e sego Kriste. (Johane 14:30; 2 Bakorinthe 4:4) Se se bontšha lebaka leo ka lona Jesu kgaufsinyane a tlago go fediša mebušo ya batho ka moka gomme e be Mmuši a nnoši wa lefase. (Psalme 2:2, 6-9; Kutollo 19:11-21) Batho ba rapelela gore se se direge ge ba rapela Thapelo ya Morena, e rego: “Mmušo wa gago ga o tle. Thato ya gago ga e direge le mo lefaseng.”—Mateo 6:10.

Ka ge ba thekga tshepedišo ya lefase ya dipolitiki, baetapele ba bantši ba bodumedi ba ganeditše bao ba bolelago therešo ka Mmušo wa Modimo gaešita le go tlaiša. Ka mo go kgahlišago, puku ya Beibele ya Kutollo e bolela ka mogweba-ka-mmele wa seswantšhetšo—“Babilona o Mogolo”—yo a ‘tagilwego ke madi a bakgethwa le madi a dihlatse tša Jesu.’ (Kutollo 17:4-6) Le gona o gweba ka mmele ka tsela ya moya ka go thekga “dikgoši” tša lefase, goba babuši ba dipolitiki, gomme ka morago o amogela thekgo. Mosadi yo wa seswantšhetšo ke bodumedi bja maaka bja lefase. Ke karolo e kgolo ya molwa-le-Kriste.—Kutollo 18:2, 3; Jakobo 4:4.

Molwa-le-Kriste o ‘Kweša Ditsebe Bose’

Ntle le go gana therešo ya Beibele, ba bantši bao go thwego ke Bakriste ba tlogetše ditekanyetšo tša Beibele tša boitshwaro e le gore ba thekge mekgwa e tlwaelegilego. Lentšu la Modimo le ile la bolela e sa le pele ka tiragalo ye, gore: “Gobane go tla ba le nako yeo ka yona [batho bao ba ipolelago gore ba hlankela Modimo] ba ka se kego ba kgotlelela thuto e phelago, eupša ba tla  ikgobokeletša barutiši ka go dumelelana le dikganyogo tša bona gore ba kweše ditsebe tša bona bose.” (2 Timotheo 4:3) Baradia ba ba bodumedi ba hlaloswa gape e le “baapostola ba maaka, badiri ba bofora, bao ba itirago baapostola ba Kriste.” Beibele e tšwela pele ka gore: “Pheletšo ya bona e tla ba go ya ka mediro ya bona.”—2 Bakorinthe 11:13-15.

Mediro ya bona e akaretša “boitshwaro bjo bo hlephilego,” e lego go se hlomphe melao e phagamego ya motheo. (2 Petro 2:1-3, 12-14) Na ga re bone palo e oketšegago ya baetapele ba bodumedi gotee le balatedi ba bona ba phela ka—goba ganyenyane ba thekga—mekgwa yeo e sego ya Bokriste, e bjalo ka bosodoma le kopano ya botona le botshadi ya ka ntle ga lenyalo? Hle iphe nako ya go bapetša dikgopolo le mekgwa ye e amogelwago ke batho ba bantši le seo Beibele e se bolelago go Lefitiko 18:22; Baroma 1:26, 27; 1 Bakorinthe 6:9, 10; Baheberu 13:4; le Juda 7.

“Lekang Dipolelo tše di Buduletšwego”

Re šetša seo se lego ka mo godimo, re swanetše go ela hloko mantšu a moapostola Johane a gore re se ke ra tšea tumelo ya rena ya bodumedi gabohwefo. O lemoša ka gore: “Le se ke la dumela polelo e nngwe le e nngwe e buduletšwego, eupša lekang dipolelo tše di buduletšwego gore le bone ge e ba di e-tšwa go Modimo, gobane baporofeta ba bantši ba maaka ba tšwetše lefaseng.”—1 Johane 4:1.

Ela hloko mohlala wa batho ba “bulegilego monaganong” ba bego ba phela Berea lekgolong la pele la nywaga. Ba “amogetše lentšu ka go le fišegela kudu monaganong, ba hlahloba Mangwalo ka kelohloko letšatši le letšatši go bona ge e ba dilo tše [tšeo di bolelwago ke Paulo le Silase] di be di le bjalo.” (Ditiro 17:10, 11) Ee, le ge ba ikemišeditše go ithuta, Baberea ba ile ba kgonthišetša gore seo ba se kwelego le go se amogela se be se theilwe ka go tia ka Mangwalong.

Le lehono Bakriste ba kgonthe ga ba tutuetšwe ke dikgopolo tše di atilego le tšeo di tlwaelegilego eupša ba kgomarela ka go tia therešong ya Beibele. Moapostola Paulo o ngwadile gore: “Se ke seo ke tšwelago pele ke se rapelela gore lerato la lena le gole ka mo go oketšegago ka tsebo e nepagetšego le temogo e tletšego.”—Bafilipi 1:9.

Ge e ba o sešo o dira bjalo, ikemišetše go hwetša “tsebo e nepagetšego le temogo e tletšego” ka go ithuta seo ge e le gabotse se rutwago ke Beibele. Bao ba ekišago Baberea ga ba hlalefetšwe ke “mantšu a bofora” a balwa-le-Kriste. (2 Petro 2:3) Go e na le moo, ba lokollwa ke therešo e buduletšwego ya Kriste wa kgonthe le balatedi ba gagwe ba therešo.—Johane 8:32, 36.

[Lepokisi/Seswantšho go letlakala 4]

SEO BEIBELE E SE BOLELAGO MABAPI LE MOLWA-LE-KRISTE

“Bana ba banyenyane, ke nako ya bofelo [ka mo go lemogegago bofelo bja mehla ya boapostola], gomme go etša ge le kwele gore molwa-le-Kriste o a tla, gaešita le bjale go na le balwa-le-Kriste ba bantši.”—1 Johane 2:18.

“Moaketši ke mang ge e ba e se yo a latolago gore Jesu ke Kriste? Molwa-le-Kriste ke yo a latolago Tate le Morwa.”—1 Johane 2:22.

“Polelo e nngwe le e nngwe e buduletšwego e sa bolelego Jesu ga e tšwe go Modimo. Go feta moo, ye ke polelo e buduletšwego ya molwa-le-Kriste yeo le kwelego gore e e-tla, gomme bjale e šetše e le gona lefaseng.”—1 Johane 4:3.

“Bafori ba bantši ba tšwetše lefaseng, e lego batho bao ba sa bolelego gore ba dumela go Jesu Kriste e le yo a tlilego a le nameng. Yo ke mofori le molwa-le-Kriste.”—2 Johane 7.

[Lepokisi go letlakala 5]

MOFORI YO A NAGO LE DIBOPEGO TŠE DINTŠI

Lentšu “molwa-le-Kriste” le šupa batho bohle bao ba ganago se Beibele e se bolelago mabapi le Jesu Kriste, bohle bao ba thulanago le Mmušo wa gagwe le bohle bao ba swarago balatedi ba gagwe gampe. Gape le akaretša batho ka o tee ka o tee, mekgatlo le ditšhaba tšeo ka mo go fošagetšego di ipolelago gore di emela Kriste goba bao ba iphago kabelo ya Mesia ba se na tshwanelo, bao ka boikgodišo ba holofetšago go dira dilo tšeo e lego Kriste feela yo a ka di dirago—go tliša khutšo ya kgonthe le polokego.

[Seswantšho go letlakala 7]

Ka go swana le Baberea, re swanetše go ‘hlahloba Mangwalo ka mehla’

[Mothopo wa Seswantšho go letlakala 5]

Augustine: ©SuperStock/age fotostock