Na Moahlodi a ka Phošollwa?

SLADJANA, e lego yo mongwe wa Dihlatse tša Jehofa kua Croatia, o be a swanetše go tla kgorong ya tsheko mabapi le ditaba tša ditšhelete. O ile a fihla ka nako go moahlodi. Lega go le bjalo, motho yo mongwe yo a bego a swanetše go tla tshekong o be a šiilwe ke nako. Sladjana o be a fišegela go nea bohlatse, ka gona ge bohle ba sa letile o ile a rapa sebete sa go bolela le moahlodi.

O ile a botšiša gore: “Mohlomphegi, na o be o tseba gore go se go ye kae go ka se sa hlwa go e-ba le baahlodi le dikgoro tša tsheko mo lefaseng?” Go ba gona, o be a bolela ka baahlodi bjalo ka ge ba tsebja lehono.

A maketše, moahlodi o ile a fo mo lebelela a se na seo a ka se bolelago. Ka yona nako yeo, tsheko e ile ya thoma. Ge ba feditše gomme Sladjana a eme gore a saene lengwalo, moahlodi o ile a okomela gomme a mmotšiša ka go seba-seba a re: “Na o tiišitše ka seo o sa tšwago go mpotša sona, gore go se go ye kae go ka se sa hlwa go e-ba le baahlodi le dikgoro tša tsheko mo lefaseng?”

Sladjana o ile a araba ka gore: “Ee Mohlomphegi. Ke tloga ke tiišitše!”

Moahlodi o ile a botšiša a re: “O na le bohlatse bofe ka seo?”

Sladjana a araba ka gore: “Bo hwetšagala ka Beibeleng.”

Moahlodi o ile a re o be a tla rata go bala bohlatse bjo bo bjalo eupša o be a se na Beibele. Ka gona Sladjana o ile a ithapela go mo hweletša yona. Dihlatse di ile tša etela moahlodi, tša mo nea Beibele gomme tša mo kgothaletša go ba le thuto ya Beibele ya beke le beke. Moahlodi o ile a amogela seo gomme go se go ye kae a ba yo mongwe wa Dihlatse tša Jehofa.

Psalme 2:10 (PK) e bolela ka tsela ya boporofeta gore: “Bjalo-ge, lena dikgoši, le lena baahlodi ba lefase, eletšegang!” Ke mo go ruthetšago pelo gakaakang ge ba bjalo ka boikokobetšo ba amogela ditaelo tša Jehofa tše lerato!

[Seswantšho go letlakala 32]

Sladjana le moahlodi