Rata Modimo yo a go Ratago

“O rate Jehofa Modimo wa gago ka pelo ya gago ka moka le ka moya wa gago ka moka le ka monagano wa gago ka moka.”—MATEO 22:37.

1, 2. Ke’ng seo se ka bago se ile sa dira gore go rotoge potšišo ya mabapi le taelo e kgolo-kgolo?

GO BONALA potšišo yeo e botšišitšwego e le yeo Bafarisei ba mehleng ya Jesu ba bego ba ngangišana kudu ka yona. Ke molao ofe woo e bego e le wa bohlokwa kudu gare ga melao ka moka e fetago e 600 yeo e bego e bopa Molao wa Moše? Na e be e le molao wa mabapi le dihlabelo? Ka kgonthe, dihlabelo di be di dirwa bakeng sa go lebalelwa dibe le go leboga Modimo. Goba na molao o mogolo e be e le wa lebollo? Molao woo le wona o be o le bohlokwa, ka ge lebollo e be e le leswao la kgwerano yeo Jehofa a e dirilego le Aborahama.—Genesi 17:9-13.

² Ka lehlakoreng le lengwe, go bonala batho bao ba kgomaretšego setšo ba be ba bolela gore ka ge molao o mongwe le o mongwe woo o neilwego ke Modimo o be o le bohlokwa—gaešita le ge go be go ka bonala e mengwe e se bohlokwa kudu—e be e tla ba phošo go godiša taelo le ge e le efe go feta tše dingwe. Bafarisei ba ile ba phetha ka go botšiša Jesu potšišo ye yeo e bakilego ngangišano. Mohlomongwe o be a tla bolela selo se itšego seo se bego se tla senya botumo bja gagwe bjalo ka motho yo a botegago. Yo mongwe wa bona o ile a batamela Jesu gomme a mmotšiša gore: “Taelo e kgolo-kgolo Molaong ke efe?”—Mateo 22:34-36.

3. Jesu o itše taelo e kgolo-kgolo ke efe?

³ Karabo yeo Jesu a e neilego ke ya bohlokwa kudu go rena lehono. Ge a araba, o akareditše seo e bego e dutše e le karolo ya borapedi bja therešo le seo se tlago go dula e le karolo ya bjona. Ge a tsopola Doiteronomio 6:5, Jesu o itše: “‘O rate Jehofa Modimo wa gago ka pelo ya gago ka moka le ka moya wa gago ka moka le ka monagano wa gago ka moka.’ Ye ke taelo e kgolo-kgolo le ya pele.” Gaešita le ge Mofarisei yoo a be a nyaka taelo e tee feela, Jesu o mo neile e nngwe. Ge a tsopola Lefitiko 19:18, o itše: “Ya bobedi ya go swana le yona ke ye, ‘O rate moagišani wa gago go etša ge o ithata.’” Ka go rialo Jesu o bontšhitše gore borapedi bjo bo sekilego bo theilwe melaong ye e mebedi. Ge a thibela maiteko le ge e le afe a go mo dira gore a lokeletše melao e mengwe go ya ka bohlokwa bja yona, o phethile ka gore: “Molao ka moka le Baporofeta di ithekgile ditaelong tše tše pedi.” (Mateo 22:37-40) Sehlogong se, re tla ahla-ahla taelo e kgolo-kgolo go tše tše pedi. Ke ka baka la’ng re swanetše go rata Modimo? Re bontšha bjang gore re a mo rata? Gona re ka hlagolela bjang lerato le bjalo? Ke gabohlokwa gore re tsebe dikarabo tša dipotšišo tše ka gobane re swanetše go rata Jehofa ka dipelo tša rena, moya wa rena le menagano ya rena ka moka e le gore re mo thabiše.

Bohlokwa bja Lerato

4, 5. (a) Ke ka baka la’ng Mofarisei a se a ka a makatšwa ke seo Jesu a se boletšego? (b) Ke’ng seo se lego bohlokwa kudu go Modimo go feta dihlabelo le dibego?

⁴ Go bonala Mofarisei yo a botšišitšego Jesu a se a ka a tšhošwa goba go makatšwa ke karabo  yeo a e neilwego. O be a tseba gore go rata Modimo ke karolo ya bohlokwa ya borapedi bja therešo, gaešita le ge ba bantši ba paletšwe ke go bontšha lerato leo. Ka disinagogeng, go be go tlwaelegile gore batho ba boeletše Shema, goba boipolelo bja tumelo ka go hlaboša, gomme yona e be e akaretša karolo e hwetšwago go Doiteronomio 6:4-9 yeo Jesu a e tsopotšego. Go ya ka pego e sepedišanago le ye yeo e lego go Mareka, Mofarisei yo o ile a re go Jesu: “Morutiši, o boletše gabotse ka go dumelelana le therešo, ‘Ke O tee, gomme ga go yo mongwe ka ntle le Yena’; le gona, go mo rata mo ka pelo ka moka le ka tlhaologanyo ka moka le ka matla ka moka le go rata moagišani mo go etša ge motho a ithata go feta dibego tša go fišwa ka moka le dihlabelo.”—Mareka 12:32, 33.

⁵ Ka kgonthe, gaešita le ge dibego tša go fišwa le dihlabelo di be di nyakwa ke Molao, selo sa bohlokwa go Modimo ke lerato la bahlanka ba gagwe le tšwago pelong. Thaga yeo e bego e neelwa go Modimo ka lerato le boineelo e be e le ya bohlokwa kudu go feta dikgapa tše dikete tšeo di bego di neelwa ka maikemišetšo a fošagetšego. (Mika 6:6-8) Gopola pego ya mohlologadi wa modiidi yoo Jesu a bego a mo lebeletše tempeleng kua Jerusalema. Ditšheletiana tše pedi tšeo a di tsentšego ka polokelong di be di sa kgone go reka gaešita le thaga e tee. Lega go le bjalo, moneelo woo, wo o dirilwego go tšwa pelong e tletšego lerato bakeng sa Jehofa, e be e le wa bohlokwa kudu go feta meneelo yeo bahumi ba e dirilego go tšwa go seo se ba tlaletšego. (Mareka 12:41-44) Ruri go a kgothatša go tseba gore Jehofa o tšeela godimo selo seo ka moka ga rena re ka se bontšhago go sa šetšwe maemo a rena—go mo rata!

6. Paulo o ngwadile eng mabapi le bohlokwa bja lerato?

⁶ Ge a gatelela bohlokwa bja lerato borapeding bja therešo, moapostola Paulo o ngwadile gore: “Ge e ba ke bolela ka maleme a batho le a barongwa eupša ke se na lerato, gona ke tšhipi e llago goba simbala e bethantšhwago. Ge e ba ke e-na le mpho ya go porofeta e bile ke tseba diphiri ka moka tše kgethwa, ke e-na le tsebo ka moka, ge e ba ke e-na le tumelo yohle gore ke šuthiše dithaba, eupša ke se na lerato, gona ga ke selo. Ge e ba ke nea dilo tša-ka ka moka go fepa ba bangwe le ge e ba ke gafa mmele wa-ka, e le gore ke ikgantšhe, eupša ke se na lerato, ga ke boelwe ke selo.” (1 Bakorinthe 13:1-3) Ka kgonthe, lerato le bohlokwa e le gore borapedi bja rena bo kgahliše Modimo. Lega go le bjalo, re bontšha bjang gore re rata Jehofa?

Kamoo re Bontšhago Gore re Rata Jehofa

7, 8. Re ka bontšha bjang gore re rata Jehofa?

⁷ Ba bantši ba dumela gore lerato ke maikwelo ao re sa kgonego go a laola, go swana le ge monna le mosadi ba thoma go ratana. Lega go le bjalo, lerato la kgonthe ga se feela tsela yeo re ikwago ka yona. Le bonagatšwa le go hlaloswa ka ditiro, e sego maikwelo. Beibele e bolela ka lerato e le “tsela e phalago tšohle” le selo seo re se ‘phegelelago.’ (1 Bakorinthe 12:31; 14:1) Bakriste ba kgothaletšwa gore ba rate, e sego “ka lentšu goba ka leleme, eupša ka tiro le ka therešo.”—1 Johane 3:18.

⁸ Go rata Modimo go re tutueletša go dira seo se mo kgahlišago le go emela bogoši bja gagwe gotee le go bo godiša ka mantšu le ditiro tša rena. Go re tutueletša go phema go rata lefase le ditsela tša lona tša go se hlomphe Modimo. (1 Johane 2:15, 16) Bao ba ratago Modimo ba hloile bobe. (Psalme 97:10) Le gona go rata Modimo go akaretša go rata moagišani, e lego seo re tlago go se ahla-ahla sehlogong se se latelago. Ka godimo ga moo, go rata Modimo go nyaka gore re mo kwe. Beibele e re: “Se ke seo lerato la Modimo le se bolelago, gore re boloke ditaelo tša gagwe.”—1 Johane 5:3.

9. Jesu o bontšhitše bjang gore o rata Modimo?

⁹ Jesu o bontšhitše ka mo go phethagetšego seo go rata Modimo go se bolelago. Lerato le mo tutueleditše go tlogela legae la legodimong gomme a tla go dula mo lefaseng bjalo ka motho. Le mo tutueleditše go nea Tatagwe letago ka dilo tšeo a bego a di dira le go di ruta. Lerato le mo tutueleditše gore a be “yo a kwago go fihla lehung.” (Bafilipi 2:8) Go kwa moo—pontšho ya lerato la gagwe—go buletše batho ba botegago tsela ya go ba le boemo bja go loka pele ga Modimo. Paulo o ngwadile gore: “Ka go se kwe ga  motho o tee [Adama] ba bantši ba ile ba dirwa badiradibe, ka mo go swanago ka go kwa ga motho o tee [Kriste Jesu] ba bantši ba tla dirwa ba lokilego.”—Baroma 5:19.

10. Ke ka baka la’ng go rata Modimo go akaretša go kwa?

¹⁰ Go etša Jesu, re bontšha lerato la rena ka go kwa Modimo. Moapostola yo a rategago wa Jesu e lego Johane o ngwala gore: “Se ke seo lerato le se bolelago, gore re tšwele pele re sepela go ya ka ditaelo tša gagwe.” (2 Johane 6) Bao ba ratago Jehofa e le ka kgonthe ba hlologela tlhahlo ya gagwe. Ka ge ba lemoga gore ba ka se kgone go laola dikgato tša bona ka katlego, ba bota bohlale bja Modimo gomme ba ikokobeletša tlhahlo ya gagwe e lerato. (Jeremia 10:23) Ba swana le batho ba Berea ya bogologolo bao ba bego ba bulegile monaganong bao ba amogetšego molaetša wa Modimo ka ‘go o fišegela kudu monaganong,’ ba e-na le kganyogo e tšwago pelong ya go dira thato ya Modimo. (Ditiro 17:11) Ba ile ba hlahloba Mangwalo ka kelohloko e le gore ba kwešiše thato ya Modimo ka mo go tseneletšego, e lego seo se ba thušitšego go bontšha lerato ka ditiro tše oketšegilego tša go kwa.

11. Go rata Modimo ka pelo, monagano, moya le matla a rena ka moka go bolela’ng?

¹¹ Go etša ge Jesu a boletše, go rata Modimo go akaretša pelo, moya le matla a rena ka moka. (Mareka 12:30) Lerato le bjalo le tšwa pelong, le akaretša maikwelo a rena, dikganyogo le dikgopolo tše tseneletšego, gomme re na le kganyogo e tseneletšego ya go kgahliša Jehofa. Le gona re mo rata ka menagano ya rena. Boineelo bja rena ga se bjo bo dirwago ka ntle le tsebo; re tseba Jehofa—dika tša gagwe, ditekanyetšo le merero ya gagwe. Re diriša moya wa rena, e lego bophelo bja rena ka moka, go mo hlankela le go mo tumiša. Le gona re diriša matla a rena go dira seo.

Lebaka Leo ka Lona re Swanetšego go Rata Jehofa

12. Ke ka baka la’ng Modimo a nyaka gore re mo rate?

¹² Lebaka le lengwe leo ka lona re swanetšego go rata Jehofa ke gore o nyaka gore re bonagatše dika tša gagwe. Modimo ke mothopo le mohlala o phagamego kudu wa lerato. Moapostola Johane yo a buduletšwego o ngwadile gore: “Modimo ke lerato.” (1 Johane 4:8) Batho ba bopilwe ka seswantšho sa Modimo; re bopetšwe gore re be le lerato. Ge e le gabotse, bogoši bja Jehofa bo theilwe leratong. O nyaka go buša feela batho bao ba mo hlankelago ka gobane ba mo rata e bile ba kganyoga tsela ya gagwe ya go buša ya toko. Ka kgonthe, lerato le a nyakega e le gore tlholo ka moka e be le khutšo gomme e kwane.

13. (a) Ke ka baka la’ng Baisiraele ba ile ba botšwa gore: ‘Rata Jehofa Modimo wa gago’? (b) Ke ka baka la’ng e le mo go kwagalago gore Jehofa o lebeletše gore re mo rate?

¹³ Lebaka le lengwe leo ka lona re ratago Jehofa ke gore re leboga seo a re diretšego sona. Gopola gore Jesu o itše go Bajuda: “O rate Jehofa Modimo wa gago.” Go be go sa letelwa gore ba rate modimo yo a lego kgole le batho le yo a sa tsebjego. Ba be ba swanetše go rata Motho yo a bego a ba utolletše lerato la gagwe. Jehofa e be e le Modimo wa bona. Ke Yena a ba ntšhitšego nageng ya Egipita gomme a ba iša Nageng ya Kholofetšo, ke Yena a ilego a ba šireletša, a ba fepa le go ba rata e bile ke Yena a ilego a ba laya ka lerato. Le lehono Jehofa ke Modimo wa rena, ke yena a neilego Morwa wa gagwe e le topollo e le gore re be le bophelo bjo bo sa felego. Ruri go a kwagala gore Jehofa a letele gore le rena re mo rate! Lerato la rena le tutuetšwa ke lerato la gagwe; re kgopelwa gore re rate Modimo yo a re ratago. Re rata yoo a ‘re ratilego pele.’—1 Johane 4:19.

14. Ke ka tsela efe lerato la Jehofa le swanago le la motswadi yo lerato?

¹⁴ Lerato leo Jehofa a ratago batho ka lona le swana le leo motswadi a ratago bana ba gagwe ka lona. Gaešita le ge ba sa phethagala, batswadi bao ba nago le lerato ba šoma ka thata ka nywaga e mentši ba hlokomela bana ba bona, ba senyagalelwa ke tšhelete e ntši gotee le dilo tše dingwe ge ba dira bjalo. Batswadi ba ruta bana ba bona, ba a ba kgothatša, ba a ba thekga le go ba laya ka gobane ba nyaka gore ba thabe le go atlega. Ke’ng seo batswadi ba nyakago gore bana ba bona ba ba bušetše sona? Ba nyaka gore bana ba bona ba ba rate le gore ba amogele seo ba ba rutilego  sona gore ba holege. Na ga se mo go kwagalago gore Tatago rena yo a phethagetšego wa legodimong o lebeletše gore re bontšhe tebogo e nago le lerato bakeng sa sohle seo a re diretšego sona?

Go Hlagolela go Rata Modimo

15. Mogato wa pele wa go hlagolela go rata Modimo ke ofe?

¹⁵ Ga se ra ka ra bona Modimo goba ra kwa modumo wa lentšu la gagwe. (Johane 1:18) Lega go le bjalo, o re laletša gore re be le tswalano e lerato le yena. (Jakobo 4:8) Re ka dira seo bjang? Mogato wa pele wa go rata motho le ge e le ofe ke go ithuta ka motho yoo; go thata go rata ka mo go tseneletšego motho yo re sa mo tsebego. Jehofa o re neile Lentšu la gagwe, Beibele, e le gore re ithute ka yena. Ke ka lebaka leo Jehofa, ka mokgatlo wa gagwe, a re kgothaletšago go bala Beibele ka mehla. Ke Beibele yeo e re rutago ka Modimo, dika tša gagwe, botho bja gagwe gaešita le tsela yeo a dirišanego ka yona le batho ka nywaga e dikete. Ge re naganišiša ka  dipego tše bjalo, kwešišo ya rena le lerato la rena go yena di tla gola.—Baroma 15:4.

16. Go naganišiša ka bodiredi bja Jesu go godiša lerato la rena go Modimo bjang?

¹⁶ Tsela ya bohlokwa yeo ka yona lerato la rena go Jehofa le ka golago ke ka go naganišiša ka bophelo le bodiredi bja Jesu. Ge e le gabotse, Jesu o bonagaditše botho bja Tatagwe ka mo go phethagetšego mo a bego a ka re: “Yo a bonego nna o bone le Tate.” (Johane 14:9) Na ga o kgongwe ke kwelobohloko yeo Jesu a e bontšhitšego ge a tsoša morwa a nnoši wa mosadi wa mohlologadi? (Luka 7:11-15) Na ga go ipiletše go tseba gore yena—Morwa wa Modimo le motho yo a phagamego kudu yo a kilego a phela—ka boikokobetšo o ile a hlapiša barutiwa ba gagwe maoto? (Johane 13:3-5) Na ga o tutuetšwe ke go tseba gore gaešita le ge a be a phagame e bile a le bohlale go feta motho le ge e le ofe yo mongwe, o ile a dira gore batho ka moka ba kgone go mmatamela, go akaretša le bana? (Mareka 10:13, 14) Ge re dutše re naganišiša ka tebogo ka dilo tše, re ba bjalo ka Bakriste bao Petro a ngwadilego mabapi le bona gore: “Le ge le sa ka la [bona Jesu], fela le a mo rata.” (1 Petro 1:8) Ge lerato la rena go Jesu le gola, lerato la rena go Jehofa le lona le a gola.

17, 18. Ke go naganišiša ka ditokišetšo dife tše lerato tša Jehofa mo go ka godišago lerato la rena go yena?

¹⁷ Tsela e nngwe yeo ka yona re ka oketšago lerato la rena go Modimo ke ka go naganišiša ka bontši bja ditokišetšo tše lerato tšeo a di dirilego go re thuša go thabela bophelo—bobotse bja tlholo, bontši bja dijo tše bose tšeo re ka di jago, go ba le bagwera ba borutho gotee le dilo tše dingwe tše dintši tšeo di re tlišetšago lethabo le kgotsofalo. (Ditiro 14:17) Ge re dutše re ithuta ka Modimo wa rena, re ba le mabaka a mantši a go leboga botho bja gagwe bjo bo sa lekanyetšwago le go ba ga gagwe le seatla se se bulegilego. Nagana ka dilo tšohle tšeo Jehofa a go diretšego tšona. Na ga o dumele gore o swanelwa ke gore o mo rate?

¹⁸ E nngwe ya dimpho tše dintši tše di tšwago go Modimo ke sebaka seo re nago le sona sa go mmatamela ka thapelo ka nako le ge e le efe, re tseba gore “Mokwi wa dithapêlô” o a re theetša. (Psalme 65:2) Jehofa o neile Morwa wa gagwe yo a rategago matla a go buša le go ahlola. Lega go le bjalo, ga a dire gore batho ba bangwe, go akaretša le morwa wa gagwe, ba theetše dithapelo. Yena ka noši o theetša dithapelo tša rena. Ka gona, tlhokomelo e lerato ya motho ka noši yeo Jehofa a re bontšhago yona e dira gore re batamele kgaufsi le yena.

19. Ke dikholofetšo dife tša Jehofa tšeo di dirago gore re mo rate?

¹⁹ Le gona re batamela kgaufsi le Jehofa ge re naganišiša ka seo a tlago go se direla batho nakong e tlago. O holofeditše gore o tla fediša bolwetši, manyami le lehu. (Kutollo 21:3, 4) Ge batho ba boetše ba phethagetše, ga go motho yo a tlago go hlaselwa ke kgateletšo, manyami goba kotsi. Tlala, bodiidi le ntwa di tla fela. (Psalme 46:9; 72:16) Lefase le tla fetošwa paradeise. (Luka 23:43) Jehofa o tla tliša ditšhegofatšo tše, e sego ka gobane a gapeletšega, eupša ka gobane a re rata.

20. Moše o ile a re’ng ka mehola ya go rata Jehofa?

²⁰ Ka gona, go na le mabaka a matla a gore re rate Modimo wa rena le go dumelela lerato leo go gola. Na o tla tšwela pele o matlafatša go rata ga gago Modimo, o mo dumelela go hlahla dikgato tša gago? Kgetho ke ya gago. Moše o ile a lemoga mehola ya go hlagolela go rata Jehofa le go dula a mo rata. Go Baisiraele ba bogologolo, Moše o itše: “Hlê ikxetheleng bophelô xore Le phelê, lena le bana ba lena, Lè le ba ba rataxo Morêna Modimo wa lena, Lè e-kwa se a se bolêlaxo, Lè mo xomaretše; Ka xobane xo phela xa xaxo le xo atêlwa ke matšatši di na le Yêna.”—Doiteronomio 30:19, 20.

Na o a Gopola?

• Ke ka baka la’ng go le bohlokwa gore re rate Jehofa?

• Re ka bontšha bjang gore re rata Modimo?

• Re na le mabaka afe a go rata Jehofa?

• Re ka hlagolela go rata Modimo bjang?

[Dipotšišo tša Thuto]

[Seswantšho go letlakala 20]

Jehofa o tloga a tšeela godimo seo ka moka ga rena re ka kgonago go se bontšha—go mo rata

[Diswantšho go letlakala 23]

“Yo a bonego nna o bone le Tate.”—Johane 14:9