Seo go Rata Moagišani go se Bolelago

“O rate moagišani wa gago go etša ge o ithata.”—MATEO 22:39.

1. Re bontšha bjang gore re rata Modimo?

KE’NG seo Jehofa a se nyakago go barapedi ba gagwe? Jesu o akareditše karabo ya potšišo ye ka mantšu a sego kae a bonolo le a bohlokwa. O itše taelo e kgolo-kgolo ke ya go rata Jehofa ka pelo, moya, monagano le matla a rena ka moka. (Mateo 22:37; Mareka 12:30) Bjalo ka ge re bone sehlogong se se fetilego, go rata Modimo go akaretša go mo kwa le go boloka ditaelo tša gagwe ge re arabela leratong leo a re bontšhitšego lona. Go bao ba ratago Modimo, go dira thato ya gagwe ga se morwalo; go a ba thabiša.—Psalme 40:8; 1 Johane 5:2, 3.

2, 3. Ke ka baka la’ng re swanetše go ela hloko taelo ya go rata moagišani, gona go rotoga dipotšišo dife?

² Jesu o itše taelo ya bobedi e kgolo-kgolo e tswalana le ya pele: “O rate moagišani wa gago go etša ge o ithata.” (Mateo 22:39) Ga bjale re tlo ahla-ahla taelo ye, gomme re na le lebaka le lebotse la go dira bjalo. Mehla yeo re phelago go yona e tletše boithati le pontšho e fošagetšego ya lerato. Tlhalosong ya gagwe e buduletšwego ya ‘mehla ya bofelo,’ moapostola Paulo o ngwadile gore batho ba be ba tla rata tšhelete le maipshino, e sego go ratana bona seng. Ba bantši ba be ba ka se be le “maikwelo a borutho a tlhago,” goba go etša ge phetolelo e nngwe e hlalosa, e tla ba ba se nago “maikwelo a tlwaelegilego a borutho bakeng sa malapa a bona.” (2 Timotheo 3:1-4) Jesu Kriste o boletše e sa le pele gore: “Ba bantši . . . ba tla ekana ba ba ba hloyana. . . . Lerato la ba bantši le tla fola.”—Mateo 24:10, 12.

³ Lega go le bjalo, ela hloko gore Jesu ga se a ka a re lerato la batho ka moka le tla fola. Go be go dutše go e-na le bao ba bontšhago lerato leo Jehofa a le nyakago le leo le mo swanelago, gomme ba tla dula ba le gona. Bao ba ratago Jehofa e le ka kgonthe ba tla katanela go lebelela ba bangwe kamoo a ba lebelelago ka gona. Lega go le bjalo, moagišani yo re swanetšego go mo rata ke mang? Re swanetše go rata moagišani bjang? Mangwalo a ka re thuša go araba dipotšišo tše tša bohlokwa.

 Moagišani Wa-ka ke Mang?

4. Go ya ka Lefitiko kgaolo 19, Bajuda ba be ba swanetše go rata bomang?

⁴ Ge a be a botša Mofarisei gore taelo ya bobedi e kgolo-kgolo e be e le ya gore motho a rate moagišani wa gagwe bjalo ka ge a ithata, Jesu o be a bolela ka molao o itšego woo o bego o neilwe Baisiraele. O ngwadilwe go Lefitiko 19:18. Kgaolong yona yeo, Bajuda ba be ba boditšwe gore ba lebelele le batho ba bangwe e le baagišani ba bona, e sego Baisiraele-gotee le bona feela. Temana 34 e re: “Moeng e a diiletšexo xo lena a dulê xo lena byalo ka motho wa xeno e a tswaletšwexo xaê. O mo ratê ka mokxwa wo O ithataxo ka wôna; ka xobane le lena Le kile la ba badiiledi naxeng ya Egipita.” Ka gona gaešita le batho bao e sego Bajuda, kudu-kudu basokologi, ba be ba swanetše go swarwa ka lerato.

5. Bajuda ba be ba kwešiša go rata moagišani bjang?

⁵ Lega go le bjalo, baetapele ba Bajuda ba mehleng ya Jesu ba be ba e-na le pono e fapanego. Ba bangwe ba be ba ruta gore mantšu “mogwera” le “moagišani” a be a šoma feela go Bajuda. Batho bao e sego Bajuda ba be ba swanetše go hloiwa. Barutiši ba bjalo ba be ba re bao ba rapelago Modimo ba swanetše go hloya bao ba sa mo rapelego. Puku e nngwe e re: “Maemong a bjalo, lehloyo le be le ata. Go be go e-na le dilo tše dintši tšeo di le hlohleletšago.”

6. Ke dintlha dife tše pedi tšeo Jesu a di gateletšego ge a be a bolela ka go rata moagišani?

⁶ Thutong ya gagwe ya Thabeng, Jesu o ile a ahla-ahla taba ye, a hlalosa bao ba swanetšego go swarwa ka lerato. O itše: “Le kwele gore go ile gwa thwe, ‘O rate moagišani wa gago gomme o hloye lenaba la gago.’ Lega go le bjalo, ke re go lena: Tšwelang pele le rata manaba a lena le go rapelela bao ba le tlaišago; e le gore le itlhatsele le le barwa ba Tatago lena yo a lego magodimong, ka ge a hlabišetša ba kgopo le ba bolo letšatši la gagwe gomme a nešetša ba lokilego le ba sa lokago pula.” (Mateo 5:43-45) Mo Jesu o gateletše dintlha tše pedi. Ya pele, Jehofa o fana ka seatla se se bulegilego e bile o botho go batho ba ba lokilego le ba kgopo. Ya bobedi, re swanetše go latela mohlala wa gagwe.

7. Re ithuta’ng papišong ya Mosamaria wa kwelobohloko?

⁷ Ka nako e nngwe, Mojuda yo a tsebago Molao gabotse o ile a botšiša Jesu gore: “Ge e le gabotse, ke mang yo e lego moagišani wa-ka?” Jesu o ile a araba ka go laodiša papišo ya Mosamaria yo a ilego a kopana le monna yo a itšego, Mojuda, yo a bego a bethilwe ke bahlakodi e bile ba mo hutše dilo tša gagwe. Gaešita le ge Bajuda ka kakaretšo ba be ba hloile Basamaria, Mosamaria yo o ile a bofa dintho tša monna yoo gomme a mo iša ntlong ya baeng mo a bego a tla dula gona a šireletšegile ge a dutše a fola. Se se re ruta’ng? Go rata ga rena moagišani go swanetše go akaretša le bao e sego ba morafo wa rena, setšhaba goba bodumedi.—Luka 10:25, 29, 30, 33-37.

Seo go Rata Moagišani go se Bolelago

8. Lefitiko kgaolo 19 e re’ng mabapi le kamoo lerato le bego le swanetše go bontšhwa ka gona?

⁸ Go swana le go rata Modimo, go rata moagišani  ga e fo ba maikwelo; go akaretša mediro. Go hlahloba ka mo go oketšegilego taba e dikologilego taelo e lego go Lefitiko 19 yeo e kgothaletšago batho ba Modimo go rata baagišani ba bona bjalo ka ge ba ithata go tla re thuša kudu. Moo re bala gore Baisiraele ba be ba swanetše go dumelela bao ba tlaišegago le badiiledi gore ba bune. Ba be ba sa dumelelwe go utswa goba go radia. Baisiraele ba be ba sa swanela go beba sefahlego ditabeng tša boahlodi. Gaešita le ge ba be ba swanetše go kgalema ge go be go nyakega, ba be ba boditšwe ka go lebanya gore: “O se kê wa hlôya ngwan’eno pelong ya xaxo.” Ditaelo tše gotee le tše dingwe tše dintši di be di akareditšwe ka mantšu a rego: “Wa xeno O mo ratê ka mokxwa wo O ithataxo ka wôna.”—Lefitiko 19:9-11, 15, 17, 18.

9. Ke ka baka la’ng Jehofa a ile a laela Baisiraele gore ba ikarole ditšhabeng tše dingwe?

⁹ Gaešita le ge Baisiraele ba be ba swanetše go bontšha ba bangwe lerato, ba be ba swanetše gore gape ba dule ba ikarotše go bao ba rapelago medimo ya maaka. Jehofa o ile a ba lemoša ka dikotsi le ditla-morago tša ditlwaelano tše mpe. Ka mohlala, mabapi le ditšhaba tšeo Baisiraele ba bego ba tla di amoga naga, Jehofa o ba laetše gore: “Le se kê la tšeana nabô’; Le se kê la ba nea barwedi ba lena ya ba basadi ba barwa ba bôná; xomme Le se kê la tšeiša barwa ba bôná barwedi ba lena. Ka xobane ba tlo aroša barwa ba lena ba nthlanoxêla, ba dirêla medimo e šele; xomme boxale bya Modimo bo tlo Le tukêla.”—Doiteronomio 7:3, 4.

10. Re swanetše go itiša malebana le eng?

¹⁰ Ka mo go swanago, Bakriste ba itiša malebana le go gwerana le batho bao ba ka fokodišago tumelo ya bona. (1 Bakorinthe 15:33) Re eletšwa gore: “Le se ke la rwala joko le ba ba sa dumelego,” bao e sego karolo ya phuthego ya Bokriste. (2 Bakorinthe 6:14) Ka godimo ga moo, Bakriste ba eletšwa gore ba nyale “feela Moreneng.” (1 Bakorinthe 7:39) Lega go le bjalo, ga se ra swanela go nyatša bao ba sa dumelego go Jehofa. Kriste o hwetše badiradibe gomme ba bantši bao ba kilego ba dira bokgopo ba fetotše ditsela tša bona gomme ba boelantšwe le Modimo.—Baroma 5:8; 1 Bakorinthe 6:9-11.

11. Tsela e kaone-kaone ya go bontšha lerato go bao ba sa hlankelego Jehofa ke efe, gona ka baka la’ng?

¹¹ Tsela e kaone ya go bontšha lerato go bao ba sa hlankelego Modimo ke ka go ekiša Jehofa ka boyena. Gaešita le ge a sa rate bokgopo, o bontšha bohle botho bjo lerato ka go ba nea sebaka sa gore ba boelane le yena, ba lahle ditsela tša bona tše kgopo gomme ba amogele bophelo bjo bo sa felego. (Hesekiele 18:23) Jehofa “o rata gore bohle ba fihle boitsholong.” (2 Petro 3:9) Thato ya gagwe ke gore “mehuta yohle ya batho e phološwe gomme e fihle tsebong e nepagetšego ya therešo.” (1 Timotheo 2:4) Ke ka baka leo Jesu a laetšego balatedi ba gagwe gore ba dire boboledi, ba rute gomme ba “dire batho ba ditšhaba ka moka barutiwa.” (Mateo 28:19, 20) Ka go tšea karolo modirong wo, re bontšha gore re rata Modimo le moagišani, ee, go akaretša le manaba a rena!

Go Rata Bana Babo Rena ba Bakriste

12. Moapostola Johane o ngwadile’ng mabapi le go rata bana babo rena?

¹² Moapostola Paulo o ngwadile gore: “Anke re direleng bohle botse, eupša kudu-kudu re bo direleng bao ba tswalanego le rena tumelong.” (Bagalatia 6:10) Bjalo ka Bakriste, re na le boikarabelo bja go bontšha lerato go bao ba tswalanego le rena tumelong—bana babo rena le dikgaetšedi tša moya. Lerato le ke la bohlokwa gakaaka’ng? Ge a gatelela ntlha ye ya bohlokwa, moapostola Johane o ngwadile gore: “Yo mongwe le yo mongwe yo a hloilego ngwanabo ke mmolai . . . Ge e ba motho a re: “Ke rata Modimo,” fela a hloile ngwanabo, ke moaketši. Gobane yo a sa ratego ngwanabo yo a mmonago, a ka se rate Modimo yo a sa kago a mmona.” (1 Johane 3:15; 4:20) Mantšu a ke a matla. Jesu Kriste o ile a diriša mantšu “mmolai” le “moaketši” go Sathane Diabolo. (Johane 8:44) Le ka mohla re ka se nyake gore mantšu ao a dirišwe go rena!

13. Ke ka ditsela dife re ka bontšhago badumedi-gotee le rena lerato?

¹³ Bakriste ba therešo ba “rutwa ke Modimo  gore [ba] ratane.” (1 Bathesalonika 4:9) Ga se ra swanela go ratana “ka lentšu goba ka leleme, eupša ka tiro le ka therešo.” (1 Johane 3:18) Lerato la rena e swanetše go ba “le le se nago boikaketši.” (Baroma 12:9) Lerato le re tutueletša go ba botho, go ba le kwelobohloko, go lebalela le go ba le bopelotelele, e sego go ba le lehufa, go ikgantšha, go ikgogomoša goba go ba le boithati. (1 Bakorinthe 13:4, 5; Baefeso 4:32) Le re tutueletša go ‘hlankelana.’ (Bagalatia 5:13) Jesu o boditše barutiwa ba gagwe gore ba ratane go fo swana le ge yena a ba ratile. (Johane 13:34) Ka baka leo, Mokriste o swanetše go ikemišetša go gafa gaešita le bophelo bja gagwe bakeng sa badumedi-gotee le yena ge go nyakega.

14. Re ka bontšha lerato bjang ka lapeng?

¹⁴ Lerato le swanetše go bonagatšwa kudu-kudu ka lapeng la Bokriste gomme ka mo go kgethegilego le bonagatšwe magareng ga monna le mosadi. Tlemo ya lenyalo ke ya kgaufsi kudu mo e lego gore Paulo o itše: “Banna ba swanetše go rata basadi ba bona bjalo ka mebele ya bona.” O okeditše ka gore: “Yo a ratago mosadi wa gagwe o a ithata.” (Baefeso 5:28) Paulo o boeletša keletšo ye ditemaneng tše hlano tše di latelago. Monna yo a ratago mosadi wa gagwe a ka se ekiše Baisiraele ba mehleng ya Maleaki bao ba ilego ba radia balekane ba bona. (Maleaki 2:14) O tla mo rata. O tla mo rata go etša ge Kriste a ratile phuthego. Ka mo go swanago lerato le tla tutueletša mosadi go hlompha monna wa gagwe.—Baefeso 5:25, 29-33.

15. Ke’ng seo ba bangwe ba ilego ba tutueletšega go se bolela le go se dira ge ba bona bana babo rena ba thušana ka lerato?

¹⁵ Ka kgonthe, wo ke mohuta wa lerato leo le hlaolago Bakriste ba therešo. Jesu o itše: “Bohle ba tla tseba ka se gore le barutiwa ba-ka, ge e ba le ratana.” (Johane 13:35) Lerato leo re ratanago ka lona le gogela batho go Modimo yo re mo ratago le yo re mo emelago. Ka mohlala, go na le pego ye e tšwago kua Mozambique mabapi le lapa la Dihlatse. “Re be re sa ka ra bona selo sa go swana le seo. Moya o matla o ile wa thoma go tšutla mathapama gomme wa latelwa ke pula e matla le sefako. Diphefo tše matla di ile tša senya ntlo ya rena ya mahlaka gomme masenke a tšewa ke phefo. Ge bana babo rena go tšwa diphuthegong tša kgaufsi ba e-tla gomme ba re thuša go aga ntlo ya rena lefsa, baagišani ba rena bao ba bego ba maketše ba ile ba re: ‘Bodumedi bja lena bo kgahliša kudu. Kereke ya rena ga se ya ka ya re thuša ka tsela ye.’ Re ile ra phetla Beibele gomme ra ba bontšha Johane 13:34, 35. Bontši bja baagišani ba rena ga bjale bo ithuta Beibele.”

Go Rata Motho ka o Tee ka o Tee

16. Phapano ke efe magareng ga go rata sehlopha le go rata motho ka o tee ka o tee?

¹⁶ Ga go thata go rata baagišani ba rena e le sehlopha. Lega go le bjalo, go rata motho ka o tee ka o tee go ka ba thata kudu. Ka mohlala, go rata ga batho ba bangwe moagišani go akaretša feela go dira moneelo wa tšhelete mokgatlong o itšego wa go thuša setšhaba. Ka kgonthe, go bonolo kudu go bolela gore re rata moagišani go e na le go rata mošomi-gotee yo go bonalago a se na taba le rena, moagišani yo a dulago kgaufsi le rena yo a sa rategego goba mogwera yo a re nyamišago.

17, 18. Jesu o ile a bontšha bjang gore o rata batho, gona o be a dira bjalo ka maikemišetšo afe?

¹⁷ Tabeng ye ya go rata motho ka o tee ka o tee, re ka ithuta go Jesu, yo a bonagaditšego dika tša Modimo ka mo go phethagetšego. Gaešita le ge a be a tlile lefaseng go tlo tloša sebe sa lefase, o ile a bontšha lerato go motho ka o tee ka o tee—mosadi yo a babjago, molephera le ngwana.  (Mateo 9:20-22; Mareka 1:40-42; 7:26, 29, 30; Johane 1:29) Ka mo go swanago, re bontšha gore re rata moagišani ka tsela yeo re swarago batho bao re kopanago le bona letšatši le letšatši.

¹⁸ Lega go le bjalo, ga se ra swanela go lebala gore go rata ga rena moagišani go tswalana le go rata ga rena Modimo. Gaešita le ge Jesu a ile a thuša badiidi, a fodiša balwetši le go fepa ba swerwego ke tlala, boikemišetšo bja gagwe bja go dira dilo tše ka moka gotee le go ruta mašaba e be e le go thuša batho gore ba boelane le Jehofa. (2 Bakorinthe 5:19) Jesu o be a dira dilo tšohle e le gore a nee Modimo letago, a sa lebale gore o emela le go bonagatša Modimo yoo a mo ratago. (1 Bakorinthe 10:31) Ka go ekiša mohlala wa Jesu, le rena re ka rata baagišani ba rena e le ka kgonthe gomme ka nako e swanago ra se be karolo ya lefase la batho ba kgopo.

Re ka Rata Bjang Baagišani ba Rena go Etša ge re Ithata?

19, 20. Go rata moagišani go etša ge re ithata go bolela’ng?

¹⁹ Jesu o itše: “O rate moagišani wa gago go etša ge o ithata.” Ke ga tlhago gore re ithate gomme re be le boitlhompho bjo bo lekanetšego. Ge e ba go be go se bjalo, taelo ye e be e ka se be le mohola. Lerato le leo le swanetšego ga se la swanela go fapanywa le lerato la boithati leo moapostola Paulo a boletšego ka lona go 2 Timotheo 3:2. Go e na le moo, ke go ithata ka tsela e leka-lekanego. Seithuti se sengwe sa Beibele se go hlalositše e le “go ithata ka tsela e leka-lekanego e sego boikgantšho bjo bo rego ‘ke phagametše ba bangwe’ goba boinyatšo bjo bo rego ‘ga ke selo.’”

²⁰ Go rata ba bangwe go etša ge re ithata go bolela go lebelela ba bangwe ka tsela yeo re ratago gore ba re lebelele ka yona le go ba swara ka tsela yeo re ratago gore ba re sware ka yona. Jesu o itše: “Dilo tšohle, tše le nyakago batho ba le dira tšona, le lena ka mo go swanago le ba dire tšona.” (Mateo 7:12) Ela hloko gore Jesu ga se a re re nagane kudu ka seo batho ba re dirilego sona nakong e fetilego gomme le rena re ba dire ka mo go swanago. Go e na le moo, re swanetše go nagana ka tsela yeo re ka ratago gore ba re sware ka yona, ke moka re ba sware ka yona tsela yeo. Le gona, ela hloko gore Jesu ga se a bolela gore re swanetše go swara bagwera ba rena le bana babo rena feela ka tsela ye. O dirišitše lentšu “batho,” mohlomongwe e le go bontšha gore re swanetše go swara batho bohle ka tsela ye, batho ka moka bao re kopanago le bona.

21. Re bontšha’ng ka go rata ba bangwe?

²¹ Go rata moagišani go tla re thibela go dira se se fošagetšego. Moapostola Paulo o ngwadile gore: “Gobane molao o rego, ‘O se ke wa hlotlola, O se ke wa bolaya, O se ke wa utswa, O se ke wa duma tša ba bangwe,’ le taelo le ge e le efe e nngwe yeo e lego gona, o akaretšwa ka lentšu le, le le rego ‘O rate wa geno bjalo ka ge o ithata.’ Lerato ga le dire moagišani wa motho gampe.” (Baroma 13:9, 10) Lerato le tla re tutueletša go tsoma ditsela tša go direla ba bangwe botse. Ka go rata batho ba bangwe, re bontšha gore re rata Yo a bopilego motho ka seswantšho sa Gagwe, e lego Jehofa Modimo.—Genesi 1:26.

O be o tla Araba Bjang?

• Re swanetše go rata bomang, gona ka baka la’ng?

• Re ka bontšha bjang lerato go bao ba sa hlankelego Jehofa?

• Beibele e hlalosa bjang lerato leo re swanetšego go rata bana babo rena ka lona?

• Go rata moagišani go etša ge re ithata go bolela’ng?

[Dipotšišo tša Thuto]

[Seswantšho go letlakala 26]

“Ge e le gabotse, ke mang yo e lego moagišani wa-ka?”

[Seswantšho go letlakala 29]

Jesu o rata motho ka o tee ka o tee