Jehofa o Nea “Moya o Mokgethwa go Bao ba mo Kgopelago”

“Ge e ba lena gaešita le ge le le ba kgopo le tseba go nea bana ba lena dimpho tše dibotse, gona Tate yo a lego legodimong o tla nea gakaakang moya o mokgethwa go bao ba mo kgopelago!”—LUKA 11:13.

1. Ke neng mo re nyakago thušo ya moya o mokgethwa ka mo go kgethegilego?

‘N KA se kgone go lebeletšana le boemo bjo ke le noši. Nka kgona go kgotlelela teko ye ge feela ke thušwa ke moya o mokgethwa!’ Na o kile wa bolela mantšu ao a tšwago pelong? Bakriste ba bantši ba kile ba bolela mantšu ao. Mohlomongwe o a boletše ka morago ga go lemoga gore o swerwe ke bolwetši bjo šoro. Goba o a boletše nakong ya ge molekane wa gago yo o bego o nyalane le yena ka nako e telele a hlokofala. Goba e be e le nakong ya ge maemo ao a kgahlišago a be a fetoga a gateletšago kudu. Dinakong tša mahloko bophelong, mohlomongwe o be o ikwa o kgona go tšwela pele o phela e le feela ka gobane moya o mokgethwa wa Jehofa o be o go nea “matla a fetago a tlwaelegilego.”—2 Bakorinthe 4:7-9; Psalme 40:1, 2.

2. (a) Bakriste ba therešo ba lebeletšana le ditlhohlo dife? (b) Re tla ahla-ahla dipotšišo dife sehlogong se?

² Bakriste ba therešo ba lebeletšana le kgateletšo e tšwelago pele le kganetšo e tšwago lefaseng la lehono leo le sa boifego Modimo. (1 Johane 5:19) Go oketša moo, balatedi ba Kriste ba hlaselwa ke Sathane Diabolo ka boyena, yo a lwago ntwa e šoro malebana le bao “ba bolokago ditaelo tša Modimo gomme ba e-na le modiro wa go nea bohlatse ka Jesu.” (Kutollo 12:12, 17) Ka gona, ga go makatše gore re nyaka thekgo ya moya wa Modimo gona bjale go feta le ge e le neng pele. Re ka dira’ng go kgonthišetša gore re tšwela pele re amogela moya o mokgethwa wa Modimo ka botlalo? Le gona ke ka baka la’ng re ka kgodišega gore Jehofa o tloga a ikemišeditše go re nea matla ao re a nyakago dinakong tša teko? Re hwetša dikarabo tša dipotšišo tše dipapišong tše pedi tša Jesu.

Phegelela Thapelong

3, 4. Jesu o boletše papišo efe gomme o ile a e diriša bjang tabeng ya thapelo?

³ Yo mongwe wa barutiwa ba Jesu o kile a kgopela a re: “Morena, re rute go rapela.” (Luka 11:1) Ge a araba, Jesu o neile barutiwa ba gagwe dipapišo tše pedi tše di tswalanago. Ya pele e mabapi le motho yo a amogelago moeng gomme ya bobedi e mabapi le tate yo a theetšago morwa wa gagwe. Anke re eleng hloko e nngwe le e nngwe ya dipapišo tše tše pedi.

⁴ Jesu o itše: “Ke mang go lena yo e ka rego a e-na le mogwera gomme a ya go yena bošego-gare a re go yena, ‘Mogwera’ka, nkadime dinkgwa tše tharo, gobane mogwera’ka o sa tšwa go fihla go nna a le leetong gomme ga ke na seo nka se beago pele ga gagwe’? Ke moka yo a lego ka gare a fetola a re, ‘Lesa go ntshwenya. Mojako o šetše o notletšwe gomme bana ba-ka ba banyenyane ba na le nna malaong; nka se ke ka tsoga ka go nea selo.’ Ke a le botša, gaešita le ge a ka se ke a tsoga a mo nea se sengwe gobane e le mogwera wa gagwe, ruri ka baka la go phegelela ga gagwe ka sebete o tla tsoga a mo nea dilo le ge e le dife tšeo a di nyakago.” Ka morago Jesu o ile a hlalosa kamoo papišo ye e šomago ka gona thapelong, a re: “Ka gona, ke re go lena, Tšwelang pele le kgopela, gomme le tla newa; tšwelang pele le tsoma, gomme le tla hwetša; tšwelang pele le kokota, gomme le tla bulelwa.  Gobane yo mongwe le yo mongwe yo a kgopelago o a amogela, gomme yo mongwe le yo mongwe yo a tsomago o a hwetša, le yo mongwe le yo mongwe yo a kokotago o tla bulelwa.”—Luka 11:5-10.

5. Papišo ya mabapi le monna yo a phegelelago e re ruta’ng mabapi le boemo bja kgopolo bjo re swanetšego go ba le bjona ge re rapela?

⁵ Papišo ye yeo e kwagalago ya motho yo a phegelelago e bontšha boemo bja kgopolo bjo re swanetšego go ba le bjona ge re rapela. Ela hloko gore Jesu o bolela gore motho o atlega go hwetša seo a se nyakago “ka baka la go phegelela ga gagwe ka sebete.” (Luka 11:8) Polelwana e rego ‘go phegelela ka sebete’ e tšwelela gatee feela ka Beibeleng. E fetoletšwe go tšwa lentšung la Segerika leo ka go lebanya le bolelago “go se hlabje ke dihlong.” Gantši go se hlabe ke dihlong ke seka se se sa rategego. Lega go le bjalo, ge go se hlabje ke dihlong go bontšhwa ka lebaka le lebotse, e ba seka se se retegago. Go bjalo le ka moamogela-moeng papišong ye. Ga a hlabje ke dihlong tša go kgopela ka go phegelela seo a se nyakago. Ka ge Jesu a tšweletša moamogela-moeng yo e le mohlala go rena, dithapelo tša rena le tšona e swanetše go ba tše di phegelelago. Jehofa o nyaka gore ‘re tšwele pele re kgopela, re tšwele pele re tsoma le go tšwela pele re kokota.’ Ge a arabela, o tla ‘nea moya o mokgethwa go bao ba mo kgopelago.’

6. Motlwae wa go bontšha moya wa go amogela baeng o be o lebelelwa bjang mehleng ya Jesu?

⁶ Jesu ga a re bontšhe feela kamoo re swanetšego go rapela ka gona—ka go phegelela ka sebete—eupša gape o re bontšha lebaka leo ka lona re swanetšego go dira bjalo. E le gore re lemoge thuto yeo gabotse, re swanetše go ela hloko kamoo bao ba ilego ba theetša papišo ya Jesu mabapi le moamogela-moeng yo a phegelelago ba bego ba lebelela motlwae wa go amogela baeng. Dipego tše dintši ka Mangwalong di bontšha gore go hlokomela baeng mehleng ya Beibele e be e le motlwae wo o bego o tšeelwa godimo, kudu-kudu go bahlanka ba Modimo. (Genesi 18:2-5; Baheberu 13:2) Go palelwa ke go bontšha moya wa go amogela baeng go be go hlabiša dihlong. (Luka 7:36-38, 44-46) Re naganne ka seo, anke re lebeleleng papišo ya Jesu gape.

7. Ke ka baka la’ng moamogela-moeng wa papišong ya Jesu a sa hlabje ke dihlong tša go tsoša mogwera wa gagwe?

⁷ Moamogela-moeng wa papišong ye o amogela moeng bošego-gare. Moamogela-moeng o ikwa a gapeletšega go nea moeng wa gagwe dijo eupša ‘ga a na seo a ka se beago pele ga gagwe.’ O lebelela boemo bjo e le bja tšhoganetšo! O swanetše go hwetša senkgwa, go sa šetšwe gore o se hwetša bjang. Ka baka leo, o ya go mogwera wa gagwe gomme a sa hlabje ke dihlong, o a mo tsoša. Moamogela-moeng o goeletša ka gore: “Mogwera’ka, nkadime dinkgwa tše tharo.” O phegelela kgopelong ya gagwe go fihlela a hwetša seo a se hlokago. Ke feela nakong ya ge a swere dinkgwa mo a ka bago moamogela-moeng yo botse.

Ge se Nyakwa Kudu—Se Kgopelwa Kudu

8. Ke’ng seo se tla re tutueletšago go rapelela moya o mokgethwa ka go phegelela?

⁸ Papišo ye e bontšha’ng mabapi le lebaka leo le dirago gore re phegelele thapelong? Monna  yo o ile a tšwela pele a kgopela senkgwa ka gobane a be a nagana gore go ba le dinkgwa tšeo go be go le bohlokwa kudu e le gore a tle a kgone go ba moamogela-moeng. (Jesaya 58:5-7) O be a ka se kgone go dira seo ge a be a se na dinkgwa. Ka mo go swanago, ka baka la ge re lemoga gore go ba le moya wa Modimo go tloga go le bohlokwa e le gore re phethagatše bodiredi bja rena re le Bakriste ba therešo, re tšwela pele re rapela Modimo, re mo kgopela moya woo. (Sakaria 4:6) Ka ntle le wona, re tla palelwa. (Mateo 26:41) Na o bona phetho ya bohlokwa yeo re ka e fihlelelago go tšwa papišong ye? Ge re lebelela moya wa Modimo e le selo seo re se nyakago ka go akgofa, go na le kgonagalo e kgolo kudu ya gore re ka phegelela ge re o kgopela.

9, 10. (a) Bontšha lebaka leo ka lona re swanetšego go phegelela go kgopela moya wa Modimo. (b) Re swanetše go ipotšiša potšišo efe, gona ka baka la’ng?

⁹ Ge re diriša thuto ye boemong bja mehleng yeno, anke re re setho se sengwe sa lapa la gago se thoma go babja bošego-gare. Na o ka tsoša ngaka gore o e kgopele thušo? E sego ge molwetši a babja ganyenyane. Lega go le bjalo, ge e ba a swerwe ke bolwetši bja pelo, o ka se hlabje ke dihlong tša go bitša ngaka. Ka baka la’ng? Ka gobane o lebeletšane le boemo bja tšhoganetšo. O a lemoga gore thušo ya motho yo a nago le bokgoni e bohlokwa kudu. Go se kgopele thušo go ka ba le mafelelo a mabe. Ka mo go swanago, ka tsela ya seswantšhetšo Bakriste ba therešo ba lebeletšane le boemo bja tšhoganetšo bjo bo tšwelago pele. Go ba gona, Sathane o sepela-sepela bjalo ka “tau e rorago,” a leka go re metša. (1 Petro 5:8) E le gore re dule re phela moyeng, thušo ya moya wa Modimo e bohlokwa kudu. Go se kgopele thušo ya Modimo go ka ba kotsi. Ka baka leo, ka go phegelela ka sebete re kgopela moya o mokgethwa go Modimo. (Baefeso 3:14-16) Ke feela ge re dira bjalo mo re tlago go ba le matla ao a nyakegago bakeng sa go ‘kgotlelela go fihla bofelong.’—Mateo 10:22; 24:13.

¹⁰ Ka gona, go bohlokwa gore ka dinako tše dingwe re eme ganyenyane gomme re ipotšiše gore, ‘Ge e le gabotse, na ruri dithapelo tša-ka ke tša go phegelela?’ Gopola gore ge re lemoga ka botlalo gore re nyaka thušo ya Modimo, re tla phegelela kudu go rapelela moya o mokgethwa.

Ke’ng Seo se re Tutueletšago go Rapela ka Kholofelo?

11. Jesu o ile a diriša bjang papišo ya tate le morwa wa gagwe thapelong?

¹¹ Papišo ya Jesu ya moamogela-moeng yo a phegelelago e bontšha boemo bja motho yo a rapelago—modumedi. Papišo e latelago e bontšha boemo bja yo a kwago dithapelo—Jehofa Modimo. Jesu o botšišitše gore: “Ruri ke tate ofe mo gare ga lena yo e ka rego ge morwa wa gagwe a kgopela hlapi, yena a mo nea noga go e na le hlapi? Goba ge e ba a bile a kgopela lee, a ka mo neago phepheng?” Jesu o ile a tšwela pele a bontšha kamoo taba e šomago ka gona, a re: “Ka gona, ge e ba lena gaešita le ge le le ba kgopo le tseba go nea bana ba lena dimpho tše dibotse, gona Tate yo a lego legodimong o tla nea gakaakang moya o mokgethwa go bao ba mo kgopelago!”—Luka 11:11-13.

12. Papišo ya tate yo a kwago kgopelo ya morwa wa gagwe e gatelela bjang kganyogo ya Jehofa ya go arabela dithapelo tša rena?

¹² Ka mohlala wo wa tate yo a arabelago go seo morwa wa gagwe a se kgopelago, Jesu o utolla kamoo Jehofa a ikwago ka gona mabapi le bao  ba retologelago go yena ka thapelo. (Luka 10:22) Sa pele, ela hloko phapano ya dipapišo tše. Ka go se swane le monna yo a lego papišong ya pele yo a bego a dika-dika go arabela ge a be a kgopelwa thušo, Jehofa o bjalo ka tate yo e lego motho yo lerato, yo a fagahletšego go arabela kgopelong ya ngwana wa gagwe. (Psalme 50:15) Jesu o ile a tšwela pele a utolla go ikemišetša ga Jehofa go re thuša ka go mmapetša le tate yo e lego motho. O bolela gore ge e ba tate yo a lego “kgopo” ka baka la sebe sa leabela a kgona go nea morwa wa gagwe mpho e botse, ruri re ka letela gore Tatago rena wa legodimong a dire se se fetago seo ka go nea lapa la barapedi ba gagwe moya o mokgethwa, ka ge a e-na le seatla se se bulegilego!—Jakobo 1:17.

13. Re ka kgodišega ka’ng ge re rapela Jehofa?

¹³ Re ithuta’ng? Re ka kgodišega gore ge re kgopela moya o mokgethwa go Tatago rena wa legodimong, o tloga a ikemišeditše go re nea seo re se kgopelago. (1 Johane 5:14) Ge re retologela go yena ka thapelo ka go phegelela, Jehofa a ka se ke a bolela go le bjalo ka ge eka o re: “Lesa go ntshwenya. Mojako o šetše o notletšwe.” (Luka 11:7) Ka mo go fapanego, Jesu o itše: “Tšwelang pele le kgopela, gomme le tla newa; tšwelang pele le tsoma, gomme le tla hwetša; tšwelang pele le kokota, gomme le tla bulelwa.” (Luka 11:9, 10) Ee, Jehofa ‘o tla re kwa mohla re mmitšago.’—Psalme 20:9; 145:18.

14. (a) Ke kgopolo efe e fošagetšego yeo e tshwenyago ba bangwe bao ba lebeletšanago le diteko? (b) Ke ka baka la’ng re ka rapela Jehofa ka kgodišego ge re lebeletšane le diteko?

¹⁴ Papišo ya Jesu ya tate yo lerato e gatelela gape gore botho bja Jehofa bo feta botho bjo bo bontšhwago ke motswadi le ge e ofe. Ka baka leo, le ka mohla ga go le o tee wa rena yo a swanetšego go nagana gore diteko tšeo re lebeletšanago le tšona e swanetše go ba e le pontšho ya gore Modimo ga a re amogele. Ke lenaba la rena le legolo e lego Sathane yo a nyakago gore re ikwe ka tsela yeo. (Jobo 4:1, 7, 8; Johane 8:44) Dikgopolo tše bjalo tša go ipea molato ga se tša thewa Mangwalong. Jehofa ga a re leke “ka dilo tše mpe.” (Jakobo 1:13) Ga a re nee teko e swanago le noga goba e swanago le phepheng. Tatago rena wa legodimong o nea “dilo tše dibotse go bao ba mo kgopelago.” (Mateo 7:11; Luka 11:13) Ka kgonthe, ge re tšwela pele re kwešiša botho bja Jehofa le go nyaka ga gagwe go re thuša, re tla tšwela pele re tutueletšega go rapela ka kgodišego. Ge re dira bjalo, le rena re tla kgona go bolela mantšu a swanago le a mopsalme yo a ngwadilego gore: “’Me byale Modimo ó nkwile, a utlwêla ruri xe ke rapêla.”—Psalme 10:17; 66:19.

Kamoo Moya o Mokgethwa e Lego Mothuši wa Rena

15. (a) Jesu o holofeditše’ng mabapi le moya o mokgethwa? (b) Tsela e nngwe yeo moya o mokgethwa o re thušago ka yona ke efe?

¹⁵ Nakwana pele ga ge Jesu a ka hwa, o ile a boeletša kgonthišetšo yeo a e neilego dipapišong tša gagwe. Ge a bolela mabapi le moya o mokgethwa, o boditše baapostola ba gagwe gore: “Ke tla kgopela Tate gomme o tla le nea mothuši yo  mongwe gore a be le lena ka mo go sa felego.” (Johane 14:16) Ka baka leo, Jesu o holofeditše gore mothuši, goba moya o mokgethwa, o tla ba le balatedi ba gagwe nakong e tlago, go akaretša le mehleng ya rena. Tsela e nngwe ya bohlokwa yeo re hwetšago thekgo e bjalo ka yona ke efe? Moya o mokgethwa o re thuša go kgotlelela diteko tše di fapa-fapanego. Bjang? Moapostola Paulo, yo ka boyena a ilego a lebeletšana le diteko, o ile a hlalosa ka lengwalong leo a le ngwaletšego Bakriste ba kua Korinthe mabapi le kamoo moya wa Modimo o mo thušitšego ka gona. Anke ka boripana re eleng hloko seo a se ngwadilego.

16. Boemo bja rena bo ka swana bjang le bja Paulo?

¹⁶ Sa pele, Paulo ka go lebanya o boditše badumedi-gotee le yena gore o be a e-lwa le “mootlwa nameng,” e lego mohuta o itšego wa teko. Ke moka o ile a bolela gore: “Ke ile ka lopa Morena [Jehofa] ka makga a mararo . . . e le gore o tloge go nna.” (2 Bakorinthe 12:7, 8) Gaešita le ge Paulo a ile a lopa Modimo gore a tloše mathata a gagwe, a ile a dula a le gona. Mohlomongwe o lebeletšana le boemo bjo bo swanago lehono. Go etša Paulo, o ka ba o rapetše ka go phegelela le ka kgodišego o kgopela Jehofa gore a tloše teko. Lega go le bjalo, go sa šetšwe go lopa ga gago leboelela, o sa dutše o lebeletšane le bothata. Na seo se bolela gore Jehofa ga se a ka a araba dithapelo tša gago le gore moya wa gagwe ga o go thuše? Le gatee! (Psalme 10:1, 17) Ela hloko seo moapostola Paulo a ilego a tšwela pele a se bolela.

17. Jehofa o arabile dithapelo tša Paulo bjang?

¹⁷ Ge Modimo a be a araba dithapelo tša Paulo o mmoditše gore: “Botho bja-ka bjo bo sa swanelago bo go lekane; gobane matla a-ka a phethagatšwa bofokoding.” Paulo o itše: “Ka gona, ka mo go thabišago kudu, nka upša ka ikgantšha ka bofokodi bja-ka, e le gore matla a Kriste a be godimo ga-ka bjalo ka tente.” (2 Bakorinthe 12:9; Psalme 147:5) Ka baka leo, Paulo o ile a lemoga ka Kriste gore tšhireletšo e matla ya Modimo e be e le godimo ga gagwe bjalo ka tente. Lehono, Jehofa o araba dithapelo tša rena ka tsela e swanago. O tliša tšhireletšo ya gagwe bjalo ka seširo godimo ga bahlanka ba gagwe.

18. Ke ka baka la’ng re kgona go kgotlelela diteko?

¹⁸ Ke therešo gore tente ga e thibele dipula gore di se ke tša na goba gore phefo e se ke ya foka, eupša e šireletša dilong tšeo ka tekanyo e itšego. Ka mo go swanago, seširo seo se newago ka “matla a Kriste” ga se thibele gore re se ke ra lebeletšana le diteko goba go tlelwa ke mathata. Lega go le bjalo, se re nea tšhireletšo ya moya malebana le dilo tše di gobatšago tša lefase le le ditlhaselo tša mmuši wa lona e lego Sathane. (Kutollo 7:9, 15, 16) Ka baka leo, gaešita le ge o lebeletšana le teko yeo e sa ‘tlogego go wena,’ o ka kgodišega gore Jehofa o lemoga go katana ga gago le gore o arabela “xe a kwa Ò mo llêla.” (Jesaya 30:19; 2 Bakorinthe 1:3, 4) Paulo o ngwadile gore: “Modimo o a botega, gomme a ka se le lese le lekwa go feta kamoo le ka kgonago go kgotlelela ka gona, eupša gotee le moleko o tla ba a bula tsela ya go tšwa e le gore le kgone go o kgotlelela.”—1 Bakorinthe 10:13; Bafilipi 4:6, 7.

19. O ikemišeditše go dira’ng, gona ka baka la’ng?

¹⁹ Ke therešo gore ‘mehla ya bofelo’ ya gona bjale ya lefase le leo le sa boifego Modimo e tletše ka “dinako tše di hlobaetšago tšeo go lego thata go lebeletšana le tšona.” (2 Timotheo 3:1) Gaešita le ge go le bjalo, bahlanka ba Modimo ba a kgona go lebeletšana le dinako tše. Ka baka la’ng? Ka baka la thekgo le tšhireletšo ya moya o mokgethwa wa Modimo, wo Jehofa a o neago ka go rata le ka botlalo go bohle bao ba mo kgopelago wona ka go phegelela le ka kgodišego. Ka gona, anke re ikemišetšeng go tšwela pele re rapelela moya o mokgethwa letšatši le letšatši.—Psalme 34:6; 1 Johane 5:14, 15.

O be o tla Araba Bjang?

• Re swanetše go dira’ng gore re amogele moya o mokgethwa wa Modimo?

• Ke ka baka la’ng re ka kgodišega gore Jehofa o tla arabela dithapelo tša rena tša go kgopela moya o mokgethwa?

• Moya o mokgethwa o re thuša bjang go kgotlelela diteko?

[Dipotšišo tša Thuto]

[Seswantšho go letlakala 21]

Re ka ithuta’ng papišong ya Jesu mabapi le moamogela-moeng yo a phegelelago?

[Seswantšho go letlakala 22]

Na o rapelela moya o mokgethwa wa Modimo ka go phegelela?

[Seswantšho go letlakala 23]

Re ithuta’ng ka Jehofa go tšwa papišong ya tate yo a hlokomelago?