Jehofa o tla “Dira Gore Toka e Dirwe”

“Na Modimo a ka se ke a dira gore toka e dirwe bakeng sa bakgethwa ba gagwe bao ba goeletšago go yena mosegare le bošego?”—LUKA 18:7.

1. Ke bomang bao ba go kgothatšago, gona ka baka la’ng?

LEFASENG ka moka, Dihlatse tša Jehofa di thabela go ba gare ga bana babo tšona ba Bakriste le dikgaetšedi bao ba hlanketšego Jehofa ka potego ka nywaga e mentši. Na o kile wa kopana le batho ba bao ba rategago? Mohlomongwe o ka nagana ka kgaetšedi yo a tšofetšego, yo a kolobeditšwego nywageng e mentši e fetilego eupša e le ka sewelo a sa bego gona dibokeng Holong ya Mmušo. Goba o ka nagana ka ngwanabo rena yo a tšofetšego yo a thekgago dithulaganyo tša phuthego tša tirelo ya tšhemo ka potego beke le beke gomme a dirile bjalo ka nywaga e mentši. Ke therešo gore bontši bja batho ba ba be ba nagana gore Haramagedone e be e tla ba e šetše e fetile mo nakong ye. Lega go le bjalo, taba ya gore lefase le le se nago toka le sa dutše le le gona ga se ya fokodiša go bota ga bona dikholofetšo tša Jehofa goba go fokodiša boikemišetšo bja bona bja go ‘kgotlelela go fihla bofelong.’ (Mateo 24:13) Bogolo bja tumelo yeo e bontšhitšwego ke bahlanka ba bjalo ba Jehofa bao ba botegago, ruri ke mothopo wa kgothatšo phuthegong ka moka.—Psalme 147:11.

2. Ke boemo bofe bjo bo re nyamišago?

² Lega go le bjalo, ka dinako tše dingwe re ka bona se se fapanego kudu le seo. Dihlatse tše dingwe di tšere karolo bodireding ka nywaga e mentši, eupša tumelo ya tšona go Jehofa e ile ya fokola ge nako e dutše e e-ya gomme tša kgaotša go kopanela le phuthego ya Bokriste. Go a re nyamiša gore bao re kilego ra kopanela le bona ba tlogetše Jehofa le gona re kganyoga ka go tšwa pelong go thuša ‘nku e nngwe le e nngwe e timetšego’ gore e boele mohlapeng. (Psalme 119:176; Baroma 15:1) Lega go le bjalo, mafelelo a ao a sa swanego—a gore ba bangwe ba kgomarele tumelo mola ba bangwe ba lahlegelwa ke tumelo—a rotoša dipotšišo. Ke’ng seo se thušago Bakriste ba bantši go kgomarela tumelo ya bona dikholofetšong tša Jehofa mola ba bangwe e ba lahlegela? Ke’ng seo re le motho ka o tee ka o tee re ka se dirago go kgonthišetša gore kgodišego ya rena ya gore “’tšatši le lexolo la Morêna” le a tla e dula e tiile? (Tsefanya 1:14) Anke re eleng hloko papišo e hwetšwago Ebangeding ya Luka.

Temošo go Bao ba Phelago “ge Morwa wa Motho a Fihla”

3. Ke bomang bao ka mo go kgethegilego ba ka holwago ke papišo ya mohlologadi le moahlodi, gona ka baka la’ng?

³ Go Luka kgaolo 18, re hwetša papišo ya Jesu e lego mabapi le mohlologadi le moahlodi. E swana le papišo ya moamogela-moeng yo a phegelelago, yeo re e ahla-ahlilego sehlogong se se fetilego. (Luka 11:5-13) Lega go le bjalo, taba e dikologilego karolo ye ya Beibele yeo e nago le papišo ya mohlologadi le moahlodi e bontšha gore se se šoma ka mo go kgethegilego go bao ba phelago “ge Morwa wa motho a fihla” ka matla a Mmušo, e lego nako yeo e thomilego ka 1914.—Luka 18:8. *

4. Ke’ng seo Jesu a ilego a se bolela pele ga ge a ka bolela papišo e hwetšwago go Luka kgaolo 18?

⁴ Pele ga ge a ka bolela papišo ye, Jesu o boletše gore bohlatse bja go ba gona ga gagwe a le matleng a Mmušo bo be bo tla lemogega gabotse  kudu “go etša legadima” la go “phadima go tšwa karolong e nngwe tlase ga legodimo go ya karolong e nngwe tlase ga legodimo.” (Luka 17:24; 21:10, 29-33) Lega go le bjalo, batho ba bantši bao ba phelago ‘lebakeng la bofelo’ ba be ba ka se ele hloko bohlatse bjoo bjo bo lego molaleng. (Daniele 12:4) Ka baka la’ng? Ka baka le le swanago le leo le dirilego gore batho mehleng ya Noa le mehleng ya Lota ba hlokomologe ditemošo tša Jehofa. Morago kua dinakong tšeo, batho ‘ba be ba e-ja, ba e-nwa, ba reka, ba rekiša, ba bjala e bile ba aga go ba go fihla ka letšatši leo ba ilego ba fedišwa ka lona.’ (Luka 17:26-29) Ba lahlegetšwe ke maphelo ka ge ba be ba nweletše kudu medirong yeo e tlwaelegilego mo ba sa kago ba ela hloko thato ya Modimo. (Mateo 24:39) Lehono, batho ka kakaretšo le bona ba nweletše kudu medirong ya letšatši le letšatši mo ba palelwago ke go bona bohlatse bja gore bofelo bja lefase le leo le sa boifego Modimo bo kgaufsi.—Luka 17:30.

5. (a) Ke bomang bao Jesu a ilego a ba lemoša, gona ka baka la’ng? (b) Ke’ng seo se dirilego gore ba bangwe ba lahlegelwe ke tumelo ya bona?

⁵ Go molaleng gore Jesu o be a tshwenyegile ka gore balatedi ba gagwe le bona ba be ba ka arošwa ke lefase la Sathane, go ba go fihla bokgoleng bja gore ba ka “boela dilong tše di šetšego morago.” (Luka 17:22, 31) Le gona, seo ruri se diragaletše Bakriste ba bangwe. Ka nywaga e mentši, batho ba bjalo ba be ba fagahletše letšatši leo ka lona Jehofa a bego a tla fediša lefase le le kgopo. Lega go le bjalo, ge Haramagedone e be e sa fihle ka nako yeo ba bego ba e letetše, ba ile ba langwa. Go ba ga bona le kholofelo tabeng ya go batamela ga letšatši la Jehofa go ile gwa fokola. Ba ile ba fokotša bodiredi bja bona gomme ganyenyane-ganyenyane ba nwelela kudu dilong tše di tlwaelegilego tša bophelo mo ba bego ba se na nako e lekanego bakeng sa dilo tša moya. (Luka 8:11, 13, 14) Ge nako e dutše e eya, ba ile ba “boela dilong tše di šetšego morago”—a manyami ruri!

Go Nyakega ga go ‘Rapela ka Mehla’

6-8. (a) Laodiša seswantšho sa mohlologadi le moahlodi. (b) Jesu o dirišitše seswantšho se bjang?

⁶ Re ka dira’ng go kgonthišetša gore go ba ga rena le kholofelo e tiilego phethagatšong ya dikholofetšo tša Jehofa ga go fokole? (Baheberu 3:14) Jesu o ile a ahla-ahla potšišo yeo ka morago ga ge a lemošitše barutiwa gore ba se ke ba boela lefaseng le kgopo la Sathane.

⁷ Luka o bega gore, Jesu “a tšwela pele go ba botša seswantšho mabapi le go nyakega ga gore ba rapele ka mehla ba sa langwe.” Jesu o itše: “Motseng o mongwe go be go e-na le moahlodi yo mongwe yo a bego a sa boife Modimo gomme a sa hlomphe motho. Eupša go be go e-na le mohlologadi motseng woo yo a bego a dula a e-ya go yena a re, ‘Kgonthišetša gore ke hwetša toka go moganetši wa-ka molaong.’ Ee, ka lebakanyana, o be a sa rate go dira bjalo, eupša ka morago a ipotša a re: ‘Le ge ke sa boife Modimo goba go hlompha motho, fela ka baka la ge mohlologadi yo a ntshwenya ka mehla, ke tla  bona gore o hwetša toka, e le gore a se ke a dulela go tla gomme a nngamola hlogo e le ruri.’”

⁸ Ka morago ga go laodiša taba ye, Jesu o ile a e diriša ka tsela ye: “E-kwang seo moahlodi yo le ge a se a loka a se boletšego! Ruri, na Modimo a ka se ke a dira gore toka e dirwe bakeng sa bakgethwa ba gagwe bao ba goeletšago go yena mosegare le bošego gaešita le ge e le yo pelotelele go bona? Ke a le botša, O tla dira gore toka e dirwe go bona ka bjako. Lega go le bjalo, ge Morwa wa motho a fihla, na ruri o tla hwetša tumelo lefaseng?”—Luka 18:1-8.

“Kgonthišetša Gore ke Hwetša Toka”

9. Ke taba efe e gatelelwago seswantšhong sa mohlologadi le moahlodi?

⁹ Taba-kgolo ya seswantšho se seo se lemogegago e molaleng. E bolelwa ke baanegwa ba seswantšhong se go akaretša le Jesu. Mohlologadi yo o ile a phegelela ka gore: “Kgonthišetša gore ke hwetša toka.” Moahlodi o itše: “Ke tla bona gore o hwetša toka.” Jesu o botšišitše gore: “Na Modimo a ka se ke a dira gore toka e dirwe?” Le gona Jesu o boletše ka Jehofa gore: “O tla dira gore toka e dirwe go bona ka bjako.” (Luka 18:3, 5, 7, 8) Ke neng ka mo go kgethegilego mo Modimo a tlago go “dira gore toka e dirwe”?

10. (a) Ke neng mo toka e ilego ya dirwa lekgolong la pele la nywaga? (b) Ke neng le gona bjang toka e tlago go dirwa bakeng sa bahlanka ba Modimo lehono?

¹⁰ Lekgolong la pele la nywaga, “matšatši a go diragatša toka” (goba, “matšatši a tefetšo,” Kingdom Interlinear) a fihlile ka 70 C.E. ge Jerusalema le tempele ya yona di be di senywa. (Luka 21:22) Go batho ba Modimo lehono, toka e tla dirwa ka “’tšatši le lexolo la Morêna.” (Tsefanya 1:14; Mateo 24:21) Ka nako yeo, Jehofa o tla ‘lefeletša ka tlaišego bao ba tlaišago’ batho ba gagwe “ge [Jesu Kriste] a tliša tefetšo go bao ba sa tsebego Modimo le bao ba sa kwego ditaba tše dibotse mabapi le Morena wa rena Jesu.”—2 Bathesalonika 1:6-8; Baroma 12:19.

11. Ke ka tsela efe toka e tlago go tla “ka bjako”?

¹¹ Lega go le bjalo, re swanetše go kwešiša bjang kgonthišetšo ya Jesu ya gore Jehofa o tla dira gore toka e dirwe “ka bjako”? Lentšu la Modimo le bontšha gore “gaešita le ge [Jehofa] e le yo pelotelele,” kapejana o tla dira dilo ka toka ge nako e fihlile. (Luka 18:7, 8; 2 Petro 3:9, 10) Mehleng ya Noa, ba kgopo ba ile ba fedišwa ka ntle le tika-tiko ge Meetse-fula a be a fihla. Ka mo go swanago, ba kgopo ba ile ba fedišwa ge mollo o be o theoga go tšwa legodimong mehleng ya Lota. Jesu o itše: “Go tla ba ka tsela e swanago letšatšing leo ge Morwa wa motho a tla ba a utollwa.” (Luka 17:27-30) Le gona, ba kgopo ba tla welwa ke “tshenyego ya tšhoganyetšo.” (1 Bathesalonika 5:2, 3) Re ka kgodišega ka mo go feletšego gore Jehofa a ka se dumelele lefase la Sathane go tšwela pele le le gona ka nako e telele go feta kamoo toka e nyakago ka gona.

“O tla Dira Gore Toka e Dirwe”

12, 13. (a) Seswantšho sa Jesu sa mohlologadi le moahlodi se re ruta thuto bjang? (b) Ke ka baka la’ng re ka kgodišega gore Jehofa o tla kwa dithapelo tša rena le go dira gore toka e dirwe?

¹² Seswantšho sa Jesu sa mohlologadi le moahlodi se gatelela therešo e nngwe gape ya bohlokwa. Ge Jesu a bontšha kamoo seswantšho se se šomago ka gona, o itše: “E-kwang seo moahlodi yo le ge a se a loka a se boletšego! Ruri, na Modimo a ka se ke a dira gore toka e dirwe bakeng sa bakgethwa ba gagwe?” Ke therešo gore Jesu o be a sa bapiše Jehofa le moahlodi, go le bjalo ka ge eka o re Modimo o tla swara badumedi ka tsela e swanago. Go e na le moo, Jesu o rutile balatedi ba gagwe thuto mabapi le Jehofa ka go gatelela phapano magareng ga moahlodi le Modimo. Ke ditsela dife tše dingwe tšeo ba fapanego ka tšona?

¹³ Moahlodi yo a lego seswantšhong sa Jesu o be “a se a loka,” mola “Modimo [e le] moahlodi yo a lokilego.” (Psalme 7:12, PK; 33:5) Moahlodi yo o be a se na taba le mohlologadi yo, eupša Jehofa o kgahlegela motho yo mongwe le yo mongwe. (2 Koronika 6:29, 30) Moahlodi o be a sa rate go thuša mohlologadi, eupša Jehofa o a rata—ee, o fagahletše—go thuša bao ba Mo hlankelago. (Jesaya 30:18, 19) Re ithuta’ng? Ge e ba moahlodi yo a sa lokago a ile a theetša  mohlologadi gomme a mo swara ka toka, ruri Jehofa o tla theetša dithapelo tša batho ba gagwe kudu le go feta gomme a dira gore ba swarwe ka toka e le ka kgonthe!—Diema 15:29.

14. Ke ka baka la’ng re sa swanela go lahlegelwa ke tumelo ya gore letšatši la Modimo la kahlolo le a tla?

¹⁴ Ka baka leo, bao ba lahlegelwago ke tumelo ge letšatši la Modimo le dutše le e-tla ba dira phošo e kgolo. Ka baka la’ng? Ka go lahla tumelo ya bona e tiilego ya gore “’tšatši le lexolo la Morêna” le kgaufsi, ge e le gabotse ba belaela ge e ba Jehofa a ka botwa gore o tla boloka dikholofetšo tša gagwe ka potego. Eupša ga go na motho yo a nago le lebaka la go belaela go botega ga Modimo. (Jobo 9:12) Potšišo e bohlokwa ke e rego, Na rena ka borena re tla dula re botega? Le gona yeo ke yona taba ye Jesu a ilego a e rotoša mafelelong a seswantšho sa gagwe sa mabapi le mohlologadi le moahlodi.

“Na Ruri o tla Hwetša Tumelo ye Lefaseng?”

15. (a) Jesu o ile a rotoša potšišo efe, gona ka baka la’ng? (b) Re swanetše go ipotšiša potšišo efe?

¹⁵ Jesu o ile a rotoša potšišo e kgahlišago e rego: “Ge Morwa wa motho a fihla, na ruri o tla hwetša tumelo ye lefaseng?” (Luka 18:8, mongwalo wa tlase wa NW) Polelwana e rego “tumelo ye” e bontšha gore Jesu o be a bolela ka mohuta o itšego wa tumelo—tumelo e swanago le yeo mohlologadi yo a bego a e-na le yona—e sego tumelo ka kakaretšo. Jesu ga se a ka a araba potšišo ya gagwe. O ile a e botšiša e le gore barutiwa ba gagwe ba ka nagana ka boemo bja tumelo ya bona. Na e be e fokola ganyenyane-ganyenyane, mo e lego gore ba be ba le kotsing ya go boela dilong tšeo ba di tlogetšego? Goba na ba be ba e-na le mohuta wa tumelo yeo e bontšhitšwego ke mohlologadi yola? Lehono, le rena re swanetše go ipotšiša gore, ‘Ke tumelo ya mohuta ofe yeo “Morwa wa motho” a e hwetšago ka pelong ya-ka?’

16. Mohlologadi o be a e-na le tumelo ya mohuta ofe?

¹⁶ E le gore re be gare ga bao ba tlago go amogela toka ya Jehofa, re swanetše go latela mohlala wa mohlologadi yola. O be a e-na le tumelo ya mohuta ofe? O bontšhitše tumelo ya gagwe ka go phegelela go “[ya go moahlodi] a re, ‘Kgonthišetša gore ke hwetša toka.’” Mohlologadi yoo o ile a phegelela e le gore a hwetše toka e tšwago go motho yo a sa lokago. Ka mo go swanago, bahlanka ba Modimo lehono ba ka kgodišega gore ba tla hwetša toka e tšwago go Jehofa—gaešita le ge e tšea nako e telele go feta ka mo ba bego ba letetše ka gona. Go feta moo, ba bontšha gore ba bota dikholofetšo tša Modimo ka go phegelela thapelong—ee, ka ‘go goeletša Jehofa mosegare le bošego.’ (Luka 18:7) Ka kgonthe, ge e ba Mokriste a be a ka kgaotša go rapelela gore toka e dirwe, o be a tla bontšha gore o lahlegetšwe ke kholofelo ya gore Jehofa o tla gata mogato bakeng sa bahlanka ba gagwe.

17. Re na le mabaka afe a go phegelela thapelong le go dula re e-na le tumelo kgonthišetšong ya go tla ga letšatši la Jehofa la kahlolo?

¹⁷ Boemo bja mohlologadi yo bo re bontšha gore re na le mabaka a mantši a go phegelela thapelong. Ela hloko diphapano tše dingwe magareng ga boemo bja gagwe le bja rena. Mohlologadi o be a phegelela go ya go moahlodi gaešita le ge go se na motho yo a bego a mo kgothaletša go dira bjalo, eupša Lentšu la Modimo le re nea kgothatšo e kgolo ya gore re ‘phegelele thapelong.’ (Baroma 12:12) Mohlologadi o be a se na kgonthišetšo ya gore o tla hwetša seo a se kgopelago, eupša Jehofa o re kgonthišeditše gore toka e tla dirwa. Jehofa o boletše ka moporofeta wa gagwe gore: “Xe e sa phêthêxe  ka pelá, xona e letêlê. Xo tla di tlo tla, di ka se diêxe.” (Habakuku 2:3; Psalme 97:10) Mohlologadi yola o be a se na mothuši yo a bego a ka mo phophothela e le gore a tiiše kgopelo ya gagwe. Eupša re na le mothuši yo matla e lego Jesu, “yo a lego ka letsogong le letona la Modimo le yo gape a re phophothelago.” (Baroma 8:34; Baheberu 7:25) Ka baka leo, ge mohlologadi a ile a tšwela pele a phophotha go sa šetšwe boemo bja gagwe bjo thata, ruri re swanetše go dula re e-na le tumelo kudu kgonthišetšong ya go tla ga letšatši la Jehofa la kahlolo!

18. Thapelo e tla matlafatša tumelo ya rena bjang le go re thuša go amogela toka?

¹⁸ Seswantšho sa mohlologadi se re ruta gore go na le tswalano e kgolo magareng ga thapelo le tumelo le gore dithapelo tša rena tša go phegelela di ka šitišana le ditutuetšo tšeo di ka fokodišago tumelo ya rena. Ke therešo gore se ga se bolele gore ponagalo ya ka ntle feela ya gore motho o a rapela ke pheko ya gore motho a se ke a lahlegelwa ke tumelo. (Mateo 6:7, 8) Ge re tutueletšega go rapela ka gobane re lemoga gore re ithekgile ka botlalo ka Modimo, gona thapelo e re batametša kgaufsi le Modimo gomme e matlafatša tumelo ya rena. Le gona ka ge tumelo e nyakega gore re phologe, ga go makatše ge Jesu a ile a bona go le bohlokwa go kgothaletša barutiwa ba gagwe “gore ba rapele ka mehla ba sa langwe”! (Luka 18:1; 2 Bathesalonika 3:13) Ke therešo gore go tla ga “’tšatši le lexolo la Morêna” ga se gwa ithekga ka dithapelo tša rena—go sa šetšwe gore re a le rapelela goba go se bjalo, le tla tla. Eupša taba ya ge e ba re tla amogela toka le go phologa ntwa ya Modimo goba go se bjalo, ruri e ithekgile ka tumelo yeo re nago le yona le go phegelela ga rena thapelong.

19. Re bontšha bjang gore re dumela ka go tia gore Modimo o tla “dira gore toka e dirwe”?

¹⁹ Bjalo ka ge re gopola, Jesu o ile a botšiša gore: “Ge Morwa wa motho a fihla, na ruri o tla hwetša tumelo ye lefaseng?” Karabo ke efe potšišong ye ya gagwe e kgahlišago? Re thaba gakaakang gore bahlanka ba dimilione ba Jehofa lefaseng ka bophara lehono ba bontšha ka dithapelo tša bona, go se fele pelo ga bona le kgotlelelo gore ba na le tumelo yeo! Ka baka leo, potšišo ya Jesu e ka arabja ka gore ee. Ee, go sa šetšwe go hloka toka mo lefase la Sathane le re tlišetšago gona mo nakong ye, re dumela ka go tia gore Modimo o tla “dira gore toka e dirwe bakeng sa bakgethwa ba gagwe.”

[Mongwalo wa ka tlase]

Na o a Gopola?

• Ke’ng seo se dirilego gore Bakriste ba bangwe ba lahlegelwe ke tumelo?

• Ke ka baka la’ng re ka ba le tumelo e tiilego ya gore letšatši la Jehofa la kahlolo le a tla?

• Re na le mabaka afe a go phegelela thapelong?

• Go phegelela thapelong go ka re thuša bjang go phema go lahlegelwa ke tumelo?

[Dipotšišo tša Thuto]

[Seswantšho go letlakala 26]

Ke’ng seo se bontšhwago ke seswantšho sa mohlologadi le moahlodi?

[Diswantšho go letlakala 29]

Ba dimilione lehono ba a dumela gore Modimo o tla “dira gore toka e dirwe”