Na Moya wa Keresemose o ka ba Gona Ngwaga ka Moka?

“Letago a le ye go Modimo magodimo-dimong, gomme lefaseng a go be le khutšo bathong bao a ba amogelago.”—Luka 2:14.

BATHO ba dimilione ba tlwaelane le mantšu a a barongwa ba Modimo a go tsebatša go belegwa ga Jesu go badiši bao ba bego ba letile mehlape ya bona bošego. Ka letšatši leo dikereke di naganago gore Jesu o belegwe ka lona, bontši bja batho bao ba ipitšago Bakriste ba dira boiteko bjo bo kgethegilego bja go kaonefatša boitshwaro bja bona. Dika tšeo di bontšhwago ka nakwana tša lethabo, khutšo le botho—tšeo morongwa a boletšego ka tšona molaetšeng wa gagwe—gantši go bolelwa ka tšona e le moya wa Keresemose.

Dika tše tšeo di rategago di kgahla le batho bao ba sa ketekego letšatši la bodumedi la maikhutšo la Keresemose. Le bona ba thabela moya wa lethabo wo go bonalago o godišwa ke go keteka letšatši le. Ge sehla sa Keresemose se nea batho sebaka sa go se ye sekolong goba mošomong, letšatši le la maikhutšo le ba nea sebaka sa go khutša, go fetša nako le malapa a bona gotee le bagwera goba go ba nea sebaka sa go thaba. Ke therešo gore batho ba bantši ba botegago ba lebelela Keresemose ka mo go kgethegilego e le nako ya go hlompha Jesu Kriste.

Ba bantši ba dumela gore maikwelo le ge e le afe ao a godišwago ka sehla se le tlhompho le ge e le efe yeo ba e tswalanyago le Keresemose ke tša nakwana. Batho ba boela kapejana mekgweng ya bona ya go se itshware gabotse. Lengwalo leo le nago le sehlogo se se rego, “Moya wa Keresemose,” leo le gatišitšwego ke Royal Bank of Canada, le boletše gore: “Bontši bja bao go thwego ke Bakriste bo swanelwa ke leina le feela ka dibeke tše sego kae ka ngwaga, ge ba bontšha moya wa go amogela ba bangwe go fihla ge letšatši la Ngwaga o Mofsa le fetile, gomme ba boela gape mekgweng ya bona ya boithati.” Ge le tšwela pele le boletše gore “se se fošagetšego” ka moya wa Keresemose ke gore batho ga ba be le ona “ngwaga ka moka.”

Go sa šetšwe gore o dumelelana le nyakišišo yeo goba go se bjalo, e tsoša dipotšišo tše bohlokwa. Na ruri batho ba ka kgona go bontšha moya wa go nea ka seatla se se bulegilego le go kwešiša ba bangwe ka mehla? Na go na le kholofelo e kwagalago e bontšhago gore tsebišo yeo e dirilwego ke morongwa bošegong bjo Jesu a belegwego ka bjona e tla phethagatšwa e le ka kgonthe? Goba, na kholofelo ya khutšo ya kgonthe ke toro feela?