Dipotšišo tše Tšwago go Babadi

Go swaiwa mo go bolelwago ka gona go Kutollo 7:3 ke eng?

Kutollo 7:1-3 e re: “Ka bona barongwa ba bane ba eme dikhutlong tše nne tša lefase ba kakatletše diphefo tše nne tša lefase, gore go se be le phefo e fokago lefaseng goba lewatleng goba sehlareng le ge e le sefe. Ka bona morongwa yo mongwe a rotoga bohlabatšatši, a e-na le leswao la Modimo yo a phelago; a goeletša ka lentšu le le hlabošago barongwa ba bane bao ba dumeletšwego go senya lefase le lewatle, a re: ‘Le se senye lefase goba lewatle goba dihlare go fihla ge re swaile bahlanka ba Modimo wa rena diphatleng.’”

Ge “diphefo tše nne” di lokollwa, mafelelo e tla ba ‘masetlapelo a magolo,’ e lego tshenyo ya bodumedi bja maaka le lefase le ka moka le kgopo. (Kutollo 7:14) “Bahlanka ba Modimo wa rena” ke bana babo Kriste ba lefaseng bao ba tloditšwego. (1 Petro 2:9, 16) Ka baka leo, boporofeta bjo bo bontšha gore go swaiwa ga bana babo Kriste go tla ba go feditšwe ge masetlapelo a magolo a thoma. Lega go le bjalo, ditemana tše dingwe tša Beibele di bontšha gore go na le go swaiwa ga pele ga batlotšwa. Ke ka baka leo ka dinako tše dingwe re bolelago ka go swaiwa ga pele le ga mafelelo. Phapano ke efe magareng ga dilo tšeo tše pedi?

Anke re eleng hloko seo se bolelwago ke lentšu “swailwe.” Dinakong tša bogologolo, leswao goba setempe e be e le sedirišwa seo se dirišetšwago go kiba pampiri. Lentšu le gape le ka šupa go setempe ka bosona. Mehleng yeo, go be go tlwaelegile go kiba setempe sengwalweng se itšego goba selong se sengwe go bontšha gore se ngwadilwe ke mang goba gore mong wa sona ke mang.—1 Dikxoši 21:8; Jobo 14:17.

Paulo o ile a swantšha moya o mokgethwa le leswao ge a be a bolela gore: “Yo a tiišetšago gore rena le lena re ba Kriste le yo a re tloditšego ke Modimo. Gape o re swaile gomme o re neile pontšho ya seo se tlago go tla, ke gore moya dipelong  tša rena.” (2 Bakorinthe 1:21, 22) Ka baka leo, Jehofa o tlotša Bakriste ba ka moya o mokgethwa go bontšha gore ke ba gagwe.

Lega go le bjalo, go na le maemo a mabedi tabeng ya go swaiwa ga batlotšwa. Go swaiwa ga pele go fapana le go swaiwa ga mafelelo (1) ka morero le (2) ka nako. Go swaiwa ga pele go šoma e le go kgetha setho se sefsa seo se tlaleletšago palong ya Bakriste bao ba tloditšwego. Go swaiwa mo go bolelwago e le ga mafelelo go kgonthišetša gore motho yo yoo a kgethilwego le go swaiwa o bonagaditše potego ya gagwe ka botlalo. Ke ka nako yeo feela, e lego nakong ya go swaiwa ga mafelelo mo go swaiwa go tla dulago go le gona ‘phatleng’ ya motlotšwa, go mo hlaola ka mo go feletšego e le yo a lekilwego le ‘mohlanka yo a botegago wa Modimo wa rena.’ Go swaiwa mo go boletšwego ka gona go Kutollo kgaolo 7 go šupa boemong bja go swaiwa mo ga mafelelo.—Kutollo 7:3.

Moapostola Paulo o ngwaletše Bakriste bao ba tloditšwego mabapi le nako ya go swaiwa ga pele gore: “Le lena le ile la holofela go yena ka morago ga ge le kwele lentšu la therešo, ditaba tše dibotse mabapi le phološo ya lena. Ka yena gape, ka morago ga ge le dumetše, le ile la swawa ka moya o mokgethwa wo o holofeditšwego.” (Baefeso 1:13, 14) Maemong a mantši, pego ya Beibele e bontšha gore Bakriste ba lekgolong la pele la nywaga ba be ba swailwe e le ka kgonthe nakwana ka morago ga ge ba kwele ditaba tše dibotse gomme ba dumetše go Kriste. (Ditiro 8:15-17; 10:44) Go swaiwa mo go bjalo go bontšhitše gore Modimo o a ba amogela. Lega go le bjalo, go be go sa bontšhe gore Modimo o ba amogela ka mo go feletšego. Ka baka la’ng?

Paulo o boletše gore Bakriste bao ba tloditšwego ba ‘swailwe bakeng sa letšatši la go lokollwa.’ (Baefeso 4:30) Se se bontšha gore go nyakega gore go fete nako e telele, gantši nywaga e mentši ka morago ga go swaiwa ga pele. Batlotšwa ba swanetše go dula ba botega go tloga ka letšatši leo ba swaiwago ka lona ka moya o mokgethwa go ba go fihla ‘ka letšatši leo ba lokollwago’ mebeleng ya bona ya nama—seo se ra gore, go fihlela ge ba e-hwa. (Baroma 8:23; Bafilipi 1:23; 2 Petro 1:10) Ka baka leo, e be e le feela mafelelong a bophelo bja Paulo mo a bego a ka bolela gore: “Ke kitimile lebelo go fihla mafelelong, ke bolokile tumelo. Go tloga mo nakong ye go ya pele ke boloketšwe mphapahlogo wa toko.” (2 Timotheo 4:6-8) Go oketša moo, Jesu o boditše phuthego ya Bakriste ba tloditšwego gore: ‘Itlhatseleng le botega gaešita le go iša lehung, gomme ke tla le nea mphapahlogo wa bophelo.’—Kutollo 2:10; 17:14.

Lentšu “mphapahlogo” le nea bohlatse bjo bo oketšegilego bjo bo bontšhago gore go swanetše go be le nako e telele e fetago magareng ga go swaiwa ga pele le ga mafelelo. Ka baka la’ng? Dinakong tša bogologolo, e be e le motlwae go nea mokitimi yo a bego a thopile sefoka mphapahlogo. E le gore a hwetše mphapahlogo, o be a swanetše go dira se se fetago go fo tsenela phadišano. O be a swanetše go kitima go fihla bofelong. Ka mo go swanago, ke feela ge Bakriste bao ba tloditšwego ba kgotlelela tseleng ya bona go fihla bofelong—go tloga ge ba swaiwa la pele go fihla mafelelong—mo ba tlago go newa mphapahlogo wa bophelo bja go se hwe legodimong.—Mateo 10:22; Jakobo 1:12.

Mašaledi a Bakriste bao ba tloditšwego ao a swailwego la pele a tla hwetša neng leswao la ona la mafelelo? Mašaledi le ge e le afe ao a tla bago a phela lefaseng a tla swaiwa “diphatleng” pele ga ge masetlapelo a magolo a ka thoma. Ge diphefo tše nne tša masetlapelo di lokollwa, Baisiraele ka moka ba moya ba tla ba ba swailwe la mafelelo, gaešita le ge ba mmalwa ba tla be ba sa dutše ba phela nameng gomme ba sa dutše ba swanetše go fetša bophelo bja bjona bja lefaseng.