Kamoo o ka Atlegago ka Gona
Kamoo o ka Atlegago ka Gona
BJALO ka ge batswadi ba hlokomela bana ba bona gomme ba nyaka gore ba atlege, Tatago rena wa legodimong le yena o a re hlokomela gomme o nyaka gore re atlege. E le go bontšha tlhokomelo ya gagwe e lerato, o re nea tsebišo e ntši mabapi le go atlega le go se atlege. Ge e le gabotse, ge Beibele e bolela ka motho yo a elago hloko seo Modimo a se bolelago, e hlalosa ka mo go kwagalago gore: “Tšohle tše a di diraxo di a lêtlêxa.”—Psalme 1:3.
Ka gona, ge e ba go le bjalo, ke ka baka la’ng bophelo bja katlego, bjo bo thabišago le bjo bo kgotsofatšago bo sa fihlelelwe ke batho ba bantši? Go hlahlobišiša psalme ye go tla re nea karabo gomme go tla re bontšha kamoo le rena re ka atlegago ka gona.
‘Tayo ya Bakgopo’
Mopsalme o lemoša ka kotsi ya go sepela ka ‘tayo ya bakgopo.’ (Psalme 1:1) Motho yo “kgopo” yo mogolo ke Sathane Diabolo. (Mateo 6:13) Mangwalo a re botša gore ke “mmuši wa lefase le” le gore “lefase ka moka le rapaletše matleng a yo kgopo.” (Johane 16:11; 1 Johane 5:19) Ka gona, ga go makatše ge bontši bja dikeletšo tšeo di newago lefaseng di bonagatša dikgopolo tša yena yoo yo kgopo.
Ke keletšo ya mohuta mang yeo bakgopo ba e neago? Ka kakaretšo, ba kgopo ba nyaditše Modimo. (Psalme 10:13) Dikeletšo tša bona, tšeo di hlokomologago goba go nyatša Modimo, di hwetšwa gohle. Batho ba lehono ba godiša “kganyogo ya nama le kganyogo ya mahlo le pontšho ya bompogeng ya dilo tša motho tša boiphedišo.” (1 Johane 2:16) Mekero ya ditaba e diriša filosofi ya yona ya, “hwetša dilo tšohle tšeo di hwetšagalago bophelong,” go re kgothaletša go rata dilo tše di bonagalago. Go dikologa lefase, dikhampani di diriša dimilione tše dimilione tše 3,3 tša diranta ka ngwaga dipapatšong bakeng sa go kgodiša batho gore ba reke ditšweletšwa tša tšona—go sa šetšwe gore bareki ba a di nyaka goba ga ba di nyake. Le gona, phatlalatšo ye ya maaka ga se ya fetoša feela mekgwa ya batho ya go reka. E kgopamišitše le pono ya bona mabapi le katlego.
Ka baka leo, le ge batho ba bantši ba e-na le dilo tšeo pele ba bego ba lora ka go ba le tšona, ba sa dutše ba e-na le kganyogo e sa kgotsofatšegego ya go ba le dilo tše dingwe tše dintši tše di bonagalago. Ba na le kgopolo ya gore motho a ka se ke a thaba goba a atlega ntle le gore a be le dilo tše. Kgopolo ye ke ya maaka gomme ‘ga e tšwe go Tate, eupša e tšwa lefaseng.’—1 Johane 2:16.
Mmopi wa rena o tseba seo se tla re atlegišago e le ka kgonthe. Dikeletšo tša gagwe di fapana le ‘dikeletšo tša bakgopo.’ Ka gona, go leka go hwetša kamogelo ya Modimo mola motho a dutše a sepela tseleng ya lefase ya katlego go swana le go leka go sepela ditseleng tše pedi ka nako e tee. Ga go kgonege. Ga go makatše ge Beibele e lemoša ka gore: “Lesang go bopega ka sebopego sa tshepedišo ye ya dilo.”—Baroma 12:2.
O se ke wa Dumelela Lefase le go Bopa
Lefase leo le laolwago ke Sathane le leka go bonala eka le tshwenyegile ka katlego ya rena. Lega go le bjalo, re swanetše go ba šedi. Gopola gore Sathane ka boithati o forile mosadi wa pele Efa, e le gore a kgotsofatše dikganyogo tša gagwe. Ka morago o ile a mo diriša go gogela Adama sebeng. Le lehono, Sathane o diriša batho gore ba re nee dikeletšo tša gagwe tše kgopo.
Ka mohlala, David yo go boletšwego ka yena sehlogong se se fetilego, o be a swanetše go šoma diiri tše di oketšegilego le go ba le maeto a mantši a tša kgwebo. David o itše: “Ke be ke sepela mesong ka Mošupologo gomme ke boa ka Labone mantšiboa.” Ka ge ba kwešiša gore boikgafo bjo bo bjalo bo a nyakega bakeng sa go atlega dilong tša lefase, bagwera ba paale, ditho tša lapa gaešita le bašomi-gotee le yena ba ile ba kgothaletša David gore: “Šomela lapa la gago.” Ba ile ba nea mabaka ka gore o swanetše go šoma ka tsela yeo nywaga e mmalwa feela go fihlela ge a hweditše maemo mošomong. David o hlalositše gore: “Ba ile ba fahlela ka gore se se tla thuša lapa la-ka ka ge ke tla tliša tšhelete e ntši ka gae—ke tla ba yo a atlegilego kudu. Le ge ke be ke sa bone lapa la-ka, bagwera ba-ka ba ile ba nkgonthišetša gore ke be ke nea lapa la-ka tšohle.” Go swana le David, batho ba bantši ba šoma ka thata bakeng sa go nea malapa a bona dilo tšohle tšeo ba naganago gore a a di hloka. Eupša na go latela dikeletšo tša mohuta wo go lebiša katlegong? Ke’ng seo ruri lapa le se nyakago?
David o ile a lemoga ge a be a sepetše ka mabaka a tša kgwebo seo lapa la gagwe le tlogago le se nyaka. David o itše: “Ke be ke boledišana le morwedi wa-ka Angelica ka mogala, yo a itšego: ‘Tate, ke ka baka la’ng o sa nyake go dula le rena ka gae?’ Go be go nyamiša.” Mantšu a morwedi wa gagwe a ile a tiiša kganyogo ya gagwe ya go rola modiro. David o ile a dira phetho ya go nea lapa la gagwe seo le bego le se nyaka—yena.
Go Diriša Keletšo ya Modimo go Tliša Katlego
O ka ganetša bjang dikgopolo tše di fošagetšego tšeo di phatlaletšego lefaseng le? Mopsalme o re botša gore motho yo a atlegilego le yo a thabilego ke yoo a ‘thabelago molao wa Jehofa, gomme molao woo a o akanya mosegare le bošego.’—Psalme 1:2.
Ge Modimo a kgetha Jošua go ba moetapele wa setšhaba sa Isiraele, o ile a mmotša gore: ‘O le akanye [Lentšu la Modimo] mosegare le bošego.’ Ke therešo gore go bala le go naganišiša ka Lentšu la Modimo go be go le bohlokwa, eupša gape Jošua o be a swanetše go ‘hlokomela tšohle tšeo di ilego tša ngwalwa mo go lona gomme a di dire.’ Go ba gona, go fo bala Beibele go ka se go dire ka mohlolo gore o be motho yo a atlegilego. O swanetše go diriša seo o se balago. Jošua o ile a botšwa gore: “Ké mo O tl’o xo ba le mahlatse ditseleng tša xaxo, ké mo O tl’o xo lêtlêxêlwa.”—Jošua 1:8.
Nagana ka ngwana yo a myemyelago yo a dutšego diropeng tša motswadi wa gagwe yo lerato ge ba bala kanegelo yeo ba e ratago kudu. Go sa šetšwe gore ba e badile ga kae pele, ba thabela dinako tše swanago le tše. Ka mo go swanago, motho yo a ratago Modimo o hwetša go bala Beibele ka mehla e le selo seo se thabišago—nako e botse yeo a e fetšago le Tatagwe wa legodimong. Ka go diriša keletšo le tlhahlo tša Jehofa, motho yoo o ba bjalo ka “sehlare-se-šingwa-nokeng ya meetse, sa xo enywa dienywa lebaka la xôna, sa xo se pône matlakala; ’me tšohle tše a di diraxo di a lêtlêxa.”—Psalme 1:3.
Sehlare se se hlaloswago ke mopsalme ga se gwa fo itiragalela gore se mele fao. Se bjetšwe ka kelohloko mothopong wa meetse gomme se hlokomelwa ke molemi. Ka tsela e swanago, Tatago rena wa legodimong o lokiša le go phošolla menagano ya rena ka go diriša keletšo e hwetšwago ka Mangwalong. Ka baka leo, re a atlega gomme ra tšweletša dika tšeo di kgahlago Modimo.
Lega go le bjalo, “bakxôpô bôná xa ba byalo.” Ke therešo gore ka lebakanyana ba ka bonala eka ba a atlega, eupša mafelelong ba ba le ditla-morago tše mpe. Ba ka se “ême kahlolong.” Go e na le moo, “tsela ya bakxôpô yôna ké ya xo lôba.”—Psalme 1:4-6.
Ka gona, o se ke wa dumelela lefase le go beela dipakane gotee le go go beela ditekanyetšo. Le ge o ka ba o e-na le talente le bokgoni tšeo di ka go atlegišago lefaseng le, hlokomela kamoo o dirišago ditalente tša gago goba kamoo o dumelelago lefase le di diriša ka gona. O ka se holege, go phegelela dilo tše di bonagalago go ka dira gore motho a “pône.” Ka lehlakoreng le lengwe, go ba le tswalano e botse le Modimo go tliša katlego ya kgonthe le lethabo.
Kamoo o ka Atlegago ka Gona
Ke ka baka la’ng dilo tšohle tšeo motho a di dirago di atlega ge a latela dikeletšo tša Modimo? Mopsalme o be a sa bolele ka go atlega lefaseng le. Go atlega ga motho yo a boifago Modimo go tswalanywa le go dira ga gagwe thato ya Modimo—le gona thato ya Modimo e atlega ka mehla. A re boneng gore ke bjang go diriša melao ya Beibele ya motheo go ka dirago gore o atlege.
Lapa: Mangwalo a eletša banna go “rata basadi ba bona bjalo ka mebele ya bona,” gomme mosadi wa Mokriste o laelwa go “ba le tlhompho e tseneletšego go monna wa gagwe.” (Baefeso 5:28, 33) Batswadi ba kgothaletšwa gore ba fetše nako le bana ba bona, go thaba le bona le go ba ruta dilo tša bohlokwa bophelong. (Doiteronomio 6:6, 7; Mmoledi 3:4) Le gona Lentšu la Modimo le eletša batswadi ka gore: “Le se ke la befediša bana ba lena.” Ge keletšo ye e dirišwa, go bonolo gore bana ba ‘kwe batswadi ba bona,’ le gore ba ‘godiše tatago bona le mmago bona.’ (Baefeso 6:1-4) Go latela keletšo ye ya Modimo go tla dira gore bophelo bja lapa e be bjo bo atlegilego.
Bagwera: Batho ba bantši ba nyaka bagwera. Re na le menagano le maikwelo tšeo di re tutueletšago go rata le go ratwa. Jesu o boditše balatedi ba gagwe gore ba “ratane.” (Johane 13:34, 35) Gare ga bona, re hwetša bagwera bao re ka ba ratago le go ba bota—gaešita le go ba botša dikgopolo le maikwelo a rena a ka gare-gare. (Diema 18:24) Go feta tšohle, ka go diriša melao ya Beibele ya motheo re ka ‘batamela Modimo,’ gomme ka go swana le Aborahama, le rena re ka bitšwa ‘bagwera ba Jehofa.’—Jakobo 2:23; 4:8.
Morero Bophelong: Go e na le gore ba be le bophelo bjo bo se nago morero, bao ba atlegilego e le ka kgonthe ba lemoga bohlokwa le morero wa bophelo. Bophelo bja bona ga se bja ithekga ka maemo ao a sego a tsepama a tshepedišo ye ya dilo. Dipakane tša bona di lebiša kgotsofalong ya kgonthe le ya sa ruri, ka ge di theilwe morerong wa kgonthe wa bophelo. Ke’ng seo se dirago gore bophelo bja motho bo be le morero? “Boifa Modimo, O lôtê taêlô tša xaxwe. Ké se se swanetšexo batho bohle.”—Mmoledi 12:13.
Kholofelo: Go dira Modimo Mogwera wa rena go re nea kholofelo ka bokamoso. Moapostola Paulo o kgothaleditše Bakriste gore “ba se holofele mahumo a sa kgonthišegego, eupša ba holofele Modimo.” Ka tsela ye, ba tla be ‘ba ipolokela motheo o mobotse wa bokamoso e le lehumo la bona, e le gore ba swarelele ka go tia bophelong bja kgonthe.’ (1 Timotheo 6:17-19) Bophelo bjo bja kgonthe bo tla tla kgaufsinyane ge Mmušo wa Modimo wa legodimong o tsošološa Paradeise lefaseng le.—Luka 23:43.
Le ge o diriša melao ya motheo ya Beibele, o tla ba le mathata, eupša o tla kgona go efoga bohloko le manyami a magolo ao ba kgopo ba ipakelago ona. David yo go boletšwego ka yena pejana le ba dimilione ba swanago le yena ba ithutile bohlokwa bja go diriša melao ya motheo ya Beibele maphelong a bona. Ka morago ga go hwetša mošomo wo o bego o kgona go mo nea nako ya go ba le lapa la gagwe, David o itše: “Ke thabela tswalano ya-ka le mosadi wa-ka le bana gotee le tokelo ya go hlankela Jehofa Modimo ke le mogolo ka phuthegong.” Ga go makatše ge mopsalme a boletše ka motho yo a latelago keletšo ya Modimo gore: “Tšohle tše a di diraxo di a lêtlêxa”!
[Tšhate go letlakala 6]
MEGATO E MEHLANO YEO E LEBIŠAGO KATLEGONG
1 Gana go bopša ke ditekanyetšo tša lefase le.
2 Bala le go naganišiša ka Lentšu la Modimo ka mehla.
3 Diriša keletšo ya Beibele bophelong bja gago.
4 Gwerana le Modimo.
5 Boifa Modimo wa therešo gomme o boloke ditaelo tša gagwe.
[Pictures on page 7]
Na o gata megato e lebišago katlegong?