Katlego—O Nagana Gore e Tlišwa ke Eng?

A LEBELELWA ke ba bangwe e le moananyi yo a atlegilego kudu mmarakeng wa go ananya wa Wall Street, Jesse Livermore o be a tsebja ka go dira diphetho tše bohlale ditabeng tša kgwebo. Ka gona, o ile a kgona go kgoboketša lehumo le lentši kudu. O be a apara disutu tše dibotse tšeo di rokilwego ka seatla, a dula ka ntlong e kgolo e nago le diphapoši tše 29 le gona a hirile motho yo a bego a otlela koloi ya gagwe ya mmala o moso ya Rolls-Royce.

David * le yena o be a ikemišeditše go atlega. Ka ge e be e le motlatša-mopresidente le molaodi-pharephare femeng e kgolo ya go dira diswantšho, o be a le boemong bjo bobotse bja go ka ba mopresidente wa lefapha le itšego la khamphani yeo. O be a goketšwa ke lehumo le maemo. Lega go le bjalo, David o ile a dira phetho ya go rola modiro. David o itše: “Ke a tseba gore nka se hlwe ke e ba le maemo a phagamego a bolaodi gape mošomong.” Na o nagana gore David o dirile phetho e fošagetšego?

Ba bantši ba dumela gore go atlega go akaretša go ba le lehumo, botumo goba maemo. Lega go le bjalo, bao ba nago le dilo tše di bonagalago ba ka ikwa ba se ba kgotsofala e bile ba se na morero bophelong. Go molaleng gore maemo a Mna. Livermore a be a le bjalo. Go sa šetšwe lehumo leo a bego a e-na le lona, o phetše bophelo bjo bo tletšego mahloko, masetlapelo le manyami. O ile a gateletšega, a ba le manyalo ao a sa atlegego gotee le go se be le tswalano e botse le barwa ba gagwe. Mafelelong ka morago ga go  lahlegelwa ke bontši bja lehumo la gagwe, ka letšatši le lengwe Mna. Livermore o ile a tsena ka pareng hoteleng ya maemo a godimo gomme a thoma go lla ka ditahlegelo tša gagwe. O ile a reka seno, a ntšha pukwana ya gagwe ya go ngwalela dintlha yeo e tlemilwego ka letlalo gomme a ngwala lengwalwana la go laela mosadi wa gagwe. Ge a feditše seno sa gagwe, o ile a tsena ka phapošing ya go bea merwalo gomme ka manyami a ipolaya.

Gaešita le ge go ka dumelwa gore mabaka a gagwe a go ipolaya ke a mantši, phihlelo ye e hlatsela go rereša ga mantšu a Beibele a rego: “Bao ba ikemišeditšego go huma . . . ba itlhabile gohle ka mahloko a mantši.”—1 Timotheo 6:9, 10.

Na e ka ba e le gore bao ba naganago gore katlego e tlišwa ke lehumo, maemo goba botumo ba diriša tekanyetšo e fošagetšego? Na o nagana gore o atlegile? Ke ka baka la’ng o nagana bjalo? Ke ditekanyetšo dife tšeo o di dirišago go dira phetho ye? Ke’ng seo se tutuetšago pono ya gago ka katlego? Sehlogo se se latelago se ahla-ahla keletšo e ka botwago e thušitšego ba dimilione gore ba fihlelele katlego. A re boneng kamoo le wena o ka atlegago ka gona.

[Mongwalo wa ka tlase]