Monna yo a Bego a Rata Bophelo le Batho

DANIEL SYDLIK, setho sa nako e telele sa Sehlopha se Bušago sa Dihlatse tša Jehofa, o feditše bophelo bja gagwe bja lefaseng ka Labobedi, April 18, 2006. O be a e-na le nywaga e 87 gomme a hlanketše e le setho sa lapa la Bethele kua Brooklyn, New York, ka nywaga e nyakilego go ba e 60.

Ngwanabo rena Dan, ka ge bagwera ba gagwe ba paale ba be ba mmitša bjalo ka lerato, o tlile Bethele ka 1946. Pele ga moo, o hlanketše e le mmulamadibogo yo a kgethegilego kua California gomme a fetša nako e itšego a golegilwe nakong ya Ntwa ya II ya Lefase ka baka la boema-gare bja gagwe bja Bokriste. Dilo tšeo di mo diragaletšego nakong yeo di hlalositšwe gabotse ka phihlelong ya gagwe yeo e tšweletšego ka go Morokami wa June 1, 1985, sehlogong se se rego, “Modimo, Bogwera bja Gago bo Bohlokwa Gakaakang!”

Ngwanabo rena Sydlik o be a tsebja e le motho yo a ikokobeditšego le yo a batamelegago. Ge a be a swere temana ya letšatši legaeng la Bethele, go ba ga gagwe le kgopolo e nepagetšego le go rata bophelo gantši di be di kwagala mantšung a gagwe a matseno a rego: “Ke mo gobotse go phela e le gore re hlankele Modimo wa therešo yo a phelago.” Bjalo ka seboledi sa phatlalatša, o be a kgothaletša ba bangwe go ba le pono ye, a nea dipolelo tša dihlogo tše bjalo ka tše di rego “Go Thabile Batho Bao Modimo wa Bona e lego Jehofa,” “Go Bonagatša Lethabo la Jehofa,” “Bolokang Mollo wa Moya wa Modimo o Tuka ka Mehla” le “Se se Phadišago se sa E-tla.”

Ka 1970, Ngwanabo rena Sydlik o ile a nyala Marina Hodson yo a tšwago Engelane, yo a mo hlalositšego e le “thušo e rometšwego ke Modimo.” Ba hlanketše Jehofa gotee ka nywaga e fetago e 35.

Nywageng ya ge a le Bethele, Ngwanabo rena Sydlik o hlanketše mafapheng a fapa-fapanego, go akaretša le lefapha la kgatišo le Lefapha la Bongwadi. Le gona o ile a šoma seteišeneng sa seyalemoya sa WBBR. Ke moka, ka November 1974, o ile a kgethwa go hlankela go Sehlopha se Bušago gomme mafelelong a šoma komiting ya Sehlopha sa Bašomi le komiting ya Bongwadi.

Ka nywaga e fetago e 30, mošomo wa Ngwanabo rena Sydlik Komiting ya Sehlopha sa Bašomi o tutueditšwe ke tsela yeo ka yona a ratago batho ka mo go tseneletšego. O be a kgothatša ba bantši ka lentšu la gagwe le matla, ka mehla a lebiša tlhokomelo tokelong ya bohlokwa yeo re nago le yona ya go hlankela Jehofa. Ka mehla o be a gatelela gore lethabo la kgonthe ga se la ithekga ka dilo tšeo re di bonago eupša le ithekgile ka tswalano ya rena le Jehofa le tsela yeo re lebelelago bophelo ka yona.

Gaešita le ge lapa la Bethele le hlologela Ngwanabo rena Sydlik kudu, mohlala wa gagwe bjalo ka motho yo a bego a tloga a rata bophelo le batho o tla tšwela pele o e-na le tutuetšo e botse. Re kgodišegile gore o akareditšwe go bao go boletšwego ka bona go Kutollo 14:13 gore: “Go thaba bahu ba hwago ba le boteeng le Morena go tloga mo nakong ye go ya pele. Moya o re, ee, a ba khutše boitapišong bja bona, gobane dilo tše ba di dirilego di sepela le bona.”