Na o ka Katologa Leratong?

KETANE yeo e swerego tshetledi ya sekepe e swanetše go lwantšha diphefo tše matla e le gore sekepe se se ke sa šutha. Lega go le bjalo, se se kgonega feela ge makopanyi a lego ketaneng a tiile e bile a le matla. Go sego bjalo, ketane e tla kgaoga.

Go ka bolelwa selo se se swanago le ka phuthego ya Bokriste. E le gore phuthego e tie le go phela gabotse, ditho tša yona di swanetše go ba le botee. Ke’ng seo se dirago gore e be batee? Ke lerato, e lego tutuetšo e matla kudu ya botee. Ga go makatše ge Jesu Kriste a ile a botša barutiwa ba gagwe gore: “Ke le nea taelo e mpsha ya gore le ratane; go etša ge ke le ratile, gore le lena le ratane. Bohle ba tla tseba ka se gore le barutiwa ba-ka, ge e ba le ratana.” Ka kgonthe, Bakriste ba therešo ba ratana ka tsela yeo e fetago bogwera feela le go hlomphana. Ba hlagolela lerato la boikgafo.—Johane 13:34, 35.

Go Tšeela Badumedi-gotee le Rena Godimo

Diphuthego tše dintši di bopša ke batho ba nywaga, merafo, ditšhaba, ditšo, maleme le dimelo tše di sa swanego. Motho yo mongwe le yo mongwe o na le dilo tše a di ratago le tše a sa di ratego, dilo tše a di holofelago le tše a di boifago le gona gantši yo mongwe le yo mongwe o na le morwalo wo a o rwelego—e ka ba go babja goba go se be le tšhelete. Go fapana mo go ka tliša tlhohlo boteeng bja Bokriste. Ka gona, re ka thušwa ke’ng gore re katologe leratong le go dula re le batee go sa šetšwe mathata? Go tšeela godimo e le ka kgonthe motho yo mongwe le yo mongwe ka phuthegong go tla re thuša go godiša tsela yeo re ratanago ka yona.

Lega go le bjalo, go tšeela motho godimo go bolela’ng? Go ya ka The New Shorter Oxford English Dictionary, lentšu “tšeela godimo” le bolela “go lemoga; go thabela; go bona selo e le sa mohola; go tumiša.” Ge e ba re tšeela badumedi-gotee le rena godimo, re lemoga dinyakwa tša bona, re a ba thabela, re lemoga gore ba na le mohola gomme re thabela gore ba borapeding botee le rena. Ka baka leo, re thoma go ba rata kudu. Go ahla-ahla go se nene seo moapostola Paulo a se ngwaletšego Bakriste ba lekgolong la pele la nywaga kua Korinthe go tla re thuša go bona kamoo re ka bontšhago lerato la Bokriste ka botlalo kudu.

Bakorinthe ba “Pitlagane”

Paulo o ngwadile lengwalo la gagwe la pele le le yago go Bakorinthe ka 55 C.E. gomme a ngwala lengwalo la gagwe la bobedi ka morago ga ngwaga a ngwadile lela la pele. Mantšu a gagwe a bontšha gore ba bangwe phuthegong ya Korinthe ba be ba sa tšeele badumedi-gotee le bona godimo. Paulo o hlalositše boemo ka mantšu a latelago a rego: “Bakorinthe, molomo wa rena o le ahlametše, pelo ya rena e katologile. Ga se la pitlagana go rena, eupša le pitlagane maikwelong a lena a borutho a bonolo.” (2 Bakorinthe 6:11, 12) Paulo o be a bolela’ng ge a be a ba hlalosa e le bao ba ‘pitlaganego’?

O be a bolela gore e be e le dingame e bile ba timana dipelong tša bona. Seithuti se sengwe sa Beibele se bolela gore tsela yeo Bakorinthe ba bego ba rata Paulo ka yona e be e “thibetšwe ke maemo a thata ka baka la go belaelana mo go se nago motheo . . . le gore motho a se swarwe ka tsela yeo a ikwago eka e a mo swanela.”

 Ela hloko keletšo yeo Paulo a e neilego e rego: “E le pušeletšo—ke bolela bjalo ka ge go bolelwa le bana—le lena katologang.” (2 Bakorinthe 6:13) Paulo o kgothaleditše Bakorinthe go katološa lerato la bona go badumedi-gotee le bona. Se se be se bolela gore ba swanetše go tutuetšwa ke kgopolo e nepagetšego le pelo e neago kudu, e sego ke go se bote motho le sekgopi se senyenyane.

Go Katologa Leratong Lehono

Ke mo go homotšago go bona kamoo barapedi ba therešo ba Modimo ba ikgafago ka gona go katološa tsela yeo ba ratanago ka yona. Ke therešo gore go katologa go nyaka boiteko. Ga se feela go tseba seo o swanetšego go se dira. Go katologa go nyaka gore re itshware ka tsela e fapanego le ya batho bao ba sa phelego ka go dumelelana le ditekanyetšo tša Beibele. Gantši batho ba bjalo ga ba na taba le batho ba bangwe. Ba ka dira dilo ka go se be le taba, ba se be le tlhompho gomme ya ba ba go kodutla. Ka gona, anke re se keng ra dumelela gore re tutuetšwe ke dikgopolo tše. Ruri e be e tla ba mo go nyamišago ge nkabe lerato la rena le be le ka fokotšwa ke maikwelo a go se botane, go swana le Bakorinthe! Se se ka direga ge e ba re akgofela go bona diphošo tša ngwanabo rena wa Mokriste eupša re sa akgofele go lemoga dika tša gagwe tše dibotse. Le gona seo se ka re diragalela ge e ba re sa nyake go rata motho yo mongwe ka gobane e le wa setšo se sengwe.

Ka mo go fapanego, mohlanka wa Modimo yo a katologago leratong o tšeela badumedi-gotee le yena godimo e le ka kgonthe. O ba lebelela e le ba bohlokwa kudu, o hlompha seriti sa bona gomme o lemoga dinyakwa tša bona. Gaešita le ge go e-na le lebaka le le kwagalago la go belaela, o ikemišeditše go lebalela gomme o phema go boloka sekgopi. Go e na le moo, o bota maikemišetšo  a badumedi-gotee le yena. Go ba le pelo e bulegilego go mo thuša go bontšha mohuta wa lerato leo Jesu a bego a naganne ka lona ge a be a bolela e sa le pele gore: “Bohle ba tla tseba ka se gore le barutiwa ba-ka, ge e ba le ratana.”—Johane 13:35.

Katologa Gomme o Itirele Bagwera ba Bafsa

Lerato le le tšwago pelong le tla re thuša go katologa kudu gomme la dira gore re nyake go tlwaelana le bao ba lego ka phuthegong bao gantši re sa ba tlwaelago gakaalo. Batho ba e ka ba bomang? Bana babo rena ba bangwe ba Bakriste le dikgaetšedi ba na le dihlong goba ka mabaka a itšego ba na le bagwera ba sego kae. Mathomong re ka nagana gore ga re kgahlegele dilo tše di swanago, ntle le gore re barapedi-gotee. Eupša na ga se therešo gore batho bao e ilego ya ba bagwera ba kgaufsi kudu ka Beibeleng e be e le batho bao gantši go bego go bonala ba sa kgahlegele dilo tše di swanago?

Ka mohlala, Ruthe le Naomi e be e se dithaka, ba be ba e-tšwa ditšhabeng tše di sa swanego e bile ba sa bolele leleme le le swanago. Gaešita le ge go le bjalo, segwera sa bona ga se sa ka sa kgongwa ke go se swane mo go bjalo. Jonathane o godišitšwe e le morwa wa kgoši gomme Dafida e be e le modiši. Ba be ba fetana kgole ka nywaga, lega go le bjalo ba gare ga batho bao e ilego ya ba bagwera ba paale bao go bolelwago ka bona ka Mangwalong a Makgethwa. Go batho ba ka moka, segwera sa bona e be e le mothopo wa lethabo le wa thekgo ya moya.—Ruthe 1:16; 4:15; 1 Samuele 18:3; 2 Samuele 1:26.

Gaešita le lehono, bogwera bja kgaufsi bo gola magareng ga Bakriste ba therešo bao ba tšwago merafong e fapa-fapanego goba bao maemo a bona bophelong a tlogago a sa swane. Ka mohlala, Regina ke mma yo a se nago molekane yo a nago le bana ba babedi bao ba lego mahlalagading. * O dula a swaregile gomme o na le nako e nyenyane ya go kopana le bagwera. Harald le Ute ke banyalani bao ba rotšego modiro bao ba se nago bana. Ge a lebeletšwe feela, malapa a a bonagala a dira dilo ka tsela e sa swanego e le ruri. Eupša Harald le Ute ba dirišitše keletšo ya Beibele ya gore ba katologe. Ba ile ba katologa e le gore ba ka akaretša Regina le bana ba gagwe medirong e mentši, go fetša nako ba le gotee bodireding bja phatlalatša le go thabela boitapološo bjo itšego.

Na re ka katologa kutšwanyana gore re tsebe batho ba bangwe go feta bagwera bao re tlwaelanego le bona ga bjale? Ke ka baka la’ng o sa tsome dibaka tša go tlwaelana le badumedi-gotee ba ditšhaba tše dingwe, ditšo goba bao e sego dithaka tša gago?

Go Arabela Dinyakweng tša ba Bangwe

Pelo e neago kudu e tla re tutueletša go ela hloko dinyakwa tša ba bangwe. Dinyakwa tša mohuta mang? Ela hloko ditho tša phuthego ya Bokriste. Bafsa ba nyaka tlhahlo, ba bagolo ba nyaka kgothatšo, badiredi ba nako e tletšego ba nyaka theto le thekgo gomme badumedi-gotee bao ba nyamilego ba nyaka motho yo ba ka mo ntšhetšago sa mafahleng. Motho yo mongwe le yo mongwe o na le selo seo a se nyakago. Re nyaka go arabela dinyakweng tše ka mo re ka kgonago ka gona.

Go katologa go bolela gape gore re tla bontšha go kwešiša bao ba nago le dinyakwa tše di kgethegilego. Na o tseba motho yo a phelago ka bolwetši goba yo a lebeletšanago le teko e itšego bophelong? Go katologa leratong le go hlagolela pelo e neago kudu go tla go thuša go kwešiša le go thekga bao ba nago le dinyakwa tše itšego.

Ka ge diporofeto tša Beibele mabapi le nako e tlago di dutše di phethagala, ditlemo tše matla tša botee ka gare ga phuthego e tla ba tša bohlokwa kudu go feta dilo tše re nago le tšona, bokgoni goba dilo tše re di fihleletšego. (1 Petro 4:7, 8) Yo mongwe le yo mongwe wa rena a ka tsenya letsogo tabeng ya go matlafatša ditlemo tša botee diphuthegong tšeo re kopanelago go tšona le ka go katologa tseleng yeo re ratago badumedi-gotee le rena ka yona. Re ka kgonthišega gore Jehofa o tla re šegofatša ka botlalo ge re dira dilo ka go dumelelana le mantšu a Morwa wa gagwe, Jesu Kriste, yo a itšego: “Ye ke taelo ya-ka, gore le ratane go etša ge ke le ratile.”—Johane 15:12.

[Mongwalo wa ka tlase]

[Ntlhakgolo go letlakala 10]

Go tšeela bana babo rena le dikgaetšedi godimo go bolela gore re ba lebelela e le ba bohlokwa kudu, re hlompha seriti sa bona gomme re lemoga dinyakwa tša bona