O ka Atlega Gare ga Mathata

DINAKONG tše tše di hlobaetšago, ba bantši ba lebeletšana le mathata ao a swanago le ledimo. Lega go le bjalo, Bakriste bona ba thušwa ke lerato la go rata Modimo le go botegela ga bona melao ya gagwe ya motheo gore ba lebeletšane le ona ka mo go atlegilego. Bjang? Karabo e ka hwetšwa seswantšhong seo se boletšwego ke Jesu Kriste. O swantšhitše balatedi ba gagwe ba kwago le “monna yo bohlale, yo a agilego ngwako wa gagwe godimo ga lefsika.” Jesu o itše: “Pula ya tšhologa le meetse-fula a tla le diphefo tša tšutla tša wela ntlo yeo, eupša ya se buragane, gobane e be e theilwe godimo ga lefsika.”—Mateo 7:24, 25.

Hlokomela gore le ge monna wa seswantšhong a le bohlale, o sa dutše a lebeletšana le mathata—ao a swantšhetšwago ke pula e kgolo, mafula le diphefo tše senyago. Ka gona Jesu ga se a bolela gore barutiwa ba gagwe ba be ba tla efoga mathata ka moka gomme ba thabela bophelo bja khutšo le boiketlo tše di sa kgaotšego. (Psalme 34:19; Jakobo 4:13-15) Eupša o boletše gore bahlanka ba Modimo ba botegago ba ka itokišeletša mathata le ditlalelo tše šoro gaešita le go lebeletšana ka katlego le tšona.

Jesu o thomile seswantšho ka gore: “Ka gona, yo mongwe le yo mongwe yo a kwago dipolelo tše tša-ka gomme a di dira o tla swantšhwa le monna yo a nago le temogo, yo a agilego ntlo ya gagwe godimo ga lefsika.” Ke therešo gore Jesu o be a sa bolele ka go agwa ga nywako ya kgonthe, eupša o be a bolela ka go agwa ga maphelo. Bao ba elago hloko mantšu a Kriste ba diriša temogo le go bontšha kahlolo e botse. Ba thea ditutuetšo le ditiro tša bona dithutong tša Kriste tšeo di tiilego bjalo ka lefsika ka go diriša seo ba se rutilwego. Ka mo go kgahlišago, lefsika le la seswantšhetšo ga le hwetšwe feela ka godimo. Monna wa seswantšhong o be a swanetše go epa “ka mo go išago tlase” gore a le fihlelele. (Luka 6:48) Ka mo go swanago, barutiwa ba Jesu ba tšwela pele ba šoma ka thata go hlagolela dika tše di swarelelago tšeo di ba batametšago kgaufsi le Modimo.—Mateo 5:5-7; 6:33.

Go direga’ng ge mathata ao a etšago ledimo a leka go tia ga motheo wa Bokriste wa balatedi ba Jesu? Go ikokobeletša ga bona ka go rata dithuto tša Kriste le dika tša bona tša Bokriste, go ipontšha e le mothopo wa matla dinakong tša mathata a bjalo, gomme mafelelong tša ba bjalo kudu nakong ya ledimo le le batamelago la Haramagedone. (Mateo 5:10-12; Kutollo 16:15, 16) Ee, ka go latela dithuto tša Kriste, ba bantši ba lebeletšana ka katlego le diteko tšeo di swanago le ledimo. O ka dira se se swanago.—1 Petro 2:21-23.