Dipotšišo tše Tšwago go Babadi

Ke ka kgopolo efe mokgobokanyi a ‘hweditšego monna o tee go ba sekete’ eupša ‘a hlokile mosadi go bao bohle’?—Mmoledi 7:28.

Gore re kwešiše gabotse mantšu a a buduletšwego, sa pele re swanetše go kwešiša kamoo Modimo a lebelelago basadi ka gona. Beibele e bolela ka Ruthe, e lego ngwetši ya Naomi wa mohlologadi, e le “mosadi wa sethakxa.” (Ruthe 3:11) Go ya ka Diema 31:10, mosadi yo mobotse ‘o feta dipheta.’ Ka baka leo, Kgoši Salomo wa Isiraele ya bogologolo o be a bolela’ng ge a be a re: “Mo xo batho ba sekete monna ke bone o tee; xe e le mosadi, mo xo bao bohle ka mo hlôka”?

Taba e dikologilego e bontšha gore basadi ba mehleng ya Salomo ba ka ba ba be ba se na boitshwaro. (Mmoledi 7:26) Go ka ba go bile bjalo ka baka la tutuetšo ya basadi bašele bao ba bego ba rapela Baali. Gaešita le Kgoši Salomo o ile a ineela tutuetšong ya basadi ba gagwe ba bantši ba šele. Beibele e re: “Ó be a na le basadi ba bahumaxadi ba makxolo a šupaxo, le basadi ba dirêthê ba makxolo a mararo; basadi bá ba xaxwe ba arošitše pelo ya xaxwe” gore e rapele medimo ya maaka. (1 Dikxoši 11:1-4) Ditekanyetšo tša banna tša boitshwaro le tšona di be di phuhlame—go hwetša monna o tee yo a lokilego go ba sekete e be e le selo se thata, seo se nyakilego se sa kgonege. Salomo o phetha ka gore: “Se ke se hweditšexo ké setee, sese: Batho, Modimo ó ba dirile baloki; ké bôná ba ba nyakaxo mahlale a mantši.” (Mmoledi 7:29) Ye ke phetho yeo e dirilwego ka batho—moloko wa batho ka kakaretšo, e sego monna ge a bapišwa le mosadi. Ka baka leo, mantšu ao a hwetšwago go Mmoledi 7:28 a swanetše go lebelelwa e le tlhaloso ya boitshwaro bja batho ba mehleng ya Salomo ka kakaretšo.

Lega go le bjalo, go na le selo se sengwe seo temana ye e ka bago e se bolela. Le gona e ka ba e le boporofeta, ka ge go se gwa ka gwa ba le mosadi yo a ilego a kwa Jehofa ka mo go phethagetšego. Eupša go bile le monna o tee yo bjalo—Jesu Kriste.—Baroma 5:15-17.

[Seswantšho go letlakala 31]

‘Monna o tee go ba sekete’