Go Dula o Tiile ge Ngwana a Rabela

MOSADI wa Mokriste yo re tla mmitšago Joy, o ile a leka go godiša morwa wa gagwe gore a rate Jehofa Modimo. Lega go le bjalo, ge a be a le nywageng ya gagwe ya mafelelo ya mahlalagading, morwa yo o ile a rabela gomme a tloga gae. Joy o re: “E be e le bohloko bjo bo tseneletšego bjo ke sa kago ka lebeletšana le bjona. Pelo ya-ka e be e le bohloko, ke ferekane e bile ke ikwa eka ke ekilwe. Ke be ke tletše ka dikgopolo tše di fošagetšego.”

Mohlomongwe le wena o kile wa leka go godiša bana ba gago gore ba rate Modimo le go mo hlankela—eupša ka morago yo mongwe goba ba bangwe ba mo hlanogela. O ka lebeletšana bjang le manyami a ao a kwešago bohloko? O tla thušwa ke’ng gore o dule o tiile tirelong ya gago go Jehofa?

Ge Barwa ba Jehofa ba be ba Rabela

Mogato wa pele ke go lemoga gore Jehofa o tseba gabotse gore o ikwa bjang. Go Jesaya 49:15, re bala gore: “A fa mosadi a ka lebala leseanyana l’axwe, a lesa xo šôkêlwa ngwana yo a mmelexexo?—Le xe yêna a ka lebala, Nna nka se Xo lebale.” Ee, Jehofa o kwešiša maikwelo ao bo-tate le bo-mma ba bago le ona. Ka gona, anke o nagane tsela yeo a ilego a ikwa ka yona ge barwa ba gagwe bao e lego barongwa ba be ba mo reta le go mo hlankela. Ge Jehofa “à le ledimong,” o ile a araba mopatriareka Jobo ka go gopola dinako tše di thabišago tša ge a be a e-na le lapa la gagwe la moya le le lego boteeng, a re: “O be O le kae mola kè thêa lefase? . . . Mola xò hlalala ’naledi tša mesô tšohle, xò xobêla bana bohle ba Modimo.”—Jobo 38:1, 4, 7.

Ge nako e dutše e e-ya, yo mongwe wa barwa bao e lego barongwa ba phethagetšego ba Modimo wa therešo, o ile a rabela kgahlanong le yena gomme a ba Sathane, yeo e bolelago gore “Moganetši.” Le gona Jehofa o ile a bona morwa wa gagwe wa mathomo yo e lego motho, Adama, le mosadi wa gagwe yo a phethagetšego Efa, ba thekga borabele bjo. (Genesi 3:1-6; Kutollo 12:9) Ka morago, barwa ba bangwe bao e lego barongwa “ba tlogetše bodulo bja bona bjo bo swanetšego” gomme ba rabela kgahlanong le Modimo.—Juda 6.

Mangwalo ga a re botše kamoo Jehofa a ilego a ikwa ka gona ge ba bangwe ba barwa ba gagwe ba phethagetšego ba be ba rabela. Lega go le bjalo, Beibele e bolela ka go lebanya gore: “Morêna a bôna bokxôpô bya batho bò xodile mo lefaseng, le tirô ka moka tša diakanyô tša  dipelô tša bôná è le bobe fêla ka mehla. Morêna a napa a šexama, a re motho ke mo diretše’ng lefaseng, a nyama pelo.” (Genesi 6:5, 6) Borabele bja batho ba Jehofa bao ba kgethilwego, e lego Baisiraele, le bjona bo ile bja dira gore a ‘befelwe’ gomme bja mo “šexamiša.”—Psalme 78:40, 41.

Ga go pelaelo gore Jehofa o tshwenyega ka batswadi bao ba kwešwago bohloko le go nyamišwa ke boitshwaro bja borabele bja bana ba bona. Ka Lentšung la gagwe e lego Beibele, o neile keletšo e kwagalago le kgothatšo ya go thuša batswadi ba bjalo gore ba lebeletšane le boemo bja bona. Modimo o ba kgothaletša gore ba lahlele dipelaelo tša bona go yena, ba ikokobetše le gore ba eme ba tiile malebana le Sathane Diabolo. Anke re boneng kamoo go latela keletšo ye go ka go thušago ka gona go dula o tiile ge ngwana wa gago a rabela.

Lahlela Dipelaelo tša Gago go Jehofa

Jehofa o tseba gore ga go selo seo se bakelago batswadi dipelaelo go feta go tseba gore bana ba bona ba kotsing ya go ikgobatša goba go gobatšwa ke ba bangwe. Moapostola Petro o bontšha tsela e nngwe ya go swaragana le dipelaelo tše gotee le tše dingwe. O ngwala gore: “[Lahlelang] dipelaelo tša lena ka moka go [Jehofa], gobane o a le hlokomela.” (1 Petro 5:7) Ke ka baka la’ng taletšo ye le kgonthišetšo ye e le tša bohlokwa kudu go batswadi bao ba nago le ngwana wa lerabele?

Ge ngwana wa gago e be e sa le yo monyenyane, o be o dula o phafogetše go mo šireletša dikotsing, gomme go bonagala a ile a arabela tlhahlong ya gago e lerato. Lega go le bjalo, o ka ba o ile wa se sa ba le tutuetšo gakaalo go yena ge a be a dutše a gola, eupša kganyogo ya gago e tseneletšego ya go mo šireletša kotsing ga se ya ka ya fokotšega. Ge e le gabotse, mohlomongwe e ile ya oketšega.

Ka baka leo, ge ngwana wa gago a rabela le go gobala moyeng, maikwelong goba mmeleng, o ka ikwa eka phošo ke ya gago. Joy, yo go boletšwego ka yena pejana o ile a ikwa ka tsela ye. O re: “Letšatši le letšatši, ka ge ke be ke tshwenywa ke go ikwa eka ke paletšwe, ke be ke dula ke gopola ditiragalo tša nakong e fetilego, ke nyaka go bona gore ke dirile phošo kae.” Ke ka dinako tše mo Jehofa ka mo go kgethegilego a nyakago gore o ‘lahlele dipelaelo tša gago go yena.’ Ge o dira bjalo, o tla go thuša. Mopsalme o itše: “Lahlêla Morêna morwalô wa xaxo; Yêna ó tlo Xo babalêla; a ka se kê a bá a lesa moloki xe a ka šuthišwa.”  (Psalme 55:22) Joy o ile a homotšwa ke seo. O hlalosa gore: “Ke ile ka bolela le Jehofa go tšwa pelong mabapi le tsela yeo ke ikwago ka yona. Ke ile ka mo tšhollela sa mafahleng, gomme ke ile ka lokologa kudu.”

Bjalo ka motswadi yo a sa phethagalago, o ka ba o ile wa dira diphošo ge o be o godiša ngwana wa gago. Eupša ke ka baka la’ng o swanetše go nagana ka dilo tše? Go molaleng gore Jehofa ga a nagane ka tšona, ka gobane mopsalme yo a buduletšwego o opetše ka gore: “Xe Wene Morêna Ò latiša molato, xôna xo ka êma mang?” (Psalme 130:3) Gaešita le ge o kile wa ba motswadi yo botse, le wena o ka ba o e-na le ngwana yo a ilego a rabela. Ka baka leo, tšhollela Jehofa maikwelo a gago ka thapelo gomme o tla go thuša go lebeletšana le boemo. Lega go le bjalo, e le gore wena ka noši o tšwele pele o hlankela Jehofa ka go tia le go phema go ba mohlaselwa wa Sathane, go na le selo se sengwe gape seo o swanetšego go se dira.

Ikokobetše

Petro o ngwadile gore: “Ikokobetšeng tlase ga seatla se matla sa Modimo, gore a le godiše nakong e swanetšego.” (1 Petro 5:6) Ke ka baka la’ng o swanetše go ikokobetša ge ngwana wa gago a rabela? Go oketša tabeng ya go dira gore o ikwe o e-na le molato le go kwa bohloko, go ba le ngwana wa lerabele go ka dira gore o nyame ka tekanyo e itšego. O ka ba o tshwenyegile ka gore ditiro tša ngwana wa gago di sentše botumo bja lapa la gago, kudu-kudu ge e ba a ile a swanelwa ke go kgaolwa ka phuthegong ya Bokriste. O ka ba le maikwelo a go inyatša le go ikwa o ekilwe gomme wa nyama mo o feleletšago o se sa hlwa o e-ba gona dibokeng tša Bokriste.

O swanetše go swaragana le boemo bjo ka bohlale. Diema 18:1 e re lemoša ka gore: “Mo-dula-thokô ó ile le boithatêlô; tše byôbana tšohle ó xanana natšô.” Ka go ba gona dibokeng tša Bokriste ka mehla go sa šetšwe manyami a gago, o tla kgona go hwetša mothopo o bohlokwa wa thuto le kgothatšo. Joy o dumela ka gore: “Mathomong, ke be ke ikwa ke sa nyake go kopana le motho le ge e le ofe. Eupša ke ile ka ikgopotša bohlokwa bja modiro wa-ka wa moya. Ka ntle le moo, ge nkabe ke ile ka dula gae, ke be ke tla nagana kudu ka mathata a-ka. Diboka di ile tša nthuša go lebiša tlhokomelo dilong tša moya tše di agago. Ke thaba kudu gore ga se ka itira modula-thoko gomme ka lahlegelwa ke thekgo e lerato ya bana babo rena le dikgaetšedi.”—Baheberu 10:24, 25.

Le gona, gopola gore motho yo mongwe le yo mongwe ka lapeng o swanetše go “rwala morwalo wa gagwe” wa boikarabelo bja Bokriste. (Bagalatia 6:5) Jehofa o letetše gore batswadi ba rate le go laya bana ba bona. Le gona o letetše gore bana ba kwe le go hlompha batswadi ba bona. Ge batswadi ba dira seo ba ka se kgonago go godiša bana ba bona ka “tayo le tlhahlo ya monagano ya Jehofa,” ba tla ba le leina le lebotse go Modimo. (Baefeso 6:1-4) Ge ngwana a rabela malebana le tayo e lerato ya batswadi, ke botumo bja ngwana bjo bo tlago go senyega. Diema 20:11 e re: “Le mošemanyana ó lemoxwa ka medirô y’axwe, xe e le yo botse le yo boló.” Ruri borabele bja Sathane ga se bja senya botumo bja Jehofa go bao ba tsebago ditherešo.

Ema o Tiile Kgahlanong le Diabolo

Petro o lemoša ka gore: “Dulang le hlaphogetšwe, le phakgame. Lenaba la lena, Diabolo, o sepela-sepela go swana le tau e rorago, a nyaka go metša yo mongwe.” (1 Petro 5:8) Ka go swana le tau, gantši Diabolo o hlasela ba  banyenyane le ba se nago phihlelo. Mehleng ya bogologolo, ditau di be di sepela-sepela kua Isiraele gomme e be e le tšhošetšo e kgolo go diruiwa. Ge e ba kwana e be e ka aroga mohlapeng, e be e ka hlaselega gabonolo. Nku ya tshadi e ka bea bophelo bja yona kotsing e leka go šireletša kwana ya yona. Lega go le bjalo, gaešita le nku e godilego e be e ka se lwe le tau. Ka baka leo, go be go nyakega badiši bao ba nago le sebete e le gore ba šireletše mohlape.—1 Samuele 17:34, 35.

E le gore Jehofa a šireletše dinku tša gagwe tša seswantšhetšo go “tau e rorago,” o rulagantše badiši ba moya gore ba hlokomele mohlape ka tlase ga “modiši yo mogolo” e lego Jesu Kriste. (1 Petro 5:4) Petro o kgothatša banna ba bjalo bao ba kgethilwego ka gore: “Dišang mohlape wa Modimo wo o lego tlhokomelong ya lena, e sego ka go gapeletšwa, eupša e be ka go rata; le gona e se be ka go rata leruo la go se botege, eupša e be ka go fišega.” (1 Petro 5:1, 2) Ka go dirišana gabotse le bona, badiši ba ba ka kgona go thuša mofsa go lokiša diphošo tseleng ya gagwe ya moya.

Ge badiši ba Bakriste ba nyaka go eletša ngwana wa gago wa lerabele, o ka ikwa o tutueletšega go mo šireletša tayong. Lega go le bjalo, go phegelela tsela e bjalo e be e tla ba phošo e kgolo. Petro o re: “Emeletšanang le [Diabolo]”—e sego le badiši ba moya.—1 Petro 5:9.

Ge Tayo e le Thata

Ge ngwana wa gago a sa itshole e bile e le Mokriste yo a kolobeditšwego, a ka hwetša mohuta o matla wa tayo—go kgaolwa ka phuthegong. Ka gona tsela yeo o tla dirišanago ka yona le yena e ithekgile ka nywaga yeo a nago le yona le maemo a mangwe.

Ge ngwana e le yo monyenyane gomme le dula le yena ka gae, ka tlwaelo le tla tšwela pele le hlokomela dinyakwa tša gagwe tša nama. Le gona o nyaka go tlwaetšwa boitshwarong le go newa tayo, ka gona le na le boikarabelo bja go mo nea dilo tše. (Diema 1:8-18; 6:20-22; 29:17) Le ka nyaka go mo swarela thuto ya Beibele, le dira gore a tšee karolo ka go lebanya. Le ka lebiša tlhokomelo ya gagwe mangwalong a fapa-fapanego le dikgatišong tšeo di neilwego ke “mohlanka yo a botegago le wa temogo.” (Mateo 24:45) Le gona le ka ya le yena dibokeng tša Bokriste gomme la dula le yena. Tše ka moka di ka dirwa ka kholofelo ya gore o tla tšeela godimo keletšo ya Mangwalo.

Boemo ke bjo bo fapanego ge e ba motho yo a kgaotšwego e se ngwana e bile a dula kgole le gae. Moapostola Paulo o kgothaleditše Bakriste ba Korinthe ya bogologolo gore: “Le lese go tswakana le motho yo a bitšwago ngwanabo rena yo e lego seotswa goba motho wa megabaru goba morapedi wa medimo ya diswantšho goba wa maroga goba letagwa goba mohlakodi, le go ja le se ke la ja le motho yo bjalo.” (1 Bakorinthe 5:11) Gaešita le ge go hlokomela ditaba tša lapa go ka nyaka gore ka tsela e itšego go ikgokaganywe le motho yo a kgaotšwego, motswadi wa Mokriste o swanetše go katanela go phema go gwerana le yena go sa nyakege.

Ge ngwana yo a dirilego phošo a newa tayo ke badiši ba Bakriste, e ka se be gabohlale go leka go gana goba go nyatša kgato ya bona e theilwego Beibeleng. Go ema ka lehlakoreng la ngwana wa gago wa lerabele go ka se mo šireletše go Diabolo ka tsela le ge e le efe. Ge e le gabotse, o tla ba o bea bophelo bja gago bja moya kotsing. Ka lehlakoreng le lengwe, ka go thekga maiteko a badiši, o tla dula o “tiile tumelong” gomme o tla nea ngwana wa gago thušo e di phalago tšohle.—1 Petro 5:9.

Jehofa o tla go Matlafatša

Ge ngwana wa gago a ka rabela, gopola gore ga o noši. Batswadi ba bangwe ba Bakriste ba bile le diphihlelo tše bjalo. Go sa šetšwe diteko tšeo re lebeletšanago le tšona, Jehofa a ka re matlafatša.—Psalme 68:19.

Ithekge ka Jehofa ka thapelo. Kopanela le phuthego ya Bokriste ka mehla. Thekga tayo ya badiši bao ba kgethilwego. Ka go dira bjalo, o tla kgona go dula o tiile. Le gona, mohlala wa gago o mobotse o ka thuša ngwana wa gago go arabela taletšong e lerato e tšwago go Jehofa ya gore a boele go yena.—Maleaki 3:6, 7.

[Diswantšho go letlakala 18]

Matlafatšwa ke thapelo le phuthego ya Bokriste