Monna le Mosadi—Yo Mongwe le yo Mongwe o na le Boikarabelo bjo bo Hlomphegago

JEHOFA MODIMO o bopile Adama pele gomme ka morago a bopa Efa. Pele ga ge Efa a ka bopša, Adama o be a šetše a e-na le phihlelo ya bophelo. Nakong yona yeo, Jehofa o ile a mo nea ditaelo tše itšego. (Genesi 2:15-20) A hlankela e le mmoleledi wa Modimo, Adama o be a swanetše go botša mosadi wa gagwe ditaelo tšeo. Ka gona, ka mo go swanetšego o be a tla etelela pele dilong ka moka tšeo di bego di tswalana le borapedi.

Ka phuthegong ya Bokriste go na le thulaganyo e swanago, gomme re ka holwa ke go e hlahloba. Moapostola Paulo o ngwadile gore: “Ga ke dumelele mosadi go . . . laola monna, eupša gore a ikhomolele. Gobane Adama o bopilwe pele, ke moka gwa bopša Efa.” (1 Timotheo 2:12, 13) Se ga se bolele gore mosadi o swanetše go homola ka mo go feletšego dibokeng tša phuthego ya Bokriste. O swanetše go homola ka kgopolo ya gore a se ngangišane le monna. Ga se a swanela go nyatša maemo ao monna a a kgethetšwego goba go leka go ruta phuthego. Banna ba neilwe kabelo ya go okamela le go ruta phuthego, eupša basadi ba thekga kudu diboka tša Bokriste ka go tšea karolo go tšona ka ditsela tše di fapa-fapanego.

Ge a re thuša go kwešiša karolo e hlomphegago yeo e phethwago ke banna le basadi thulaganyong ya Modimo, moapostola Paulo o ngwadile gore: “Gobane monna ga a tšwe mosading, eupša ke mosadi yo a tšwago monneng . . . Ka ntle le moo, go Morena mosadi ga a gona ka ntle le monna, le monna ga a gona ka ntle le mosadi [ga go na yo a ka bago gona ka ntle ga yo mongwe]. Gobane go etša ge mosadi a e-tšwa monneng, le monna o gona ka mosadi; eupša dilo ka moka di tšwa go Modimo.”—1 Bakorinthe 11:8-12.

Basadi ba na le Ditokelo tše di Kgahlišago

Ka tlase ga Molao woo Modimo a o neilego Baisiraele, basadi ba be ba e-na le ditokelo tše dintši gomme ba be ba lokologile go dira dilo go ya le kamoo ba di kwešišago ka gona. Ka mohlala, Diema 31:10-31 e bolela ka “mosadi wa sethakxa” yo a rekago lešela le lebotse gomme a direla ba lapa la gagwe diaparo tše dibotse ka lona. Ka gona, “ó roka diaparô ka mengwêta, a rekiša”! (Ditemana 13, 21-24) “Byalo ka le-thsela-watlê la bašabi,” mosadi yo wa sethakga o reka dijo tše di swanetšego, le ge a di lata dinageng tša kgole. (Temana 14) ‘O nyaka tšhemo, a be a e hwetše,’ gomme ‘a šeme dihlare-dilewa.’ (Temana 16) Ka ge a “lêtlêxa,” mediro ya gagwe e dira gore a holege. (Temana 18) Go oketša tabeng ya go “šetša tšohle tše di tlaxo ka lapeng la xaxwe,” mosadi yo wa seroto yo a boifago Jehofa o thuša ba bangwe ka tsela e se nago boithati. (Ditemana 20, 27) Ruri ga go makatše ge a retwa!—Temana 31.

Melao yeo Jehofa a e neilego ka Moše e be e nea basadi sebaka se se lekanego sa go gola moyeng.  Ka mohlala, re bala go Jošua 8:35 gore: “Xwa se bê le lentšu letee la tšeo tše Mošê a di laetšexo tšohle, le Jošua a sa kaxo a le balêla phuthêxô ya Isiraele ka moka, le basadi le bana le baeng ba ba sepetšexo le bôná.” Beibele e bolela mabapi le Esera moperisita gore: “[O ile] a tliša molaô woo pele xa phuthêxô ya banna le basadi le bohle ba ba naxo le thlaoloxanyô ba kxôna xo kwa; e be e le ka la pele la kxwedi ya xo šupa. Xôna-moo lepatlelong la pele xa kxôrô ya motse a ba balêla puku yeo, a thôma xe xo e-sa, ya ba mosexare o moxolo à sa bala, xò na le banna le basadi le ba ba naxo le thlaoloxanyô; xomme ditsêbê ka moka tša sethšaba di be di sekexetše ’taba tša puku ya melaô.” (Nehemia 8:2, 3) Basadi ba ile ba holwa ke go balwa moo ga Molao. Le gona ba be ba e-ba gona menyanyeng ya bodumedi. (Doiteronomio 12:12, 18; 16:11, 14) Sa bohlokwa le go feta, basadi ba Isiraele ya bogologolo ba be ba ka ba le tswalano ya kgaufsi le Jehofa Modimo gomme ba mo rapela ka bobona.—1 Samuele 1:10.

Lekgolong la pele la nywaga C.E., basadi bao ba boifago Modimo ba bile le tokelo ya go hlankela Jesu. (Luka 8:1-3) Ge a be a le dijong tša mantšiboa kua Bethania, mosadi yo mongwe o ile a mo tlotša hlogo le maoto ka makhura. (Mateo 26:6-13; Johane 12:1-7) Basadi ke ba bangwe ba batho bao Jesu a ilego a iponagatša go bona ka morago ga tsogo ya gagwe. (Mateo 28:1-10; Johane 20:1-18) Ka morago ga ge Jesu a rotogetše legodimong, sehlopha sa batho ba e ka bago ba 120 seo se ilego sa bokana gotee se be se akaretša “basadi ba bangwe le Maria mmago Jesu.” (Ditiro 1:3-15) Ga go pelaelo gore ge moya o mokgethwa o be o romelwa gomme ka mohlolo barutiwa ba Jesu ba thoma go bolela ka maleme a fapa-fapanego, basadi ba bantši goba ka moka ga bona ba be ba le ka phapošing ya ka godimo kua Jerusalema letšatšing la Pentekoste ya 33 C.E.—Ditiro 2:1-12.

Bobedi banna le basadi ba be ba le gare ga bao ba bonego go phethagatšwa ga Joele 2:28, 29, ka ge e ile ya tsopolwa ke moapostola Petro letšatšing la Pentekoste ge a re: “Ke [Jehofa] tla tšhollela o mongwe wa moya wa-ka godimo ga nama ya mohuta o mongwe le o mongwe, gomme barwa ba lena le barwedi ba lena ba tla porofeta . . . Gaešita le godimo ga bahlanka ba-ka ba banna le ba basadi, ke tla tšhollela o mongwe wa moya wa-ka mehleng yeo.” (Ditiro 2:13-18) Nakwana ka morago ga Pentekoste ya 33 C.E., basadi ba Bakriste ba ile ba newa dimpho tše bohlokwa tša moya. Ba be ba bolela le go porofeta ka maleme a šele, e sego gore ba be ba bolelela pele dilo tše di sa tlago eupša ba be ba bolela ditherešo tša Mangwalo.

Lengwalong la gagwe leo le yago go Bakriste  ba Roma, moapostola Paulo ka borutho o bolela ka “Fibe kgaetšedi ya rena,” a mmolela gabotse go bona. O bolela gape ka Teraefina le Teraefosa, gore ke “basadi bao ba šomago ka thata Moreneng.” (Baroma 16:1, 2, 12) Le ge basadi ba ba sa ka ba kgethelwa go ba maemong a itšego ka phuthegong ya pele ya Bokriste, bona gotee le basadi ba bangwe ba bantši ba bile le tokelo ya go kgethwa ke Modimo gore ba kopanywe le Morwa wa gagwe Jesu Kriste, Mmušong wa legodimo.—Baroma 8:16, 17; Bagalatia 3:28, 29.

A tokelo e bohlokwa le e kgolo gakaakang yeo basadi ba boifago Modimo ba e thabelago lehono! Psalme 68:11 (NW) e re: “Jehofa ka noši o kwatša lentšu; basadi ba ba bolelago ditaba tše dibotse ke madira a mantši.” Basadi ba bjalo ba swanelwa ke theto. Ka mohlala, go ruta ga bona ka bokgoni dithutong tša magae tša Beibele go dira gore batho ba bantši ba amogele dithuto tša therešo tšeo di kgahlišago Modimo. Basadi ba Bakriste ba nyetšwego, bao ba thušago bana ba bona gore e be badumedi le go thekga banna ba bona bao ba nago le mediro e mentši ka phuthegong, le bona ba swanelwa ke theto. (Diema 31:10-12, 28) Basadi ba sego lenyalong le bona ba na le maemo a hlomphegago thulaganyong ya Modimo, gomme banna ba Bakriste ba kgothaletšwa gore ba “lope . . . basadi ba bagolo bjalo ka bo-mma, basadi ba bafsa bjalo ka dikgaetšedi ka thakgafalo yohle.”—1 Timotheo 5:1, 2.

Dikabelo tše di Fapa-fapanego tša Banna

Monna wa Mokriste o na le boikarabelo bjoo a bo neilwego ke Modimo gomme go letetšwe gore a bo phethe. Paulo o boletše gore: “Ke nyaka ge le tseba gore hlogo ya monna yo mongwe le yo mongwe ke Kriste; hlogo ya mosadi yona ke monna; hlogo ya Kriste yona ke Modimo.” (1 Bakorinthe 11:3) Monna le yena o na le hlogo—Kriste. Ka kgonthe monna o ikarabela go Kriste gomme ka go rialo o ikarabela go Modimo. Le gona, Modimo o letetše gore monna a diriše bohlogo bja gagwe ka lerato. (Baefeso 5:25) Go be go le bjalo go tloga nakong ya ge batho ba thoma go phela lefaseng.

Beibele e bontšha gore Modimo o neile monna dikabelo tšeo di sepedišanago le maemo a gagwe a bohlogo. Ka mohlala, Jehofa o ile a nea monna, Noa, kabelo ya go aga areka bakeng sa go phološa batho nakong ya Meetse-fula. (Genesi 6:9–7:24) Monna, Aborahama, o ile a holofetšwa gore malapa le ditšhaba tšohle tša lefase di tla itšhegofatša ka peu ya gagwe. Karolo ya mathomo ya peu yeo ke Kriste Jesu. (Genesi 12:3, 22:18; Bagalata 3:8-16) Modimo o ile a kgetha monna, Moše, go etelela Baisiraele pele ge ba etšwa Egipita. (Ekisodo 3:9, 10,12, 18) Jehofa o be a diriša Moše go nea melao ya thulaganyo yeo e tsebjago e le Molao wa kgwerano, goba Molao wa Moše. (Ekisodo 24:1-18) Ge e le gabotse, bangwadi ba Beibele ka moka e be e le banna.

Ka ge Jesu e le Hlogo ya phuthego ya Bokriste, o “neile dimpho tšeo e lego batho.” (Baefeso 1:22; 4:7-13) Ge a lokeletša ditshwanelego tša balebeledi, Paulo o bolela ka banna. (1 Timotheo 3:1-7; Tito 1:5-9) Ka gona, diphuthego tša Dihlatse tša Jehofa di hlankelwa ke balebeledi bao e lego banna, goba bagolo, gotee le banna bao ba kgethetšwego go ba bahlanka ba bodiredi. (Bafilipi 1:1, 2; 1 Timotheo 3:8-10, 12) Ke banna feela bao ba swanetšego go hlankela e le badiši ka phuthegong ya Bokriste. (1 Petro 5:1-4) Lega go le bjalo, go etša ge go boletšwe, basadi ba na le ditokelo tše di kgahlišago tšeo ba di neilwego ke Modimo.

Ba Thabela Dikabelo tša Bona

Bobedi banna le basadi ba a thaba ge ba phetha boikarabelo bja bona bjo ba bo neilwego ke Modimo. Ge banna le basadi ba ekiša mohlala wa Kriste le wa phuthego ya gagwe, ba ba le manyalo a thabišago. Paulo o ngwadile gore: “Banna, tšwelang pele le rata basadi ba lena go etša ge Kriste le yena a ratile phuthego gomme a ikgafela yona . . . Yo mongwe le yo mongwe wa lena ka noši a rate mosadi wa gagwe bjalo ka ge a ithata.” (Baefeso 5:25-33) Ka baka leo, banna ba swanetše go phetha boikarabelo bja bona bja bohlogo, e sego ka tsela ya boithati, eupša ka tsela e lerato. Phuthego ya Kriste ga se ya bopša ka batho ba phethagetšego. Lega go le bjalo, Jesu o a e rata e bile o a e hlokomela. Ka mo go swanago, monna wa Mokriste o swanetše go rata le go hlokomela mosadi wa gagwe.

 Mosadi wa Mokriste o “swanetše go ba le tlhompho e tseneletšego go monna wa gagwe.” (Baefeso 5:33) Mo tabeng ye, a ka lebelela phuthego e le mohlala. Baefeso 5:21-24 e re: “Ikokobetšeng seng sa lena ka go boifa Kriste. Basadi ba ikokobeletše banna ba bona go etša ge ba ikokobeletša Morena, gobane monna ke hlogo ya mosadi wa gagwe go etša ge Kriste le yena e le hlogo ya phuthego, e le yena mophološi wa mmele wo. Ge e le gabotse, go etša ge phuthego e ikokobeletša Kriste, basadi le bona ba ikokobeletše banna ba bona dilong tšohle.” Le ge mosadi ka dinako tše dingwe a ka hwetša go le thata go ikokobeletša monna wa gagwe, seo se a “swanela Moreneng.” (Bakolose 3:18) Go ikokobeletša monna wa gagwe go tla ba bonolo ge a ka gopola gore se se a kgahliša go Morena Jesu Kriste.

Le ge monna wa gagwe e se modumedi-gotee, mosadi wa Mokriste o swanetše go ikokobeletša bohlogo bja gagwe. Moapostola Petro o re: “Lena basadi ikokobeletšeng banna ba lena, e le gore, ge e ba go e-na le bao ba sa kwego lentšu, ba tle ba ruiwe ka ntle le lentšu ka boitshwaro bja basadi ba bona, ka baka la ge ba bile dihlatse tše di bonego ka mahlo tša boitshwaro bja lena bjo bo sekilego gotee le tlhompho e tseneletšego.” (1 Petro 3:1, 2) Sara yo a bego a hlompha monna wa gagwe Aborahama, o ile a newa tokelo ya go belega Isaka le go ba makgolokhukhu wa Jesu Kriste. (Baheberu 11:11, 12; 1 Petro 3:5, 6) Basadi bao ba itshwarago bjalo ka Sara ba kgonthišetšwa gore ba tla šegofatšwa ke Modimo.

Khutšo le kwano di ba gona ge banna le basadi ba phetha boikarabelo bjo ba bo neilwego ke Modimo. Se se ba tlišetša kgotsofalo le lethabo. Go feta moo, go dumelelana le dinyakwa tša Mangwalo go nea yo mongwe le yo mongwe seriti seo se sepedišanago le tokelo yeo ba e neilwego thulaganyong ya Modimo.

[Lepokisi go letlakala 7]

Kamoo ba Ikwago ka Gona ka Boikarabelo Bjoo ba bo Neilwego ke Modimo

Susan o re: “Monna wa-ka o phetha boikarabelo bja bohlogo ka tsela e lerato le e botho. Gantši re boledišana ka diphetho gomme ge a dira phetho ka seo se swanetšego go dirwa goba go se dirwe, ke a tseba gore ke bakeng sa go re hola. Ka kgonthe thulaganyo ya Jehofa bakeng sa basadi ba Bakriste e a nthabiša gomme e tiiša lenyalo la rena. Re batamelane kudu gomme re šoma gotee bakeng sa go fihlelela dipakane tša moya.”

Mosadi yo a bitšwago Mindy o bolela gore: “Karolo ye Jehofa a e abetšego bahlanka ba gagwe ba basadi ke ya go re kgonthišetša ka lerato la gagwe. Ke nagana gore ge ke nea monna wa-ka kgodišo le tlhompho e bile ke mo thekga medirong ya gagwe ya phuthego, ke tsela yeo ke bontšhago ka yona gore ke leboga Jehofa bakeng sa thulaganyo ye.”

[Diswantšho go letlakala 5]

Ka go dumelelana le maemo a monna a bohlogo, Modimo o neile Noa, Aborahama le Moše dikabelo tše di fapa-fapanego

[Seswantšho go letlakala 7]

“Basadi ba bolelago ditaba tše dibotse ke madira a mantši”