Motho wa Nywaga e Lekgolo yo a Nago le Morero Bophelong

ELIN ke yo mongwe wa batho ba 60 kua Sweden bao ba sa tšwago go lokeletšwa e le ba nywaga e 105 goba go feta moo. Yena o na le nywaga e 105. Le ge a dula legaeng la batšofadi leo a sa kgonego go tšwa go lona, boemo bja gagwe bja tša maphelo bo mo dumelela go tšwela pele a hlankela bjalo ka Hlatse e mafolofolo ya Jehofa, e lego tsela ya bophelo yeo a e kgethilego nywageng e fetago e 60 e fetilego.

Ge a dira boboledi go ba bangwe, Elin o latela mohlala wo o beilwego ke moapostola Paulo ge a be a golegilwe ntlong, a sa dumelelwa go tloga legaeng leo. Paulo o ile a bolela le bohle bao ba bego ba mo etela. (Ditiro 28:16, 30, 31) Ka mo go swanago, Elin o šomiša sebaka se sengwe le se sengwe go boledišana le bahlwekiši, dingaka tša meno, dingaka, bao ba lokišago meriri, baoki le ba bangwe bao a kopanago le bona moo legaeng, a boledišana le bona ka ditaba tše dibotse tšeo di hwetšwago ka Beibeleng. Nako le nako, badumedi-gotee le Elin ba lego phuthegong ya gabo e bile ba laletša dithuto tša bona tša Beibele gore di mo etele e le gore di ka holwa ke tsebo le phihlelo tšeo a nago le tšona.

Ditho tša phuthego ya gabo Elin di thabela moya o mobotse wo a nago le wona le go kgahlegela ga gagwe ba bangwe. Hlatse-gotee le yena e re: “O na le bokgoni bjo bo makatšago bja go sepedišana le mediro ya phuthego. O gopola maina a bana ka moka gaešita le a bao ba sa tšwago go hudugela phuthegong.” Elin gape o tsebja kudu ka mokgwa wa gagwe wa go amogela baeng, ka go ba ga gagwe le metlae le ka go ba le pono e nepagetšego ka bophelo.

Ke eng seo se thušago Elin gore a dule a thabile le go dula a lebišitše tlhokomelo morerong wa gagwe bophelong? Letšatši le lengwe le le lengwe o bala temana ya Lengwalo go tšwa pukwaneng ya Go Hlahloba Mangwalo ka Mehla, yeo e gatišitšwego ke Dihlatse tša Jehofa. Ka thušo ya galase ya go godiša dilo (magnifying glass), o bala le karolo e itšego ya Beibele letšatši le letšatši. Elin o lokišetša le diboka tša beke le beke tša Dihlatse tša Jehofa, gomme gaešita le ge a sa kgone go ba go tšona ka nama o theetša dikgatišo tša diboka tše. Go bala Beibele ka mehla le dikgatišo tšeo di theilwego Beibeleng le go se tlogele go bokana dibokeng tša Bokriste, go ka re thuša go phela maphelo a kgotsofatšago le ao a nago le morero go sa šetšwe nywaga ya rena.—Psalme 1:2; Baheberu 10:24, 25.