Tema e Bohlokwa Yeo e Fihleletšwego ka go Gatišwa ga Dibeibele ka Maleme a Afrika

KE KGALE babadi ba botegago ba Beibele ba tšwago Yuropa le Amerika Leboa ba lemogile go nyakega ga gore Maafrika a kgone go bala Lentšu la Modimo ka maleme a gabo ona. Gore ba fihlelele pakane ye yeo e kgahlišago, banna ba bantši ba ile ba tla Afrika go tlo ithuta maleme a Afrika. Ba bangwe ba ile ba hlama mongwalelo wa maleme a mangwe gomme ba ngwala dipukuntšu. Ke moka ba ile ba thoma modiro wa go fetolela Beibele malemeng a mantši a fapa-fapanego a Afrika. Wo e be e le modiro o thata. The Cambridge History of the Bible e hlalosa gore: “Go be go ka feta nywaga e mentši pele mofetoledi a ka hwetša lentšu le le nepagetšego bakeng sa kgopolo e bonolo le ya motheo ya Bokriste.”

Batswana e bile batho ba pele ba go ba le phetolelo e feletšego ya Beibele ka 1857, e lego le lengwe la maleme a Afrika ao pele a bego a sa ngwalwe. * E ile ya gatišwa gomme ya tlengwa ka dikarolo, e se puku e tee. Ge nako e dutše e e-ya, Beibele e ile ya fetolelwa ka maleme a mangwe a Afrika. Bontši bja diphetolelo tše bo be bo e-na le leina la Modimo, Jehofa, ka Mangwalong a Seheberu, goba “Testamente ya Kgale” gotee le ka Mangwalong a Bakriste a Segerika, goba “Testamente e Mpsha.” Lega go le bjalo, diphetolelo tše mpsha tšeo di boeleditšwego di gatišitšwe ke batho bao ba bego ba sa hlomphe leina le lekgethwa la Mongwadi wa Beibele e lego Jehofa. Go e na le moo, ba ile ba latela ditumela-khwele tša moetlo wa Sejuda wa go tloša leina la Modimo gomme legatong la lona gwa bewa direto tše bjalo ka Modimo goba Morena. Ka gona go ile gwa ba le tlhokagalo ya gore barati ba Modimo ba Afrika ba be le Beibele yeo e nago le leina la Modimo.

Ga e sa le go tloga ka bo-1980, Sehlopha se Bušago sa Dihlatse tša Jehofa se šomile ka thata gore New World Translation of the Holy Scriptures e fetolelwe ka maleme a mantši a magolo a Afrika. Ka baka leo, lehono barati ba Beibele ba dikete tše makgolo ba kgona go bala New  World Translation ka meleme a bobona. Go fihla ga bjale, New World Translation e hwetšagala ka maleme a 17 a setlogo a Afrika, e feletše goba ka karolo ya yona.

Babadi ba Dibeibele tše tša maleme a Afrika ba thabela go ba le phetolelo yeo e dirišago leina la Modimo la letago e lego Jehofa. Ka mohlala, ge Jesu a be a ema ka sinagogeng kua Natsaretha, o tsebaditše modiro wa gagwe ka go bala karolo ya lengwalo la go phuthwa la Jesaya, moo leina la Tatagwe le tšwelelago. (Jesaya 61:1, 2, NW) Go ya ka Ebangedi ya Luka bjalo ka ge e fetoletšwe ka go New World Translation, Jesu o badile mantšu a rego: “Moya wa Jehofa o go nna, gobane o ntloleditše go tsebiša badiidi ditaba tše dibotse, o nthomile gore ke bolele tokologo go mathopša le go bolela gore difofu di bone gape, go lokolla ba ba gateletšwego, go bolela ngwaga wo o amogelegago wa Jehofa.”—Luka 4:18, 19.

Ka August 2005 go ile gwa fihlelelwa selo se sengwe gape se bohlokwa go gatišweng ga Dibeibele ka maleme a Afrika. Kgweding yona yeo, dikopi tše fetago 76 000 tša New World Translation ka maleme ao a bolelwago Afrika di ile tša gatišwa le go tlengwa lekaleng la Afrika Borwa la Dihlatse tša Jehofa. Palong ye go be go akaretšwa Dibeibele tše 30 000 tša leleme la Seshona. Kgatišo ye e ile ya lokollwa Dikopanong tša Selete tša Dihlatse tša Jehofa tša “Go kwa Modimo” kua Zimbabwe.

Nakong yeo e sa lebalegego, baeng bao ba bego ba tlile lekaleng la Afrika Borwa ba ile ba thabela go bona go gatišwa ga Dibeibele tše difsa ka maleme a Afrika. Nhlanhla, yoo e lego setho sa Bethele e bile a šomago lefapheng la go tlemaganya dipuku, o itše: “Ruri ke ile ka thabela go ba le tokelo ya go tšea karolo go tšweletšeng New World Translation ka Seshona gotee le maleme a mangwe a Afrika.” Ka kgonthe, o akaretša maikwelo a lapa ka moka la Bethele la Afrika Borwa.

Ga bjale batho ba Afrika ba tla hwetša Dibeibele tše difsa ka pela le ka tsela e sa bitšego kudu go feta ge di be di gatišwa le go romelwa go tšwa moše wa mawatle. Sa bohlokwa le go feta ke gore gona bjale Maafrika a na le phetolelo e hwetšagalago gabonolo le e nepagetšego yeo e dirišago leina le lekgethwa la Mongwadi yo mogolo wa Beibele, Jehofa Modimo.

[Mongwalo wa ka tlase]

[Seswantšho go letlakala 12]

Leina la Modimo ka Beibeleng ya Setswana yeo e gatišitšwego ka 1840

[Mothopo]

Harold Strange Library of African Studies

[Seswantšho go letlakala 13]

Baeng ba tšwago Swaziland ba bogela Dibeibele tše difsa tšeo di gatišwago lekaleng la Afrika Borwa