Thuša ba Bangwe go kwa Seo Beibele e se Rutago

“Ge e le yeo e lego mmung o mobotse, ba ke bao ka morago ga go kwa lentšu ka pelo e botse le e bolo, ba le bolokago gomme ba enywa dienywa ka kgotlelelo.”—LUKA 8:15.

1, 2. (a) Puku ya Ke Eng Seo ge e le Gabotse Beibele e se Rutago? e hlamilwe ka morero ofe? (b) Nywageng ya morago bjale, Jehofa o šegofaditše bjang maiteko a batho ba gagwe a go dira barutiwa?

“PUKU ye e a kgahliša e le ruri. Barutwana ba-ka ba a e rata. Ke a e rata. Puku ye e dira gore motho a kgone go thoma dithuto tša Beibele le batho ka go lebanya mejakong ya bona.” Mantšu ao a boletšwe ke kgaetšedi yo e lego modiredi wa mmulamadibogo wa ka mehla wa Dihlatse tša Jehofa mabapi le puku ya Ke Eng Seo ge e le Gabotse Beibele e se Rutago? * Ge mogoeledi yo mongwe wa Mmušo yo a tšofetšego a bolela ka kgatišo yona yeo, o itše: “Nywageng e 50 yeo ke bilego mafolofolo ka yona bodireding, ke bile le tokelo ya go thuša batho ba bantši gore ba tsebe Jehofa. Eupša therešo ke gore kgatišo ye ya go ithutwa ke e botse kudu. Dipapišo tša yona tše di tutuetšago tšeo di nago le mantšu gotee le diswantšho di a kgahliša.” Na o ikwa ka tsela yeo ka puku ya Seo Beibele e se Rutago? Puku ye ya go thuša go ithuta Beibele e hlametšwe go go thuša go phethagatša taelo ya Jesu e rego: “Ka gona, e-yang le dire batho ba ditšhaba ka moka barutiwa, . . . le ba ruta go boloka dilo tšohle tšeo ke le laetšego tšona.”—Mateo 28:19, 20.

² Ga go pelaelo gore pelo ya Jehofa e a thaba ge a bona Dihlatse tša gagwe tše ka bago dimilione tše 6,6 di e-kwa tlhahlo ya Jesu ka go rata ya go dira barutiwa. (Diema 27:11) Go molaleng gore Jehofa o šegofatša maiteko a tšona. Ka mohlala, ngwageng wa 2005, ditaba tše dibotse di boletšwe dinageng tše 235 gomme go ile gwa swarwa palo-gare ya dithuto tša Beibele tše fetago 6 061 500. Ka baka leo, batho ba bantši ‘ba kwele lentšu la Modimo gomme ba le amogela, e sego e le lentšu la batho, eupša kamoo ruri le lego ka gona, e le lentšu la Modimo.’ (1 Bathesalonika 2:13) Nywageng e mebedi e fetilego, barutiwa ba bafsa ba fetago seripa-gare sa milione ba ile ba dumelelanya maphelo a bona le ditekanyetšo tša Jehofa gomme ba ineela go Modimo.

3. Ke dipotšišo dife tša mabapi le go dirišwa ga puku ya Seo Beibele e se Rutago tšeo di tlago go ahla-ahlwa sehlogong se?

³ Na o sa tšwa go thabela go swarela motho thuto ya Beibele? Lefaseng ka bophara, go sa dutše go e-na le batho ba nago le “pelo e botse le e bolo” bao ka morago ga go kwa lentšu la Modimo ba tla le “bolokago gomme ba enywa dienywa ka kgotlelelo.” (Luka 8:11-15) Anke re ahla-ahleng kamoo o ka dirišago puku ya Seo Beibele e se Rutago modirong wa go dira barutiwa. Re tla ahla-ahla dipotšišo tše tharo tabeng ye ya rena: (1) O ka thoma thuto ya Beibele bjang? (2) Ke mekgwa efe ya go ruta yeo e šomago  kudu? (3) O ka thuša motho bjang gore e se ke ya ba morutwana feela eupša gape e be morutiši wa Lentšu la Modimo le le ngwadilwego, Beibele?

Kamoo o ka Thomago Thuto ya Beibele

4. Ke ka baka la’ng ba bangwe ba ka dika-dika go ithuta Beibele, gona o ka ba thuša bjang gore ba fenye go dika-dika mo ga bona?

⁴ Ge o be o ka kgopelwa gore o tshele noka e ahlamego ka go fo tabogela ka mošola wa yona, mohlomongwe o be o ka gana. Eupša ge go ka ba go beilwe mafsika mo gare ga noka ao o ka gatago go ona, mohlomongwe o be o ka rata go e tshela. Ka mo go swanago, motho yo a dulago a swaregile a ka dika-dika go ithuta Beibele. Mong wa ntlo a ka nagana gore go nyakega nako e ntši le maiteko e le gore motho a ithute yona. O ka mo thuša bjang go fenya go dika-dika ga gagwe? Ka go swara lelokelelo la dipoledišano tše dikopana le tše di neago tsebišo, o ka diriša puku ya Seo Beibele e se Rutago go dira gore motho a swarelwe thuto ya ka mehla ya Lentšu la Modimo. Ge e ba o lokišetša gabotse, leeto le lengwe le le lengwe la go boela go motho yoo le tla ba bjalo ka lefsika leo go gatwago go lona leo le tlago go mo lebiša go beng le bogwera le Jehofa.

5. Ke ka baka la’ng o swanetše go bala puku ya Seo Beibele e se Rutago?

⁵ Lega go le bjalo, pele ga ge o ka thuša motho yo itšego go holwa ke puku ya Seo Beibele e se Rutago, o swanetše go tlwaelana le yona gabotse. Na o badile puku ye ka moka ga yona? Banyalani ba bangwe ba ile ba sepela le kgatišo ye ge ba e-ya maikhutšong gomme ba thoma go e bala ge ba be ba iketlile lewatleng. Ge mosadi yo a rekišetšago baboga-naga dithoto a be a ba batamela, o ile a bona sehlogo se se rego Ke Eng Seo ge e le Gabotse Beibele e se Rutago? O boditše banyalani ba gore diiring tše mmalwa tše di sa tšwago go feta, o be a rapela ka taba yona yeo a kgopela Modimo gore a mo nee karabo. Ka lethabo banyalani bao ba ile ba nea mosadi yoo kopi ya puku ye. Na o ‘rekile nako’ ya go bala kgatišo ye, mohlomongwe la bobedi, ge o be o dutše o letile nako ya gore o kopane le motho yo itšego goba ka nako ya go khutša mošomong goba sekolong? (Baefeso 5:15, 16) Ge e ba o dira bjalo, o tla tlwaelana le puku ye yeo e re thušago go ithuta Beibele gomme gape o ka ba le dibaka tša go bolela le ba bangwe ka dikagare tša yona.

6, 7. O ka diriša bjang puku ya Seo Beibele e se Rutago go thoma dithuto tša Beibele?

⁶ Ge o sepediša puku ye bodireding bja phatlalatša, diriša diswantšho gabotse, mangwalo le dipotšišo tše di lego go matlakala 4, 5 le 6. Ka mohlala, o ka thoma poledišano ka go botšiša gore, “Mathateng ka moka ao batho ba lebeletšanego le ona lehono, o nagana gore mothopo o botegago wa tlhahlo ke ofe?” Ka morago ga go theetša karabo ya motho ka kelohloko, bala 2 Timotheo 3:16, 17 gomme o hlalose gore Beibele e nea tharollo ya kgonthe ya mathata a batho. Ke moka o lebiše tlhokomelo ya mong wa ntlo go matlakala 4 le 5, gomme o botšiše gore: “Maemong ao a bontšhitšwego matlakaleng a, ke bofe bjo bo go tshwenyago kudu?” Ge mong wa ntlo a šupa go bjo tee, dira gore a sware puku ge o dutše o bala lengwalo leo le sepedišanago le taba yeo Beibeleng ya gago. Ke moka, bala letlakala 6 gomme o botšiše mong wa ntlo gore, “Go dipotšišo tše tše tshela tše di botšišitšwego  botlaseng bja letlakala le, o ka rata go arabelwa efe?” Ge motho a kgetha e tee, mmontšhe kgaolo yeo e arabago potšišo yeo, mo tlogelele puku gomme o dire dithulaganyo tše di kgonthišeditšwego tša go boa gape gore le tle le ahla-ahle potšišo yeo.

⁷ Thero yeo e sa tšwago go bontšhwa e ka akaretšwa ka metsotso e ka bago e mehlano. Lega go le bjalo, metsotsong yeo e sego kae, o tla ba o lemogile seo mong wa ntlo a tshwenyegilego ka sona, o badile mangwalo a mabedi le go a hlalosa e bile o theile motheo wa leeto la go boela. Poledišano ya gago e kopana gotee le mong wa ntlo mo gongwe e ka ba phihlelo e kgothatšago kudu le e homotšago yeo a ka bago a bile le yona ka morago ga nako e telele. Ka baka leo, gaešita le motho yo a swaregilego a ka fagahlela go fetša nako e oketšegilego le wena nakong e tlago ge o mo thuša go gata mogato wa gagwe o latelago wa go tsena ‘tseleng e išago bophelong.’ (Mateo 7:14) Ge nako e dutše e e-ya, nako ya thuto e swanetše go oketšwa ge kgahlego ya mong wa ntlo e gola. Se se ka dirwa ka gore o kgopele go dula fase gomme le ithute ka nako e itšego e teletšana.

Mekgwa ya go Ruta Yeo e Šomago Kaone Kudu

8, 9. (a) O ka thuša bjang morutwana wa gago wa Beibele go fenya mapheko le diteko tšeo mohlomongwe a ka kopanago le tšona? (b) Dikago tše di palelago mollo di ka hwetšwa kae bakeng sa go aga tumelo e matla?

⁸ Ge motho a thoma go kwa seo Beibele e se rutago, ka ntle le pelaelo o tla lebeletšana le mapheko ao a ka šitišanago le tšwelopele ya gagwe. Moapostola Paulo o itše: “Bohle bao ba ratago go phela ka boineelo go Modimo tswalanong le Kriste Jesu le bona ba tla hlomarwa.” (2 Timotheo 3:12) Paulo o ile a bapiša diteko tše le mollo wo o ka senyago dikago tše di fokolago gomme wa tlogela dilo tše di swanago le gauta, silifera le mabje a bohlokwa di sa diragalelwa ke selo. (1 Bakorinthe 3:10-13; 1 Petro 1:6, 7) Gore o thuše morutwana wa gago wa Beibele go hlagolela dika tše di nyakegago go emeletšana le diteko tšeo di ka tšwelelago, o swanetše go mo thuša go aga ka dikago tše di palelago mollo.

⁹ Mopsalme o bapiša “se Morêna a se boletšexo” le “thsipi-thsêhla e tšwaxo meubeng è tološitšwe xa-šupa.” (Psalme 12:6) Ka kgonthe, Beibele e hupere dilo ka moka tše bohlokwa tšeo di ka dirišwago go aga tumelo e matla. (Psalme 19:7-11; Diema 2:1-6) Le gona puku ya Seo Beibele e se Rutago e go bontšha kamoo o ka dirišago Mangwalo ka katlego.

10. Ke bjang o ka lebišago tlhokomelo ya morutwana Beibeleng?

¹⁰ Nakong ya thuto, lebiša tlhokomelo ya morutwana mangwalong ao a bontšhitšwego kgaolong e nngwe le e nngwe yeo e ahla-ahlwago. Diriša dipotšišo go thuša morutwana gore a kwešiše ditemana tša motheo tša Beibele le gore yena ka noši a di diriše. Hlokomela gore o se ke wa mmotša seo a swanetšego go se dira. Go e na le moo, ekiša mohlala wa Jesu. Ge Jesu a be a botšišwa potšišo ke monna yo a bego a tseba Molao, o arabile ka gore: “Go ngwadilwe’ng Molaong? O bala bjang?” Monna yoo o ile a araba go tšwa Mangwalong gomme Jesu a mo thuša go bona kamoo a ka dirišago molao woo wa motheo. Jesu o ile a thuša monna yoo go bona kamoo thuto e swanetšego go mo kgoma ka gona ka go diriša seswantšho. (Luka 10:25-37) Puku ya Seo Beibele e se Rutago e tletše ka diswantšho tše bonolo tšeo o ka di dirišago go thuša morutwana go diriša melao ya motheo ya Mangwalo.

11. Ke taba e kaaka’ng yeo le swanetšego go e akaretša nakong e nngwe le e nngwe ge le ithuta?

¹¹ Puku ya Seo Beibele e se Rutago e diriša leleme le bonolo le le le lebanyago go hlalosa Lentšu la Modimo, go etša ge Jesu a ile a fetiša dikgopolo tše di raraganego ka tsela e bonolo. (Mateo 7:28, 29) Latela mohlala wa gagwe. Fetiša tsebišo ka tsela e bonolo, e kwagalago le e nepagetšego. O se ke wa kitimela go fetša sehlogo. Go e na le moo, dira gore maemo le bokgoni bja morutwana di laole palo ya dirapa tšeo le di hlahlobago thutong e nngwe le e nngwe. Jesu o be a tseba mafokodi a barutiwa ba gagwe gomme ga se a ka a ba imetša ka tsebišo e ntši go feta yeo ba bego ba e nyaka ka nako yeo.—Johane 16:12.

12. Mametletšo e swanetše go dirišwa bjang?

¹² Puku ya Seo Beibele e se Rutago e na le mametletšo e nago le dihlogo tše 14. Go ithekgile ka dinyakwa tša morutwana, wena bjalo ka mohlahli  o swanetše go kgona go lemoga kamoo taba ye e ka dirišwago gabotse kudu ka gona. Ka mohlala, ge morutwana a thatafalelwa ke go kwešiša taba goba a e-na le dipotšišo ditabeng tše itšego ka baka la ditumelo tša gagwe tša nakong e fetilego, e ka ba mo gobotse go lebiša tlhokomelo ya gagwe karolong e swanetšego ya mametletšo gomme wa dira gore a hlahlobe taba ka boyena. Ka lehlakoreng le lengwe, dinyakwa tša morutwana di ka go gapeletša go hlahloba taba le yena. Mametletšo e na le ditaba tše bohlokwa tša Mangwalo, tše bjalo ka tše rego, “‘Moya [Soul] le ‘Moya [Spirit]’—Mantšu a ge e le Gabotse a Bolela’ng?” le “Go Hlaola ‘Babilona o Mogolo.’” Mo gongwe o ka rata go boledišana le morutwana wa gago ka dihlogo tše. Ka ge go se na dipotšišo tše di neilwego bakeng sa ditaba tšeo go boletšwego ka tšona go mametletšo, o tla swanelwa ke go tlwaelana le tsebišo e le gore o kgone go hlama dipotšišo tše di kwagalago.

13. Thapelo e kgatha tema efe go matlafatšeng tumelo?

¹³ Psalme 127:1 e re: “Ngwakô wà sa axwa ke Morêna, baaxi ba wôna ba itapiša ka lefêla.” Ka baka leo, ge o dutše o lokišeletša go swara thuto ya Beibele, rapelela thušo ya Jehofa. Dira gore dithapelo tšeo o di rapelago mathomong le mafelelong a thuto e nngwe le e nngwe di bonagatše tswalano e borutho yeo o nago le yona le Jehofa. Kgothaletša morutwana go rapelela bohlale go Jehofa e le gore a kwešiše Lentšu la Gagwe le go hwetša matla a go diriša keletšo ya lona. (Jakobo 1:5) Ge a dira bjalo, morutwana o tla matlafala e le gore a kgotlelele diteko gomme o tla tšwela pele a matlafala tumelong.

Thuša Barutwana ba Beibele go ba Barutiši

14. Barutwana ba Beibele ba swanetše go dira tšwelopele efe?

¹⁴ Gore barutwana ba rena ba Beibele ba kgone go kwa “dilo tšohle” tšeo Jesu a di laetšego barutiwa ba gagwe, ba swanetše go tšwela pele go tloga go beng barutwana ba Lentšu la Modimo go ya go beng barutiši ba lona. (Mateo 28:19, 20; Ditiro 1:6-8) O ka dira’ng go thuša morutwana go dira tšwelopele e bjalo ya moya?

15. Ke ka baka la’ng o swanetše go kgothaletša morutwana wa gago wa Beibele go ba gona dibokeng tša phuthego ya Bokriste?

¹⁵ Di sa tloga fase thutong ya pele, laletša morutwana gore a ye dibokeng tša phuthego le wena. Mo hlalosetše gore dibokeng ke moo o hwetšago tlwaetšo ya go ba morutiši wa Lentšu la Modimo. Ge dibeke di dutše di feta, fetša metsotso e sego kae bofelong bja thuto e nngwe le e nngwe ya Beibele o hlalosa lenaneo la thuto ya moya yeo o e hwetšago dibokeng tše di fapa-fapanego le dikopanong. Bolela ka mafolofolo mabapi le mehola yeo o e hwetšago mafelong a. (Baheberu 10:24, 25) Ge morutwana a thoma go ba gona dibokeng ka mehla, go na le kgonagalo ya gore a ka ba morutiši wa Lentšu la Modimo.

16, 17. Ke dipakane dife tše dingwe tšeo morutwana wa Beibele a ka ipeelago tšona le go di fihlelela?

¹⁶ Thuša morutwana wa Beibele go ipeela dipakane tšeo a ka di fihlelelago. Ka mohlala, mo kgothaletše go boledišana le bagwera goba ba leloko ka seo a ithutago sona. Le gona, šišinya gore a ipeele pakane ya go bala Beibele ka moka. Ge e ba o mo thuša go thea le go kgomarela lenaneo la go bala Beibele ka mehla, mokgwa wo o tla mo hola ka morago ga nako e telele ge a tla be a kolobeditšwe. Go oketša moo, ke ka baka la’ng o sa šišinye gore morutwana a ipeele pakane ya go gopola bonyenyane temana e tee ya Beibele yeo e arabago potšišo ya motheo kgaolong e nngwe le e nngwe ya puku ya Seo Beibele e se Rutago? Ka  go dira bjalo, o tla ba “modiri yo a se nago seo se mo hlabišago dihlong, yo a swarago lentšu la therešo ka tshwanelo.”—2 Timotheo 2:15.

¹⁷ Go e na le go ruta morutwana go boeletša mangwalo ao a a lokišeditšego goba go hlalosa seo mangwalo ao a se bolelago, mo kgothaletše go hlalosa kamoo temana e swanetšego ya Beibele e šomago ka gona sehlogong seo le se ahla-ahlago ge a dutše a araba bao ba nyakago go tseba seo a se dumelago. Go ba le dinako tše dikopana tša go itlwaeletša seo go ka thuša, wena o tšee karolo ya go ba wa leloko goba mošomi-gotee yo a mo kgopelago go hlalosa ditumelo tša gagwe. Ge morutwana a dutše a araba, mmontšhe kamoo a ka arabago ka “moya o boleta le ka tlhompho e tseneletšego.”—1 Petro 3:15.

18. Ge morutwana wa Beibele a swanelega go ba mogoeledi yo a sa kolobetšwago, o ka tšwela pele bjang o mo thuša?

¹⁸ Ge nako e dutše e e-ya, morutwana a ka swanelega go ya bodireding bja tšhemo. Gatelela gore go dumelelwa go tšea karolo modirong wo ke tokelo. (2 Bakorinthe 4:1, 7) Ge bagolo ba tla be ba bone gore morutwana o a swanelega go hlankela e le mogoeledi yo a sa kolobetšwago, mo thuše go lokišetša thero e bonolo gomme o sepele le yena bodireding bja tšhemo. Tšwela pele o šoma le yena ka mehla dibopegong tše di fapa-fapanego tša bodiredi bja phatlalatša gomme o mo rute kamoo a ka lokišeletšago le go dira maeto a go boela a atlegago. Mohlala wa gago o mobotse e tla ba tutuetšo e botse.—Luka 6:40.

“O tla Iphološa le go Phološa Bao ba go Theetšago”

19, 20. Re swanetše go ba le pakane efe, gona ka baka la’ng?

¹⁹ Ka ntle le pelaelo, go nyakega go šoma ka thata go thuša motho gore a fihle “tsebong e nepagetšego ya therešo.” (1 Timotheo 2:4) Lega go le bjalo, go thaba lefaseng go ka se ke gwa bapetšwa le lethabo le o bago le lona ge o thušitše motho yo itšego go kwa seo Beibele e se rutago. (1 Bathesalonika 2:19, 20) Ka kgonthe, re na le tokelo ya go ba “badirišani ba Modimo” modirong wo wa go ruta wa lefaseng ka bophara!—1 Bakorinthe 3:9.

²⁰ A diriša Jesu Kriste le barongwa ba matla, kgaufsinyane Jehofa o tla ahlola bao “ba sa tsebego Modimo le bao ba sa kwego ditaba tše dibotse mabapi le Morena wa rena Jesu.” (2 Bathesalonika 1:6-8) Maphelo a kotsing. Na o ka ipeela pakane ya go swara bonyenyane thuto e tee ya legae ya Beibele ka puku ya Ke Eng Seo ge e le Gabotse Beibele e se Rutago? Ge o dutše o swaregile modirong wo, o na le sebaka sa go “iphološa le go phološa bao ba go theetšago.” (1 Timotheo 4:16) Ga bjale go feta le ge e le neng pele, go akgofile gore re thuše ba bangwe go kwa seo Beibele e se rutago.

[Mongwalo wa ka tlase]

O Ithutile’ng?

• Puku ya Seo Beibele e se Rutago e hlamilwe ka morero ofe?

• O ka thoma dithuto tša Beibele bjang o diriša puku ya Seo Beibele e se Rutago?

• Ke mekgwa efe ya go ruta yeo e šomago kudu?

• O ka thuša morutwana bjang go ba morutiši wa Lentšu la Modimo?

[Dipotšišo tša Thuto]

[Seswantšho go letlakala 26]

Na o diriša puku ye gabotse?

[Seswantšho go letlakala 27]

Poledišano e kopana e ka dira gore motho a kgahlegele go hwetša tsebo ya Beibele

[Seswantšho go letlakala 28, 29]

O ka dira’ng e le gore o lebiše tlhokomelo ya morutwana Beibeleng?

[Seswantšho go letlakala 30]

Thuša morutwana wa Beibele go tšwela pele