Amosi—Na e be e le Mokgoboketši Goba Mohlabi wa Mago?

MORAGO kua lekgolong la senyane la nywaga B.C.E., moporofeta Amosi o ile a laelwa ke Amatsia yo kgopo, moperisita yo e lego morapedi wa namane, gore a kgaotše go porofeta kua Isiraele. Amosi o ile a gana, a bolela gore: “Nna ke [be ke le] modiši wa dikxomo, ke sêla maxó a naxa [“ke le mohlabi wa mago a dihlare tša sikamore,” NW]. Fêla, Morêna ó ntšere kè dišitše mohlape, a ntaêla a re: Yaa O porofetêlê sethšaba sa Isiraele.” (Amosi 7:14, 15) Ee, Jehofa o romile Amosi bjalo ka moporofeta; e be e se moporofeta wa mma-ka-ipea. Eupša, ke’ng seo Amosi a bego a se bolela ge a be a re e be e le “mohlabi” wa mago a dihlare tša sikamore?

Polelwana ya Seheberu yeo e fetoletšwego ka tsela yeo e tšwelela ka lekga le tee feela ka go New World Translation. Diphetolelo tše dingwe tša Beibele di šomiša lentšu “mokgoboketši,” “molemi” goba “mobjadi,” go e-na le “mohlabi” wa mago a sikamore. Lega go le bjalo, makasine wa Economic Botany o bolela gore phetolelo e swanetšego ya lentšu le e tla ba “yo a phulago” ka gobane lentšu le le bontšha tiro e kgethegilego ya molemi wa mago a sikamore.

Mokgwa wa go hlaba, ke gore wa go phula mago a sikamore mašobana, ke woo o bego o dutše o tsebja kudu kua Egipita le Tsipero go tloga mehleng ya bogologolo. Isiraeleng ya mehleng yeno mokgwa wo wa go hlaba mago ga o sa dirišwa ka gobane go bjalwa mehuta e mengwe ya mago nageng yeo. Lega go le bjalo, mokgwa wa go hlaba mago o be o dirišwa ke Baisiraele mehleng ya Amosi, ka ge dihlare tša sikamore tšeo di bego di bjalwa Isiraele mehleng yeo di be di e-tšwa mehuteng e fapa-fapanego ya mesikamore ya Egipita.

Ge e le gabotse, go hlaba mago go dira gore a kgone go monya meetse le go ba le matute. Mokgwa wo gape o oketša go tšweletšwa ga kgase ya ethylene, yeo e akgofišago go butšwa ga mago gomme se sa feleletša ka go dira gore seenywa e be se segolo le se sebose kudu. Go oketša moo, seboba seo se jago mago ga se kgone go senya seenywa ka gobane se butšwa ka pela.

Go sa šetšwe setlogo sa gagwe sa tlasana bjalo ka modiši le mohlabi wa mago, Amosi ga se a ka a tšhošwa ke manaba a gagwe. Go e na le moo, o ile a tsebatša molaetša wa kahlolo ya Jehofa malebana le Isiraele ka sebete. A mohlala o mobotse gakaakang go bahlanka ba Jehofa lehono, bao ka mo go swanago ba swanetšego go tsebatša molaetša o sa rategego!—Mateo 5:11, 12; 10:22.