Dipotšišo tše Tšwago go Babadi

‘Ntwa ya Modimo Ra-matla-ohle’ yeo e lego Haramagedone ke’ng, gona mafelelo e tla ba afe?—Kutollo 16:14, 16.

Ge e bewa ka go lebanya, ntwa ya Haramagedone ke ntwa ya lefase ka bophara ya nakong e tlago yeo go yona Kgoši e kgethilwego ya Modimo e lego Jesu Kriste, e tlago go fediša manaba a Modimo. Beibele e hlalosa gore manaba a, e lego “dikgoši tša lefase ka moka le go agilwego go lona,” a rapilwe ke “dipolelo tše di buduletšwego ke batemona” gomme a bokanywa gotee go ya “ntweng ya letšatši le legolo la Modimo Ra-matla-ohle. . . lefelong le le bitšwago Haramagedone ka Seheberu.”—Kutollo 16:14, 16.

Lefelo leo dihlopha tša ntwa di bokanago go lona ga se la kgonthe. Leina Haramagedone le bolela gore “Thaba ya Megido.” (Kutollo 16:16) Ga se gwa ka gwa ba le thaba e bitšwago ka leina leo. Go feta moo, “dikgoši tša lefase le madira a tšona” di ka se ke tša kopana lefelong le tee ka tsela ya kgonthe. (Kutollo 19:19) Go e na le moo, ‘lefelo’ ke boemo bjo go bjona babuši ba lefase ba dipolitiki le bathekgi ba bona ba dirilwego gore ba be go bjona—boemo bja go ganetša Jehofa le “madira ao a bego a le legodimong” ka tlase ga taelo ya ntwa e tšwago go “Kgoši ya dikgoši le Morena wa marena,” Jesu Kriste.—Kutollo 19:14, 16.

Se se lemogegago ke gore lentšu “Haramagedone” le tswalana le motse wa Isiraele ya bogologolo wa Megido. Megido, yeo e beilwego ka boomo ka leboa la Thaba ya Karamele, e be e sepelwa gantši ke baananyi le bahlabani mehleng yeo. Le gona e be e le lefelo la dintwa tša makgaola-kgang. Ka mohlala, e be e le “Megido nokeng” moo Moahlodi wa Moisiraele e lego Baraka a ilego a fenya madira a matla a Bakanana ao a bego a eteletšwe pele ke Tona Sisera. (Baahlodi 4:12-24; 5:19, 20) Lefelong lona leo, Moahlodi Gideoni o ile a fenya Bamidiane ya ba moka. (Baahlodi 7:1-22) Ka go tswalanya Megido le ntwa e tlago, Beibele e re kgonthišetša gore Modimo, ka Morwa wa gagwe, o tla fenya sa ruri batho ka moka bao ba lego kgahlanong le yena.

Mafelelo e tla ba afe? Ntwa ya Haramagedone e tla fediša kgobogo le bokgopo ka moka mo lefaseng. E tla bula sebaka bakeng sa mehla e kgahlišago kudu historing ka moka ya batho. (Kutollo 21:1-4) Ka tlase ga boetapele bjo lerato bja Mmušo wa Modimo, lefase le tla fetošwa paradeise yeo baloki ba tlago go phela go yona ka mo go sa felego.—Psalme 37:29.