Ee, e Bonolo, Eupša na e Nepagetše?

KA September 2005, Kereke ya Engelane e ile ya thabela go lokollwa ga Beibele e bitšwago The 100-Minute Bible. Kgatišo ye e mpsha yeo e rulaganyeditšwego go balwa ka metsotso e 100, e akaretša Mangwalo a Seheberu ka dikarolong tše 17 tša letlakala le tee gomme Mangwalo a Segerika a ka dikarolong tše 33 tša letlakala le tee, ka go rialo ga e akaretše seo mmadi yo mongwe a se hlalosago e le “dikarolo ka moka tše di tšwafišago.” Ee, go bonolo go e bala, eupša na e nepagetše?

Ka ntle le gore ga e na leina la Modimo, Jehofa, bontši bja diphapano tše dingwe bo tla lemogwa ke barutwana ba mafolofolo ba Beibele. (Psalme 68:4) Ka mohlala, karolo 1 e bolela gore Modimo “o bopile legodimo le lefase ka matšatši a tshela.” Lega go le bjalo, Genesi 1:1 e bolela feela gore: “Mathomong Modimo ó hlodile lexodimo le lefase.” Ka morago ga moo, pego ya kgonthe e hlalosa megato ya tlholo e latetšego yeo e akaretšago le lefase, yeo e tšerego “matšatši” a tshela goba mabaka a nako. Ke moka, Genesi 2:4 e nea kakaretšo ya nako ka moka ya tlholo, e e bitša gore ke “mehleng ya xe Morêna Modimo a dira lefase le lexodimo.”—Mongwalo o sekamego ke wa rena.

Go ya ka Beibele ya The 100-Minute Bible, Jobo, monna wa go botega, o ile a hlaselwa ke “yo mongwe wa bahlanka [ba Modimo], Sathane, . . . yo boikarabelo bja gagwe e bego e le go šoma e le mmegi wa batho.” Na o bona go se dumelelane mo go lego gona mo? Lentšu “Sathane” le bolela “Moganetši.” Go e na le go ba mohlanka wa Modimo, ge e le gabotse Sathane ke lenaba le legolo la Modimo le mmegi wa batho yo a ipeilego.—Kutollo 12:7-10.

Go thwe’ng ka karolo ya Mangwalo a Bakriste a Segerika ya Beibele ya The 100-Minute Bible? Papišong ya dinku le dipudi, kgatišo ye e mpsha e bolela gore Jesu o amogela bao ba thušitšego “motho le ge e le ofe, go sa šetšwe gore o nyatšega gakaakang,” mola e le gore Jesu ge e le gabotse o boletše gore o šegofatša bao ba dirago botse go balatedi bao ba latelago mohlala wa gagwe—‘bana babo.’ (Mateo 25:40) Kakaretšo ya Kutollo e botša babadi ba yona gore “Roma, e lego Babilona o mogolo, e tla senywa ka mo go feletšego.” Lega go le bjalo, barutwana ba Beibele ba a tseba gore ga go na temana ya mangwalo a mathomo ye e thekgago phetho yeo mabapi le go tsebja ga “Babilona o Mogolo.”—Kutollo 17:15–18:24.

Go bao ba nyakago go tseba Mmopi wa rena le go kwešiša morero wa gagwe, ga go na seo se ka tšeago legato la Beibele e feletšego. Ke therešo gore go bala Beibele go tla tšea metsotso e fetago e 100, eupša go dira bjalo go tliša meputso e megolo kudu. (Johane 17:3) Eka o ka amogela tlhohlo ye gomme o ikhweletše meputso.—2 Timotheo 3:16, 17.