Jehofa ke Modimo yo a Nago le Tebogo
Jehofa ke Modimo yo a Nago le Tebogo
“Modimo ga se yo a sa lokago moo a ka lebalago modiro wa lena le lerato leo le le bontšhitšego leineng la gagwe.”—BAHEBERU 6:10.
1. Jehofa o ile a bontšha bjang tebogo ya gagwe bakeng sa Ruthe wa Momoaba?
JEHOFA o tšeela godimo kudu maiteko a bao ba tlogago ba nyaka go dira thato ya gagwe gomme o ba putsa ka mo go humilego. (Baheberu 11:6) Monna yo a botegago Boase o be a tlwaelane le karolo ye e botse ya semelo sa Modimo ka gobane o ile a botša Ruthe wa Momoaba, yoo ka lerato a ilego a hlokomela mmatswale’agwe wa mohlologadi, gore: “Morêna a a Xo bušetšê tše O di dirilexo; moputsô o tletšexo O o fiwê ke Morêna.” (Ruthe 2:12) Na Ruthe o ile a šegofatšwa ke Modimo? Ee! Ge e le gabotse, pego ya bophelo bja gagwe e gona ka Beibeleng! Go oketša moo, o ile a nyalana le Boase gomme a ba makgolokhukhu wa Kgoši Dafida le Jesu Kriste. (Ruthe 4:13, 17; Mateo 1:5, 6, 16) Mohlala woo e fo ba o mongwe wa mehlala e mentši ya ka Beibeleng yeo e bontšhago tebogo ya Jehofa bakeng sa bahlanka ba gagwe.
2, 3. (a) Ke’ng seo se dirago gore dipontšho tša Jehofa tša tebogo di kgahliše? (b) Ke ka baka la’ng Jehofa a kgona go bontšha tebogo ya kgonthe? Bontšha.
2 Jehofa o tla lebelela go se bontšhe ga gagwe tebogo e le go se loke. Baheberu 6:10 e re: “Modimo ga se yo a sa lokago moo a ka lebalago modiro wa lena le lerato leo le le bontšhitšego leineng la gagwe, ka ge le diretše bakgethwa e bile le tšwela pele le ba direla.” Seo se dirago gore taba ye e kgahliše ke gore Modimo o bontšha batho bao ba ineetšego tebogo gaešita le ge e le badiradibe e bile ba hlaelelwa ke letago la gagwe.—Baroma 3:23.
3 Ka baka la go se phethagale ga rena, re ka bona nke mediro ya rena ya boineelo go Modimo ke e sa rego selo le yeo e sa swanelwego ke tšhegofatšo ya Modimo. Lega go le bjalo, Jehofa o kwešiša maikemišetšo a rena le maemo a rena ka mo go feletšego, gomme o tšeela godimo tirelo ya rena ya moya ka moka e le ruri. (Mateo 22:37) Ka mohlala: Mma o hwetša mpho—pheta e sa bitšego tšhelete e ntši—tafoleng ya gagwe. A ka fo bona mpho e le e sa rego selo gomme a e hlokomologa. Lega go le bjalo, karata yeo e sepelago le yona e bontšha gore mpho yeo e tšwa go ngwanenyana wa gagwe yo monyenyane, yoo a tšerego tšhelete ya gagwe ka moka yeo a bego a e boloka gore a e reke. Mma bjale o bona mpho yeo ka leihlo le lengwe. Mohlomongwe o gokarela ngwana wa gagwe a sekišitše megokgo go mmontšha tebogo e tšwago pelong.
4, 5. Jesu o ekišitše Jehofa bjang ka go bontšha tebogo?
4 Ka ge a tseba maikemišetšo a rena le mafokodi a rena ka mo go feletšego, Jehofa o rata gore re mo nee sohle seo re se kgonago, go sa šetšwe gore ke se senyenyane goba se segolo. Tabeng ye, Jesu e be e le seswantšho se se phethagetšego sa Tatagwe. Nagana ka pego ya Beibele ya mabapi le tšheletiana ya mohlologadi. “Ge [Jesu] a lebelela a bona bahumi ba lahlela dimpho tša bona ka matloleng a matlotlo. Ke moka a bona mohlologadi yo mongwe wa mohloki a lahlela ditšheletiana tša tšhipi tše pedi tša theko e nyenyane kudu, gomme a re: ‘Ruri, ke a le botša, Mohlologadi yo gaešita le ge a diila, o lahletše go feta kamoo bohle ba lahletšego. Gobane ba ka moka ba lahletše dimpho ba ntšha go tše di ba tlaletšego, eupša mosadi yo bohloking bja gagwe, o lahletše sohle seo a bego a iphediša ka sona.’”—Luka 21:1-4.
5 Ee, ka ge Jesu a be a tseba maemo a mosadi yoo—gore e be e le mohlologadi e bile a diila—o ile a kwešiša tekanyo ya kgonthe ya mpho ya gagwe gomme o ile a e tšeela godimo kudu. Go ka bolelwa se se swanago ka Jehofa. (Johane 14:9) Na ga se mo go kgothatšago go tseba gore go sa šetšwe maemo a gago, o ka amogelwa ke Modimo wa rena yo a nago le tebogo le Morwa wa gagwe?
Jehofa o Putsa Moethiopia yo a Boifago Modimo
6, 7. Ke ka baka la’ng le gona ke bjang Jehofa a ilego a bontšha tebogo ya gagwe bakeng sa Ebede-meleke?
6 Taba ya gore Jehofa o putsa bao ba phethago thato ya gagwe e bontšhitšwe gantši ka Mangwalong. Ela hloko ditirišano tša gagwe le Moethiopia yo a boifago Modimo e lego Ebede-meleke, yo a phetšego mehleng ya Jeremia e bile e le molaki wa ngwako wa Kgoši Tsedekia yo a sa botegego wa Juda. Ebede-meleke o ile a kwa gore ka go hloka toka bakgomana ba Juda ba latofaditše moporofeta Jeremia ka gore ke twantšha-molao le gore ba mo lahletše ka moleteng, e le gore a hwe ka tlala. (Jeremia 38:1-7) Ka go tseba gore Jeremia o be a hloilwe o šoro ka baka la molaetša woo a bego a o goeletša, Ebede-meleke o ile a bea bophelo bja gagwe kotsing gomme a bolela le kgoši. Moethiopia yo o boletše ka sebete gore: “Kxoši Mong’a-ka! Banna bao, ka tšohle tše ba di dirilexo moporofeta Jeremia, ba šaeditše; xe ba mo lahletše moleteng, ó tlo hwêla moo ka tlala.” A laetšwe ke kgoši, Ebede-meleke o ile a tšea banna ba 30 gomme a yo phološa moporofeta wa Modimo.—Jeremia 38:8-13.
7 Jehofa o ile a bona gore Ebede-meleke o be a e-na le tumelo, yeo e mo thušitšego go fenya poifo le ge e le efe yeo a ka bego a be a e-na le yona. Ka baka leo, Jehofa ile a bontšha tebogo ya gagwe gomme a botša Ebede-meleke ka Jeremia gore: “Tseba xore ke tlo tšweletša bošula byo ke bo boletšexo kè e-ra motse wó; xa ke tliše tše botse . . . Xe e le wêna, ke tlo Xo hlakodiša mohla woo! . . . O ka se kê wa xafêlwa diatleng tša bao O ba boifaxo. Ke tlo Xo lesa wa pholoxêla ruri . . . ; O tlo phônyôkxa Ò ithopetše bophelô bya xaxo, ka xobane O botile Nna.” (Jeremia 39:16-18) Ee, Jehofa o ile a phološa Ebede-meleke gotee le Jeremia, go bakgomana ba kgopo ba Juda gomme ka morago a ba phološa go Bababilona, bao ba ilego ba phušola Jerusalema. Psalme 97:10 e re: “[Jehofa] ké Yêna Molotodi wa meôya ya baratwa b’axwe; ó ba namolêla diatleng tša bakxôpô.”
“Tatago yo a Bonago Sephiring o tla go Putsa”
8, 9. Bjalo ka ge Jesu a bontšhitše, Jehofa o thabela dithapelo tša mohuta mang?
8 Bohlatse bjo bongwe bja gore Jehofa o a leboga e bile o tšeela godimo go bontšha ga rena boineelo go Yena bo ka bonwa go seo Beibele e se bolelago mabapi le thapelo. Monna yo bohlale o boletše gore: “[Modimo] ó kxahlwa ke thapêlo ya baloki.” (Diema 15:8) Mehleng ya Jesu baetapele ba bantši ba bodumedi ba be ba rapela phatlalatša, e sego ka tlhompho ya kgonthe ya borapedi, eupša ka kganyogo ya go kgahliša batho. Jesu o ile a re: “Ba hwetša moputso wa bona ka botlalo.” O ile a laela balatedi ba gagwe gore: “Lega go le bjalo, wena ge o rapela, tsena phapošing ya gago gomme ge o tswaletše mojako wa gago, rapela Tatago yo a lego sephiring; ke moka Tatago yo a bonago sephiring o tla go putsa.”—Mateo 6:5, 6.
9 Ke therešo gore Jesu o be a sa ganetšane le go rapela phatlalatša, ka gobane le yena o be a rapela phatlalatša ka dinako tše dingwe. (Luka 9:16) Jehofa o thaba kudu ge re mo rapela go tšwa pelong, e sego ka maikemišetšo a go kgahla ba bangwe. Ge e le gabotse, dithapelo tša rena tša ka sephiring di bontšha gabotse gore re rata Modimo le go mmota gakaakang. Ka gona, ga go makatše gore gantši Jesu o ile a nyaka mafelo a ka sephiring gore a yo rapela. Lebakeng le lengwe, o dirile se “e sa le bosasa, ge go be go sa fsifetše.” Lebakeng le lengwe gape, o ile “a rotogela thabeng a nnoši gore a yo rapela.” Gomme pele a kgetha baapostola ba gagwe ba 12, Jesu o ile a fetša bošego ka moka a rapela a nnoši.—Mareka 1:35; Mateo 14:23; Luka 6:12, 13.
10. Ge dithapelo tša rena di bonagatša potego le maikwelo a tseneletšego, re ka kgonthišega ka’ng?
10 Nagana kamoo Jehofa a bego a theeditše ka kelohloko ka gona dithapelo tša Morwa wa gagwe tše tšwago pelong! Ee, ka dinako tše dingwe Jesu o be a rapela “ka megoo e matla le megokgo, gomme a kwewa ka mo go amogelegago ka baka la go boifa Modimo ga gagwe.” (Baheberu 5:7; Luka 22:41-44) Ge dithapelo tša rena di bonagatša potego e bjalo le maikwelo a bjalo a tseneletšego, re ka kgonthišega gore Tatago rena wa legodimong o re theeditše ka kelohloko le ka tebogo. Ee, “Morêna ó kxaufsi le bohle . . . ba e rexo xe ba mmitša ba rereša.”—Psalme 145:18.
11. Jehofa o ikwa bjang ka seo re se dirago ka sephiring?
11 Ge e ba Jehofa a thaba ge re mo rapela ka sephiring, ruri o swanetše go ba a thaba kudu ge re mo kwa ka sephiring! Ee, Jehofa o bona seo re se dirago ka sephiring. (1 Petro 3:12) Ka kgonthe, go botega ga rena le go kwa ge re nnoši ke leswao le lebotse la gore re direla Jehofa ka “pelo yohle,” yeo e nago le maikemišetšo a mabotse le yeo e emelago se se lokilego ka go tia. (1 Koronika 28:9) Ruri boitshwaro bjo bjalo bo thabiša pelo ya Jehofa!—Diema 27:11; 1 Johane 3:22.
12, 13. Re ka diša menagano le dipelo tša rena bjang gomme ra ba bjalo ka morutiwa yo a botegago Nathaniele?
12 Ka baka leo, Bakriste ba botegago ba phema go dira dibe tša ka sephiring tšeo di senyago monagano le pelo, tše bjalo ka go bogela diswantšho tše di kgothaletšago bootswa le bošoro. Gaešita le ge dibe tše dingwe di ka utelwa batho, re a tseba gore “dilo ka moka di hlobotše e bile di molaleng mahlong a yo re ikarabelago go yena.” (Baheberu 4:13; Luka 8:17) Ka go katanela go phema dilo tšeo di sa kgahlišego Jehofa, re ba le letswalo le lebotse le go thabela go tseba gore Modimo o a re amogela. Ee, ga go pelaelo gore Jehofa ruri o thabela motho “yo a swerexo tsela ya bothakxa, a dira tša xo loka, a búa therešô ka pelo.”—Psalme 15:1, 2.
13 Lega go le bjalo, re ka diša menagano le dipelo tša rena bjang lefaseng leo le tletšego bobe? (Diema 4:23; Baefeso 2:2) Go tlaleletša go dirišeng ka botlalo ditokišetšo ka moka tša moya, re swanetše go dira sohle seo re ka se kgonago go gana se sebe gomme re dire se sebotse, re dira seo ka go akgofa e le gore dikganyogo tše sa swanelago di se ke tša emara gomme tša tswala sebe. (Jakobo 1:14, 15) Nagana gore o be o tla thaba bjang ge nkabe Jesu a boletše ka wena ka tsela yeo a ilego a bolela ka Nathaniele gore: “Bonang, [monna] yoo go se nago bofora go yena.” (Johane 1:47) Ka morago Nathaniele, yo gape a bitšwago Baratholomeo, o ile a ba le tokelo ya go ba yo mongwe wa baapostola ba Jesu ba 12.—Mareka 3:16-19.
“Moperisita yo a Phagamego yo a Gaugelago le yo a Botegago”
14. Karabelo ya Jesu tirong ya Maria e be e fapana bjang le ya ba bangwe?
14 Ka ge e le “seswantšho sa Modimo yo a sa bonagalego,” Jehofa, Jesu o dula a ekiša Tatagwe ka go bontšha bao ba hlankelago Modimo go tšwa pelong tebogo ka tsela e phethagetšego. (Bakolose 1:15) Ka mohlala, matšatši a mahlano pele a neela bophelo bja gagwe, Jesu le ba bangwe ba barutiwa ba gagwe ba be ba etetše lapeng la Simone wa Bethania. Mantšiboeng ao, Maria, kgaetšedi’a Latsaro le Mareta, o ile “a tšea makhura a monko o mobose a boima bja ponto, e lego nareda ya kgonthe ya theko e kgolo kudu” (a theko ya mogolo wa ngwaga ka moka), gomme a tšhela Jesu hlogo le dinao. (Johane 12:3) Ba bangwe ba ile ba re: “Tshenyo ye ke ya’ng?” Lega go le bjalo, Jesu o ile a bona tiro ya Maria ka leihlo le le fapanego. O e bone e le tiro ya go bontšha go ba le seatla se se bulegilego le e nago le seo e tlogago e se bolela mabapi le lehu la gagwe leo le bego le le kgaufsi gotee le poloko ya gagwe. Ka go rialo, go e na le go mo kgalema, Jesu o ile a mo godiša. O itše: “Kae le kae mo ditaba tše tše dibotse di bolelwago gona lefaseng ka moka, se mosadi yo a se dirilego le sona se tla bolelwa e le go mo gopola.”—Mateo 26:6-13.
15, 16. Re holwa bjang ke go phela ga Jesu le go hlankela ga gagwe Modimo e le motho?
15 Ruri re na le tokelo e kgolo ya go ba le motho yo a nago le tebogo bjalo ka Jesu e le Moetapele wa rena! Ge e le gabotse, bophelo bja Jesu bjalo ka motho bo mo lokišeleditše mošomo woo Jehofa a bego a mmeetše wona—go hlankela e le Kgoši le Moperisita yo a Phagamego, wa pele wa phuthego ya batlotšwa le wa lefaseng.—Bakolose 1:13; Baheberu 7:26; Kutollo 11:15.
16 Pele a e-tla lefaseng, Jesu o be a šetše a kgahlegela batho ka mo go tseneletšego le go ba rata ka tsela e kgethegilego. (Diema 8:31) Ge a be a phela bjalo ka motho, o ile a kwešiša ka mo go tletšego diteko tšeo re lebanago le tšona ge re direla Modimo. Moapostola Paulo o ngwadile gore: “[Jesu] o be a tlamegile go swana le ‘bana babo’ ka ditsela tšohle gore e be moperisita yo a phagamego yo a gaugelago le yo a botegago. . . Gobane ka ge yena a ile a tlaišega ge a be a lekwa, o kgona go thuša bao ba lekwago.” Jesu a ka re “kwela bohloko bofokoding bja rena” ka gobane ke yo a “lekilwego ka ditsela tšohle go swana le rena, eupša a se na sebe.”—Baheberu 2:17, 18; 4:15, 16.
17, 18. (a) Mangwalo ao a yago diphuthegong tše šupago tša Asia Minor a utolla’ng ka tebogo yeo Jesu a nago le yona? (b) Bakriste ba tloditšwego ba be ba lokišeletšwa’ng?
17 Go lemoga ga Jesu diteko tša balatedi ba gagwe ka mo go oketšegilego go bonagetše ka morago ga tsogo ya gagwe. Ela hloko mangwalo a gagwe ao a yago diphuthegong tše šupago tša Asia Minor ao a ngwadilwego ke moapostola Johane. Jesu o boditše phuthego ya Simirina gore: “Ke tseba tlaišego ya gago le bodiidi bja gago.” Mo ge e le gabotse Jesu o be a re, ‘Ke kwešiša mathata a gago ka botlalo; ruri ke kwešiša seo o lebeletšanego le sona.’ Ke moka, ka ge le yena a ile a tlaišega go fihla lehung, ka kgaugelo le ka kgonthišetšo Jesu o okeditše ka gore: “Itlhatsele o botega gaešita le go iša lehung, gomme ke tla go nea mphapahlogo wa bophelo.”—Kutollo 2:8-10.
18 Mangwalo ao a yago diphuthegong tše šupago a tletše ka dipolelo tšeo di bontšhago gore Jesu o be a lemoga mathata a barutiwa ba gagwe le tebogo ya gagwe ya kgonthe bakeng sa go phela ga bona ka potego. (Kutollo 2:1–3:22) Gopola gore Jesu o be a bolela le Bakriste ba tloditšwego bao ba nago le kholofelo ya go buša gotee le yena legodimong. Ka go swana le Morena wa bona, ba be ba lokišeletšwa maemo a bona a phagamego a go thuša go diriša mehola ya sehlabelo sa Kriste sa topollo bathong bao ba babjago, ka kwelobohloko e kgolo kudu.—Kutollo 5:9, 10; 22:1-5.
19, 20. Bao ba dirago “lešaba le legolo” ba bontšha bjang go leboga ga bona Jehofa le Morwa wa gagwe?
19 Ka kgonthe, lerato leo Jesu a ratago balatedi ba gagwe ba tloditšwego ka lona o rata le “dinku tše dingwe” ka lona, e lego dimilione tšeo gona bjale di dirago “lešaba le legolo . . . le le tšwago ditšhabeng tšohle” la ka moso, leo le tlago go phologa “masetlapelong a magolo” ao a tlago. (Johane 10:16; Kutollo 7:9, 14) Bona ba ba kgeregela ka lehlakoreng la Jesu e le ge ba bontšha go leboga ga bona sehlabelo sa gagwe sa topollo le kholofelo ya bona ya bophelo bjo bo sa felego. Ba bontšha tebogo ya bona bjang? Ba dira seo ka go “direla [Modimo] tirelo e kgethwa mosegare le bošego.”—Kutollo 7:15-17.
20 Pego ya lefase ka bophara ya ngwaga wa tirelo wa 2006, yeo e lego go matlakala 27 go ya go 30, e nea bohlatse bjo bo lego molaleng bja gore bahlanka ba ba direla Jehofa “tirelo e kgethwa mosegare le bošego” e le ka kgonthe. Ge e le gabotse, wona ngwageng woo o tee, bona gotee le mašaledi a sego kae a sehlopha sa Bakriste ba tloditšwego ba gafile palo-moka ya diiri tše 1 333 966 199 bodireding bja phatlalatša—e lego tšeo di lekanago le nywaga e 152 283!
Tšwela Pele o Bontšha Tebogo!
21, 22. (a) Mabapi le go bontšha tebogo, ke ka baka la’ng Bakriste ba swanetše go itlhokomela kudu lehono? (b) Ke’ng seo se tlago go ahla-ahlwa sehlogong se se latelago?
21 Ge Jehofa le Morwa wa gagwe ba dirišana le batho ba sa phethagalago, ba bontšha tebogo yeo e tlogago e kgahliša e le ruri. Lega go le bjalo, ka manyami batho ba bantši ga ba iše felo ka Modimo, gomme ba lebišitše tlhokomelo kudu dilong tšeo bona ba tshwenyegilego ka tšona. Ge a bolela ka batho bao ba phelago “mehleng ya bofelo,” Paulo o ngwadile gore: “Batho e tla ba ba ithatago ka mo go feletšego, bao ba ratago tšhelete e le ruri . . . Bao ba tlogago ba se na tebogo.” (2 Timothy 3:1-5, Phillips) Ruri batho ba bjalo ba fapana le Bakriste ba therešo, bao ka thapelo e tšwago pelong, go kwa ka go rata le ka tirelo ya moya ka moka ba bontšhago go leboga ga bona seo Modimo a ba diretšego sona!—Psalme 62:8; Mareka 12:30; 1 Johane 5:3.
22 Sehlogong se se latelago, re tla ahla-ahla tše dingwe tša ditokišetšo tše dintši tša moya tšeo ka lerato Jehofa a re filego tšona. Ge re nagana ka ‘dimpho tše tše dibotse,’ anke tebogo ya rena e gole le go feta.—Jakobo 1:17.
O be o tla Araba Bjang?
• Jehofa o ipontšhitše bjang e le Modimo yo a nago le tebogo?
• Ge re le ka sephiring, re ka thabiša pelo ya Jehofa bjang?
• Jesu o ile a bontšha tebogo ka ditsela dife?
• Go phela e le motho go thušitše Jesu bjang go ba le kwelobohloko le go ba mmuši yo a nago le tebogo?
[Dipotšišo tša Thuto]
[Seswantšho go letlakala 17]
Go fo swana le ge motswadi a rata pontšho e nyenyane ya lerato ya ngwana wa gagwe, Jehofa o thaba kudu ge re mo direla ka mo re ka kgonago