Phihlelo

Lebaka Leo ka Lona ke Thabelago go Dira Barutiwa

KA GE GO ANEGA PAMELA MOSELEY

Ntwa e be e le e šoro kua Engelane ge mma a be a e-ya le nna kopanong ya Dihlatse tša Jehofa kua Leicester ka 1941. Albert Schroeder o beile polelo e kgethegilego yeo e bego e bolela ka bana. Ge nna le mma re be re kolobetšwa kopanong yeo, ke ile ka lemoga gore bao ba ilego ba re thuša go tšwela pele moyeng ba be ba thabile kudu. Ka nako yeo ke be ke sa lemoge gore go dira batho barutiwa ba Jesu Kriste go tliša lethabo le lekaakang.

TŠWELOPELE ya rena e lebišitšego go beng barutiwa e thomile ngwaga pele ga moo. Ke sa dutše ke gopola letšatši leo le bego le boifiša la September 1939 ge go be go thoma Ntwa ya II ya Lefase. Ka mehla ke be ke bona mma a tšholla megokgo ge a be a botšiša gore, “Ke ka baka la’ng go sa be le khutšo mo lefaseng?” Batswadi ba-ka ba hlanketše go tša bohlabani nakong ya Ntwa ya I ya Lefase gomme ba bone bošoro bja yona. Mma o ile a botšiša moruti wa Anglican kua Bristol potšišo yeo. O ile a araba ka go fo re: “Dintwa di be di dutše di le gona e bile di tla dula di le gona.”

Lega go le bjalo, nakwana ka morago ga moo, mokgekolo yo mongwe o ile a re etela. E be e le yo mongwe wa Dihlatse tša Jehofa. Mma o ile a mmotšiša potšišo yona yela e rego: “Ke ka baka la’ng go sa be le khutšo mo lefaseng?” Hlatse ye e ile ya hlalosa gore dintwa ke le lengwe la maswao ao a bontšhago gore re phela bofelong bja tshepedišo ye e thata ya dilo. (Mateo 24:3-14) Go se go ye kae, ke ge morwedi wa yona a ithuta Beibele le rena. Bobedi bja bona ba be ba le gare ga batho bao ba ilego ba thabela go bona ge re kolobetšwa. Ke ka baka la’ng go dira barutiwa go thabiša batho gakaakaa? Ke ile ka lemoga seo ka morago. E re ke go botše tše dingwe tša dilo tšeo ke ithutilego tšona nywageng e fetago 65 ya go dira barutiwa.

 Go Lemoga Lethabo le le Tlišwago ke go Ruta

Ke thomile modiro wa go bolela ka Mmušo kua Bristol ge ke be ke e-na le nywaga e 11. Ngwanabo rena yo mongwe o ile a nnea keramafomo le karata ya bohlatse gomme a re: “Ga bjale, etela malapa ka moka ao a lego ka lehlakoreng leo la setarata.” Ke moka ke ile ka thoma go dira bjalo ke nnoši. Ke therešo gore ke be ke tšhogile kudu. Ke be ke bapala polelo e gatišitšwego ya Beibele gomme ke bontšha mong wa ntlo karata ya bohlatse, yeo e bego e laletša batho gore ba amogele dipuku tše di theilwego Beibeleng.

Go thoma ka bo-1950, go ile gwa gatelelwa kudu gore re bale Beibele maetong a rena a ntlo le ntlo. Mathomong, go ba ga-ka le dihlong go ile gwa dira gore ke thatafalelwe ke go boledišana le batho bao ke sa ba tsebego le go hlalosa ditemana tša Beibele. Eupša ke ile ka ba le sebete mafelelong. Yeo e be e le nako ya ge ke be ke thoma go thabela bodiredi. Batho ba bangwe ba be ba re lebelela re le barekiši feela ba dipuku, eupša ge re be re ba balela le go ba hlalosetša ditemana tša Beibele, ba ile ba re lebelela re le barutiši ba Lentšu la Modimo. Ke be ke thabela go dira modiro wo mo ke ilego ka nyaka go tšea karolo go ona ka mo go oketšegilego. Ka baka leo, ke ile ka tsenela bodiredi bja nako e tletšego ka ba mmulamadibogo ka September 1955.

Go Phegelela go Tliša Meputso

E nngwe ya dithuto tša pele tšeo ke ilego ka ithuta tšona ke gore go phegelela ka tsela e botho go ka tliša meputso. Ka letšatši le lengwe, ke ile ka sepedišetša mosadi yo a bitšwago Violet Morice kopi ya makasine wa Morokami. Ge ke be ke boela go yena, o ile a ahlamiša mojako, a phutha matsogo gomme a theetša ka kelohloko ge ke be ke mo hlalosetša Mangwalo. Nako le nako ge ke be ke mo etela, o be a bonagala a thabela e le ka kgonthe. Lega go le bjalo, ge ke be ke ithapela go ithuta Beibele le yena ka mehla, o ile a re: “Aowa. Ke tla bala ge bana ba godile.” Ke be ke nyamile e le ruri! Beibele e bolela gore “xo nyaka xo na le mohla wa xôna, le xo tšitlanya xo na le mohla wa xôna.” (Mmoledi 3:6) Ke ile ka dira phetho ya gore ke se ke ka langwa.

Ka morago ga kgwedi, ke ile ka boela go Violet gomme ka ahla-ahla mangwalo a mmalwa le yena. Go se go ye kae, ke ge re swara thuto ya Beibele ya beke le beke mojakong. O ile a feleletša ka gore: “Ke nagana gore go kaone o tsene ka ngwakong, wena o re’ng?” Violet o ile a fetoga modumedi-gotee le mogwera yo botse gakaakang! Ee, Violet o ile a kolobetšwa gore e be yo mongwe wa Dihlatse tša Jehofa.

Ka letšatši le lengwe, Violet o ile a makatšwa ke go kwa gore monna wa gagwe o rekišitše legae la bona yena a sa tsebe le gore o mo tlogetše. Se se thabišago ke gore ka thušo ya mogwera yo e lego Hlatse, o ile a hwetša legae le lengwe thapameng yona yeo. Ka baka la tebogo ya gagwe go Jehofa, o ile a dira phetho ya go fetša bophelo bja gagwe ka moka e le mmulamadibogo. Ge ke be ke bona moya wa Jehofa o mo nea mafolofolo borapeding bja therešo, ke ile ka lemoga lebaka leo ka lona go dira barutiwa go tlišago lethabo le bjalo. Ee, wo e be e tla ba modiro wa bophelo bja-ka ka moka!

Ka 1957, nna le Mary Robinson re ile ra abelwa go bula madibogo tikologong ya diintaseteri ya Rutherglen kua Glasgow, Scotland. Re be re dira boboledi go e-na le kgodi, moya, pula le lehlwa, eupša go bile le mohola. Ka letšatši le lengwe, ke ile ka kopana le Jessie. Ke be ke thabela go ithuta Beibele le yena. Monna wa gagwe, Wally, e be e le Mokomanisi gomme o be a nkatoga mathomong. Ge a be a ithuta Beibele gomme a lemoga gore ke Mmušo wa Modimo feela wo o tlago go tliša maemo a mabotse bathong, o ile a thaba kudu. Ge nako e dutše e e-ya, bobedi bja bona ba ile ba dira batho barutiwa.

Karabelo ya Mathomo e ka Fora

Ka morago re ile ra amogela kabelo e mpsha ya go ya Paisley, kua Scotland. Ka letšatši le lengwe ge ke be ke dira boboledi gona moo, kgarebe e nngwe  e ile ya fo tswalela mojako mahlong a-ka. Eupša ka morago e ile ya šala e nyakana le nna e le gore e kgopele tebalelo. Ge ke be ke boa bekeng e latelago, e itše: “Ke ile ka ikwa eka ke tswaletše mojako pele ga mahlo a Modimo ka boyena. Ke ile ka fo swanelwa ke go tšama ke go nyaka.” Leina la yona e be e le Pearl. E mpoditše gore e be e nyamišitšwe ke bagwera le ba leloko mo e ilego ya feleletša e rapela gore Modimo a e nee mogwera wa therešo. E itše: “Ke moka o ile wa tla ka gae. Bjale ke nagana gore o ka no ba o le mogwera yoo wa therešo.”

Go be go se bonolo go ba mogwera wa Pearl. O be a dula godimo-dimo ga mmoto gomme ke be ke swanetše go o namela ka maoto. Ge ke be ke e-ya mo a dulago gona go yo mo tšea gore ke ye le yena la mathomo sebokeng, moya le pula di ile tša nyaka di mpea fase. Samporela sa-ka se ile sa robega gomme ka se lahla. Dikgweding tše tshela feela ka morago ga gore a tswalele mojako mahlong a-ka, Pearl o ile a bonagatša boineelo bja gagwe go Modimo ka go kolobetšwa meetseng.

Nakwana ka morago ga moo, monna wa gagwe o ile a ithuta Beibele gomme go se go ye kae o ile a ya le nna bodireding bja ntlo le ntlo. Ka ge e le tlwaelo, pula e be e e-na. O ile a re: “O se ke wa tshwenyega. Ke ema boemong bja leratadima bjo bo swanago le bjo diiri tše dintši ke bogetše kgwele ya maoto, ka gona nka emeletšana le pula ke direla Jehofa.” Ka mehla ke be ke makatšwa ke moya wa boikemišetšo wa batho ba Scotland.

Ke ile ka thaba gakaakang ge ke be ke boa ka morago ga nywaga e mentši gomme ke hwetša bontši bja bao ke ithutilego le bona ba sa dutše ba kgotleletše tumelong! Leo ke lethabo le le tlišwago ke go dira barutiwa. (1 Bathesalonika 2:17-20) Ka 1966, ka morago ga nywaga e fetago e seswai ke bula madibogo kua Scotland, ke ile ka laletšwa go ya Sekolong sa Beibele sa Watchtower sa Gilead e le gore ke tlwaeletšwe go ba moromiwa.

Tšhemong e Šele

Ke ile ka abelwa gore ke ye Bolivia, toropo ya molatšatšing ya Santa Cruz, mo go bego go e-na le phuthego ya batho ba ka bago ba 50. Toropo ye e ile ya nkgopotša bodikela bja United States go etša ge bo bontšhwa difiliming tša Hollywood. Ge ke gopola morago, ke nagana gore ke be ke le moromiwa yo a tlwaelegilego. Ga se ka ka ka hlaselwa ke dikwena, ka dikologwa ke dihlopha tše šoro tša batho bao ba galefilego, ka timela leganateng goba ka robegelwa ke sekepe mawatleng a magolo. Lega go le bjalo, go dira barutiwa e bile mo go kgahlišago kudu go nna.

Yo mongwe wa basadi ba pele bao ke ithutilego Beibele le bona kua Santa Cruz e be e le Antonia. Ke be ke thatafalelwa ke go ruta ka Sepaniši. Morwa yo monyenyane wa Antonia o kile a re: “Mma, na o dira diphošo e le gore a re segiše?” Mafelelong, Antonia e ile ya ba morutiwa, go akaretša le morwedi wa gagwe e lego Yolanda. Yolanda o be a e-na le mogwera, yo a bego a ithutela molao gomme leina la gagwe la dikwero e be e le Dito, yoo le yena a ilego a thoma go ithuta Beibele le go ba gona dibokeng tša rena. Ge ke šoma le yena, ke ithutile selo se sengwe mabapi le go ruta therešo ya Beibele: Batho ka dinako tše dingwe ba nyaka go kgorometšwa go se nene.

Ge Dito a be a thoma go se sa ba gona bakeng sa go ithuta, ke ile ka re: “Dito, Jehofa ga a go gapeletše go thekga Mmušo wa gagwe. O swanetše go ikgethela.” Ge a be a araba ka gore o nyaka go hlankela Modimo, ke ile ka re: “O na le diswantšho mo tša moetapele yo a bakago tlhakahlakano e kgolo. Na moeng yo a ka di bonago a ka phetha ka gore o kgethile go thekga Mmušo wa Modimo?” Moo e be e le go kgorometšwa go se nene mo a bego a go nyaka.

Dibekeng tše pedi ka morago, go ile gwa tsoga moferefere, gomme gwa thoma ntwa ya dithunya magareng ga barutwana ba yunibesithing le maphodisa. Dito o ile a goeletša mogwera wa gagwe ka gore: “A re tloge mo!” Mogwera wa gagwe yo a bego a tšea sethunya e bile a namela marulelong a moago wa yunibesithi o ile a araba ka gore: “Aowa! Le ke letšatši la rena le legolo leo re bego re dutše re le letetše.” E be e le yo mongwe wa bagwera ba Dito ba seswai bao ba ilego ba hwa ka letšatši leo. Na o kwešiša lethabo le ke bago le lona ge ke bona monna yo, Dito, yo a ka bago a ile a hwa ge nkabe a se a ka a dira phetho ya go ba Mokriste wa therešo?

Go Bona Moya wa Jehofa o Šoma

Ka letšatši le lengwe ge ke be ke feta ngwako o mongwe, wo ke bego ke nagana gore re šetše re o etetše, mosadi wa ka moo ngwakong woo o ile a  mpitša. Leina la gagwe e be e le Ignacia. O be a tseba ka Dihlatse tša Jehofa, eupša kganetšo e šoro ya monna wa gagwe—tona ya senatla ya maphodisa yeo e bitšwago Adalberto—e ile ya mo palediša go tšwela pele moyeng. O be a gakantšhwa ke dithuto tše dintši tša motheo tša Beibele, ka gona ke ile ka thoma go ithuta Beibele le yena. Gaešita le ge Adalberto a be a ikemišeditše go thibela dithuto tše tša Beibele, ke ile ka kgona go boledišana le yena ka nako e telele kudu ka ditaba tše dingwe. E be e le mogato wa mathomo wa go re gweranya.

Nagana ka lethabo leo ke ilego ka ba le lona ge ke be ke bona Ignacia a e-ba setho se se rategago sa phuthego, a hlokomela boemo bja nama le bja moya bja ba bantši bao ba nyakago khomotšo. Ge nako e dutše e e-ya, monna wa gagwe le bana ba bararo ba ile ba ba Dihlatse. Ge e le gabotse, ge Adalberto mafelelong a be a kwešiša moko wa seo se bolelwago ke ditaba tše dibotse, o ile a boela lefelong la maphodisa gomme a bolela ka mafolofolo moo maphodisa a ilego a ba a kgopela dipeeletšo tše 200 tša Morokami le Phafoga!

Jehofa o a Mediša

Ka morago ga go hlankela kua Santa Cruz ka nywaga e tshela, ke ile ka abelwa go ya toropong e kgolo ya Bolivia, La Paz, mo ke ilego ka fetša nywaga e 25. Mathomong a bo-1970, legae la lekala la Dihlatse tša Jehofa kua La Paz le be le e-na le palo-moka ya ditho tše 12 feela. Ge modiro wa boboledi o be o dutše o katologa, go ile gwa nyakega mafelo a oketšegilego gomme moago o mofsa wa lekala o ile wa agwa toropong yeo e bego e gola ka lebelo ya Santa Cruz. Lekala le ile la agwa moo ka 1998, gomme ke ile ka laletšwa gore ke tle ke be setho sa bašomi ba lekaleng, leo ga bjale le nago le ditho tše fetago 50.

Phuthego e nnoši yeo e bego e le gona Santa Cruz morago kua ka 1966 e fetogile diphuthego tše fetago 50. Dihlatse ka moka tše 640 tšeo di bego di le kua Bolivia ka nako yeo, lehono ke tše nyakilego go ba tše 18 000!

Go a thabiša gore kabelo ya-ka ya Bolivia e ile ya enywa dienywa. Lega go le bjalo, ka mehla ke kgothatšwa ke go botega ga Bakriste-gotee gohle. Ka moka ga rena re thabela go bona tšhegofatšo ya Jehofa modirong wa go bolela ka Mmušo. Ruri go a thabiša go tšea karolo modirong wa go dira barutiwa.—Mateo 28:19, 20.

[Seswantšho go letlakala 13]

Go bula madibogo kua Scotland

[Diswantšho go letlakala 15]

Go hlankela ofising ya lekala kua Bolivia; (gare) go aloga ga sehlopha sa bo-42 sa Gilead