O ka Ithuta’ng Baneng?

“O ITSHWERE bjalo ka ngwana!” Ge re be re ka botšwa mantšu ao, re be re ka kgopišega. Gaešita le ge ba kgahliša, bana ba banyenyane ruri ba hlaelela kgolo, phihlelo le bohlale bjoo ge e le gabotse bo sepedišanago le nywaga.—Jobo 12:12.

Lega go le bjalo, lebakeng le lengwe Jesu o ile a botša barutiwa ba gagwe gore: “Ruri ke re go lena, Ka ntle le gore le sokologe gomme le be bjalo ka bana ba banyenyane, le ka se tsene mmušong wa magodimo le gatee.” (Mateo 18:3) Jesu o be a e-ra gore’ng? Bana ba na le dika dife tšeo batho ba bagolo ba swanetšego go di hlagolela?

Go Hlagolela Boikokobetšo bja go Swana le bja Bana

Ela hloko boemo bjoo bo dirilego gore Jesu a bolele mantšu ao. Ge a fihlile Kaperenaume ka morago ga leeto le letelele, Jesu o botšišitše barutiwa ba gagwe gore: “Ke’ng seo le bego le tšeišane kgang ka sona tseleng?” Barutiwa bao ba bego ba lewa ke dihlong ba ile ba homola ka gobane ba be ba tšeišane kgang mabapi le gore ke mang yo mogolo gare ga bona. Mafelelong, ba rapa sebete sa go botšiša Jesu gore: “Ke mang yo mogolo kudu mmušong wa magodimo?”—Mareka 9:33, 34; Mateo 18:1.

Go ka bonala go makatša gore ka morago ga go ba le Jesu nywaga e nyakilego go ba e meraro, barutiwa ba ka tšeišana kgang ka maemo. Lega go le bjalo, ba be ba godišitšwe bodumeding bja Sejuda, e lego bjoo bo lebelelago ditaba tše bjalo e le tše bohlokwa kudu. Ge e le gabotse, bodumedi bjo bja setlogo, ge bo kopane le go se phethagale ga batho, bo ile bja tutuetša menagano ya barutiwa.

Jesu o ile a dula fase, a bitša barutiwa gomme a re: “Ge e ba motho le ge e le ofe  a nyaka go ba wa pele, o swanetše go ba wa mafelelo go bohle gomme e be modiredi wa bohle.” (Mareka 9:35) Mohlomongwe mantšu a a ile a ba makatša. Tsela ya Jesu ya go bea mabaka e ile ya ganetšana ka go lebanya le dikgopolo tša Sejuda tša mabapi le bophagamo! Ke moka Jesu a bitša ngwana yo monyenyane gore a tle thoko tša gagwe. A gokaretše ngwana yo ka borutho, o ile a gatelela ntlha ya gagwe ka gore: “Ruri ke re go lena, Ka ntle le gore le sokologe gomme le be bjalo ka bana ba banyenyane, le ka se tsene mmušong wa magodimo le gatee. Ka baka leo, mang le mang yo a tlago go ikokobetša go swana le ngwana yo yo monyenyane, ke yena yo mogolo kudu mmušong wa magodimo.”—Mateo 18:3, 4.

A mohlala o mobotse gakaakang wa boikokobetšo! Anke o leke go bona tiragalo ye. Sehlopha sa banna-tia se dikologile ngwana yo monyenyane gomme se mo lebeletše. Ngwana yo ruri o be a se a ikholofela e bile o be a botega! Ruri o be a se na ditshele le lehloyo! E be e le yo a kwago le yo a ikokobeditšego gakaakang! Ee, ngwana yo yo monyenyane o swantšhetša gabotse seka seo se kgahlišago Modimo sa boikokobetšo.

Ntlha ya Jesu e a kwagala. Ka moka ga rena re swanetše go hlagolela boikokobetšo bja go swana le bja ngwana gore re hwetše bohwa Mmušong wa Modimo. Thulaganyong ya Jehofa ya lapa, ga go na moo dikganetšano goba go ikgantšha ka tsela ya phadišano di tsenago gona. (Bagalatia 5:26) Ge e le gabotse, dika tše ke tšona tšeo di šušumeleditšego Sathane Diabolo go rabela malebana le Modimo. Ga go makatše ge Jehofa a di hloile!—Diema 8:13.

Bakriste ba therešo ba tsoma go hlankela, e sego go laola. Go sa šetšwe gore modiro ga o thabiše goba gore motho yoo re mo hlankelago ke mmotlana gakaakang, boikokobetšo bja kgonthe bo re šušumeletša go hlankela ba bangwe. Tirelo e bjalo ya boikokobetšo e putsa ka mo go humilego. Jesu o re: “Mang le mang yo a amogelago yo mongwe wa bana ba ba bjalo ba banyenyane ka baka la leina la-ka, o a nkamogela; gomme mang le mang yo a nkamogelago ga a amogele nna ke nnoši, eupša o amogela le yo a nthomilego.” (Mareka 9:37) Go hlagolela moya wa go swana le wa bana wa go nea le wa boikokobetšo go re dira gore re be batee le Motho yo a phagamego kudu legohleng le Morwa wa gagwe. (Johane 17:20, 21; 1 Petro 5:5) Re tla buna lethabo leo le tlišwago ke go ba bao ba neago. (Ditiro 20: 35) Le gona re ba le kgotsofalo ka go tsenya letsogo khutšong le boteeng bjoo bo bonwago gare ga batho ba Modimo.—Baefeso 4:1-3.

Ba a Rutega e Bile ba a Botega

Se se latelago, Jesu o gatelela thuto e nngwe yeo batho ba bagolo ba ka ithutago yona baneng ka gore: “Mang le mang yo a sa amogelego mmušo wa Modimo go swana le ngwana yo monyenyane a ka se tsene go wona le gatee.” (Mareka 10:15) Bana ga se bao ba ikokobeditšego feela; ba a rutega. Mma yo mongwe o re: “Ba monya tsebišo go swana le dipontšhe.”

Ka go rialo, gore re je bohwa Mmušong wa Modimo, re swanetše go hwetša molaetša wa Mmušo le go o kwa. (1 Bathesalonika 2:13) Go etša masea a sa tšwago go belegwa, re swanetše go ‘hlagolela kganyogo ya go kganyoga mafsi a sa tswakwago a lentšu, e le gore ka ona re golele phologong.’ (1 Petro 2:2) Ka gona, go thwe’ng ge e ba thuto ya Beibele e bonagala e le thata go kwešišega? Mohlokomedi yo mongwe wa bana o re: “Bana ba dula ba botšiša gore ‘Ke ka baka la’ng?’ go fihlela ba hwetša dikarabo tše di kgotsofatšago tša dipotšišo tša bona.” Re swanetše go latela mohlala wa bona. Ka gona tšwela pele o ithuta. Boledišana le Bakriste bao ba nago le phihlelo. Kgopela bohlale go Jehofa. (Jakobo 1:5) Ka ntle le pelaelo, go phegelela ga gago thapelong go tla putswa mafelelong.—Mateo 7:7-11.

Lega go le bjalo, ba bangwe ba ka ipotšiša gore, ‘Na batho bao ba rutegago ba ka se arošwe gabonolo?’ E sego ge ba e-na le mothopo o botegago wa tlhahlo. Ka mohlala, bana ka tlhago ba tsoma tlhahlo go batswadi ba bona. Tate yo mongwe o re: “Batswadi ba itlhatsela e le bao ba ka botwago ka go šireletša le go hlokomela bana ba bona letšatši le letšatši.” Ka ntle le pelaelo re na le mabaka a swanago a go bota Tatago rena wa legodimong, Jehofa. (Jakobo 1:17; 1 Johane 4:9, 10) Jehofa o re fa tlhahlo e ka botwago ka Lentšu la gagwe leo le ngwadilwego. Moya wa gagwe o mokgethwa le mokgatlo wa gagwe di a re homotša le go re thekga. (Mateo 24:45-47; Johane 14:26) Go diriša ditokišetšo tše go tla re dira gore le ka mohla re se ke ra gobala moyeng.—Psalme 91:1-16.

Go hlagolela go bota Modimo bjalo ka bana gape go re nea khutšo ya monagano. Seithuti se sengwe sa Beibele se re: “Ge re le bana re tšea leeto  re se na seo re kago lefa ka sona e bile re sa tsebe gore re tla fihla bjang moo re yago gona, gomme lega go le bjalo ga re ke re belaela gore batswadi ba rena ba ka re fihliša moo re yago re bolokegile.” Na re bota Jehofa ka mo go swanago ge re dutše re le mo leetong la rena la bophelo?—Jesaya 41:10.

Go bota Modimo ka mo go feletšego go re thuša go phema mekgwa le ditiro tšeo di ka beago boemo bja rena bja moya kotsing. Go e na le moo, re bota ka mo go feletšego mantšu a Jesu a gore Tatago rena wa legodimong o tseba ditiro tša rena le gore Modimo o tla re hlokomela ge re tšwela pele re tsoma Mmušo pele le toka ya Modimo. Se se tla re thuša go gana kgoketšo ya go tshwenyega kudu ka dilo tše di bonagalago moo e lego gore re hlokomologa boikarabelo bja rena bja moya.—Mateo 6:19-34.

“Bana ge e le Mabapi le Bobe”

Gaešita le ge ba belegwa ba se ba phethagala, seo se kgahlišago ke gore bana ba banyenyane ba sekile dipelong le menaganong. Ka lebaka le, Beibele e kgothaletša Bakriste gore: “Le be bana ge e le mabapi le bobe.”—1 Bakorinthe 14:20.

Ela hloko Monique wa nywaga e mehlano, yo a boditšego mmagwe ka mafolofolo gore: “Mogwera wa-ka yo mofsa, Sarah, o na le meriri ya go tatagana go swana le ya-ka!” Ga go seo se ilego sa bolelwa ka mmala o fapanego wa letlalo la Sarah le gore ke wa morafo ofe. Motswadi yo mongwe o re: “Bana ba banyenyane ga ba tutuetšwe ke mmala wa letlalo. Ga ba tsebe selo ka semorafo goba go beba sefahlego.” Tabeng ye, bana ruri ba bonagatša gabotse pono ya Modimo wa rena yo a sa bebego sefahlego, yoo a ratago batho ba ditšhaba ka moka.—Ditiro 10:34, 35.

Bana gape ba na le bokgoni bjo bo kgahlišago kudu bja go lebalela. Motswadi yo mongwe o re: “Ge Jack yo monyenyane le Levi ba e-lwa, re ba botša gore ba kgopelane tshwarelo gomme kapejana ba ba ba šetše ba bapala gape ba thabile. Ga ba ngale, ga ba tsoše ditaba tša kgale, goba go nyaka se sengwe pele ba lebalelana. Ba no tšwela pele ka bophelo.” A mohlala o mobotse gakaakang woo batho ba bagolo ba swanetšego go o latela!—Bakolose 3:13.

Go oketša moo, bana ba banyenyane ba amogela go ba gona ga Modimo gabonolo. (Baheberu 11:6) Tlhago ya bona ya go bolela ka go lebanya gantši e ba šušumeletša go nea ba bangwe bohlatse ka sebete. (2 Dikxoši 5:2, 3) Dithapelo tša bona tše bonolo le tše tšwago pelong di ka kgoma ba dipelo tše thata. E bile ba ka bonagatša matla a makatšago a boitshwaro ge ba lebeletšane le teko. Ruri bana ba banyenyane ke dimpho tše bohlokwa!—Psalme 127:3, 4.

Go Tsošološa Botse bja Peleng

O ka ipotšiša gore, ‘Na go a kgonega gore batho ba bagolo ba buše ba be le dika tše di kgahlišago tšeo di tswalanago le bjana?’ Karabo e bonolo le e kgodišago ke ee! Ka ntle le pelaelo taelo ya Jesu ya gore re “be bjalo ka bana ba banyenyane” e bontšha gore go a kgonega.—Mateo 18:3.

Ka mohlala: Sehlopha sa batsošološi ba diswantšho tša bokgabo se ka katana le go lokiša seswantšho se bohlokwa kudu se se thadilwego gabotse. Ge ba dutše ba se lokiša, ba tloša magapi a ditšhila le makgwakgwa ao a dirilwego ke maiteko a go se tsošološa nakong a fetilego. Ka morago ga maiteko a go se fele pelo a batsošološi bao, mebala ya mathomong e kgahlišago ya seswantšho seo le botse bja sona bja tlhago di a utologa gore bohle ba di bone. Ka mo go swanago, ka go phegelela go dira maiteko, ka thušo ya moya wa Jehofa le ka thekgo e lerato ya phuthego ya Bokriste, re ka buša ra ba le dika tše dibotse tšeo ka tlhago re bago le tšona ge re le bana.—Baefeso 5:1.

[Seswantšho go letlakala 9]

Ka tlhago bana ba ikokobeditše

[Seswantšho go letlakala 10]

Bana ba banyenyane ga ba bebe sefahlego e bile ba kgona go lebalela ka pela le go lebala