O se ke wa Kgaotša go Godiša Tebogo ya Gago
O se ke wa Kgaotša go Godiša Tebogo ya Gago
“Dikgopolo tša gago di bohlokwa gakaakang! Ao Modimo, palo ye e feletšego ya tšona ke e kgolo gakaakang!”—PSALME 139:17, NW.
1, 2. Ke ka baka la’ng re swanetše go leboga Lentšu la Modimo, gomme mopsalme o ile a bontšha tebogo ya gagwe bjang?
E BE e le selo se bohlokwa kudu seo se ilego sa hwetšwa. Ge go be go lokišwa tempele ya Jehofa kua Jerusalema, Moperisita yo Mogolo Hilikia o ile a hwetša “Puku ya Melaô ya Morêna ye e beilwexo ke Mošê,” yeo ka ntle le pelaelo e lego kopi ya mathomo yeo e bego e feditšwe mo e ka bago nywaga e 800 pele ga moo! Na o ka akanya kamoo Kgoši Josia yo a boifago Modimo a ka bago a ile a ikwa ka gona ge puku yeo e be e bewa pele ga gagwe? Ke therešo gore o ile a e tšeela godimo gomme a re Safane, mongwaledi, a e bale le semeetseng ka go hlaboša.—2 Koronika 34:14-18.
2 Lehono, batho ba dimilione tše dikete ba kgona go bala Lentšu la Modimo, le feletše goba karolo ya lona. Eupša na seo se dira gore Mangwalo e be a sa rego selo le ao a se nago mohola? Ga go bjalo le gatee! Ge e le gabotse, a na le dikgopolo tša Ramatla-ohle, tšeo di ngwaletšwego go re hola. (2 Timotheo 3:16) Ge a hlalosa kamoo a ikwago ka gona ka Lentšu la Modimo, mopsalme Dafida o ngwadile gore: “Dikgopolo tša gago di bohlokwa gakaakang! Ao Modimo, palo ye e feletšego ya tšona ke e kgolo gakaakang!”—Psalme 139:17, NW.
3. Ke’ng seo se bontšhago gore Dafida e be e le motho wa kwešišo e tseneletšego ya moya?
3 Tebogo ya Dafida ya go leboga Jehofa, Lentšu la gagwe gotee le thulaganyo ya gagwe ya borapedi bja therešo ga se ya ka ya fela le ka mohla. Dipsalme tše dintši tše dibotse tšeo Dafida a di hlamilego di bontšha kamoo a bego a ikwa ka gona. Ka mohlala, o ngwadile go Psalme 27:4 gore: “Se ke se kxopêlaxo xo Morêna ké se tee; se ke se nyakaxo ké xore ke dulê Ngwakong wa Morêna mehla yohle kè sa phela, ke boxê mabothakxa a Morêna, ke fahloxêlê [“lebelele ka tebogo,” NW] Ntlo-kxethwa ya xaxwe.” Seheberung sa mathomo, polelwana e rego ‘go lebelela ka tebogo’ e bolela go swarega ka go naganišiša, go lebeledišiša, go lebelela ka kgahlego, ka lethabo le ka lerato. Go molaleng gore Dafida e be e le motho wa kwešišo e tseneletšego ya moya, yoo a bego a tšeela ditokišetšo tša Jehofa tša moya godimo e bile a iphepa ka therešo e nngwe le e nngwe ya moya yeo Modimo a bego a e utolla. Re swanetše go ekiša mohlala wa gagwe wa tebogo.—Psalme 19:7-11.
Leboga Tokelo ya go Tseba Therešo ya Beibele
4. Ke’ng seo se ilego sa dira gore Jesu ‘a thabe kudu ka moya o mokgethwa’?
4 Go hwetša temogo ya Lentšu la Modimo ga gwa ithekga ka matla a tlhaologanyo goba ka thuto ya lefase, yeo e tšweletšago boikgogomošo. Go e na le moo, go ithekgile ka botho bjo bo sa swanelago bja Jehofa, bjoo a bo bontšhago batho ba ikokobeditšego, batho ba ba botegago bao ba lemogago go nyaka ga bona dilo tša moya. (Mateo 5:3; 1 Johane 5:20) Ge Jesu a be a naganišiša ka taba ya gore maina a batho ba bangwe ba sa phethagalago a be a ngwalwa legodimong, o ile “a thaba kudu ka moya o mokgethwa gomme a re: ‘Ke go tumiša phatlalatša, wena Tate, Morena wa legodimo le lefase, gobane o utetše ba bohlale le ba tlhaologanyo dilo tše ka kelohloko gomme wa di utollela bana.’”—Luka 10:17-21.
5. Ke ka baka la’ng barutiwa ba Jesu ba be ba se ba swanela go lebelela ditherešo tša Mmušo tšeo ba di utolletšwego e le tše sa rego selo?
5 Ka morago ga go rapela thapelo yeo e tšwago pelong, Jesu o ile a retologela go barutiwa ba gagwe gomme a re: “Go thaba mahlo a bonago dilo tšeo le di bonago. Gobane ke re go lena, Baporofeta ba bantši le dikgoši tše dintši ba ratile go bona dilo tše le di bonago, eupša ga se ba di bona gomme ba ratile le go kwa dilo tše le di kwago, eupša ga se ba di kwa.” Ee, Jesu o ile a kgothaletša balatedi ba gagwe ba botegago gore ba se ke ba lebelela ditherešo tše bohlokwa tša Mmušo tšeo ba di utolletšwego e le tše sa rego selo. Ditherešo tše di be di se tša ka tša utollelwa meloko ya peleng ya bahlanka ba Modimo e bile di be di se tša utollelwa “ba bohlale le ba tlhaologanyo” ba mehleng ya Jesu!—Luka 10:23, 24.
6, 7. (a) Re na le mabaka afe a go tšeela godimo therešo ya Modimo? (b) Ke phapano efe e bonwago lehono magareng ga bodumedi bja therešo le bja maaka?
6 Mo mehleng ya rena, re na le mabaka a mantši kudu a go leboga ditherešo tša Modimo, ka gobane Jehofa o file batho ba gagwe kwešišo e tseneletšego ya Lentšu la gagwe, a diriša “mohlanka yo a botegago le wa temogo.” (Mateo 24:45; Daniele 12:10) Moporofeta Daniele o ngwadile mabapi le lebaka la bofelo gore: “E tlo latišišwa ka ba bantši, ’me xwa ata yôna tsebô.” (Daniele 12:4) Na ga o dumele gore go tseba Modimo lehono go ‘atile’ le gore bahlanka ba Jehofa ba fepša gabotse moyeng?
7 Ruri re bona phapano e kgolo magareng ga katlego ya moya ya batho ba Modimo le kgakanego ya bodumedi ya Babilona o Mogolo! Ka baka leo, ba bantši bao ba notšwego moko goba ba tennwego ke bodumedi bja maaka ba retologela borapeding bja therešo. Ke batho ba swanago le dinku, ba go se “nyake go ba le kabelo le [Babilona o Mogolo] dibeng tša gagwe” goba “go amogela karolo ya dikotlo tša gagwe.” Jehofa le bahlanka ba gagwe ba laleletša ba bjalo ka moka ka phuthegong ya Bokriste bja therešo.—Kutollo 18:2-4; 22:17.
Ba Nago le Tebogo ba Kgeregela go Modimo
8, 9. Mantšu a Hagai 2:7 a phethagala bjang lehono?
8 Jehofa o boletše e sa le pele mabapi le ntlo ya gagwe ya moya ya borapedi gore: “Dithšaba ka moka ke tlo di šišinya, xwa tseb’o tla matsaka a dithšaba ka moka; ’me Ntlo yé ke tlo e tlatša letaxô.” (Hagai 2:7) Boporofeta bjo bjo bo makatšago bo ile bja phethagala mehleng ya Hagai ge mašaledi a tsošološitšwego a batho ba Modimo a be a aga tempele lefsa kua Jerusalema. Lehono, mantšu a Hagai a phethagala ka mo go oketšegilego mabapi le tempele e kgolo ya moya ya Jehofa.
9 Ba dimilione ba šetše ba kgeregetše ka tempeleng ya seswantšhetšo e le gore ba ka rapela Modimo “ka moya le ka therešo,” gomme dikete tše makgolo tša “matsaka a dithšaba ka moka” di tšwela pele di kgeregela ka go yona ngwaga o mongwe le o mongwe. (Johane 4:23, 24) Ka mohlala, pego ya lefase ka bophara ya ngwaga wa tirelo wa 2006 e bontšha gore go kolobeditšwe ba 248 327 e le go bontšha boineelo bja bona go Jehofa. Seo se dira palo-gare ya batho ba bafsa ba 680 letšatši le lengwe le le lengwe! Go rata ga bona therešo le kganyogo ya bona ya go hlankela Jehofa bjalo ka bagoeledi ba Mmušo ke bohlatse bja gore ba gogilwe ke Modimo e le ka kgonthe.—Johane 6:44, 65.
10, 11. Anega phihlelo yeo e bontšhago kamoo batho ba feleletšago ka go leboga therešo ya Beibele.
10 Bontši bja batho ba ba dipelo tše di botegago ba gogetšwe therešong ka gobane ba ile ba lemoga ‘moloki le e a sa lokago, le go hlaologanya modirela-Morena le e a sa Mo direlego.’ (Maleaki 3:18) Ela hloko phihlelo ya Wayne le Virginia, banyalani bao ba bego ba tsena kereke ya Protestanta eupša ba bego ba sa hwetše dikarabo tša dipotšišo tša bona tše dintši. Ba be ba hloile ntwa gomme bobedi bja bona ba be ba gakanegile e bile ba tshwentšwe ke go bona moruti a šegofatša mašole le dibetša. Ge banyalani bao ba be ba gola, ba be ba bona ba hlokomologwa ke ba bangwe ka kerekeng, gaešita le ge Virginia a be a e-na le nywaga e mentši a ruta sekolong sa Sontaga. Ba boletše gore: “Ga go yoo a ilego a re etela goba a ilego a bontšha go tshwenyega ka boemo bja rena bja moya. Seo kereke e bego e se nyaka e be e no ba tšhelete ya rena. Re be re gakanegile.” Ba ile ba gakanega le go feta ge kereke e be e dumelela bosodoma.
11 Ge nako e dutše e e-ya, setlogolo sa Wayne le Virginia gotee le morwedi wa bona ba ile ba ba Dihlatse tša Jehofa. Gaešita le ge Wayne le Virginia ba ile ba thoma ka go se rate taba ye, ka morago ba ile ba fetoša dikgopolo tša bona gomme ba amogela thuto ya Beibele. Wayne o boletše gore: “Ka dikgwedi tše tharo feela, re ithutile mo gontši ka Beibele go feta seo re bego re ithutile sona nywageng e 70 e fetilego! Re be re sa tsebe gore leina ka Modimo ke Jehofa e bile re be re sa tsebe selo ka Mmušo le lefase la Paradeise.” Kapejana, banyalani ba bao ba botegago ba ile ba thoma go ya dibokeng tša Bokriste le go tšea karolo bodireding. Virginia o ile a re: “Re nyaka go botša batho ka moka therešo.” Bobedi bja bona ba kolobeditšwe ka 2005 ba le nywageng ya bona ya bo-80. Ba itše: “Re hweditše legae la Bakriste ba therešo.”
Leboga Gore o ‘Hlamilwe ka mo go Feletšego Bakeng sa Modiro o Mongwe le o Mongwe o Mobotse’
12. Ke’ng seo Jehofa a dulago a se fa bahlanka ba gagwe gomme re swanetše go dira’ng gore re holege?
12 Ka mehla Jehofa o thuša bahlanka ba gagwe go phetha thato ya gagwe. Ka mohlala, Noa o ile a amogela ditaelo tšeo di kwagalago le tšeo di lebanyago tša kamoo a swanetšego go aga areka ka gona—e lego modiro woo o bego o swanetše go dirwa gabotse di sa tloga fase! Gomme go bile bjalo. Ka baka la’ng? Ka gobane Noa o ile “a dira tšôna-tšeo tšohle, a di dira ka mo Modimo a mo laetšexo ka xôna.” (Genesi 6:14-22) Le lehono, Jehofa o hlama batho ba gagwe ka mo go feletšego bakeng sa go phetha thato ya gagwe. Ke therešo gore modiro wa rena o mogolo ke go bolela ditaba tše dibotse tša Mmušo wa Modimo o hlomilwego gotee le go thuša bao ba swanelegago gore ba be barutiwa ba Jesu Kriste. Le gona katlego ya rena e ithekgile ka go kwa go swana le ge go bile bjalo ka Noa. Re swanetše go latela tlhahlo yeo Jehofa a e neago ka Lentšu la gagwe le ka mokgatlo wa gagwe.—Mateo 24:14; 28:19, 20.
13. Ke’ng seo Jehofa a re neago tlwaetšo ka sona?
13 Gore re phethe modiro woo, re swanetše go ithuta go ‘swara sedirišwa sa rena sa motheo ka tshwanelo’—Lentšu la Modimo—seo se “[holago] ka go ruta, go sola, go lokiša dilo, go laya ka toko, gore motho wa Modimo a swanelege ka botlalo, a hlangwe ka mo go feletšego bakeng sa modiro o mongwe le o mongwe o mobotse.” (2 Timotheo 2:15; 3:16, 17) Ka go swana le lekgolong la pele la nywaga, Jehofa o re nea tlwaetšo e holago kudu ka phuthego ya Bokriste. Lehono, diphuthegong tše 99 770 lefaseng ka bophara, go swarwa Sekolo sa Bodiredi sa Pušo ya Modimo le Seboka sa Tirelo beke le beke bakeng sa gore thuša bodireding. Na o bontšha gore o leboga diboka tše tše bohlokwa ka go ba go tšona ka mehla le ka go diriša seo o ithutago sona?—Baheberu 10:24, 25.
14. Bahlanka ba Jehofa ba bontšha bjang go leboga ga bona tokelo ya go hlankela Modimo? (Akaretša ditlhaloso tšeo di lego tšhateng e lego go matlakala 27-30.)
14 Batho ba Modimo ba dimilione lefaseng ka bophara ba bontšha tebogo ya bona bakeng sa tlwaetšo yeo ba e hwetšago, ka go phegelela bodireding. Ka mohlala, ngwageng wa tirelo wa 2006, bagoeledi ba Mmušo ba 6 741 444 ba feditše palo-moka ya diiri tše 1 333 966 199 dibopegong ka moka tša modiro wo, e lego seo se akaretšago go swarwa ga dithuto tše 6 286 618 tša legae tša Beibele. Tše e fo ba tše dingwe tša dintlha tše di kgothatšago tšeo di lokeleditšwego pegong ya lefase ka bophara. Re re hle anke o lebelele pego ye gomme e go kgothatše, go fo swana le bana babo rena ba lekgolong la pele la nywaga bao le bona ka ntle le pelaelo ba ilego ba kgothatšwa ke dipego tša mabapi le koketšego ya modiro wa boboledi mehleng ya bona.—Ditiro 1:15; 2:5-11, 41, 47; 4:4; 6:7.
15. Ke ka baka la’ng go se gwa swanela go ba le yo a nyamišwago ke go direla Jehofa ka moya ka moka?
15 Legoa le legolo la tumišo leo le rotogelago go Modimo ngwaga le ngwaga le bontšha tebogo e tseneletšego yeo bahlanka ba Jehofa ba nago le yona bakeng sa tokelo ya go tseba Jehofa le go nea bohlatse ka yena. (Jesaya 43:10) Ke therešo gore sehlabelo sa theto seo se dirwago ke ba bangwe ba batšofadi ba rena, ba babjago goba ke bana babo rena le dikgaetšedi bao ba nago le mathata a tša maphelo se ka bapetšwa le tšheletiana ya mohlologadi. Eupša a re se keng ra lebala gore Jehofa le Morwa wa gagwe ruri ba rata bao ba hlankelago Modimo ka moya ka moka, ge ba dira sohle seo ba se kgonago.—Luka 21:1-4; Bagalatia 6:4.
16. Ke didirišwa dife tša go ruta tšeo Modimo a di neilego mehleng ya morago bjale?
16 Ka ntle ga go re tlwaeletša bodiredi, Jehofa ka mokgatlo wa gagwe o re hlama ka didirišwa tša go ruta. Nywaga-someng ya morago bjale, didirišwa tše di be di akaretša dipuku tša Therešo ye Išago Bophelong bjo bo sa Felego, O ka Phela ka mo go sa Felego Paradeiseng mo Lefaseng, Tsebo e Išago Bophelong bjo bo sa Felego gomme ga bjale di akaretša Ke Eng Seo ge e le Gabotse Beibele e se Rutago? Bao ba lebogago ditokišetšo tše e le ka kgonthe ba di diriša gabotse bodireding.
Diriša Puku ya Seo Beibele e se Rutago Gabotse
17, 18. (a) Ke dikarolo dife tša puku ya Seo Beibele e se Rutago tšeo o ratago go di bolelela bodireding bja gago? (b) Molebeledi yo mongwe wa tikologo o boletše’ng ka puku ya Seo Beibele e se Rutago?
17 Ka dikgaolo tša yona tše 19, mametletšo e nago le dintlha ka botlalo gotee le leleme le le kwagalago le le bonolo, puku ya Ke Eng Seo ge e le Gabotse Beibele e se Rutago? e itlhatsela e le tšhegofatšo bodireding. Ka mohlala, kgaolo 12 e ahla-ahla sehlogo se se rego, “Go Phela ka Tsela Yeo e Kgahlišago Modimo.” Sehlogo se se hlalosetša morutwana kamoo a ka bago mogwera wa Modimo ka gona, e lego selo seo ba bantši ba sa kago ba se ela hloko goba go nagana gore se ka kgonega. (Jakobo 2:23) Thušo ye ya go ithuta Beibele e amogelwa bjang?
18 Molebeledi wa tikologo wa kua Australia o bega gore puku ya Seo Beibele e se Rutago ke yeo e “gogelago kudu moo e dirago gore beng ba dintlo ba tsene poledišanong kapejana.” O oketša ka gore go diriša puku ye go bonolo mo e lego gore e “ile ya dira gore bagoeledi ba bantši ba Mmušo ba tsošološe kholofelo ya bona le go thaba bodireding. Ga go makatše ge ba bantši ba re puku ye ke lehumo!”
19-21. Anega diphihlelo tše dingwe tšeo di gatelelago mohola wa puku ya Seo Beibele e se Rutago.
19 Mosadi yo mongwe wa kua Guyana o boditše mmulamadibogo yo a bego a eme mojakong wa gagwe gore: “O swanetše go ba o romilwe ke Modimo.” Monna yoo a bego a dula le mosadi yo, o be a sa tšwa go tlogela mosadi yoo le bana ba bona ba babedi ba banyenyane. Mmulamadibogo o ile a phetla puku ya Seo Beibele e se Rutago go kgaolo 1 gomme a bala serapa 11 ka go hlaboša, ka tlase ga sehlogwana se se rego “Modimo o Ikwa Bjang ka Ditiro tša go Hloka Toka Tšeo re Lebeletšanago le Tšona?” Mmulamadibogo yoo o itše: “Dintlha tšeo di ile tša mo kgoma kudu. Ge e le gabotse, o ile a ba a tloga, a ya ka morago ga lebenkele la gagwe gomme a lla o šoro.” Mosadi yo o ile a amogela go ba le thuto ya Beibele ya ka mehla le kgaetšedi wa gona moo gomme o tšwela pele gabotse.
20 José, yo a dulago Sepania, o lobile mosadi wa gagwe kotsing ya dinamelwa. O ile a nyaka khomotšo dihlare-taging gomme a ba a tsoma thušo go dingaka tša tša monagano. Lega go le bjalo, dingaka tša tša monagano ga tša ka tša kgona go araba potšišo yeo e bego tshwenya José kudu yeo e rego: “Ke ka baka la’ng Modimo a dumeletše mosadi wa-ka a e-hwa?” Ka letšatši le lengwe José o ile a kopana le Francesc, yo a bego a šoma khamphaning e tee le yena. Francesc o ile a šišinya gore ba ahla-ahle kgaolo 11 ya puku ya Seo Beibele e se Rutago, e nago le sehlogo se se rego “Ke ka Baka La’ng Modimo a Dumelela Tlaišego?” Tlhaloso ya Mangwalo gotee le seswantšho sa morutiši le morutwana di ile tša kgoma José kudu. O ile a thoma go ithuta ka phišego, a ya kopanong ya tikologo gomme gona bjale o ba gona dibokeng Holong ya Mmušo ya lefelong leo.
21 Roman, rakgwebo yo a nago le nywaga e 40 wa kua Poland, ke motho yoo a bego a dutše a hlompha Lentšu la Modimo. Eupša ka gobane o be a swaregile kudu ka mošomo wa gagwe, o ile a dira tšwelopele e fihlago bokgoleng bjo itšego ka thuto ya gagwe ya Beibele. Lega go le bjalo, o ile a ba gona kopanong ya selete gomme a ikhweletša kopi ya puku ya Seo Beibele e se Rutago. Ka morago ga moo, o ile a tšwela pele ka mo go lemogegago. O re: “Ka puku ye, dithuto tša motheo ka moka tša Beibele di bonagala di kopana bakeng sa go dira gore taba e bonagale gabotse.” Gona bjale Roman o ithuta Beibele ka mehla gomme o tšwela pele gabotse.
Tšwela Pele o Godiša Tebogo ya Gago
22, 23. Re ka tšwela pele bjang re bontšha tebogo bakeng sa kholofelo yeo e beilwego pele ga rena?
22 Ka ge go hlalositšwe Dikopanong tšeo di thabišago tša Selete tša “Tlhakodišo e Kgaufsi!” Bakriste ba therešo ba hlologetšwe “phološo e sa felego” yeo e holofeditšwego ke Modimo le go dirwa gore e kgonege ka madi a tšholotšwego a Jesu Kriste. Ga go tsela e nngwe e kaone ya go bontšha tebogo e tšwago pelong go feta ka go tšwela pele re le ba hlwekilego “medirong e hwilego e le gore re neele tirelo e kgethwa go Modimo yo a phelago.”—Baheberu 9:12, 14.
23 Ee, taba ya gore bagoeledi ba bao ba fetago dimilione tše tshelelago ba Mmušo ba kgotlelela tirelong ya Modimo ka potego mola moya wa go ba baithati o tletše ka mokgwa wo ke e makatšago e le ka kgonthe. E bile ke bohlatse bja gore bahlanka ba Jehofa ba na le tebogo e tseneletšego bakeng sa tokelo ya go hlankela Modimo, ba tseba gore ‘boitapišo bja bona ga se bja lefeela Moreneng.’ Anke tebogo yeo e se ke ya kgaotša go gola le ka mohla!—1 Bakorinthe 15:58; Psalme 110:3.
O be o tla Araba Bjang?
• Mopsalme o re ruta’ng ka go leboga Modimo le ditokišetšo tša gagwe tša moya?
• Mantšu a Hagai 2:7 a phethagala bjang lehono?
• Jehofa o hlamile bahlanka ba gagwe bjang gore ba mo hlankele ka katlego?
• O ka dira’ng go bontšha tebogo ya gago bakeng sa go loka ga Jehofa?
[Dipotšišo tša Thuto]
[Tšhate go letlakala 27-30]
PEGO YA NGWAGA WA TIRELO WA 2006 YA DIHLATSE TŠA JEHOFA LEFASENG KA BOPHARA
(See bound volume)
[Diswantšho go letlakala 25]
Jehofa o re hlama ka mo go feletšego gore re dire thato ya gagwe