Therešo—Na e Letetšwe Feela go ba Bangwe?

MOSETSANA wa nywaga e 16 o ile a goeletša ka gore: “Ke hloile maaka, le gona ke hloile go botšwa maaka!” Bontši bja rena re ikwa bjalo. Re duma gore taba yeo re e kwago—e ka ba ka ditsebe goba ka go e bala—e be therešo. Eupša ge re botša ba bangwe taba, na e ba e le therešo?

Batho ba bantši bao ba ilego ba tšea karolo nyakišišong yeo e dirilwego kua Jeremane ba ile ba bolela gore “go bolela maaka ditabeng tše dinyenyane e le bakeng sa go itšhireletša goba go šireletša ba bangwe kotsing go dumeletšwe, ee, e bile go bohlokwa bakeng sa gore batho ba kgone go phedišana.” Le gona raditaba yo mongwe o ile a ngwala gore: “Go bolela therešo ka dinako tšohle ke selo se sebotse le seo se nyakegago eupša seo se tšwafišago.”

Na e ka ba e le gore re nyaka gore batho ba bangwe ba bolele therešo, eupša rena ka dinako tše dingwe re ikwa re e-na le mabaka a go se bolele therešo? Na go bolela therešo goba go se e bolele go na le taba? Ditla-morago tša go se bolele therešo ke dife?

Tshenyo Yeo e Bakwago ke go se Bolele Therešo

Ela hloko tshenyo yeo e ka bakwago ke go se bolele therešo. Maaka a godiša go se botane gare ga balekane ba lenyalo le gare ga ditho tša lapa. Lesebo la go thomeletša maaka le ka senya botumo bjo bobotse bja motho. Go radia ga bašomi go ka dira gore ditshenyagalelo tša tšweletšo di phagame gomme seo sa dira gore ditšweletšwa di bitše tšhelete e ntši. Go bolela maaka dipegong tša motšhelo go dira gore mebušo e se hwetše tšhelete e nyakegago bakeng sa go phetha ditirelo tša setšhaba. Go thoma maaka ga banyakišiši go ka senya dipakane tše di holofetšago le go senya botumo bja mekgatlo e hlomphegago. Mekgatlo ya go se botege ya go humiša batho ka pela e dira gore babeeletši ba lahlegelwe ke dipeeletšo tša bona tša bophelo ka moka goba ba be le dipoelo tše mpe le go feta. Ruri ga go makatše ge Beibele e bolela gore gare ga dilo tšeo Jehofa Modimo a di hlaswago ke “’leme la maaká” le “hlatsi-phori kxêba-maaká”!—Diema 6:16-19.

Go phatlalatša maaka go ka senyetša batho le setšhaba ka kakaretšo. Ke ba mmalwa feela bao ba ka gananago le taba ye. Ge e ba go le bjalo, ke ka baka la’ng batho ba bolela maaka ka boomo? Na polelo e nngwe le e nngwe yeo e sego therešo ke maaka? Re tla hlahloba dikarabo tša dipotšišo tše le tše dingwe sehlogong se se latelago.

[Seswantšho go letlakala 3]

Maaka a dira gore balekane ba lenyalo ba se botane