“Bana, Kwang Batswadi ba Lena”

“Bana, kwang batswadi ba lena boteeng le Morena gobane se se lokile.”—BAEFESO 6:1.

1. Go kwa go ka go šireletša bjang?

MOHLOMONGWE ga bjale re phela ka gobane re kwele, mola ba bangwe ba hwile ka gobane ba ile ba palelwa ke go kwa. Go kwa eng? Ka mohlala, go kwa ditemošo tšeo re di newago ke mebele ya rena yeo e ‘bopilwego wa matete-tete.’ (Psalme 139:14) Mahlo a rena a bona maru a maso gomme ditsebe tša rena di kwa modumo wa leduma. Ke moka go ratha ga mohlagase wa kua sebaka-bakeng go emiša meriri ya rena. Go bao ba rutilwego ka dikotsi tše di ka bago gona, ditemošo tše ke tša gore motho a nyake lefelo le le šireletšegilego gomme a tloge ledimong le kotsi la magadima le sefako seo se ka beago bophelo kotsing.

2. Ke ka baka la’ng bana ba nyaka ditemošo, gomme ke ka baka la’ng ba swanetše go kwa batswadi ba bona?

² Lena bafsa le nyaka go newa ditemošo mabapi le dikotsi tše di ka bago gona, gomme batswadi ba lena ba na le boikarabelo bja go le nea tšona. O ka gopola ge o be o botšwa gore: “O se ke wa swara setofo seo. Se a fiša.” “Tloga moo meetseng. A kotsi.” “Lebelela mahlakoreng ka moka pele ga ge o ka kgabaganya mmila.” Ka manyami, bana ba ile ba kwešwa bohloko goba gaešita le go hwa ka baka la go palelwa ke go kwa. Go kwa batswadi ba lena go “lokile”—ke mo go nepagetšego le mo go swanetšego. Le gona ke gabohlale. (Diema 8:33) Temana e nngwe ya Beibele e bolela gore e bile go “thabiša” Morena wa rena Jesu Kriste. Ee, Modimo o go laela gore o kwe batswadi ba gago.—Bakolose 3:20; 1 Bakorinthe 8:6.

Mehola e Swarelelago ya go kwa

3. Go ba bantši ba rena, “bophelo bja kgonthe” ke’ng, gona ke bjang bana ba ka holofelago go bo hwetša?

³ Go kwa batswadi ba gago go šireletša ‘bophelo bja gago gona bjale,’ eupša go kwa gape go tla dira gore o kgone go thabela bophelo “bja nakong e tlago,” bjo bo bitšwago “bophelo bja kgonthe.” (1 Timotheo 4:8; 6:19) Go ba bantši ba rena, bophelo bja kgonthe ke bophelo bjo bo sa felego lefaseng le lefsa la Modimo, leo a le holofetšago bao ba kgomarelago ditaelo tša gagwe ka potego. Taelo e kgolo kudu go ditaelo tše e re: “‘Godiša tatago le mmago’; e lego taelo ya pele yeo e nago le kholofetšo: ‘Gore di go sepelele gabotse le gore o phele galelele lefaseng.’” Ka baka leo, o tla thaba ge o e-kwa batswadi ba gago. Bokamoso bja gago bo tla ba bo šireletšegile, gomme o ka tla wa thabela bophelo bjo bo sa felego paradeiseng mo lefaseng!—Baefeso 6:2, 3.

4. Bana ba ka godiša Modimo bjang gomme ba holwa ke seo?

⁴ Ge o godiša batswadi ba gago ka go ba kwa, o godiša le Modimo ka gobane ke yena a go laelago gore o ba kwe. E bile o a holega. Beibele e re: “Nna Morêna Modimo wa xaxo ke Xo ruta tše di Xo holaxo.” (Jesaya 48:17; 1 Johane 5:3) Go kwa go go hola bjang? Go thabiša tatago le mmago gomme ka go rialo, ba tla bontšha lethabo ka ditsela tšeo di tla dirago gore bophelo bja gago bo thabiše. (Diema 23:22-25) Eupša sa bohlokwa kudu, go kwa ga gago go thabiša Tatago wa legodimong gomme o tla go putsa ka ditsela tše di makatšago! Anke re boneng kamoo Jehofa a ilego a šegofatša le go šireletša Jesu, yo a boletšego ka yena gore: “Ka mehla ke dira dilo tše di mo kgahlišago.”—Johane 8:29.

Jesu—Mošomi yo Mafolofolo

5. Re na le mabaka afe a go dumela gore Jesu e be e le mošomi yo mafolofolo?

⁵ Jesu e be e le leitšibulo la mmagwe, Maria.  Tatagwe yo e sego wa madi, Josefa, e be e le mmetli. Jesu le yena o ile a ba mmetli gomme go molaleng gore o ile a ithuta modiro wo go Josefa. (Mateo 13:55; Mareka 6:3; Luka 1:26-31) O nagana gore Jesu e be e le mmetli wa mohuta mang? Ge a be a le legodimong, pele ga ge a ka ingwa ka mohlolo ke kgarebe, bjalo ka bohlale bjo bo mothofaditšwego, o hlalositše gore: “Ké xe kè na [le Modimo], kè le mohlankana w’axwe, kè mo kxahla mehla yohle.” Modimo o ile kgahlwa ke Jesu yo e bego e le mošomi yo mafolofolo legodimong. Na o nagana gore le ge e be e le mofsa mo lefaseng o ile a ba mošomi yo mafolofolo le mmetli yo a nago le bokgoni?—Diema 8:30; Bakolose 1:15, 16.

6. (a) O nagana gore ke ka baka la’ng Jesu a be a šoma ka gae ge e be e sa le yo monyenyane? (b) Bana ba ka ekiša Jesu ka ditsela dife?

⁶ Ga go pelaelo gore Jesu o be a bapala dipapadi tše itšego ge e be e sa le ngwana, go etša ge Beibele e bolela gore bana ba be ba dira bjalo mehleng ya pele. (Sakaria 8:5; Mateo 11:16, 17) Lega go le bjalo, o ka kgonthišega gore bjalo ka ngwana yo mogolo ka lapeng le legolo le le diilago, o be a e-na le mediro e mengwe yeo a bego a swanetše go e dira go tlaleletša tlwaetšong yeo a bego a e hwetša go Josefa ya gore e be mmetli. Ka morago, Jesu o bile mmoledi gomme a ineela bodireding bja gagwe go fihla bokgoleng bja gore a gafe boiketlo bja gagwe. (Luka 9:58; Johane 5:17) Na o bona ditsela tšeo ka tšona o ka ekišago Jesu? Na batswadi ba gago ba go kgopela gore o hlwekiše phapoši ya gago goba gore o dire mediro e mengwe? Na ba go kgothaletša go tšea karolo borapeding bja Modimo ka go ba gona dibokeng tša Bokriste le go boledišana le ba bangwe ka ditumelo tša gago? O nagana gore Jesu yo monyenyane o be a tla arabela bjang dikgopelong tše bjalo?

Morutwana yo Mafolofolo wa Beibele le Morutiši

7. (a) Ke bomang bao Jesu a ka bago a ile a ya le bona Pasekeng? (b) Jesu o be a le kae ge ba bangwe ba be ba tšea leeto la go boela gae, gomme ke ka baka la’ng a be a le moo?

⁷ Banna ka moka le bašemane ba Baisiraele ba be ba laetšwe gore ba rotogele tempeleng go yo rapela Jehofa nakong ya menyanya e meraro ya Bajuda. (Doiteronomio 16:16) Ge Jesu a be a e-na le nywaga e 12, lapa labo ka moka le ka ba le ile la tšea leeto la go ya Jerusalema bakeng sa Paseka. Seo mohlomongwe se be se akaretša bana babo le dikgaetšedi ka motswadi o tee. Lega go le bjalo, bao ba bego ba sepela le lapa labo Jesu ba ka ba ba be ba akaretša Salome, yoo mohlomongwe e bego e le ngwanabo Maria, gotee le monna wa gagwe Tsebedeo go akaretša le barwa ba bona e lego Jakobo le Johane, bao ka morago ba ilego ba ba baapostola. * (Mateo 4:20, 21; 13:54-56; 27:56; Mareka  15:40; Johane 19:25) Ge ba be ba boa leetong la bona, mohlomongwe Josefa le Maria ba ile ba nagana gore Jesu o be a e-na le ba leloko, ke ka baka leo go se be gona ga gagwe go sa kago gwa lemogwa mathomong. Matšatšing a mararo ka morago, ge mafelelong Maria le Josefa ba hwetša Jesu, o be a le ka tempeleng, “a dutše gare ga barutiši, a ba theeditše gomme a ba botšiša dipotšišo.”—Luka 2:44-46.

8. Jesu o be a dira’ng ka tempeleng, gomme ke ka baka la’ng batho ba be ba maketše?

⁸ Jesu o be a “botšiša” barutiši ka tsela efe? Go botšiša ga gagwe dipotšišo e ka ba e be e se feela moo go bego go kgotsofatša go nyaka go tseba ga gagwe goba go fo tsoma tsebišo. Lentšu la Segerika leo le dirišitšwego mo le ka ba le bolela ka dipotšišo tša go swana le ge go sekwa gomme ka go rialo gwa akaretša le go botšološiša. Ee, gaešita le ge e be e sa le mofsa, Jesu o ile a gola gomme a ba morutwana wa Beibele yo a ilego a makatša barutiši ba rutegilego ba bodumedi! Beibele e re: “Bohle bao ba bego ba mo theeditše ba be ba dutše ba makatšwa ke kwešišo ya gagwe le dikarabo tša gagwe.”—Luka 2:47.

9. O ka latela bjang mohlala wa Jesu tabeng ya go ithuta Beibele?

⁹ Ka nywaga yeo Jesu a bego a e-na le yona, o nagana gore ke ka baka la’ng a be a kgona go makatša gaešita le barutiši bao ba nago le phihlelo ka tsebo ya gagwe ya Beibele? Ke therešo gore o be a šegofaditšwe ka go ba le batswadi bao ba boifago Modimo bao ba mo neilego tlhahlo ya Modimo go tloga bjaneng. (Ekisodo 12:24-27; Doiteronomio 6:6-9; Mateo 1:18-20) Re ka kgodišega gore Josefa o be a e-ya le Jesu sinagogeng ge e be e sa le yo monyenyane gore a yo kwa ge Mangwalo a balwa le go hlaloswa. Na le wena o šegofaditšwe ka batswadi bao ba ithutago Beibele le wena le go ya le wena dibokeng tša Bokriste? Na o tšeela godimo maiteko a bona, go etša ge Jesu a ile a tšeela a batswadi ba gagwe godimo? Na o boledišana le ba bangwe ka seo o ithutago sona, go etša ge Jesu a dirile?

Jesu o be a Ikokobetša

10. (a) Ke ka baka la’ng batswadi ba Jesu ba be ba swanetše go tseba mo ba bego ba tla mo hwetša gona? (b) Jesu o beetše bana mohlala ofe o mobotse?

¹⁰ O nagana gore Maria le Josefa ba ile ba ikwa bjang ge mafelelong ba be ba hwetša Jesu ka tempeleng ka morago ga matšatši a mararo? Ga go pelaelo gore ruri ba be ba imologile! Lega go le bjalo, Jesu o ile a bontšha go makatšwa ke gore batswadi ba gagwe ba be ba sa tsebe mo a lego gona. Bobedi bja bona ba be ba tseba gore Jesu o belegwe ka tsela ya mohlolo. Go oketša moo, gaešita le ge ba be ba sa tsebe ditaba ka botlalo, ba ka be ba ile ba tseba selo se itšego mabapi le karolo ya gagwe ya nakong e tlago bjalo ka Mophološi le Mmuši wa Mmušo wa Modimo. (Mateo 1:21; Luka 1:32-35; 2:11) Ka baka leo, Jesu o ba botšišitše gore: “Ke ka baka la’ng le be le swanetše go nnyaka? Na le be le sa tsebe gore ke swanetše go ba ntlong ya Tate?” Lega go le bjalo, Jesu ka go kwa o ile a tloga le batswadi ba gagwe gomme a boela gae Natsaretha. Beibele e re: “A tšwela pele a ikokobeleditše bona.” Go feta moo, “mmagwe yena a boloka dipolelo tše ka moka pelong ya gagwe ka kelohloko.”—Luka 2:48-51.

11. Ke thuto efe mabapi le go kwa yeo o ka ithutago yona go Jesu?

¹¹ Na go bonolo go wena go ekiša Jesu, ka mehla o e-kwa batswadi ba gago? Goba na o nagana gore gantši ga ba kwešiše lefase la sebjale-bjale le gore wena o tseba go ba feta? Ke therešo gore o ka ba o tseba mo gontši ka dilo tše dingwe—mohlomongwe ka go diriša megala ya cellular, di-computer goba metšhene e mengwe ya sebjale-bjale. Eupša nagana ka Jesu, yo a ilego a makatša barutiši bao ba nago le phihlelo ka “kwešišo ya gagwe le dikarabo tša gagwe.” Mohlomongwe o ka dumela gore o tseba mo gonyenyane ge o bapetšwa le yena. Lega go le bjalo, Jesu o be a e-kwa batswadi ba gagwe. Se ga se nape se bolela gore o be a dumelelana le diphetho tša bona ka mehla. Lega go le bjalo, o ile “a tšwela pele a ikokobeleditše bona”—nywageng ka moka ya ge a be a le mahlalagading. O nagana gore o ka ithuta’ng mohlaleng  wa gagwe?—Doiteronomio 5:16, 29.

Go kwa ke Tlhohlo

12. Go kwa go ka šireletša bophelo bja gago bjang?

¹² Ga se ka mehla go kwa go lego bonolo, go etša ge go bontšhitšwe nywageng e mmalwa e fetilego ge banenyana ba babedi ba be ba le kgaufsi le go kgabaganya mmila wa lephefo wo o nago le methaladi e tshelelago go e-na le go o kgabaganya ka leporogo la basepela-ka-dinao. Ba ile ba kgothaletša mogwera wa bona yo a bego a e-ya go kgabaganya tsela ka leporogo la basepela-ka-dinao gore: “Ao hle John. Na ga o nyake go sepela le rena?” Ge a be a dika-dika, ngwanenyana yo mongwe o ile a mo kwera ka gore: “O lefšega!” Le ge John a be a sa boife, o itše: “Ke swanetše go kwa mma.” Ka moragonyana ge a be a sepela leporogong la basepela-ka-dinao o ile a kwa go lla dithaere gomme a lebelela kua fase, a bona banenyana bale ba thutšwe ke koloi. Ngwanenyana yo mongwe o ile a hwa, gomme yo mongwe o be a gobetše o šoro mo a ilego a swanelwa ke go kgaolwa leoto. Mmago banenyana ba, yo a bego a ba boditše gore ba diriše leporogo la basepela-ka-dinao o ile a botša mmago John ka morago gore: “Ke duma ge nkabe ba ile ba kwa go swana le morwa wa gago.”—Baefeso 6:1.

13. (a) Ke ka baka la’ng o swanetše go kwa batswadi ba gago? (b) Ke neng mo go swanetšego gore ngwana a se ke a dira seo batswadi ba rego a se dire?

¹³ Ke ka baka la’ng Modimo a re: “Bana, kwang batswadi ba lena”? Ge le e-kwa batswadi ba lena, le kwa Modimo. Ka ntle le moo, batswadi ba gago ba na le phihlelo go go feta. Ka mohlala, nywageng e mehlano feela pele ga ge go ka direga kotsi yeo e boletšwego ka mo godimo, mmago John o be a e-na le mogwera yo ngwana wa gagwe a ilego a hwa ge a be a leka go kgabaganya tsela yona yeo ya lephefo! Ke therešo gore ga se ka mehla go ka bago bonolo go kwa batswadi ba gago, eupša Modimo o re o swanetše go dira bjalo. Ka lehlakoreng le lengwe, ge batswadi ba gago—goba batho ba bangwe—ba go botša gore o bolele maaka, o utswe goba gore o dire selo le ge e le sefe seo se sa amogelwego ke Modimo, o swanetše “go kwa Modimo e le mmuši go e-na le batho.” Ke ka baka leo Beibele ka morago ga go bolela gore “kwang batswadi ba lena” e oketšago ka gore “boteeng le Morena.” Se se akaretša go kwa batswadi ba gago dilong ka moka tšeo di sepedišanago le melao ya Modimo.—Ditiro 5:29.

14. Ke ka baka la’ng go kwa go le bonolo go motho yo a phethagetšego, lega go le bjalo ke ka baka la’ng a swanetše go ithuta gona?

¹⁴ Na o nagana gore go be go tla ba bonolo ka mehla go kwa batswadi ba gago ge nkabe o phethagetše—ke gore, go ba “yo a sa šilafalago, yo a arogilego go badiradibe,” go etša ge Jesu a be a le bjalo? (Baheberu 7:26) Ge nkabe o phethagetše, o be o ka se be le tshekamelo ya go dira bobe, go swana le kamoo o bo dirago ka gona ga bjale. (Genesi 8:21; Psalme 51:5) Lega  go le bjalo, gaešita le Jesu o ile a swanelwa ke go ithuta dithuto mabapi le go kwa. Beibele e re: “Gaešita le ge [Jesu] e be e le Morwa, o ithutile go kwa dilong tšeo a tlaišegilego ka tšona.” (Baheberu 5:8) Tlaišego e ile ya thuša Jesu bjang gore a ithute go kwa, e lego thuto yeo a sa kago a ithuta yona legodimong?

15, 16. Jesu o ithutile go kwa ka tsela efe?

¹⁵ Ka tlhahlo ya Jehofa, Josefa le Maria ba ile ba šireletša Jesu dikotsing ge e be e sa le ngwana. (Mateo 2:7-23) Lega go le bjalo, mafelelong Modimo o ile a tloša tšhireletšo ya mohlolo go Jesu. Go tlaišega ga Jesu monaganong le mmeleng e bile mo gogolo mo Beibele e bolelago gore “o lopile le go kgopela . . . ka megoo e matla le megokgo.” (Baheberu 5:7) Se se diregile neng?

¹⁶ Ka go lebanya, se diregile diiring tša mafelelo tša bophelo bja Jesu bja lefaseng ge Sathane a be a dira boiteko bjo a ka bo kgonago e le gore a senye potego ya Gagwe. Go molaleng gore Jesu o be a tlaišwa ke dikgopolo tša kamoo lehu la gagwe bjalo ka yo go bego go naganwa gore ke modiradibe, le bego le tla nea Tatagwe botumo bjo bobe mo e lego gore ge “a tšwela pele a rapela [serapeng sa Getsemane] kudumela ya gagwe ya ba bjalo ka marothi a madi a rothela fase.” Diiring tše sego kae ka morago, mohuta wa lehu la gagwe koteng ya tlhokofatšo o be o le bohloko mo Jesu a ilego a lla “ka megoo e matla le megokgo.” (Luka 22:42-44; Mareka 15:34) Ka gona, o “ithutile go kwa dilong tšeo a tlaišegilego ka tšona” gomme ka go rialo, a thabiša pelo ya Tatagwe. Ga bjale Jesu o legodimong, gomme o kwa bohloko bjo re bo kwago ge ka mehla re katanela go ba bao ba kwago.—Diema 27:11; Baheberu 2:18; 4:15.

Go Ithuta go kwa

17. Re swanetše go lebelela go hwetša tayo bjang?

¹⁷ Ge tatago le mmago ba go laya, seo se bontšha gore ba nyaka gore dilo di go sepelele gabotse e bile ba a go rata. Beibele e botšiša ka gore: “Ke morwa ofe yo tatagwe a sa mo layego?” Na e be e ka se be mo go nyamišago ge batswadi ba gago ba sa go rate ka mo go lekanego gore ba iphe nako le go dira maiteko a go go phošolla? Ka mo go swanago, Jehofa o a go phošolla ka gobane o a go rata. “Ke therešo gore ga go na tayo yeo mo nakong ye e bonagalago e thabiša, eupša e bohloko; lega go le bjalo ka morago ga moo go bao ba tlwaeditšwego ka yona e tšweletša seenywa sa khutšo, e lego toko.”—Baheberu 12:7-11.

18. (a) Tayo e lerato ke bohlatse bja eng? (b) O bone batho ba bopša ka ditsela dife tše dibotse ka tayo e bjalo?

¹⁸ Kgoši ya Isiraele ya bogologolo yeo Jesu a boletšego ka yona gore e bohlale kudu e boletše ka go nyakega ga phošollo e lerato ya batswadi. Salomo o ngwadile gore: “Mo-hlokiša-ngwana-kxati ó mo hloile; e a mo rataxo ó tsoxêla xo mo laya.” Salomo o ile a ba a bolela gore motho yo a phošollwago ka tsela e lerato o efošwa moleteng wa lehu. (Diema 13:24; 23:13, 14; Mateo 12:42) Mosadi yo mongwe wa Mokriste o gopola gore ge a be a itshwara gampe bjaneng bja gagwe dibokeng tša Bokriste, tatagwe o be a mmotša gore o tla mo lokiša ge ba fihla gae. Ga bjale o gopola tatagwe ka lerato ge a ile a mo nea tayo e lerato yeo e ilego ya bopa bophelo bja gagwe ka tsela e botse.

19. Ke ka baka la’ng o swanetše go kwa batswadi ba gago ka mo go kgethegilego?

¹⁹ Ge e ba o e-na le batswadi bao ba go ratago ka mo go lekanego mo ba fetšago nako le go dira maiteko a go go laya ka tsela e lerato, thaba. Ba kwe, go etša ge Morena Jesu Kriste a ile a kwa batswadi ba gagwe, Josefa le Maria. Eupša ba kwe kudu ka gobane Tatago wa legodimong, Jehofa Modimo, o re o dire bjalo. Ka go rialo o tla holega, gomme dilo ‘di tla go sepelela gabotse e bile o tla phela galelele mo lefaseng.’—Baefeso 6:2, 3.

[Mongwalo wa ka tlase]

O be o tla Araba Bjang?

• Bana ba ka holega bjang ge ba e-kwa batswadi ba bona?

• Bjalo ka ngwana, Jesu o beile mohlala bjang ka go kwa batswadi ba gagwe?

• Jesu o ithutile go kwa bjang?

[Dipotšišo tša Thuto]

[Seswantšho go letlakala 24]

Jesu wa nywaga e 12 o be a tseba Mangwalo gabotse

[Seswantšho go letlakala 26]

Jesu o ile a ithuta bjang go kwa ka tlaišego?